الضابط الغيور والعنيدة

البارت 8

ولا تنفع رجعتك رجعت التابوت

يرد مچفي اعلى وجهه وابد ماينهاب

**

نبأ : ركضت بسرعة لغرفة خالة ولكيتها طالعة من الحمام وواكعة
تقربت عليها بسرعة وكلت بخوف : ها خالة شبيج ؟!
لزمت بأيدي وكالت : يمة نبأ ساعديني مداكدر اكوم على رجلي
رفعتها بسرعة ومشيتها على كيف وصلتها لفراشها وكعدتها عالجرباية
دنكت على رجلها وكلت : بله خن اشوفها خالة
اضن ملتوية
وبس لزمته هي تأذت وصاحت ..
نبأ : شلون هيج صار خالة ..شلون وكعتي

أم ياسر : ماعرف بنتي ..اتوضيت مثل كل مرة وطلعت ومحس على نفسي اله افترت بيه الأرض ووكعت صدعت واجتني دوخة فجئة

نبأ : الحمدلله هيج ولا ضرب راسج بالحايط لو الباب اني هسة اجيبلج مرهم مال اعصاب واخليلها

ام ياسر : ماشي بنتي ..وين زاهر ؟!

صفنت شوية اكللها لو لا بس اخاف يضل بالها يمه
كلت : هو دز عسل لأبوها وبعده مرجع

ام ياسر : ليش من شوكت راح ؟!

نبأ : مصارله وقت تقريبآ ساعة بس

ام ياسر : ها..الحمدلله ..لعد انتي هم اتصلي بي واتأكدي منه راجع لو بعده

نبأ : ان شاء الله ..بس هسة لازم اعالج رجلج أول

طلعت بسرعة واني افكر شأخرهم هيج ..قررت اتصل بعسل مرة الخ قبل لا ارجع لخالة ..ونفس الشيء الموبايل يدك وهي مترد ..ومرات مشغول
استغفرت وكلت بلكت همة جايين بالطريق بس عسل ليش مترد ؟!
معقولة الموبايل مو يمها ؟!
عفت الموبايل وأخذت العصارة ورجعت وقبل لا اوصل دك الموبايل ..
رجعت بسرعة واني عبالي هي عسل ..بس شفته ياسر
استغربت ..ياسر اذا يريد يتصل اغلب الأحيان على رقم البيت
رفعته وكلت : الو ..ها خوية شلونك ؟!

ياسر : هلا نبأ اني الحمدلله ..شلونكم انتم ؟!

نبأ : الحمدلله ..الله يسلمك ..تفضل اخويه

ياسر : بس اريد اسألج عن عسل اذا يمج انطيها الموبايل لأن داتصل بيها وهي مترد

نبأ : لا والله ياسر هي مو يمي راحت لأبوها ليش متصلت بيك ؟!

ياسر : اي اتصلت وكالت همة هسة رايحين للمستشفى كالت شوية واتصل وهسة صارلي فوك الساعة منتضر وهي ماكو واني اتصل بيها مترد لو يطلع مشغول

نبأ : ماعرف ..اني هماتين اتصلت بيها وماكو وزاهر ناسي الموبايل بالبيت

ياسر : ماشي ..اذا رجعوا لو اتصلوا كليلي ..

نبأ : ان شاء الله صار اخوية

ياسر : سلميلي على امي ..يلا مع السلامة

نبأ : يوصل ان شاء الله ..الله وياك

**

عسل : بعد ما دخلوا الدكاترة لبابا وخلوله شوية علاجات وأوكسجين الحمدلله استقرت حالته وكالوا لازم نتركه يرتاح هسة
وذاك الرجال متركنه ضل ويانه ولدرجة كال اذ نريد يضل هو وياه الليلة