في المنفى

الجزء السابع

🍀..
"راحيل"..
توسعوا عيون صالح وهو يشوف للشخص اللي ينادي فراحيل وهو مش مصدق..
اما راحيل اللي كانت مصدومه بقوة بعد شافت ملامح وجه صالح..
التفتت ببطء وشافت اللي ينادي فيها..
وبصوت يدوب طالع قالت..
"خويا..مفيد!"
قعد مفيد واقف بعيد عليها بمسافه وهو يشوفلها بعيون مليانه دموع حزن..
وهي تشبحله ودموعها تنزل سيل وهي مشتاقتله شوق كبير لايوصف..وخايفه من جيته وردة فعله..
ردة فعله اللي كانت عكس المتوقع بالنسبه ليها بعد كل اللي صار..
جاها طول بخطوات سريعه...
وصل فيها وخداها في حضنه..وراحيل ماصدقت..
ضماته بقوة وانهارت بالبكي في حضن خوها...
وصالح تباعد عليهم شويه ودموعه ينزلوا من عيونه ويمسح فيهم..
مفيد وهو يحضن فيها حس بشي مضايقه بعدها شويه وقعد شادها وشاف لبطنها..
هي مررت نظرها عليه وع بطنها...
شبحلها بعيونه المدمعه وعقد حواجبه..
وهي تشوفله بحزن وخوف..
شويه ارتسمت ع وجهه ابتسامه وهو يقول:كبرتي يادعوة..
ضحكت راحيل
وضحك مفيد وقرب منها وباس ع راسها وهو مغمض عيونه وهي كذلك مشتاقتله هلبه وشمت عليه ريحة الغوالي
بوها وأمها..
🌿🌿🌿🌿
واقف هو والعم صالح تحت وحده من الشجر ويشوفوا لراحيل ومفيد المقعمزين حدا بعضهم في المقعد..
مصطفى:مانعرفاش خوها اني ومانعرفش طباعه كانهم زي بوه ولا لا..
صالح:مفيد متفهم هلبه ومسالم ومتواضع من صغره..
مصطفى:لكن حسيته مش طايقني..
صالح شبحله وقال:سلم عليك سلام كويس..
مصطفى:ايه..لكن واضح ياعم صالح مش متقبلني..
تنهد صالح وقال:مفروض تكون متوقع الحاجه هادي..
ابتسم بتهكم وقعد ساكت..
اما صالح فرجع يشوف لمفيد وراحيل..
🌷مفيد:يعني انتي راضيه عن حياتك ومقتنعه بيها..
راحيل بإبتسامه:ايه يامفيد والله العظيم..
تنهد مفيد وقال:المهم انتي راضيه ومرتاحه هدا بس اللي يهمني..
راحيل :باهي خليك مني وخبرني عنك شن سر الجيه المفاجئة..
مفيد ابتسم وقال:خوك قرر يخش القفص الذهبي..
راحيل:ههههههه..
مفيد برفعة حواجب:علاش تضحكي؟
راحيل بضحكه:مش قصدي بس مش عارفه علاش استغربت ديما عندي انت متاع قرايه وبس..
ابتسم مفيد وقعد ساكت وهو يشوفلها..
راحيل ابتسمت وقالت:باهي في وحده في بالك ولاتبي امي تخطبلك..
شبح القدام بعدين حك رقبته من الخلف وقال:لاهو في وحده فبالي..بنيه طرابلسيه اخت وليد يقرا معاي..
راحيل:وين رايها؟
مفيد بإبتسامه:مرة صاحبي جوه ماليه وعزمني ع الغدي وطبعا هما عيله هكي جوهم عادي منفتحين شويه تغدينا كلنا جميع وريت البنيه وتعرفت عليها وعجبتني..مثقفه وعقلها كبير وراقيه..
راحيل:يعني شبهك..
ضحك وشبحلها وهو يقول:جديات اني هكي؟!
راحيل بإبتسامه؛ومش هكي بس وخفيف دم وراجل وقنين زي الغزال غير عويناتك الخضر سادات..
ضحك مفيد وضمها وباس راسها وهي تضحك...
🍀قعد مفيد مع اخته ساعتين وروح ع قد مادارت فيه بش يقعد يتغدا معاهم ماباش وقال امه تراجي فيه تبيه يتغدا معاها وهي بعتت معاه سلام حار لأمها وودعت خوها وعيونها دمع.
🌿🌿🌿🌿
الساعه 3:30 بعد الظهر..
واقفين ع الحوض يغسلوا في الماعين..
مصطفى وهو يمصمص؛يعني مروح بش يتزوج..
راحيل وهي تكد:إيه..
مصطفى سكت وكمل شغله..
فجاه..
طلقت راحيل الليفه وهي تفنص وحطت يدها بطنها..
مصطفى شبحلها بخوف وقال:خيرك!!!
راحيل شبحتله وقالت؛يتحرك..
ضحك مصطفى بذهول وطبس حط راسه ع بطنها بعدين قال بضحكه:والله حق توا حسيت بيه..
وراحيل ضحك..
وقف مصطفى ع حيله وشد ايديها وقال:تعالي هني تعالي..
راحيل بضحكه استغراب:خيرك!؟
مصطفى قعمزها ع كرسي وقال؛قعمزي معاش تحركي شي..
راحيل:هههه..اياه عاد ياصطوفه..
ومصطفى مشي للماعين قعد يغسل وراحيل تشبحله وتتأمل فيه بإبتسامه..
🍀🍀🍀🍀
في حوش اهلها..
في الصالون
مفيد:كان تشوفيها يام كيف واقفه في الأرض وكيف لابسه هداكا القومبالي ورابطه محرمتها تقولي فلاحه ليها سنين وسنين..
جازيه بدموع:ياناري بنيتي..
مفيد:يام بنتك مرتاحه وراضيه وباين ع راجلها راجل كويس ومريحها..
مسحت جازيه دموعها وقالت؛هدا مانبي اني نبيها تكون مرتاحه حتى لو قعدت عمري كله مانشوفش فيها..
حط مفيد يده ع يد امه وقال:ماحال يدوم يما وسيوره القلوب تلين والمية ترجع لمجاريها..
الجازيه:يااارب..
مفيد خبط يد امه خبطه خفيفه وقال بضحكه:وهي توا خليك في موضوعي وقوليلي امتى بتفتحيه مع البي الوالد.
ابتسمت جازيه وقالت:مامستعجل..
ضحك مفيد..
وبعيد عليهم فم الصالون كان عياد مدرق ويسمع في دوتهم عن راحيل ودموعه تنزل وهو يمسح فيهم وقلبه ارتاح شويه عليها...
🍀🍀🍀🍀
وتمر الأيام...
ويمشوا عياد وجازيه لطرابلس بش يخطبوا البنيه اللي يبيها مفيد..
واهل البنيه"منيره" رحبوا بيهم ترحيب حلو هلبه..
عياد والجازيه عجبتهم العيله وكذلك عيلة البنيه عجبوهم واتفقوا في نفس اليوم ع كل شي..
ع مايخص العرس..
كان مفيد واخد اجازه شهرين بس بيتزوج فيهم ويولي لبريطانيا..
وهما اتفقوا ان العرس يكون فهالشهرين..
وفالشهرين..
كان مصطفى يقرا بجد لأمتحان القبول اللي يعتبر اصعب من امتحان الشهاده الثانويه نفسه..
كانت مرته موفرتله الجو المناسب للقرايه ومخلياته بعيد عن الخدمه
وتحملت مسؤولية الخدمه في الارض هي وصالح ومصباح وكذلك ام الخير مرة مرة تجي تعاونها..
اما خوها ماجاهاش بكل من بعد هداكا اليوم لأن بوه منعه من زيارتها والكلام معاها...
🍀🍀🍀🍀
في اسبوع عرس مفيد..
كان عرس المدينه كلها تحكي بيه مش بس منطقتهم..
عرس كبير سبع أيام وسبع ليالي..
في هداكا الأسبوع..
كانت راحيل تهرب من حزنها وضيق قلبها اللي خوها بيعرس وهي مش حاضرة عرسه بإهتمامها بالأرض وراجلها...
وفي يوم الدخول..
الساعه 7:00مساءا..
كان مصطفى غاطس في القرايه خلاص امتحان القبول يفصله عنه يوم واحد بس..
راحيل واقفه في باب الدار تشبحله شويه وقالت:صطوفه ماشيه لحوش خالتي ام الخير ساعه وجايه..
مصطفى وهو مركز في قرايته:بري بري..
هي مشت طول لباب الحوش فتحاته وطلعت وصكراته وراها..
كذبت عليه..ماكانتش ماشيه لحوش ام الخير..
كانت تمشي بخطوات سريعه بطريقها للسانيه..
وين وصلت غادي..
وقفت ورا شجره بعيده شويه عن السانيه وهي تشوف في مظاهر الفرح سرب الضي..وتسمع اصوات الزغاريط والنوبه
اللي كانت ماشيه مع الموكب اللي بيجيب العروس من طرابلس..
طلعوا خوها وبوها وامها وناس من الأقارب وبدوا يركبوا السيارات..
وامه ونساوين العيله يزغردوا..
والنوبه تخبط...
شويه ووقفت وركبوا حتى هما سيارتهم وبدوا يتحركوا ورا بعض والكلاكسات قالبه الدنيا..
قعدت معاهم بعيونها اللي دموعهم تنهمر انهمار لين ادرقوا..
بعدين لفت ومشت وهي تبكي بالعبرة...
تمشي وتمشي ورجليها رفعوها لحوش مصباح..
لاقتها ام الخير اللي كانت طالعه توكل في السعي وين رتها فهالحاله عرفت خيرها..
وجت طول شدتها وقالت:تعالي بنيتي تعالي خشي داخل..
🌾🌾🌾🌾
عمري ماتخيلت خوي الكبير يتزوج واني مانحضرش عرسه
مش قادره نصدق ياخالتي ام الخير..
ام الخير تمسح ع ذراعها وهي تقول بحزن:الله غالب بنتي هدا اللي قدره ربي..
راحيل حطت يدها ع فمها وقعدت تبكي بحرقه بعدين قالت:بيني وبينك...ولايوم تخيلت اني نتزوج هكي بلا عرس بلا فرحه...اني والله مانادمه اني خديت مصطفى..بس تمنيت بابا ماكانش هكي تفكيره..ماكانش هكي عقله..
وحطت ايديها ع وجهها وانهارت بالبكي وام الخير ضمتها ودموعها فعيونها وهي تقول:خلاص بنيتي خلاص راك حامل مش باهي ليك..
وراحيل شاده فيها بقوة وتبكي...
بعد حوالي نص ساعه..هدت راحيل شويه وقعدت بس ساكته وسرحانه في الفراغ..
وام الخير في الكوجينه اطيب في العشي..
ع طقة باب الحوش..
ناضت راحيل بالسيف ومشت للكوجينه لاقت ام الخير طالعه بتفتحه..
وقفتها وقالت:هدا مصطفى..اسمعي خالتي اني بنخش الحمام انتي قوليله راحيل تعبت شويه ورقدت وتوا كيف ناضت وخشت الحمام..
ام الخير هزت راسها بإيجاب وعلى وجهها ملامح الضيق..
راحيل طول مشت للحمام
وام الخير مشت للباب اللي قاعد يطق وفتحاته..
لقاته مصطفى
مصطفى:كيف حالك خالتي
ام الخير:الحمدلله كيف حالك انت..
مصطفى:الحمد لله..بالله قولي لراحيل هيا..
ام الخير:خش باهي عمك مصباح قريب يجي..
مصطفى:لالا والله مافيها كيف نبي نرقد بكري غدوة ان شاء الله عندي مشوار ضروري..
ام الخير:براحتك ولدي..غير راجيها شويه هي كانت راقده وتوا كيف ناضت خشت للحمام ..
مصطفى:باهي بالله كلميها تستعجل..
ام الخير:باهي..ومشت خشت داخل..
شويه..
وطلعت راحيل وقالت بصوت مبحوح:خيرك ماخشتيش.
مصطفى:غدوة عندي مشوار ضروري نستيه للراجل اللي بيرفعني لطرابلس.
راحيل:ايه صح نسيت..
مصطفى:هي تعالي..شد يدها وقعد يساعد فيها ع المشي..
وماركزش ع حالتها لأن باله كان مشغول بس بالإمتحان..
وهي هدا اللي تبيه ماينتبهش لحالتها هادي ويعرف خيرها ويتنكد..
وهادي راحيل..تحب من وسط قلبها وحبها ع صغر سنها الا انه كبير هلبه زي كبر قلبها...
انسانه زيها طيبه وصافيه هلبه ونقيه طبيعي جدا لما تحب حبها يكون كبير...
🍀🍀🍀🍀
وجي اليوم اللي بيمشي فيه مصطفى لطرابلس..
واقف في الباب ومعاه العم صالح..
مصطفى:ردي بالك ع روحك راحيل ماتجهديش نفسك ارجوك..
راحيل:حاضر اطمن..توا بس فكر في امتحانك بس..
مصطفى ابتسم وقال:ان شاء الله..قرب وباس ع راسها..
بعدين التفت للعم صالح وقال:مانوصيكش..
صالح؛اكيد ياولدي مانتوصاش ع بنتي..
ابتسمت راحيل بحب..
مصطفى مشي ومعاه صالح..
وراحيل واقفه تشبحلهم ودموعها فعيونها ولما ادرقوا عنها دعت من قلبها...
"يارب افتحها عليه ونوله اللي يبيه ياكريم ياربي"..
🍀🍀🍀🍀🍀
ووصل مصطفى لطرابلس اللي عمره في حياته ماجاها..
طرابلس العاصمه..
البلاد فوسط بلاد..
عالم واسع ومختلف تماما عن العالم اللي كان عايش فيه..
حس برهبه وهو يتفرج عليها وبذهول في نفس الوقت..
وهدا شي طبيعي لشخص اول مرة يطلع من مدينه داخليه كل شي فيها بسيط..لمدينه كبيرة ومش اي مدينه عاصمة البلاد...
وصلوا هو والراجل للحوش اللي بيقعدوا فيه..
كان حوش خوه فاضي..قعد فيه هو وياه..
بعد ارتاحوا من تعب الطريق وتغدوا ورقدوا شويه..
توكل الراجل يشوف اشغاله..
اما مصطفى فقعمز ع كتاباته وبدي يقرا...
🌿🌿🌿🌿
مقعمزه حدا جارتها اللي دير في عالة الشاهي..كانت سرحانه وتخمم..
ام الخير وهي تشوفلها:رحيله..
شبحتلها وقالت:نعم..
ام الخير:خلاص بنتي معاش تخممي فيه عمك صالح طمنك عليه..
راحيل:نفكر كيف بيكون امتحانه غدوة غادي فطرابلس صعبين قالت كوثر مرت حاتم اللي يقرا غادي..
ام الخير:وصطوفه ماشاء الله عليه عنده دماغ مايصعب عليه شي..
راحيل تنهدت وقالت:ربي يسهلها عليه يارب..
ام الخير:اللهم آمين..هي خودي الطويسه هادي..
ابتسمت راحيل وخدت الطاسه من ام الخير وبدت تشرب فيها...
🍀🍀🍀🍀
وجي تاني يوم..
ومصطفى مشي لجامعة طرابلس اللي زاد انبهر بيها لما خشلها..
وخش لقاعة الأمتحان اللي كانت كبيره ومليانه بالطلبه والطالبات..
قعمز في مكانه وكان في قمة التوتر...
ولما جاته ورقة الأسئله توتره زاد..
لكن بعد قري سورة الفاتحه سبع مرات في سره..
خف توتره وبدي يحل...
ومر وقت الأمتحان وتم..
وكان زي العاده مصطفى راضي عن نفسه تمام الرضى وفرحان..
لما طلع من الجامعه كان مش عارف وين يمشي ولاشن يدير..
قعمز ع واحد من الكراسي وقعد يراجي في الراجل..
حوالي نص ساعه وجاه..
......
في السيارة..
الراجل:هاه الامور تمام؟
مصطفى بإبتسامه:الحمد لله تمام التمام..
الراجل:كويس كويس بالنجاح ان شاء الله..
مصطفى:ان شاء الله تسلم..
الراجل؛شنو مصر تروح غدوة؟
مصطفى:ايه مانقدرش نعطل ع العويله..
الراجل:معناها شن رايك نمشوا للسوق ندهوروا شويه واهو بالمره نعرفك ع اهم مناطق طرابلس..
مصطفى بضحكه:مش قايل لا..
الراجل ضحك وقال:هي مالا نتوكلوا ع الله..
🌾🌾🌾🌾
في البلاد..
الساعه 4:00 قبل العصر..
كان العم صالح راكب الطرطوري ويحرث في الأرض..
وراحيل واقفه تتفرج عليه..
شويه وقف..
وراحيل مشتله..
وصلت فيه وشدت فالعجله وقالت:نبي نتعلم نسوقه..
ضحك صالح..
راحيل؛نحكي جد راهو..
صالح بضحكه؛ياودي باهي بعدين..
راحيل ابتسمت وقالت:تعرف فرحانه اللي مصطفى جاوب في الامتحان الحمد لله..
صالح:ايه الحمد لله..بس توا راحيل بنتي لازم تستعدي للمرحلة الجديده في حياة راجلك بعد يقبلوه ويمشي يقرا في طرابلس..
راحيل:زيني زي هلبه نساوين هني عايشين نفس الحاله وامورهم ماشيه..
صالح هز راسه وقال:كويس..
تنهدت راحيل وسكتت..
بعدين..فجأة..
حست بوجع..حطت يدها ع بطنها..
العم صالح ركز عليها وقال؛راحيل بنتي خيرك..
راحيل بتعب:مش عارفه شن جاني فجأة!..
صالح بخوف؛راحيل وقته توا قصدك انتي توا تجيبي..
راحيل بوجع:ليا اسبوعين بس خاشه التاسع..ااااي..
صالح بفجعه:راحيل!..
وبدت راحيل تعيط وتتوجع..
وصالح فرفش مسكين ماعرفش شن يدير..
ورب العالمين جابله مصباح في الوقت المناسب بسيارته..
تساعدوا الزوز وركبوا راحيل السياره..
وتحرك بيها مصباح لحوشه رفع مرته ام الخير معاهم وتوجهوا للمستشفى..
♦️في طرابلس..
كان مصطفى في سوق مشهور في طرابلس..
خدي حاجات للبيبي..بعدين مشي لمكان يبيع في ملابس نساوين..ماعرفش شن ياخد لراحيل من حاجه مميزة..
شويه عيونه جو ع شال احمر مخدوم باليد يلتبس ع الكتاف عجبه هلبه وتخيل راحيل لابساته..
طول خداه بدون تردد..
..........
الساعه 6:00مساءا..
ام الخير؛الحمد لله ياربي الحمد لله..
صالح؛يعني اكيد يادكتورة حالها وحال الوليد كويس؟
الدكتورة:ايه الحمد لله بصحة تامه والوليد ماشاء الله عليه..
ام الخير:اللهم صل ع النبي..
الدكتورة:وين بوه..
صالح:بوه في طرابلس عنده امتحان قبول للجامعه اليوم داره..
الدكتورة:اها باهي..مالا اني نستأذن..
صالح:معاك الإذن..
ومشت الدكتورة..
ام الخير:الحمد لله رب العالمين..
صالح؛يافرحة مصطفى غدوة لما يروح ويعرف..
ام الخير بإبتسامه؛ايه...
🍀🍀🍀🍀
وفعلا فرحة مصطفى كانت لاتوصف لما روح وعرف من العم صالح ومشي طول شاف ولده ومرته..
راحيل وهي مقعمزة ع السرير:ربي هكي كاتب يامصطفى المهم روحت ولقيت حالنا باهي..
مصطفى شد يدها وقال:ايه الحمد لله..باهي توا قوليلي شن تبي تسميه؟
قعدت راحيل ساكته وهي تشوفله بعيون مليانه دموع..
مصطفى عقد حواجبه وقال:خيرك رحيله؟
راحيل بلعت ريقها وقالت؛نبي نسميه..عياد..
مصطفى رفع حواجبه..بعدين نزلهم وقال:باهي زي ماتبي..
راحيل؛مش زعلان..
ابتسم وقال:تس تس..
وهي ابتسمتله من قبلها..
🍀🍀🍀🍀🍀
بعد اسبوع..
طلعت صورة من تحت فراشيتها وقالت؛هدا هو..
خدت جازيه الصورة بإيديها اللي يرعشوا ودموعها ينزلوا..
كانت صورة حفيدها خدوهاله في اول ايام ولادته..
جازيه بنبرة باكيه:ورحيله شن حالها؟
ام الخير؛حالها باهي ياجازيه ماناقصتها حاجه وراجلها مساعدها..
جازيه هزت راسها وقالت:باهي عطيها اللي جبتهولك وقوليلها من امك وقوليلها راهي فرحانه بوليدك..عقدت حواجبها وقالت...شن سماته؟
ابتسمت ام الخير وقالت:عياد..
جازيه ضمت شواربها اللي كانوا يرجفوا داخل بألم ودموعها ينهمروا انهمار...
🌾🌾🌾🌾
ياعمري ياماما..
وقعدت تحضن في الحاجات اللي جابتهوملها ام الخير من امها..
ام الخير:مال كان تشوفيها منين قتلها سماته عياد قريب طارت من الفرحه..
راحيل رشفت وقالت:اني نبي بابا يعرف بالك قلبه يلين..
ام الخير:إن شاء الله يابنتي ان شاء الله...
والكلام هدا كان يسمع فيه مصطفى وهو واقف حدا باب الدار..
وجعه قلبه ع راحيل..وحس بالذنب واضايق لأنه فكر ان راحيل ممكن تكون نادمه...
🍀🍀🍀🍀
الساعه الواحده ليلا...
راقدين ع السرير وبيناتهم ولدهم..
والزوز كانوا فايقين يشبحوا للسقف..
كان الهدوء سائد..لعند ماقطعه مصطفى..
مصطفى:راحيل..
راحيل:اممم..
مصطفى:بنسألك سؤال جاوبيني بصدق وصراحه..
راحيل:اسأل..
مصطفى:راحيل..انتي نادمه؟
راحيل:على شنو؟
مصطفى:انتي فاهمه قصدي راحيل..
راحيل شبحتله وقال:علاش سألت السؤال هدا؟
مصطفى شبحلها وقال:من لما جبتي واني ملاحظك حزينه ومضايقه..حسيتك ندمتي ياراحيل..
راحيل:لا والله العظيم لا يامصطفى نهائي ولايوم ندمت من لما خديتك لتوا ولامرة حسيت بالندم...
مصطفى:متأكده..
راحيل بإبتسامه؛اكثر شي متأكده منه فحياتي اني مش نادمه اللي خديتك..
ابتسم مصطفى وقال:واني مستحيل نخليك تندمي..
قعدوا يتأملوا في عيون بعض وهما مبتسمين..
قطع عليهم وليدهم لما بدي يعيط..
راحيل ناضت قعمزت:عويده توا كيف رقدت عاد..
ومصطفى يتفرج عليهم ويضحك..
🍀🍀🍀🍀🍀🍀🍀🍀🍀🍀🍀
وتمر الأيام...
يوم ورا يوم ويمر شهر...
وطلعت نتيجة امتحان القبول...
واكيد مصطفى نجح وبتفوق..وانقبل في كلية الطب..
يومها زغاريد راحيل قلبوا الدنيا قلب فرحت قريب طارت من الفرح..
حتى اغلب اهل المنطقه فرحوا لمصطفى وزادت كبرت قيمته بالنسبه ليهم لأن الناس زمان ولتوا اللي يخش الطب يعطوه قيمة كبيرة..
واكيد مادام الناس سمعت وصل الخبر لعياد..
وعياد كان من داخله مرتاح..هو مايبيش بنته تندم هدا كل همه ومادام راجلها وصل لهالدرجه من النجاح برغم صعوبة الحياة فهدا يعني ان اختيارها كان صح...
🍀🍀🍀🍀
وهكي بدي مصطفى يجهز في نفسه للمشيه لطرابلس..
شري كل شي محتاجه غادي وراحيل ساعداته وكانت تدعم فيه بكل العبارات التشجيعيه وطمن فيه عليها وعلى ولدهم لأنها لاحظت انه مش طايب عليه يمشي ويخليهم برواحهم..
🍀🍀🍀🍀
في اليوم اللي قبل يوم مشية مصطفى..
قدام البحر..
كانت واقفه لابسه الشال الأحمر اللي خداهولها..
وهو واقف جنبها..
مصطفى:ايه مش طايب عليا ياراحيل بنقعد طول الوقت نفكر فيكم..
راحيل:اطمن يامصطفى اطمن حني بين ناسنا واهلنا هني يخافوا علينا كيف ماانت تخاف علينا وبعدين انت حتجينا كل اخر اسبوع..
مصطفى شبحلها وابتسم وهو يقول:بإذن الله بعد نتخرج حنرجع نخدم هني في البلاد..
راحيل بإبتسامه:يارب..
مصطفى:ايوا ادعيلي ربي يعيني فهالسبعه سنين..
راحيل ضحكت وعقدت حواجبها وهي تقول:واااك مابعدكم..
مصطفى بضحكه:عليك تشجيع..
راحيل:ههههههه..
مصطفى رفع حاجبه وقال؛لكن هاااه قرايتك راك تنسي..
راحيل عقدت حواجبها بضحكه ممزوجه بالإنزعاج:ياودي بااهي..
ضحك مصطفى وحرك راسه يمين ويسار..
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
وجي اليوم اللي بعده..
وودع مصطفى ولده ومرته وعيلته المعنويه بعد ماوصاهم ع عياله..
وتوكل لطرابلس...
لما ركب السيارة والسيارة تحركت..
راحيل وهي قايمه ولدها في غمرها حست بشعور غريب ومش مفهوم ضايقها..لكن فسراته على انها مضايقه انه حيكون بعيد عنهم لفترة طويله..
راحيل بصوت منخفض:يارب وفقه وافتحها عليه واحفظهولنا يارب...
🍀🍀🍀🍀
ووصل مصطفى لطرابلس وطول للسكن الداخلي متاع الجامعه..
كان معاه في الزوز شباب..
خشوا التلاته مع بعض لشقتهم..
وصكر اخر واحد فيهم الباب..
واحد فيهم قال..
:هي قبل كل شي خل نتعارفوا اسمي "معروف" من الزاويه..
التاني قال بضحكه:واني محمد من جادو..
شبحوا لمصطفى وقال معروف:وانت..
ابتسم مصطفى وقال:اني مصطفى من *****
الزوز قالوا:بالجودة..
معروف:اني مسجل في كلية اللغات...
محمد:واني فالهندسه..
مصطفى:اني طب..
الزوز قالوا:اوووووو..
معروف:مش اي حد يخشها طب..
محمد:شكلك دحيح انت..
عقد مصطفى حواجبه وقال:دحيح!؟
معروف:يعني شاطر متاع قرايه فلتوز فهمتها..
ضحك مصطفى وقال:ايه فهمتها..خلاص سادنا تعارف خل نشوفوا شن النظام توا..
معروف:نظام شني!؟
مصطفى:نظام سكنتنا مع بعض كل واحد شن ليه وشن عليه..
محمد شبح لمعروف وقال؛شكله صاحبنا جديات زياده عن اللزوم..
معروف:شكله لكن هاه مش معايا اني راني مش جدي بكل..وبإبتسامه عريضه كمل يقول..اني عمي..
ضحك محمد..
ومصطفى ضحك وحرك راسه يمين ويسار...
🍀وشويه وبدوا يرتبوا حوايجهم في الدولاب وكل واحد عنده رف خاص بيه..
وبدوا يرتبوا في الحوش ويضموا ومصطفى يوجه فيهم وهو يتحرك معاهم ومعروف مرة مرة يتسهوك ومصطفى ومحمد يضحكوا...
فهداكا اليوم رقدوا بكري من التعب...
واليوم اللي بعده..
التلاته ناضوا بكري..صلوا مع بعض
ولأنهم من الاول اتفقوا ع تقسيم الشغل في الشقه..
كان اول يوم الفطور على مصطفى
وقرر يدير شكشوكه..
وهو يطيب فيها خطرت عليه اول مرة دارتله فيها راحيل شكشوكه قعد طول الوقت وهو يطيب فيها مبتسم..
🌷معروف وهو ياكل؛لاع هكي بنغيروا بنغيروا النظام...وبنخلوا التطييب شورك انت يامصطفى..
مصطفى وهو ياكل:غير..اعبى..
محمد ضحك..
معروف:مالا في دوري اني تحملوا مايجيكم تاكلوا وانتم ساكتين..
شبحوا مصطفى ومحمد لبعض بعدين شبحوله وهو طايح ياكل...
🌾🌾🌾🌾
بالشويه يارااحيل بالشويه يابنتي..
راحيل وهي تسوق فالطرطوري قالت وهي تضحك بصوت عالي:ماتخافش ياعمي صالح راني وليت سواقه..
مصباح؛هههههه..والله حق تسوق فيه مليح..
صالح:تسكت راهي تسمعك وتتحمس وادخلها في وحده من الشجر..
ومصباح يضحك..
وراحيل تسوق فالطرطوري وهي فرحانه...
🍀🍀🍀🍀
فهالوقت ..
كان مصطفى واقف حدا المدرج يراجي امتى يجي وقت اول محاضرة..
ولمي جي الوقت..
مشي للباب..
فجأة دفه واحد وخش قبله وهو يقول:اسف اسف..
مصطفى رفع حواجبه ونزلهم بعدين كمل طريقه للباب بيخش..
وصل فيه وبيخش خلاص..
كتفه انخبط بحاجه..
شاف ايمينه..
لقي بنت شقرا مش متحجبه شعرها قصير ابتسمت بإحراج وقالت:اسفه تفضل..
مصطفى يدوب شبحلها ومشي خش طول...
هي خشت بعده وقعدت تشبحله من فوق لتحت ومركزة ع لبسه قالت:قليل ذوق مفروض خلاني نخش قبله..
ومشت قعمزت حدا وحده..
:خيرك صفو قارنتيهم..
صفاء:شفتي هداكا اللي لابس كبوط زيتي..
شافت صاحبتها وين ماقالتلها:ايه خيره..
صفاء:توا اتقبينا اني وياه فم الباب تأسفتله وقتله تفضل توقعته يقولي لا خشي انتي ويحلف عليا..مشي شبحلي بغرور وخش..
ضحكت صاحبتها وقالت؛شكله من الدواخل ماعنداش جو الذوق والإتيكيت..
صفاء وهي تشوفله بإزدراء:باين..
وهما يدوا عليه ومصطفى قعمز وجت تقعميزته جنب الولد اللي دفه وخش قبله..
الشاب شبحله وقال؛مش من هني انت ولا؟
مصطفى رفع حاجبه وجاوب بدون مايشوفله؛امم.
شبحله الشاب من فوق لتحت بعدين شبح القدام وهو يحرك في راسه يمين ويسار..
شويه وخش الدكتور اللي كان يبان عليه انه من الجهابذه الكبار...
حتى خشته فيها هيبه..خلت مصطفى يعجب بيه..
الدكتور:السلام عليكم..
كلهم ردوا:وعليكم السلام...
الدكتور حط شنطته ومرر نظره عليهم وهويقول:ماشاء الله 100طالب العام هدا..وان شاء الله يكمل نفس العدد بس..
ضحكوا..
الدكتور ابتسم وقال؛طبعا اني بنعرفكم بنفسي اسمي عبدالرزاق العجيلي..عضو هيئة تدريس وكذلك رئيس قسم الطب البشري في الكليه وطبيب في احدي المستشفيات خريج كندا..
قبل مانخش في التفاصيل اللي تخص الماده اللي بنعطيها..
نبي ندردش اني وياكم شويه...
مرر نظره عليهم وقال..تعرفوا ان الطب مهنه ساميه ولا..مهنه تشبه في قيمتها قيمة العسكريه..الزوز ليهم نفس المرتبه والمقام..
يعني الطبيب ينقذ ارواح الناس والعسكري يحميها..
اهم شي لازم تتعلموه ان المهنه هادي امانه كبيره حملها ع الأكتاف ثقيل هلبه..
انك تكون السبب في شفاء مريض يذوق في العذاب من الآلام والأوجاع وانك تنقد روح اخر راهو هالشي عند الله سبحانه معناه عظيم وكبير هلبه..
نبي نسألكم شن اهم صفه لازم تكون موجوده عند الطبيب؟
صفاء:لازم يكون قوي قلب..
الدكتور:امم كويس بس مش هدا اللي نبيه..
واحد تاني قال:ذكي ..
الدكتور بضحكه؛طبعا بش في شي أهم..
مصطفى:يكون متواضع..
الدكتور اشر عليه وقال:ممتاز يا..
مصطفى:مصطفى..
الدكتور:يامصطفى..متواضع صاحب اخلاق عاليه صدره رحب..مش كان ولى دكتور معناها خلاص وصل..لالا انك لن تخرق الأرض ولن تبلغ الجبال طولا..مهنتك مش مهنه للتباهي هادي مهنه شبه مقدسه تبي منك تكون انسان قبل لتكون طبيب..
حطوا هالكلمتين فراسكم واحفظوهم كويس..
مصطفى هز راسه بإيجاب..
الشاب اللي فجنبه قال بهمس تهكما:طالب نجيب..
مصطفى شبحله...
لقاه يمسح على لحيته وهو مبتسم برفعة حاجب..
ابتسم بتهكم وغير عيونه عنه جو فعيون صفاء..
شبحتله صفاء من فوق لتحت وقلبت عيونها وشبحت القدام..
هو مط شواربه للأسفل بإزدراء بعدين ركز مع الدكتور..

....يتبع...