🍀..
راحيل:اما حفلتها جت حفله مش عاديه العرس كله حلو حلو..عاداتهم هني تهبل..
صكر الكتاب وحول نظاراته وهو يقول:طرابلس كلها حلوة يارحيله..
راحيل:ايه حلوة ماقلنا شي بس مش زي البلاد..
مصطفى:اكيد طرابلس اكبر وكل شي فيها سبل الحياة فيها افضل..
راحيل شبحتله بإبتسامه وقالت:شن تبي تقول من الاخر..
شبحلها شويه بعدين ابتسم وقال: من الآخر نبي نعيشوا هني..في طرابلس..
نزلت راحيل عيونها وع وجهها مازال ابتسامتها موجوده..
مصطفى ضم يدها بإيديه الزوز وقال:راحيل..انتي قبل قتيلي خليك ورا حلمك وماتتخلاش عنه ولا؟ واكيد مذكرة حلمي شن هو اول مرة سألتيني شن جاوبتك؟
قامت عيونها اللي كانوا مليانات حب ودموع وقالت بنفس الإبتسامه:قلت نبي نكون دكتور معروف في العالم كله..
ابتسم مصطفى وقال:ايوه..هاك مذكرة كويس والشي هدا مايتحققش لو قعدت في البلاد غادي..لكن هني فالعاصمه الفرصه اكبر يارحيله..واني الحق تعبت من التشتت انتم غادي واني هني..حتى الصغار مش واخدين عليا من بعدي عنهم..ركز بالنظر فعيونها وهو يقول بصوت هادي وحلو..رحيله نبيكم معاي معاش نبيكم تفارقوني بكل..
نزلت من عينها دمعه مسحتها وقالت وهي مبتسمه بعشق:واني والله ماحنقول لا..الحاجه اللي في مصلحتك نديرها واني راضيه من قلبي..تنهدت وكملت تقول..وين ماأنت وين ماحني..
ضحك بفرح وقربلها وباس راسها بعدين بعد وقال؛ربي مايحرمني منكم..
ابتسمت راحيل ابتسامه تخفي بيها ألمها وهي تشوف للفرحه في عيونه بقبولها طلبه..
🌿لكن بعد مانامت العيون..
قعدت عيونها هي سهرانه تذرف في الدموع..تبكي بصمت وألم وقلبها موجوع..مش عارفه كيف بتقدر ع فراق بلادها اهلها احبابها أرضها...حتى الهواء والميه والبحر..كل شي حتموت من شوقها ليه وحيوجعها فراقه..
🌾🌾🌾🌾
بعد يومين..
روح بيهم مصطفى للبلاد وولى لطرابلس..
كان عاطي راحيل اسبوع تجهز فيه نفسها والصغار وتم كل امورها غادي..
اصعب شي ع راحيل وقتها كيف بتقدر تبلغ الناس اللي تحبهم انها بترحل وبتخليهم وممكن معاش تشوفهم بكل..
واول من وقع عليه الخبر زي الصاعقه العم صالح رغم انه كان متوقع..
صالح بألم:الله غالب يابنتي الله غالب هكي ربي مقدر وبعدين هكي خيرلكم..
راحيل ببكي وهي توزع فنظرها ع الأرض:مش عارفه كيف بنقدر ناخد ع قلتكم مش عارفه..مش عارفه كيف بنكمل حياتي في مكان تاني غير هالمكان..كيف بنخلي الارض الزرع الشجر..رشفت وقالت..مش عارفه..
صالح تنهد بألم وقال:تتعودي يابنتي تتعودي زي ماتعود مصطفى قبلك اللي كان يقول مش عاجباته طرابلس ولما بنكمل بنجي هني طول..
شبحت للعم صالح وهي ترشف وتبكي لقاته حابس دموعه بقوه وهو مركز بنظره ع المقعد..
شبحت للمقعد شويه ورجعت بكت مرة تانيه..
.........
خبطت بيدها ع صدرها وقالت:بتخليني يارحيله!
راحيل بنبرة باكيه:الله غالب ياخالتي ام الخير مانقدر ندير شي وين ماراجلي وين ماني وصغاري..
ام الخير حطت يدها ع فمها وقعدت تشبح لراحيل شويه بعدين قالت بألم:مكتوب عليا نفارق احبابي بموت ولابحيي..
حولت يدها وقالت وهي خانقتها العبرة..والله بعدك لاعاد دايره جيران ولاصحاب سادني عييت..
وحطت يدها ع وجهها وانهارت بالبكي..
وراحيل ضمتها وقعدت تبكي معاها...
.........
هادي اللي كنت خايفه منها..
راحيل بدموع:حتى اني ياوريده..كنت بنقول كان قالهالي بنقول لا وبنشد فالصحيح..لكن..ماقدرتش..اني اللي شجعته يكمل قرايه اني اللي قتله برا لطرابلس..وهو ياروحي تحسيه فرحان بروحه هلبه وباللي وصله مانبيش نوقف في طريقه المهم نكون معاه وخلاص وهو يبينا معاه.
وريده بدموع:تعرفي رحيله انتي تحبي مصطفى حب عمري ماريت زيه..
ابتسمت من بين دموعها وقالت:كل دقيقه نزيد نحبه اكثر من اللي قبلها..مانيش عارفه كيف بس هدا اللي صار..مانقدرش نعيش من غيره ياوريده..
حضنتها وريده وقالت:ربي يريحك ويهنيكم يارب ويجعل فيها الخيره يارب..
راحيل وهي ضامه وريده قالت:يارب..
🌿🌿🌿🌿
بعد ودعت احبابها جي دور اهلها..
ترددت هلبه تمشي..بس بعدين استجمعت شجاعتها ومشت..
وين وصلت غادي..
طلعتلها امها بس..وبوها قعد داخل ماباش يطلع..
الجازيه ببكي وهي ضامه بنتها:مش عارفه شن هالمكتوب يابنتي..ربي يبيك بعيده علينا وكل مرة يزيد يبعد فيك..
راحيل ببكي:ماتقوليش هكي يام ربي يختار اللي فيها الخيره وهدا مكتوبي ونحمد ربي عليه سوا كنت راضيه بيه ولالا..
الجازيه زادت ضمتها وهي تبكي وقعدت ساكته..
وراحيل وهي اضم في امها كانت تشوف للحوش بحسرة وحزن..متمنيه من قلبها بوها يهديه ربي ويطلع..
🥀لكن عياد اللي اختار يختلي بنفسه وحزنه في داره وهو يبكي ع فراق حبيبة قلبه بنيته الوحيده..قعد ثابت ع كلامه وماباش يولي فيه بكل..مادام بنته اختارت تتحمل..
🍀🍀🍀🍀🍀
بعد مرور اسبوع..
"هاه شنو مانسيتوا شي"
هدا كان صوت مصطفى وهو برا الحوش يطلع في الشناطي للسيارة اللي بترفعهم..
جاه صوت راحيل من داخل وهي تقول:راجي شويه..
مشت تجري لدار النوم..
جت لصندوق كبير فتحاته
ماكان فيه شي غير حاجتين..كندرتها البيضا وكندرة مصطفى السودا اللي لبسوهم يوم الفاتحه.
تنهدت بإبتسامه وخدتهم..
وصكرت الصندوق..
وطلعت وهي شادتهم بإيديها الزوز..
مصطفى:هي اركب بابا..
عياد الصغير:حاضر..
ركب من الخلف..
صكر مصطفى الباب وفي حضنه بنته..بعدين شبح لباب الحوش شاف راحيل طالعه بالكنادر..
ضحك وقال:ايييه وين كانوا !!؟
راحيل بضحكه؛كنت داستهم..
ومشت للكوفني حطتهم ع تركينه..
وصكراته...
مصطفى:خلاص؟
تنهدت بحسرة وقالت:هيا
هو مشي ببنته فتح الباب وركب بيها..وركبت جنبه راحيل وصكرت الباب
مصطفى؛حتى عمي صالح ماباش يجي يسلم
راحيل بحزن:اني قلتلهم..مانبيش نودع حد مرة تانيه..
ابتسم ع جنب وقال:خودي مياده..
خدت منه البنيه حطتها ع حجرها..وهو شغل السيارة وتحرك طول وهو يقول:بسم الله توكلنا على الله..
راحيل في نفسها"يارب اجعل فيها الخيره يارب توكلت عليك وفوضت الامر كله ليك"..
🍀🍀🍀🍀🍀
بعد قطع مسافه طويله من البلاد للعاصمه..
وصلوا للعمارة اللي واخد فيها مصطفى شقة للإيجار..فرشها باللي يقدر عليه..
لما خشتلها راحيل وشافتها عجبتها..لكن مااستريحتش شعور الضيق والخوف اللي تحس بيهم ماخلوهاش بكل ماقدرتش تطمن ع قد ماحاولت ماقدرتش ومع هذا مابت تبين شي لمصطفى حتى بملامح الوجه..
وقعدت راحيل تتحمل في مسؤولية اختياراتها وكملت تعيش حياتها كيف ماهي..
وبدي روتينها اليومي..
تنوض الفجر..تصلي وتنوض مصطفى يصلي..
بعدين اديرله قهوته..وفطوره..وتجهزله حوايجه..
وتسقده لكليته..
وتلهى بصغارها والحوش باقي اليوم..
مر شهر وهادي حياة راحيل..كانت ممله لأبعد حد حاسه روحها فوسط هالعاصمه الكبيره كأنها اسيره..
محبوسه في شقه صغيره..بعد ماكانت تسرح في الاراضي والسانيات والطبيعه الحلوة..
كانت تشوف لمصطفى كيف منغمس في القرايه انغماس تام..
كان لما يروح يخش الدار معاش يطلع يقرا وبس..
وهي وظيفتها بس توفرله البيئه الهاديه وماتنقص عليه شي بكل..
🍀🍀🍀🍀
حمد لله ع السلامه ياعرسان..
ابتسمت صفاء:الله يسلمك..
رضا:الله يسلمك ياسيدي..اسمع رانا عابيين عليك في كل شي فاتنا..
مصطفى ضحك وقال:عارف عارف مادوروا شي..
كانت ساكته ومبتسمه تشوف لمصطفى كيف كان في قمة الاناقه والبالطو مخلي الكاريزما متاعه حلوه وطاغيه والنظارات الطبيه زايدينه ع البهي بهي..
رمشت عيونها وكأنها تحاول تطرد افكار غير محموده من عقلها بعدين ضحكت وقالت:بتتعب معانا هلبه الفتره هادي..
مصطفى شبحلها وقال:من قبل تاعب معاكم..
رضا:هههههه..ماننحرموش ياسيدي..
صفاء:مالا وين مراد..
مصطفى رفع حواجبه ونزلهم وقال:عنده رانديفو..
رضا وصفاء:هههههههه..
مصطفى ابتسم وقال:هيا هيا البسوا بالطواتكم وتعالوا..
رضا شد يد مرته وقال:تمام..
ومشوا الزوز من جهة ومصطفى من الجهة التانيه..
🍀🍀🍀🍀
الساعه 4:00قبل العصر..
خش مصطفى للحوش..
بعد رمي كندرته وحطها في المدخل مشي وخش داخل..
لقي راحيل مقعمزة ع الكنبه وتتفرج ع التلفزيون..
مصطفى وهو ماشي للدار:السلام عليكم..
راحيل ناضت وهي تقول:وعليكم السلام..نسقيلك تتغدا..
مصطفى فتح باب الدار وقال:لالا مش توا نبي نرقد شويه..
وخش وصكر الباب..
هي تنهدت بملل ولت قعمزت تتفرج ع التلفزيون..
🌿🌿🌿🌿
طلعت من دار النوم بعد بدلت حوايجها ومشت للصاله وهي تساوي في شعرها..
وصلت فيها وخشت..لقت راجلها مقعمز حاط رجل على رجل ويهز فيها وحاجبه مرفوع..
صفاء:وين الغدي مش قلت بتمشي تجيب من برا؟
شبحلها بحده وقعد ساكت.
رفعت حواجبها وقالت:خيرك!؟..
رضا بحده:كم مرة نبهتك وقتلك التافه اللي اسمه ايهاب معاش تتعاملي معاه
صفاء:علاش الراجل ماغلطش معاي ولامرة شفت منه حركه غلط
رضا بعصبيه:مازال تعاودي في نفس الكلام..وقف وقال..اني من قبل قايلك مانبيكش تحتكي بيه هدا واحد مش تمام نظراته ليك مش عاجبتني..
صفاء:واني نشوف فيها عاديه جدا..
رضا:اني راجل ونفهم اكثر منك فالحاجات هادي..رجاءا رجااءا يا صفاء معاش تعانديني بالله عليك..
صفاء تمالكت نفسها وحاولت تساير ..هزت راسها وهي تمط في شواربها لداخل بشي من الغضب بعدين قالت:باهي..برا جيبلنا ماناكلوا جعانه
رضا:وشني بنقعد عمري كله ناكل من المطاعم اني ولاكيف!
عقدت حواجبها وضحكت بإستغراب وهي تقول:غير راك تقول انك ماتعرفش اني مانعرفش نطيب
رضا برفعة حاجب:تتعلمي!
فنصت وهي تقول:جديد كلامك هدا!! مش ع أساس قلت بديرلي خدامه وطباخ..!
رضا عكرش وجهه وقال:عمره ماخش حوشنا لاخدم ولاطباخين امي وخواتي هما المتحملين مسؤولية كل شي فالحوش..وانتي مع الوقت تتعلمي..
صفاء ضحكت بصدمه وقالت:من توا بديت تولي فكلامك!! ضحكت تاني بتهكم وقالت..حتى اني غبيه اللي صدقت انك ممكن تتغير وتولي عندك شخصيه بعيد عن امك وخواتك..
كور قبضة يده وقدملها وهو يقول من ورا سنونه:تي شن دخلهم امي وخواتي يا.....
وجي بيضربها لكن وقف لما شاف نظرات الصدمه فعيونها..
صفاء بصدمه:شن درت في عمري اني!!
هو قعد يشوفلها بتوتر وندم.
شبحتله من فوق لتحت بعدين مشت لدارها وهي تبكي..
لحقها وهو ينادي:صفااا صفو حبيبتي..
وصلت دار النوم وخشت وصكرتها في وجه بالمفتاح..
هو غمض عيونه بأسف..بعدين خبط بقبضة يده الحيط..وفتح عيونه ومشي طلع من الحوش مرة وحده..
🍀🍀🍀🍀
الساعه 7:00مساءا..
مقعمز يتغدا وهي معاه تهدرز..
راحيل:والله حتى الصغار ملوا صطوفه حاول تفضالنا نهار الجمعه حتى سويعتين..
هو شبح للصغار وهما يلعبوا بألعابهم بعدين قال:باهي يوم الجمعه من الصبح ان شاء الله نطلعكم للمغرب..
ابتسمت راحيل وقالت:سلمك ونجيك ياربي.
ابتسم مصطفى وهو ياكل..بعدين قال:ايه حقه رضا وصفاء روحوا من شهر العسل..
تعكرت ابتسامتها وهي تقول:اها..حمد لله على سلامتهم..
مصطفى حك حاجبه وقال:المهم بنعزمهم نهار الخميس يتغدوا..نبيك تتصاحبي انتي وصفاء..
راحيل:وعلاش!؟.
مصطفى شبحلها:بش ماتقعديش مكسده بروحك..مرة تجيك مرة تمشيلها مرة تطلعوا مع بعض وهي تزيد تعرفك على طرابلس اكثر هكي باك تحبيها..
حطت يدها تحت خدها وقالت:اممم..باهي..
ولى يشبح للصفرة وهو ياكل..وراحيل تشبحله بضيق..
🍀🍀🍀🍀
وجي يوم الخميس..
وجو رضا وصفاء لحوش مصطفى..
كان جو رضا مليح يضحك ويبصر هو ومصطفى ويلعب مع الصغار
وصفاء خشت مع راحيل الكوجينه تهدرز عليها..
راحيل وهي تغسل فالسلاطه:شكله يحب الصغار راجلك..
صفاء ابتسمت مجامله:امم..طول الطريق وهو يهدرز ع صغاركم وكل شويه يوقف ع محل وياخدلهم حاجات..
حطت راحيل السلاطه في سبات وقال:مالا شدي حيلك واحملي بسرعه..
تبددت ابتسامه صفاء وتبدلت بملامح الضيق..
راحيل عقدت حواجبها بإستغراب وقالت:خيرك!..
مجرد سمعت صفاء سؤال راحيل قعدت تبكي..
راحيل انفجعت..مشت طول صكرت الباب وجتها وقالت:خيرك صفاء شن في..
صفاء رشفت وقالت:تعرفي نادمه اللي تزوجت زواجي من رضا غلطه عمري..
راحيل بصدمه:علاش!!
صفاء بلعت ريقها وقالت بنبره باكيه؛نعرفه من زمان واحد متهور وماعنداش شخصيه مع اهله وماوافقتش عليه الا لما حسيته تغير..وعجبني تغييره وعدني بألف حاجه قبل الزواج..وبعد الزواج بشهر بدي يولي في كلامه شويه شويه..
راحيل:معقوله!
صفاء:ومش هكي وبس..ضربني حتى الضرب..
حولت شعرها اللي كان مدرق خدها شافت راحيل اثر كف عليه..
حطت يدها ع فمها..
صفاء ببكي:مش قادره نحكي لحد سكتت غصب عني مانبيش من الأول نكبر المشاكل بينا..نبي نحاول نتحمل..بالك نقدر نغيره..لكن مش حنجازف ونحمل منه بكل..
راحيل بصدمه:الحق وجعتيني هلبه ومش عارفه شن نقولك..
صفاء:المهم سمعتيني ساد..واسفه اللي ضايقتك بمشاكلي..
راحيل حطت يدها ع كتف صفاء وقال:ولايهمك فضفضي واحكي تلقيني في كل وقت واتيه نسمعلك وكان فيدي نساعدك حنساعدك..
ابتسمت صفاء من بين دموعها وقالت:شكرا..
راحيل بإبتسامه:العفو..
🍀في هداكا اليوم كانت راحيل طول الوقت تفكر في مشكلة صفاء ووجعتها هلبه..فكرت تحكي لمصطفى لكن لسببين تراجعت عن تنفيد هالفكره..
اولهم ان صفاء اكيد ماتبيش حد يعرف باللي هي عايشه فيه وانها من كثر الكبت حكتلها.
والسبب التاني ..خوف في قلب راحيل من شي ماتبيش تفصح عنه حتى بينها وبين نفسها..
🌿🌿🌿🌿
وتمر الايام..
زي ماهي مافيهاش جديد غير ان مراد صديق مصطفى خطب..
ونجوى صاحبة صفاء تزوجت عزمت حتى راحيل ع العرس..
ومشت راحيل حضرت..
ولاحظت على صفاء انها ضاعفه هلبه وتبان مهمومه والحزن واضح في ملامحها..
مابتش تسألها ولاتكلمها لأنها حست ان صفاء زي اللي تتجنب فيها..
يعني صفاء ندمت اللي حكت لراحيل وطلعت اسرار حياتها ليها..وراحيل شبه فهمتها..
🌿🌿🌿🌿
وجي شهر رمضان..
كان اول رمضان لراحيل في طرابلس..
اول يوم مشي كله بكي..كانت تذكر في ايامه فالبلاد مع ام الخير والاجواء غادي ليها طعم خاص..
اما توا هي بروحها حاسه بوحده ويتم حقيقي..
بعد عدوا من رمضان 10ايام..
دارو اصحاب مصطفى فطور جماعي في حوازة اهل رضا..
حضروها راحيل ومصطفى..
ونجوى وراجلها..
ومراد وخطيبته..
كانت راحيل حاسه بالإحراج ومش مستريحه لكن كانت تساير وخلاص
ع الفطور..
سميرة"خطيبة مراد":عاد سعدودكم انتم ماقعدلكم شي عام قرايه وعام امتياز وتمت مش اني اللي قاعده في سنه تالته..
مصطفى:كله يعدي..اني كنت زيك هكي نقول شن بيوصلني لسابع سنه..واهوا قربنا نوصلوا..وبعدين انتي عندك مراد ماتخمميش..
ضحكوا..
سميرة:وصاحب مراد حتى هو من بعد اذنك مراد طبعا الاول ع الكليه لازم نستفيد منه شويه..
مراد:وهو تحت امرك..
مصطفى برفعة حواحب:والله!
كلهم:ههههههههه..
وصفاء تشوف لمصطفى بإبتسامه..
راجل نجوى:الحمد لله اللي نجوى اختصرت الطريق وخشت صيدله..
صفاء:لا والله ماكانت تبي تختصرها لكن دماغها هدا مادخلها..
نجوى:اشي القرده..
كلهم:ههههههههه..
مصطفى بضحكه:فضحاتك..
رضا بضحكه:هادي صفاء تحب تحرج الناس.
راحيل شبحت لصفاء لقت ضحكتها تعكرت.
ومصطفى كذلك حس ان في شي لان من مده ملاحظ ان جوهم مع بعض مش ولابد.
سميرة:راحيل..محلاه اسمك مميز..
شبحلها مصطفى..
ابتسمت بإحراج وقالت:تسلمي..
سميرة:خريجة شني انتي..
صفاء قعدت تشبح لراحيل كيف وجهها ولى الوان من الاحراج..
اما مصطفى فقعد يشوف لطاسة العصير..
راحيل:احمم..اني واخده شهاده ثانويه بس..
سميرة:اها يعني متفرغه لحوشك وصغارك..والله هكي اريح مرات حتى نديرها..
مراد:عينك..
رضا:والله هكي خيرلك يامراد المراة حوشها وراجلها اولى من كل شي عندها..
مصطفى شبح لرضا بعدين شبح لصفاء لقاها شاده الطاسه وضاغطه عليها وهي تشوفلها..
راجل نجوى قال:في نظري من حق المراة تكمل قرايتها وتخدم وفي حالة كانت زوجه تحاول توازن بين حوشها وخدمتها لو لقت انها حتهمل حوشها تسيب الخدمه طول وهدا اللي اتفقت اني ونجوى عليه..
نجوى:واني مقتنعه بكلامه مافي شي اهم من الصغار والحوش الاسرة فوق كل شي..
ابتسمت راحيل..
ورضا كان يشوف بطرف عينه لصفاء اللي كانت تتجاهل فيه.
اما مصطفى فكان يسرقلهم في النظر هما الزوز..
.........
برافو ياراجل يابطل..ان شاء الله غير اثبت لنفسك انك راجل بعد شبعت تلقيح الليله وخليتنا مهزله..
رضا وهو يحول في جاكيته:اقصري الشر وماتخلنيش نطلع عن طوري ياصفاء خيرلك..
صفاء ضحكت بسخريه وقالت:انت ديما طالع من طورك امتى كنت بعقلك اصلا
جاها وشد شعرها وقال:فمك ضميه مانبيش نسمع حسك ماتخلنيش نهبل عليك فليلة هالرمضان..
ضربت يده وهي تقول:كل يوم نلعن في روحي اللي قبلت ناخد واحد زيك انت..انت عمرك ماكنت ليا ولاأني..
رضا جن جنونه من كلامها ولى من الغضب معاش يفكر بكل قاللها بصوت عالي:مالا لمنو ياكلبه قولي مالا لمنو ياحيوانه..
انتي ليا اني وبس اني بس ياكلبه..
وهي تشبحله بعيون جاحظه كيف يحول في القميص متاعه بعنف..
عرفت شن ناوي يدير قالتله وهي تعيط:لالا رضا لا لامش هكي لااا..لااا..
🌿وللأسف رضا كان لما يسيطر عليه الغضب مايعرفش شن يدير وفي هديكا الليله حكم ع حياته الزوجيه اللي مادامتش اكثر من اربعه شهور بالنهايه..
🌿🌿🌿🌿
ليهم اسبوع مش باينين وين سألت معروف قال سافروا لمصر بيكملوا رمضان غادي..
مراد:والقرايه!!
مصطفى مط شواربه للأسفل بعدم معرفه بعدين قال:ع العموم اني ملاحظ ان وضعهم مش تمام في شي صاير بيناتهم..
مراد:محلهم عاد!
مصطفى:مش عارف..بيني وبينك نادم اللي قربت بينه وبينها نحس في رضا مايستحقهاش..
مراد:حتى اني..ماتلومش روحك فالنهايه هدا نصيبهم..
مصطفى تنهد وهز راسه بإيجاب بعدين قال:هي تعالى نشوفوا جدول الإمتحانات..
مراد مد يده القدام وقال:تفضل..
ومشوا مع بعض وين مافي الجدول..
🌿🌿🌿🌿
ومرت الايام ..
ومازال صفاء ورضا مش باينين وماحد عارف عنهم حاجه..
راحيل بينها وبين نفسها كانت خايفه ع صفاء وحست ان في شي صاير..
لهدا قررت تحكي لمصطفى اللي تعرفه..
وكيف جت بتنوض بتمشيله الدار..
رن التليفون..
مشتله طول..وردت..
راحيل:ايوه..
"راحيل بنتي"
راحيل بإستغراب وخوف:امي!..
الجازيه بنبرة باكيه:تعالي يارحيله تعالي..بوك تعبان يابنتي ويبي يشوفك..
طاحت السماعه من يد راحيل ومشت تجري طول للدار وقفت قدامها وقالت بعياط تتخلله نبرة بكاء:بوي..ارفعني لبوي يامصطفى..
جي مصطفى من الخلعه واقف ومشالها طول خداها في حضنه وقال؛حاضر حاضر..غير اهدي شويه...
وراحيل تبكي بعبرتها وهي تقول:بوي يبيني يامصطفى يبيني..
مصطفى:باهي باهي حاضر تو نرفعك.
🌿ومع الفجر..
توكل مصطفى بعيلته للبلاد..
لما وصلوا مشوا للسانيه..
قالتلهم الخدامه ان عياد راقد في المستشفى مشوله طول..
🥀فتحت الباب وخشت..
لقاته راقد ع السرير..
جاته وشدت يده وقالت وهي تبكي:بابا...بابا حبيبي رد عليا ياغالي..اني رحيله للا بوها رويحله جيتك بابا..
فتح عياد عيونه بالشويه بدت الصورة تتوضحله..
شاف وجه اغلى حد على قلبه فالدنيا..
ارتسمت ع وجهه ابتسامة تعب خفيفه وقال:رويحله..
ضحكت من بين دموعها وطبست ع راسه وايديه وقعدت تبوس فيهم وهو يشوفلها بإبتسامه والدموع تنزل من عيونه..
برا..
صالح:ماتحملش الفراق..
ضيق مصطفى عيونه وقال:فراق من !؟
صالح:فراق بنته الوحيده
مصطفى ابتسم بتهكم وقال:تي هو متبري منها مرة وحده ليه سنين توا خطر عليه مايتحملش فراقها!
صالح:كانت قدام عينه وحالها مش خافي عنه..
مصطفى ضحك بتهكم وحرك راسه يمين ويسار..
صالح:الراجل مريض يامصطفى وحني توا في ايام مباركه صفي قلبك
مصطفى:صار اني اللي نصفي قلبي! كان مش كل شي صار ع عينك ياعمي صالح راني قلت هدا مايعرف شي..
صالح:اللي صار كله في الماضي ياولدي وخلينا فاليوم..
مصطفى:ماعنديش حاضر مع عياد خليفه..ولولا بنته راهو ماربطني بيه شي ولاتمنيت يربطني.. قول لراحيل لما تطلع تلقاني برا..وهي السلام عليكم..
ولبس نظاراته السود ولف ومشي وخلا صالح يشوفله وع وجهه ابتسامة أسف..
🌿يومها راحيل روحت على حوش اهلها
وراجلها قعد في حوشهم الاول
راجوه ع الفطور والسحور ولا بي يجي وراحيل اضايقت هلبه من حركته هادي..
تاني يوم..
في حوشهم الأول..
راحيل بغضب:عملت بأصلك ياسيدي وقدرت المراة اللي عازماتك وماخلت مادارت..
مصطفى:قدراتك انتي مش اني داراته ليك انتي واحفادها..
راحيل:شن تقول انت! تعرف ان قعدنا ربع ساعه بعد الآذان ماخديناش اخطا من التمر والحليب بش حلينا صيامنا وحني نراجو فيك..
مصطفى بنفاذ صبر:حوش بوك اني مانخشلاش من الأخير..
راحيل قعدت تشوفله بنظرات اسف وهي تقول:وتقولي يومها بوك قلبه اسود!
مصطفى:مادرتش لبوك اللي دارهولي ياراحيل ولامرة فكرت نردله اللي داره فيا..مانبيش نعرفه بس مانبيش..في النهايه هو بوك اما اني ماتفرضيشي عليا..تمام!؟..وهي توا خليني نمشي معاش عندي وقت لازم نوصل طرابلس قبل الساعه 2..
ومشي طلع من حداها وخلاها واقفه وهي تشوفله بإحباط وحزن ودموعها ينزلوا...
🌿🌿🌿🌿
وانقضت ايام شهر رمضان..
والبي عياد ولى حاله باهي وطلع من المستشفى وعيد في مع عيلته مرته وبنته وصغارها..وولده اللي جي بمرته وولده من بريطانيا اخر يوم رمضان..
وهما يتغدوا..
كان عياد يسرق في النظر لراحيل اللي كانت تاكل بالسيف وتوكل في صغارها كانت تبان مضايقه هلبه..
وقلبه وجعه عليها..
بعد الغدي..
خداها وطلع بيها برا في الجنان..
عياد:حتى فالعيد ماباش يجي يعيد مع صغويرته.
راحيل بضيق:عنده امتحانات.
عياد:امتحانات..اممم..هز راسه وقال...ع العموم مايهمنيش المهم انتي وصغارك معانا..
راحيل:بابا..سامحتني؟
عياد تنهد وقال:لا..ومازال قلبي شاد منك..لكنك بنتي فالنهايه مانبيش صغارك يكبروا والناس يعايروهم بحكاية بوهم وامهم..
راحيل بصدمه:علاش شن دارو بوهم وامهم بش يعايروهم!!؟
عياد رفع حواجبه وغير عيونه عنها..
ارتسمت ع وجهها ملامح الغضب ومشت من قدامه..
جت لصغارها اللي كانوا يلعبوا مع ولد خالهم خدتهم ومشت بيهم طول للباب وطلعت من السانيه..
بوها ابتسم بتهكم وحرك راسه يمين ويسار ومشي خش للحوش ومعاه ولد ولده..
🍀🍀🍀🍀
مقعمزين في صالون الحوش..
الاب والأم وولدهم اللي كان يهز برجله ودموعه فعيونه..
شويه وخشت عليهم..
هو شافلها بلهفه وشوق ويمرر في نظره ع اثار التعنيف اللي داره ع وجهها..
هي كانت تشوفله بحقد..
قدمتلهم وقعدت واقفه وقالت:هي كلمه مانيش موليه فيها..طلقني..
بوه:باهي يابنتي قعمزي بش نتفاهموا..
امه:احترمي كبر سننا يابنتي وقعمزي اسمعينا واسمعيه..
شبحتلهم بإزدراء وقالت:اني مش عارفه علاش تعبتوا ارواحكم وجيتوا اصلا..لو من يجيبلي ولدكم هدا مستحيل مازال نسامحه..
رضا:صفاء..قعمزي..
صفاء:ماتجيبش اسمي على لسانك..وخود بوك وامك وتوكلوا على الله..
ناضوا بوه وامه وهما حامقين.
بوه:غلطنا هلبه اللي خشينا وقعمزنا مادام حتى بوك وامك مابوش يطلعولنا..
امه:غلطنا اللي جينا من اصله..
صفاء:غلطتوا اللي خطبتوا لولدكم بنت عيله متسميه زي عيلتي مفروض خديتوله وحده من مكان شعبي ولامن الدواخل بش دارها عجينه فيده يعجنها كيف مايبي انتم وياه..
بوه:هي اطلعوا اطلعوا..
رضا وقف وشبحلها وقال بتحدي:ناخد عليك وحده خير منك ومن عيلتك الف مرة ونخليك معلقه طلاق مش حنطلقك لو اطيري..يااابنت العيله.
ولف ومشي وبوه وامه وراه وطلعوا من الحوش..
وهي من غيضها خدت المزهريه اللي كانت ع الطاوله حداها حدفتها وراهم وقعدت تبكي..
🍀🍀🍀🍀🍀
بعد تلاته ايام
في الكليه..
مصطفى بصدمه:كيف!!
نجوى بحزن؛ضاربها ضرب يامصطفى قريب قتلها..
مصطفى :شن الحيوان هدا!!
نجوى:عندها الحق في كل اللي قالته عليه ياريتني ماشجعتها تاخده
مصطفى بضيق:حتى اني غلطت نفس غلطتك..هو صح فيه حاجات مش عاجبتني بس ماتوقعتش يكون حقير لهالدرجه معقوله ضرب وتعنيف!!
نجوى:حيوان..
مصطفى:باهي توا شن بيصير فيهم..
نجوى:هي بعتتني ندخلك واسطه بش تقنعه يطلقها..
مصطفى بضيق:ولو اني عارف ان هادي مهمه شبه مستحيله بس حنحاول معاه..
نجوى:دير جهدك..
مصطفى هز راسه وقال:إن شاء الله
..........
ارجوك مصطفى خليك بعيد ع الموضوع هدا مانبيش نخسرك..
مصطفى:باهي لأمتى بتقعدوا هكي راهو هي شاده في الطلاق ماتبيش غيره..
بلع رضا ريقه وقال:واني توا بالذات مستحيل نطلقها..
مصطفى ضيق عيونه وقال:شن قصدك بتوا بالذات؟
رضا نزل راسه لوطا وقال:هي..حامل..
ضم مصطفى شواربه بأسف وقعد ساكت.
شبح رضا لمصطفى بعيون مليانه دموع وقال بألم؛اني والله نادم بنموت ع كل شي درته فيها..والله نحبها ونموت فيها ونغير عليها ومانتحمل شي فيها ولانتحمل حياة من غيرها..شد يد مصطفى وقال ودموعه ينزلوا..حاول فيها يامصطفى قوللها رضا مستعد يدير اللي تبيه اللي تبيه وحقك منه خوديه كيف ماتبي غير توليلي بس نكملوا حياتنا مع بعض ونربوا ولدنا ولابنتنا..ارجوك..
غمض مصطفى عيونه بأسف بعدين فتحهم وقال:حاضر حاضر تو نحاول معاها..
🍀🍀🍀🍀
الساعه 12:00ليلا..
راحيل وهي تحدد في حوايج مصطفى:مش حتولي..
مصطفى:حتى اني عارفها لكن بنحاول ع خاطر العيل..
حطت راحيل المكواة على جهة وقالت:اكثر شي مستغرباته كيف حملت منه وهي قالتلي مانبيش منه صغار.
نزل مصطفى الكتاب وقال :قالتلك!!
تنهدت راحيل بضيق وقالت؛ايه..اول مرة عزمناهم وهما عرسان شكتلي منه وقالت يضرب فيا..
فتح مصطفى عيونه ع وسعهم وقال:وعلاش ماقلتيش وقتها..كان قلتي رانا خشينا في موضوعهم وماخليناش الامور توصل لهني!
راحيل بتوتر:ماقدرتش نطلع اسرار المراة..
مصطفى بشي من العصبيه:ديما هكي انتي ياراحيل ماتعرفيش تشغلي دماغك ووتتصرفي صح..مش عارف لأمتى بنقعد نعلم فيك.
راحيل بصدمه:علاش هدا كله!يعني لو قتلك من قبل شن بدير..
ناض من مكانه وقال:ندير الف حاجه ولاخليتهم يوصلوا لمرحلة خراب الحوش..
غمض عيونه بعصبيه وفتحهم بعدين مشي طلع من حداها.
هي شدت دموعها بالسيف مابتش تبكي..وخدت المكواة وكملت باقي شغلها..
🍀🍀🍀🍀
تاني يوم..
في وحده من المنتزهات..
صفاء ابتسمت بتهكم وقالت:شن تحكي انت يامصطفى لو تطبق السمي ع الوطى مانوليله..
مصطفى:هو قال انه حيصلح كل شي واللي تبيه يديره.
حطت ايديها فجيوب معطفها وقالت:ماعنداش غير الدوة والوعود الكذابه..
قالي نوعدك نخليك تكملي قرايه برا..وبعد الزواج قالي فوتيها القرايه ماعندك ماديري بيها..
قالي حنفتحلك عياده نخدموا فيها اني وياك ونكتبها بإسمك.
وبعد الزواج قالي..المراة ماليها الا حوشها وراجلها..
وياما قالي ياما وعدني وكله بعد الزواج لقيته طاير متبخر في الهواء..وياريته وقفت على هكي..مد يده عليا يامصطفى..ووو..خنقتها العبره وقعدت تبكي..
مصطفى بضيق:اني اسف اسف جدا..كنت سبب في اللي وصلتيله..
مسحت دموعها ورشفت بعدين قالت:انت كان ليك الظاهر يامصطفى زيي وزي كل اللي يعرفه..ماتعرفش قداش هو في حقيقته انسان اناني ومتخلف وسطحي وماعنداش شخصيه..
مسح مصطفى بيده ع لحيته وقال:باهي والطفل اللي حيكون بيناتكم!؟
ضحكت وقالت:غبيه اني بش نقعد حامل من واحد زي هدا..
مصطفى بصدمه:شن درتي!!
صفاء غيرت عيونها عنه وقعدت ساكته..
مصطفى بصدمه؛غلط هكي ياصفاء غلط مش من حقك وحرام عليك..
صفاء شبحتله ودموعها نزلوا وهي تقول:حرام عليا لو درت صغار من واحد زي هدا نجني عليهم لو خليته بوهم..
مصطفى قعد يشبحلها بنظرة ضايقتها
صفاء:لا مصطفى انت بالذات مانبيكش تشبحلي هكي..والله لو تعرف اللي عشته يامصطفى تعذرني..والله..
ومعاش تحملت مشت من حداه طول وهي تبكي..
وهو معاها بعيونه اللي تشوفلها بنظرات أسف..
...........
في السكن الطلابي..
كان مقعمز مصطفى مع معروف ورضا محمد كان طالع وقتها..
مصطفى:خلاص يارضا..طلق..مافيش امل..
رضا كان حاط ايديه ع فمه وهو يهز في رجله بغضب..
معروف:من الاول قتلك فوتها ماتركبوش على بعض ماسمعتش كلامي..
رضا شبحلهم وقال:مادامها حامل مني طلاق مانيش مطلق..
مصطفى بضيق:رضا..اني اسف ع اللي بنقوله توا..لكن صفاء دارت عملية اجهاض..
معروف انفجع وشبح لمصطفى..
ورضا قعد يشوفله وملامح الصدمه الشديده مرسومه على وجهه..
شويه وناض ومشي طلع من حداهم..
كيف جي معروف بيلحقه شده مصطفى وقال:خليه بروحه خير...
معروف قعد يشبح لمصطفى شويه بعدين غير عيونه وشبح فالفراغ وهو موجوع على صاحبه..
🌿وياريتك يامصطفى خليت معروف يلحق رضا..
رضا وقتها كان فاقد صوابه تماما من الغضب..
ركب دراجته الناريه وانطلق بيها بأقصى سرعه مايشوف في شي قدامه..
ودار حادث شنيع...أودى بحياته..
🌿🌿🌿🌿
خبر موت رضا بهالطريقه كان صادم لكل من يعرفه ماعدا صفاء اللي كانت تعرفه لما يغيب عقله شن ممكن يطلع منه..
اكثر من تأثر بموته صاحبه معروف..لدرجة خش في حالة نفسيه وكره صفاء بشده..
ومصطفى حتى هو تأثر هلبه بموته وتمنى لو كان قدر يديرلهم شي قبل يوصل بيهم الوضع لهالحال..
.........
بعد شهر...
ياودي باهي باهي..تبي تمشي تقعدي الصيف كله غادي تو نرفعك غير فكيني من تنقريزك..
قال مصطفى كلامه بعصبيه وهو خاش الدار..
راحيل بضيق:تنقريز شني اني اول مرة نقولك ع الحاجه هادي..
مصطفى خدي شنطته ومشي وقف ع المرايه سوا ياقة سوريته..بعدين بخ من عطره ومشي طلع..
لحقاته وهي تقول:وين ماشي توا..
وصل فالمدخل لبس كندرته وهو يقول بسخريه:ماشي للملاهي!..بنمشي للمستشفى يعني وين بنمشي
راحيل؛باهي اني سألتك سؤال عادي علاش التسهويك.
لف مصطفى للباب وفتحه وقال:لا مش عادي سؤالك غبي كالعاده..
وطلع وصكره وراه..
وهي تشوف للباب بصدمه ودموعها تنزل...
🍀🍀🍀🍀
في المستشفى..
في الممر ماشي هو وياها يهدرزوا..
صفاء بأبتسامه:بجديات شكرا مصطفى لولاك كانت ضاعت عليا السنه..
مصطفى:انتي قويه ومجتهده وعندك هدف ومنيشنه عليه كويس وتبي توصليله..
صفاء بإبتسامه:اكيد ومش حنتنازل عنه مهما صار..
ابتسم مصطفى وقال؛برافو.
قعدت تشوفله وهي مبتسمه ابتسامه ليها معنى..
هو غير عيونه القدام وع وجهه ابتسامته وقال:جعانه.
صفاء بضحكه:مووووت..
مصطفى بضحكه:خلاص عازمك.
صفاء:تي والله انت احسن راجل فالعالم باهي..
مصطفى:هههههههه...
ومشوا طلعوا مع بعضهم من المستشفى....
🌷وزادت تقوت علاقه مصطفى بصفاء اكثر من قبل وتباعد هلبه عن راحيل اللي كانت عايشه معاه وكأنها خدامه تخدم ع راحته ليل نهار..وتخدم في صغارها بكل حب..
عامين تانيات عاشتهم مع مصطفى بس هالمره حياتهم كانت بارده تماما..وعلاقتهم رسميه جدا..
ولأن راحيل مراة والمراة تعرف راجلها كويس لما يتغير قلبه عليها وتحس ان اشارة البوصله متاعه تغيرت لأتجاه تاني عرفت ان مصطفى خشت حياته مراة تانيه...
وماتأكدتش من هالشي الا لما حضرت حفل تخرجه ولاحظت التقارب الكبير بينه وبين صفاء واللي ماكانش تقارب عادي نهائيا.
وقررت واخيرا بعد يروحوا تواجهه....
...يتبع.....
