راوية عشقت متمرده

البارت الثالث

قاطع كنان تليفونه اللي بيرن ورد وكان محاميه
المحامي محسن : انت فين ؟؟
كنان : في مكتبي ليه خير ؟وموطي صوتك كده ليه ؟؟
المحامي : لان في مصيبه
كنان : خير بس
المحامي : في واحده عندي هنا معاها صوره لقسيمه جواز وبتقول انها مراتك وانها عايزه تطلق منك
كنان : وايه المصيبه في ده ؟؟
المحامي : لو كل ده مش مصيبه تبقي المصيبه انها بنت شريكك محمد
كنان : طيب وقولتلها ايه ؟؟
المحامي : حضرتك واخد المىضوع ببرود ليه كده ؟؟ عايزني اقولها ايه ؟ انا بكلمك اهو افهم منك
كنان : طيب هفهمك بعدين بس انا عايزك حاليا تقنعها انه صعب انها تطلق لان انا غني ومفيش سبب منطقي وانها تحاول بالاتفاق احسن يعني قفل في وشها الطرق فاهمني ؟؟
المحامي : طيب ماهي ممكن تروح لغيري ؟؟ وهيطلقها بسهوله
كنان : مش هتروح هيا من النوع اللي بيستسهل واكيد دورت علي اكبر محامي ولقتك انت مش هتدور تاني ولو دورت هنبقي نشوف المحامي التاني ونتفق معاه ولما تمشي من عندك تعالالي
راح المحامي للين وفعلا قفلها في وشها
ليم : يعني ايه ؟؟ انا مش هعرف اسافر تاني ؟؟
المحامي : بموافقته هتسافري ... اسمعي نصيحتي
لين : اللي هيا ايه ؟؟ اسمع كلامه ؟؟
المحامي : بصي انتي قولتي انه صعيدي صح ؟؟
لين : ايوه
المحامي : طيب الصعايده رجاله ودمهم حامي وعمره ما هيعمل حاجه غصب عنك يعني انتي في امان معاه
لين : يعني ايه ؟؟ علي الاقل هيطالب بحقوقه ؟؟
المحامي : ممكن يطالب بس مش هيجبرك ابدا دول دمهم حامي وعمره ما هيقبل علي نفسه يفرض نفسه علي واحده ابدا فروحي معاه وانتي واثقه انك في امان واقنعيه يطلقك بهدوء لان هنا في مصر احبال المحاكم طويله
لين : طويله قد ايه ؟؟
المحامي : يعني من ٦ شهور لحد سنه ولو هو معاه محامي شاطر هيفضل يأجل ومش بعيد يطلبك في بيت الطاعه ويلزمك بحياه زوجيه هاه مستعده نبدأ محاكمتنا ؟؟
لين : يعني ايه بيت الطاعه ؟؟
المحامي : يعني يحبسك في بيته بأمر قضائي .. علشان كده بقولك اقنعيه اسهل وشهرين تلاته وروحي بلدكم
لين : طيب وبالنسبه لجوازي الامريكي اللي اختفي ؟
المحامي : هنطلع غيره .. الاول هنعمل محضر انه اختفي وبعدها هنقدم طلب لغيره
لين : وده هياخد قد ايه ؟
المحامي : مش كتير ما تقلقيش .. سيبي كل حاجه عليا
لين : طيب بابي معاه توكيل عام هو ممكن يخلص الاوراق مع حضرتك وبعد ما يخلص عايزاك تلغي التوكيل ده
المحامي : تمام
لين مشيت من عنده الدنيا كلها ثايره في دماغها مش عارفه تعمل ايه او تتصرف ازاي ؟؟ روحت بيتها وهناك مفيش حد طلعت اوضتها ونامت من التعب .. كنان وابوها رجعوا وهو استأذن ابوها يطلعلها علشان يسافر بقي
محمد : خلي بالك منها يا كنان دي روحي
كنان: في عنيا ولو قلقان !!
محمد : لا ده قلق الاب علي بنته مش قلقان منك
كنان : ان شاء الله خير
طلعلها وخبط خبطه خفيفه ودخل واتفاجئ بيها نايمه زي الملاك منتهي البراءه فضل واقف يتفرج عليها معجب بجمالها ده وحس انه للحظه مهدد ..
قرب منها ووطي عليها يصحيها بس اتفاجئ بنفسه بيسحب ورده من الفاظه اللي جنبها وبيصحيها بيها ومبتسم وكأنه عاشق بيصحي معشوقته .. بدأت تتحرك وابتسمت اول ما فتحت عنيها النعسانه
لين : انت هنا ؟
كنان كان قاعد في الارض ووشه قصادها بالظبط
كنان بهمس: انا هنا
ابتسمت وغمضت تاني وحس كنان بقلبه بيدق وكأنه هيخرج من مكانه .. ليه ابتسامتها سحرته كده ؟؟ ليه هو قاعد في الارض كده ؟؟ معندوش اجابه فقام وقف واتحمم بصوت عالي
كنان : احممم انتي ... جومي يالا
لين فتحت عنيها مش مستوعبه في ايه بس اول ما لمحت جلابيه في وشها اتنفضت وقامت وقفت علي السرير
لين : انت ازاي تدخل هنا وعايز ايه ؟؟
كنان : انا ادخل براحتي المكان اللي يعجبني وجاي ليه فعلشانك يا جمر ... جومي يالا غيري هدماتك دي واجهزي علشان عنسافر
لين : نسافر فين ان شاء الله ومين قالك اني هسافر معاك ؟؟ are you crazy?
كنان : بجولك ايه كرازي ولا ماكريزاش اجهزي ويالا
لين : I'm not going
كنان : اهي هترطنلي اهيي ... شوفي يا تجهزي في خمس دجايج يا هحطك في العربيه كيف ما انتي اختاري
كنان لف وشه وهيخرج ولين افتكرت كلام المحامي وخافت يحبسها فعلا ومش فاهمه هيا ليه بتخاف منه ؟؟؟
لين : طيب استني
كنان : افندم ؟؟
لين : ممكن نتكلم لحظه ؟؟
كنان : اتفضلي
لين : طيب انا مش بحبك ومش هحبك ومش طيقاك واعرف ان الصعايده دمهم حامي فأنت ازاي قابل الوضع ده ؟؟
كنان : لان ابوكي قصدني وطلب مني اتجوزك وانا عحبه زي ابوي واكتر كمان ومش هرفضله طلب وبعدين انتي علمتي الغيب
لبن : يعني ايه ؟
كنان : يعني مين جالك انك ما عتحبنيش ؟؟ مش يمكن تتعلقي في رجبتي وما اعرفش انا اخلص منيكي ؟؟
لين : ايه ؟؟ انا اتعلق بيك انت ؟؟؟ you are crazy
كنان : شوفي اجولك كلمه ابرك من عشره .. انا ما عحبكيش وانتي ما عتحبينيش تمام
لين : تمام
كنان : بس انتي حاليا مرتي شرعا وقانونا انتي مرتي وافجنا او رفضنا انتي مرتي تمام ؟
لين : وبعدين ؟
كنان : عتسافري معايا شهرين تلاته وبعدها عجولك مع السلامه وعجول لابوكي بنتك مش نافعاني !!
لين : انت تطول اصلا تتجوزني علشان ابقي مش نفعاك ؟؟
كنان : انتي عايزه تطلقلي ولا عايزه تفضلي ارسيلك علي بر عاد
لين: ايوه عايزه اطلق بس ما تقولش مش نفعاك دي مش عجباني
كنان مستغرب هيا معترضه ليه وهيا كمان مستغربه ليه الكلمه دي مش عجباها؟؟
كنان : طيب نجول مثلا انك فاشله كزوجه
لين بهجوم: انا عمري ابدا ما فشلت في اي حاجه وعمري ما كنت فاشله
كنان بابتسامه : طيب بلاش فاشله !! نقول ما انتيش ماليه عيني مفكيش انوثه كفايه مش مربربه اكده
كنان كان بيتعمد يغيظها اكتر واكتر وفعلا هيا اتجننت اكتر واكتر والشرار بيطلع من عنيها وبتقرب عليه
لين : أنا .. يا جاهل مفيش انوثه ؟؟ انا مفيش انوثه ؟؟ انت ايش فهمك انت اصلا ؟؟؟ انا مفيش انوثه ؟؟؟ انا ؟؟
كنان : ايه هو دي ؟؟ انا انا انا ؟ علجتي اياك ؟؟ ايوه مفكيش ... ايه ؟؟ رفيعه كيف العصا ... لابسالي بنطلون عاملك زي السحليه كده ماعرف كيف لابستيه اصلا ... شعرك منكوش كيف فروه الخروف ... ايوه مفكيش ريحه الانوثه اصلا
ندي عنيها بتطلع نار وكنان حس انها ممكن تضربه لانها بتبص حواليها وبتدور علي حاجه تضربه بيها
لين : مش هقول غير كلمه واحده .. جاهل
كنان : طيب يا متعلمه عايزه تجولي ايه لابوكي ؟؟
لين : هقول ان انت مش من مستوايا وانك جاهل ومعندكش ذوق وما بتفهمش وما انتاش راجل في نظري
كنان قاطعها : لا كله الا انك تغلطي ... عايزه تشوفي رجولتي اوريهالك من عنيا
لين : كلكم مفهوم الرجوله عندكم غلط
كنان : لا مش غلط وما اقصدش اللي جه في بالك ابدا لان اي كلب يقدر يفرض نفسه علي واحده بس الرجوله عندي مختلفه تماما وما تقلقيش عتشوفيها بنفسك وده وعد مني .. جدامك خمس دجايج وعنتحرك
سابلها الاوضه وخرج وهيا قعدت واتنهدت وكأنه كان مانع عنها الهواء وهو جوه الاوضه
نزل تحت لابوها
محمد : صوتكم كان عالي .. ليه قلتلها ان انا طلبت منك تتجوزها ؟؟
كنان : ماهو بديهي انا ما اعرفهاش واحنا مش متوافقين فهتجوزها ليه ؟؟ وبعدين كده هتيجي بمزاجها
محمد : واما الشهرين يعدوا ؟؟
كنان : اللي ربنا كاتبه هيكون ...
نزلت لين ببنطلون برمودا قصير وخلخال في رجلها سيمبل وكعب عالي وبلوزه بحمالات قصيره وشعرها اللي شبه مريم فارس وعليه النظاره بتاعتها
لين : انا جاهزه
كنان : سلام قولا من رب رحيم ... و راس الكبش دي مش عتعملي فيها حاجه ؟؟
لين : ok do you see him?? He is an ignorant? What are you doing to me?
محمد : ماهو انتي مزوداها قوي .. ما تلبسيلك حاجه محترمه وتلمي شعرك ده ولا تخليه علي طبيعته
كنان : يالا هنتحرك شنطك في العربيه وانا هتصرف في الطريق يالا نشوف وشك بخير يا عم محمد ابجي زورنا
سلم كنان وخرج وهيا بتتفرج عليه وخرجت وراه وراحت ناحيه عرببته اتفاجئت بيه بيفتحلها الباب
كنان : اتفضلي
لين : thanks
كنان : رطنت اهي
لين : بقولك شكرا يا جاهل

كنان رزع الباب في وشها
لين : وانا كنت فكراه جنتل !! جاهل
كنان ركب جنبها : عتجولي حاجه ؟؟
لين بصت لبره وتجاهلته وهو اتحرك وقف مره واحده نزل غاب ربع ساعه ورجع وهيا ماسألتوش نزل ليه بس شافت علبه في ايده حطها وري وقعد مكانه واتحركوا تاني
كنان : عايزه حاجه قبل ما نطلعو علي الطريج ؟؟
لين : شكرا
كنان : جعانه ؟؟ عطشانه ؟؟
لين : شكرا
اتحركوا في صمت وعدت ساعه واتنين وهما ساكتين تماما واخيرا هيا بدأت تتململ في قعدتها فتحت تابلوه العربيه ولقت سيديهات .. كنان اتوتر لان دي سيديهاته وعليها اغاني اجنبيه بمستو راق
قلبت في السيديهات مستغربه وبصتله
كنان : ايه مالك ؟؟
لين : مين بيسمع دول ؟؟
كنان : يخصك في ايه ؟؟؟
لين : اصل اللي بيسمعهم زوقه راق وعالي واستحاله تكون انت
كنان ابتسم جواه ان زوقه عجبها : متشكر علي ذوقك بس اريحك دول بتوع اخواتي ..
لين : امم عندك اخوات ؟؟
كنان : ايتن وامجد .. ايتن اخر سنه في كليه اقتصاد وعلوم سياسيه وامجد في سنه تالته في كليه هندسه بس فاشل المفروض يكون متخرج من كذا سنه
لين : وانت اللي الجاهل اللي فيهم !! صح ؟ ايه ابوك مات صغير ويا عيني اتطريت تسيب الدراسه وتمسك اشغاله ...
كنان اتعصب جدا لان ده فعلا حصل بس هو ما سابش دراسته لأ.. وقف علي رجله وقسم وقته بين ده وده واتعلم واتخرج من هندسه الكترونيات وسافر بره واخد دكتوراه بره واهو صاحب اكبر شركات في الشرق الاوسط بس للاسف مقدرش ينطق وفضل ساكت
لين ندمت علي كلامها وخصوصا بعد ما هو سكت لان حست ساعتها ان كلامها فعلا حصل وانه اضطر يسيب دراسته علشان خاطر اخواته .. كان نفسها تعتذر بس لسانها ما طاوعهاش فسكتت ورجع الصمت بينهم تاني
عدوا علي استراحه ووقف هو
كنان : استراحه
لين : مش عايزه حاجه
كنان : ابراحتك انا نازل ... هدخل بيت الراحه واكل لجمه علي خفيف .. عايزه تفضلي في العربيه انتي حره فاضل لسه يجي ساعتين كمان علي البلد
نزل كنان وهيا حست ان الجوع قرصها وانها عايزه تدخل حمام فنزلت وراه
لين : استني
كنان وقف ورجع قفل عربيته ودخلوا مع بعض وكان شكلهم منتهي التناقض .. استايل مع جلبيه وعمه
دخل كنان الحمام وخرج وطلب اكل قبل ما هيا تيجي طلب لنفسه وقعد يستناها لحد ما اخيرا خرجت
كنان : ساعه؟؟ ... شوفي هتاكلي ايه ؟؟
كنان نادي علي الجرسون وطلبت اكلها واكلوا الاتنين واتفاجئت انه بياكل بالشوكه والسكينه عادي
كنان : عتفضلي تبصيلي كده كتير ؟؟
لين : مستغربه انك بتعرف تاكل بالشوكه والسكينه ؟؟
كنان : هو علشان ما عرفش ارطن زيك يبقي ههطل علي نفسي ولا ايه ؟؟
لين : تهطل ؟؟؟ اسكت ..please god
كنان : تنكشني وتجولي اسكت
اكلوا ودفع الحساب وخرجوا وكملوا طريقهم وشويه وتليفونه رن فرد عليه وكان فتحي بلغوا بحاجه شويه وركن علي جنب وبصلها من فوق لتحت بطريقه خلتها تترعش واستغربت وقف ليه في الحته المقطوعه دي ؟؟ وبيبصلها كده ليه ؟؟ ليكون بيفكر يوريها رجولته اللي سبق ووعدها هتشوفها ؟؟ عند النقطه دي خوفها اتضاعف وبترجع لوري في كرسيها والخوف ملاها وهو ابتسامه مخيفه علي وشه ملهاش معني ...
يتبع
.
.
.
.
.
.
.
.
.
.
.
.
ياتري ادم ناوي علي ايه ؟؟
ندي هتعمل ايه ؟؟
ا

رجو ان تدعموني بالضغط علي النجمه والكومنت والمتابعه رجاءا 🤗🤗🤗
جانا ♥️♥️
1653 كلمه