اجه العيد وجان أول عيد النا مع بعض، غير مراد مالكيت أنسان يحجي بتفاصيلي ويركز بيهن، المسافة جانت على طول بينا ماحضنته شي يوم ولا بست وجهة ولا لمست أيده حته ماشميته بس هلكد احسه يخصني!
بعد العيد قربت رجعتي لبيت أهلي ونهاية السنة الأحلى بحياتي عشت أجمل لحظات عمري رغم كلشي صعب مريت بي كلمة مراد جانت تسهل عليه مر الدنيا وتمحي تعب كل يوم، كلما افكر انه راح ارجع لديرتي وأبتعد عن قطعة من روحي احس بحزن ياكل كلبي مرات أتهرب من الفكرة ومرات أواجه الواقع واكعد ابجي لحد ما تنشف دموعي، "مرادي".. شلون تمر الأيام بدون شوفة وجهك الحلو وبدون ما المحك تمر كدام عيني؟؟ ...
__ اخر يوم امتحانات بالجامعة تذكرت كل تفصيل صار وياي بيها وكل الاماكن والايام الصعبة الي حصلت منها احلا حب وصداقة بنفس الوقت، فعاليات طلاب الأقسام الكتابة على القمصان والموادع والحزن بعيون الطلاب، يوم كئيب الي وللكل، شفت مراد لابس قميص كله كتابات وذكريات من الشعبة اشرتله تعال اكتبلك هو أجه وكف كدامي كال : "كتبي" جاوبت : وين؟! هنا لابالضهر احسن، ضحك وكال ما بقى مكان ع ضهر
ف كتبتله ب مكان فارغ " اعشكك يا كمر" ومن شفت وجهة ضعفت وردت ابجي ردت أحضنه ولو مرة وأذب همي كله بس تمالكت نفسي وما بجيت طلعت كعدت وحدي قريب القسم افكر ردت ابجي من تزاحمت الافكار بعقلي، رفعت راسي شفته مقابيلي مبتسم شوية بعيد وانا تصنعت الضحكة وضميت حزني وهمي واجه يتمشى وكف وكال "ناي" اعرفج حزينة لانه اخر يوم هنا بس كافي لتفكرين وراها مشى كالعادة عمره ما طول بالحجي جان كلامه مختصر وعلى البال.. وجانت هاي أخر مرة أشوفه بيها 💔
