طفلتي ل فاطمه إبراهيم

"طفلتي"
الحلقه الأولي

علي احدي الطرق وفي منتصف الليل هناك حادثه لسياره كان يوجد بها طفله ووالدها ووالدتها،انقلبت السياره عدت مرات حتي ظن الجميع ان كل من في السياره اصبح رماداً محترق ولكن عندما اقترب شخصاً ما من السياره سمع صوت طفلاً يصرخ...

الرجل: الحقوا يا جماعه دا في صوت في العربيه
رجل آخر: صوت اي الي في العربيه انت مش شايف العربيه والعه ازاي
الرجل: لا في صوت انا متأكد صوت عيل بيعيط
(بيفضلوا في نقاش حاد علي ان في طفل في العربيه ولا لا وان الصوت الي الراجل سمعه دا بجد ولا من وحي خياله، لحد ما بتيجي الشرطه وتعاين الحادثه وبتكون المفاجأه)
العسكري: يا حازم بيه،يا حازم بيه
الرائد حازم: نعم يا عسكري في اي؟!
العسكري: يابيه في عيله صغيره تحت العربيه
حازم: عيله!! طب ارفعوا العربيه بسرعه علشان نقدر ننقذها قبل ما تموت هي كمان
العسكري: اوامرك يا حازم بيه
(بيرفعوا العربيه وبالفعل بيلاقوا تحتها بنت صغيره بس كانت المفاجأه هنا ان البنت محصلهاش ولا اي حاجه ولا حتي جرح بسيط)
حازم: مش ممكن الي انا شايفه دا،البنت معلهاش ولا آثار جرح واحد
(الناس كلهم مستغربين ازاي بنت زي دي متصابتش ولا بخدش بسيط علي عكس ابوها وامها الي ماتوا وملامحهم حتي كمان مش واضحه)
حازم للعسكري: هات البنت دي احنا لازم برضو نوديها لدكتوره تطمن عليها وحاول تلقي اي حاجه تدلنا مين الناس دي او مين قرايبهم علشان نبلغهم
العسكري: حاضر يا حازم بيه
(بياخد حازم الطفله ويمشي وبينه وبين نفسه بيكون مش لاقي تفسير للحاله الي البنت فيها،هو شايف قدامه بنت طبيعيه جداً بالرغم من الحادثه والعربيه وكل الي حصل في اهلها وحازم بيفكر بيبص للبنت لكن البنت ساكته ومطمنه عينيها فيها لامعه غريبه مش قادر يفسرها وفجأه وحازم باصص للبنت ومركز
السواق: وصلنا للمستشفي يا حازم بيه
حازم: تمام
(بينزل حازم من العربيه عند باب المستشفى وهو شايل البنت علي ايده وبيروح قسم الأطفال ويقولهم انه عايز يكشف علي البنت ويطمن عليها،بتظهرله دكتوره وبتقوله....
الدكتوره: انا ممكن اكشف عليها اتفضل
حازم: تمام شكرا لحضرتك
(بيدخل حازم ومعاه البنت لأوضة الدكتور)
الدكتوره: سيبهالي علي المكتب هنا
حازم: تمام حاضر
(بيسيب حازم البنت علي المكتب وتبتدي الدكتوره تكشف عليها وتتفحصها كويس)
الدكتوره: البنت كويسه جداً،اومال حضرتك كنت عايز تكشف عليها ليه؟؟
حازم: علشان ا.... 
(بيتردد حازم انه يقول للدكتوره اي حاجه وخاصةً لأنه مش مطمن للحاله الي البنت فيها ولا للدكتوره كمان)
حازم: انا كدا بحب كل شويه اطمن عليها
الدكتوره: هي بنتك؟
حازم: أ أ أيوه
الدكتوره: غريبه انها مش شبهك بس أكيد شبه مامتها ههههههه
حازم: هههه، ايوه
الدكتوره: علي العموم متقلقش هي كويسه
حازم: شكرا لحضرتك
الدكتوره: العفو دا شغلي.
(بياخد حازم البنت ويطلع بيها من المستشفى ويركب العربيه مع السواق ويقوله يطلع بيه علي القسم،في نفس الوقت بتكون الدكتوره واقفه في شباك البلكونه بتبص عليهم واول ما يمشوا بالعربيه بتختفي الدكتوره.....
********************************************************************
(بيوصل حازم للقسم ومعاه البنت وهو مش عارف هيعمل اي معاها وبيجي العسكري ويقوله....
العسكري: حازم بيه
حازم: لقيت اي حاجه،او عرفت اي حاجه؟!
العسكري: لقينا دا يا حازم بيه في العربيه معاهم وهو كمان محصلوش اي حاجه
حازم: دا البوم صور هعمل اي انا بألبوم صور
العسكري: معرفش يا بيه ملقتش غيره في العربيه وكل حاجه والعه
حازم: طيب روح انت دلوقتي
العسكري: اوامرك يا حازم بيه
(بتكون البنت نامت علي ايد حازم،ويمسك حازم البوم الصوره ويفضل يقلب فيه،بيلاقي صور للبنت مع ابوها وامه وكان في واحده متكرره معاهم في اغلب الصور وشكلها مش غريب عن العيله، وفي آخر الألبوم بيلاقي رقم تليفون مكتوب في الآخر ومكتوب عليه "رقم الشغل" بيمسك حازم تليفونه ويتصل بالرقم لأنه ممكن يوصله لحاجه،بيرن حازم وبترد عليه بنت
البنت: مين
حازم: ممكن اعرف دا رقم مين لو سمحتي؟!
البنت: هو مين الي متصل انت ولا انا
حازم: معلش قوليلي وانا هفهمك علي كل حاجه
البنت:دي شقتي حضرتك عايز مين
حازم: انتي في واحده بتشتغل عندك ليها اخت واختها دي عندها بنت صغيره
البنت: قصدك فريده!؟
حازم: انا معرفش اسماء بس اختها عملت حادثه هي وجوزها وبنتها بالعربيه وكنا محتاجييين حد ي....
البنت: يالهوي وهما عاملين اي
حازم: للأسف اتفوا بس بنتهم لسه عايشه
البنت: هو انت مين!؟
حازم: مع حضرتك الرائد حازم النجار
البنت بتوتر: الرائد حازم!
بس فريده مش موجوده دلوقتي يابيه هي روحت
حازم: طب ممكن تديني رقمها؟!
البنت: حاضر ثانيه واحده
حازم: تمام
(بتجيب البنت رقم فريده وتديه لحازم)
حازم: شكرا
البنت: العفو يابيه
(بيقفل حازم مع البنت ويتصل برقم فريده الي البنت اديتهوله)
حازم: الوو
فريده: مين؟!
حازم: معاكي الرائد حازم النجار
فريده: بلخبطه خير يا بيه في اي؟!
حازم: انتي عندك اخت عندها بنت صغيره؟!
فريده: ايوه فرح اختي خير في اي؟!
حازم: البقاء لله اختك وجوزها اتوفوا في حادثه
فريده بانهيار: فرح اختي ازاي حصل كدا ازاي!! و تاليا تاليا فين؟!
حازم: اهدي كدا تاليا قصدك البنت الصغيره متقلقيش هي كويسه
فريده: هي فين؟!
حازم: معايا في قسم الشرطه،عايزين حضرتك تيجي تستلميها وكمان تقوليلنا لو في اي قرايب لجوز اختك علشان نكلمهم يجوا يستلموا الجثث
فريده: قسم اي وانا هاجي لحضرتك حالاً
حازم: هقولك العنوان
(بيدي حازم عنوان قسم الشرطه لفريده وتنزل فريده بسرعه من بيتها بعد ما تلبس هدومها وهي بتعيط وبسرعه جداً تركب وتروح ع القسم،وبتوصل فريده علي القسم وتكون منهاره)
حازم: اهدي يا أنسه بس
فريده: اهدي اي بس اختي وجوزها ماتوا وتقولي اهدي وتاليا فين!!
حازم: هجبهالك حالاً
(بينادي حازم علي العسكري)
العسكري: نعم يا حازم بيه
حازم: هاتلي البنت الصغيره
العسكري: أوامرك يا فندم
(بيجيب العسكري البنت)
فريده: حبيبتي يا تاليا مبقاش ليكى حد غيري يا حبيبتي انا ياما قولت لأمك تسيب الطريق الي هي ماشيه فيه دا ومسمعتش كلامي
حازم: طريق اي دا؟!
فريده(بخضه): مفيش انا بس مش مجمعه ولا قادره استوعب إلي حصل
حازم: اه طب ممكن تقوليلنا علي أي حد من عيلة جوز أختك علشان نكلمه يجي يستلم الجثث
فريده: هو مينفعش انا الي استلمهم!
حازم: ينفع بس يستحسن ان حد من عيلته يجي
فريده: تمم انا معايا رقم اخوه هديه لحضرتك
(بتطلع فريده التليفون من جيبها علشان تدي حازم رقم اشرف جوز اختها ولكنها بتكون قلقانه وملامحها ظاهر عليها التوتر الشديد)