طفلتي ل فاطمه إبراهيم

"طفلتي"
الحلقه التاسعه

(بيروح حازم لفريده المستشفى بعد الدكتور ما يكلمه علشان يعرف هي تعبانه مالها ويتكلم مع الدكتور)
حازم: خير يا دكتور،فريده مالها!
الدكتور: طبعاً يا حازم بيه انا قولتلك اني شاكك في الأنسه فريده انها بتتعاطي مخدرات ونتيجة التحاليل طلعت ايجابيه ونظراً لكدا الآنسه فريده في حاله صحيه مش كويسه ولازم تتنقل مصحه لعلاج الإدمان
حازم: وهو ينفع في الوقت الحالي!
الدكتور: اكيد طبعاً لو حضرتك حابب اننا نكلم المصحه حالاً مفيش اي مشكله
حازم: تمام انا معنديش اي مشاكل
الدكتور: تمام يا حازم بيه
(بيمشي الدكتور ويدخل حازم لفريده الأوضه)
حازم: عامله اي يا فريده؟
فريده: انا مش كويسه،مش كويسه خالص حاسه ان روحي بتروح مني يا حازم
حازم: لا يا فريده متقوليش كدا انتي قويه وهتخفي وتبقي كويسه وانتي الي هتربي تاليا بنت أختك ومش هتسيبيها لحد تاني يربيها، الدكتور قالي انه هيكلم المصحه وهيجوا ياخدوكي
فريده: لا مش عايزه اروح يا حازم
حازم: انتي مش بتثقي فيا ولا اي!
فريده: انت اكتر حد انا واثقه فيه انا عمري ما وثقت في حد قدك
حازم: اومال اي بقي انتي هتتعلجي وتبقي كويسه وأحسن من الأول صدقيني
فريده: حاضر بس اوعدني متسبنيش
حازم: مش هسيبك أبداً يا فريده،أبداً
********************************************************************
(سوسن في الشقه مع تاليا وبتكلم سيد وتقوله)
سوسن: البنت دي لو مجتش تاخدها مني حالاً انا هموتها انت فاهم
سيد: في اي؟
سوسن: في انها عماله تزن تزن لما صدعتني وانا دماغي مش مستحمله اصلا
سيد: طب ولو جبتلك الي يظبط دماغك!
سوسن: انت بتتكلم بجد!
سيد: طبعاً،نص ساعه وهكون عندك انتي بس خدي بالك م البت لحد ما اجيلك
سوسن: حاضر بس بسرعه والنبي متتأخرش
سيد: هوا وتلاقيني عندك
********************************************************************
(بتيجي ناس من المصحه وتاخد فريده من المستشفي وحازم معاها)
حازم: اي رايك في أوضتك الجديده
فريده: متسبنيش
حازم: مش هسيبك يا فريده انا جنبك
فريده: انا كان نفسي من زمان في الكلمه دي،كان نفسي في حد يقولي انا جنبك، انا جنبك يا فريده
حازم: وانا بقولهالك اهو اني مش هسيبك
(بيكون حازم لسه بيكلم فريده ولكن بتروح في النوم وهي ماسكه ايده وكل ما يحاول يخلص ايده منها مش عارف فاضطر انه يستسلم ويبات الليله دي علي الكرسي جنب فريده،ومن اتجاه تاني خطيبته ندي الي بتتصل عليه وهو تليفونه مغلق علشان مقابلة باباها الي هيحددوا فيها ميعاد فرحهم)
والد ندي: فين حازم يا ندي؟
ندي: مش عارفه يا بابا انا برن عليه تليفونه مقفول
والد ندي: انا اصلا غلطان اني اديته فرصه
ندي:يا بابا ممكن عنده حاجه خليته ميجيش
والد ندي: لو عنده اي فهو المفروض يحترم مواعيده، انا داخل اوضتي وحتي لو جه انا مش عايز اقابله
ندي: بابا يا بابا
(يدخل والد ندي وهو غضبان جداً من حازم يسيب ندي بتعيط ومضايقه من حازم انه مجاش وكسفها قدام باباها)
********************************************************************
(بيروح سيد لسوسن الشقه ويديها المخدرات الي هي بتتعطاها علشان بس تفضل مع تاليا)
سوسن: يابن اللذينه جبته منين!
سيد: دا شغلي انا بقي مالكيش فيه، المهم تخلي بالك من البت وبرضو تاخدي علي قدك بلاش طفاسه
سوسن: عيني حاضر
(ويسيب سيد سوسن وينزل من عندها)
********************************************************************
(تاني يوم بتفوق فريده وتلاقي حازم نايم جنبها علي الكرسي وايده في ايديها بتفرح انه كان جنبها طول الليل ومسبهاش ومشي وتبتدي تصحيه)
فريده: حازم، حازم
(بيفوق حازم)
حازم: فريده صباح الخير
فريده: صباح النور، انت هنا من امبارح!
حازم: ايوه ياستي ومروحتش كمان
فريده: انا اسفه
حازم: ولا يهمك المهم تبقي بخير
(يحط حازم ايده في جيبه ويطلع الموبايل ويفتحه لأنه بيكون مقفول وبيشوف كمية الرسايل الي جياله من ندي)
حازم: ياخبر ندي!
فريده: خير في اي مالها؟
حازم: انا كنت عطيها ميعاد اني هقابلها امبارح هي وباباها ونسيت خالص، فريده انا لازم امشي دلوقتي خلي بالك انتي من نفسك وانا هرجعلك أكيد
فريده: حاضر بس متتأخرش
حازم: حاضر سلام
فريده: مع السلامه
(بتحس فريده بالغيره شويه ولكن هي لازم تتقبل حقيقة ان ندي هي خطيبة حازم وانها مجرد واحده غريبه عنه وهو بيساعدها لأنها صعبانه عليه مش أكتر)
********************************************************************
(بيروح حازم علي بيت ندي ويخبط علي الباب ويفتح باباها)
حازم: عمي انا اسف والله، مكنش بإيدي اني مجيش ميعاد امبارح
والد ندي: وانا ميخصنيش انا اديتك ميعاد وكان لازم تحترمه وتيجي فيه
حازم: والله اسف ومكنش بإيدي حصلت ظروف في الشغل ومقدرتش اجي انا اسف
(بتطلع ندي من اوضتها علي صوت حازم)
ندي: حازم، انت كنت فين قلقتني عليك وتليفونك مقفول ليه!
حازم: انا اسف ياندي والله ظروف حصلت وهقولك عليها
والد ندي: اتفضل يا حازم علشان مينفعش تفضل علي الباب كدا
(بيدخل حازم)
والد ندي: هسيبكوا تتكلموا شويه
ندي: شكرا يا بابا
(بيمشي والد ندي وتبتدي ندي تتكلم مع حازم)
ندي:قلقتني عليك يا حازم أنت كنت فين؟
حازم: هقولك
(ويبتدي حازم يحكي لندي علي كل الي حصل وانه ليه مقدرش يجي ميعاد امبارح تبتدي ندي تتنرفز وتبان عليها الغيره)
ندي: يعني انت مجتش ميعاد بابا وكسفتني قدامه علشان ست فريده بتاعتك!
حازم: لا والله انا من لبختي نسيت،وبعدين انا مكنش ينفع اسيبها يا ندي حالتها مكنتش تسمح
ندي: يعني مينفعش تسيبها بس تسيبني انا عادي صح؟
حازم: لا مش عادي بس هي ظروف و...
(يرن تليفون حازم)
حازم: الوو
معاذ: حازم بيه احنا راقبنا سيد مساعد وائل زي ما حضرتك طلبت وعرفنا مكان سوسن وهو كان عندها امبارح
حازم: انت بتتكلم بجد يا معاذ، متأكد يعني!
معاذ: طبعاً يا حازم بيه
حازم: طب انا مسافة السكه وهكون عندك جهز قوه علي ما اجيلك
معاذ: امرك يافندم
(بيقفل حازم التليفون)
حازم: انا لازم انزل دلوقتي يا ندي هنتكلم بعدين
ندي: رايح في يا حازم وقوة اي!
حازم: هفهمك بعدين سلام
ندي: حازم يا حازم
.................