البارت الخامس
ام عبد العزيز :الهنوف عبد العزيز تضايق يوم رحتي وهو باغيتس ويقو لكم اصبرو علي والحين تطلقتي وهوشاريتس حتى بعد طلاقتس
الهنوف ارتبكت وشتت نظرها بعيد عن ام عبدالعزيز.. يالله توه مارسل اورقتي وش اقولها
ام عبد العزيز :اخليه يتقدم لابوتس تراهو الاول لاتعدين احد عليه
الهنوف برتباك واضح :انشالله
ام عبد العزيز :اخليه يتقدم
الهنوف تهز راسها بمعنى ايه
ام عبد العزيز بفرحه :الله يكملس بعقلس مع السلامه ياامي
ارفعت راسها لها وابتسمت بخجل راحت منها ام عبدالعزيز وهي ارجعت للبنات
ساره :وش تبي
الهنوف بخوف:تقول بخلي عبدالعزيز يجي لابوتس يكرر الخطبه وشاريني الاان
لمياء بتوجس:وش قلتي
الهنوف :وافقت
نوره :طيب والي ماخذتس قبل
الهنوف :انشالله يبيني امعلقه بخلي ابوي يدق عليه
لمياء :غريبه مارسل اورقتس لذلحين
الهنوف بخوف :اخاف ارسلها ووماوصلت لنا
نوره وساره فضلن السكوت والهنووف قامت وراحت لغزيل شافتها عند الحريم واستحت تدخل عقب ماكلمتها ام عبد العزيز ارجعت للبنات ووقفت بارتباك
نوره :وش فيس ياقلبي لاترتبكين كذا
الهنوف بقلق :ابي غزيل وهي داخل
لمياء قامت :انا بروح اناديها
الهنوف: ايه يابعد عمري شوفيني بالمطبخ
لمياء :من عيوني راحت لها لمياء ونادت اغزيل وسبقتها على المطبخ الحريم بالمجلس الداخلي للحريم ابعيد عن المطبخ لازم لفه يعني
ام فهد :لمياء لمياء
لمياء :لبيه
ام فهد :جهزي الدخون الرجاجيل ابوتس طالبه ابسرعه
لمياء في نفسها ياليتني مامريت راحت لمخزنهم وطلعت الجمر وادخلت للمطبخ ولفت على الفرن على طول بتشعله مانتبهت للي قاعد يذوق الجريش على درج المطبخ ومعه دلة القهوه التفت لها عقب ماسمع صوت تفافاها للكبريت ماولع لها
مفلح يشوف ظهرها وشعرها ماعرفها تحنحن يبيها تروح احذفت الكبريت في الغساله والتفت على الدروج بتاخذ جديد شافته واقف ويناظرها عضت شفايفها بقوه وحطت يدها على وجهها وصاحت على طول بصوت عالي وهو نزل راسه ابسرعه وطلع بالقهوه
مفلح اكيد ان هاذي الهنوف كلن يمدحها الله على الزين ياحظك ياعزيز وش الي جابها في طريقك والله من الشين فيك.. ناظزر ليده بها اثر جريش وقف واحد من البزارين دنق عليه حط الدله امسكه مع راسه ومسح يده الي فيها جريش في جيكته من داخل والبزر يناظره مايدري وش يسوي ناظره مفلح وطقه مع راسه :يالله حبيبي لامك للعاد تمر من هنا .!!
صاح البزر بقوه:والله لعلم امي عليك
مفلح :ماتعرفني اصلن ...
البزر يمسح الجريش ويزيد اصياحه : الا اخو مثاعد
مفلح براعه :عنكني رحت فيها ..افتح عيونه بقوه وبصوت غليظ.. تراني شرطي ..انزل على الدله خذاها وراح وهو يلتفت للبزر ويعض بشفايفه ويرفع حواجبه يعني ياويلك والبزر اسكت ارتاح وهو يشوف ملامحها خايفه لف ووقف عند باب مجلس الرجاجيل ونادى فهد
مفلح :فهد عطني القهوه بصبها وانت روح سخن القهوه ذي ..خذاها فهد وراح بها
غزيل :اسم الله عليس لمياء وش فيتس
لمياء ارفعت راسها ودرات بعيونها اتاكد انه اطلع من المطبخ مالقيت يشوفني الاهو الله يسامحتس يالهنوف ليتني مافزعت
غزيل بستغراب:لمياء
لمياء اتبهت لها :مافيني شي عشان الهنوف بس
غزيل :وش فيها الي خلاتس اتصيحين ..وتذكرت ...هي وش تبي بي
ادخلت الهنوف عليهن :السلام
البنات :وعليكم السلام
لمياء بغضب :وينتس وانتي بتلحقيني ذلحين
الهنوف شافت اغزيل واسفهت لمياء اقربت عندها وهي اتفرك ايديها :غزيل ام عبد العزيز جاتني مرسلها ولدها وش اسوي
غزيل :انتي مابعد جاتس ورقة طلاقس
الهنوف بحزن وخوف :لالا
غزيل :اصبري لين يروحن من العرب وبعدين بتصرف روحي ذلحين وخليس عاديه
اطلعت الهنوف وراحت وراءها لمياء الي زعلانه وتحس بشي في صدرها
اجلسن وكملن السمره الي صارت ممله و هاديه عقب ماكانت حلوه
راحو المعزيم كلهم وعبد العزيز تاخر اشوي الين ماعاد بقى احد قام واجلس جنب ابو فهد
عبدالعزيز :عم انا ابي الهنوف انكنه لذلحين تبيني
ابو فهد التفت عليه وبرتياح :الله يكتب الي فيه الخير ابسالها وبنرد لكم الخبر ولا تباطونا
عبد العزيز في نفسه ولا انتباطاكم ترده لي يعني ماعليه اهم شي الهنوف اتحصل :اخذو راحتكم وتراني شاري طيبكم
ابو فهد :تسلم ابو فالح
عبد العزيز يوقف :تمسو على خير
ابو فهد :وانتو من اهله
ادخل ابو فهد على اهله ونادى ام فهد واطلب الهنوف
منيره جت بتقوم واحلفت عليه اغزيل ماترقى الدرج وراحت بدالها
غزيل رقت لهن فوق شافتهن بالصاله :الهنوف ابسرعه ابوي يطلبس اكيد انه بكلمس في موضوع عبد العزيز
الهنوف توقف وتاخذ حذيانها :بجي الحين ..اسرعت لحجرتها تسبحت على عجل البست جلابيتها تعطرت وامسكت شعرها ذيل احصان ونزلت
الهنوف :مسك بالخير يبه
ابوها :مسيتي بالرضى والسرور ..اشر لها تجلس جنبه راحت جنبه واجلست
ابو فهد :الهنوف عبد العزيز عاد خطبته وانتي توتس في ذمة سلطان
الهنوف حسيت بقلبي واكنه انعصر بذكرى اسمه الي ماسمعته الا مرتين بس:مدري يبه وش اسوي
ام فهد :دق عليهم واطلبه باسمه ذكره اكيد انه نسى .
الهنوف والله من كثرهن النسوان يوخر ذي من وجه ذي
ابو فهد بتفكير :الظاهر انه عطاني رقمه.. التفت على فهد .فهد جبه شفه في درج السياره
ام فهد بتساؤل:بدق ذلحين
ابو فهد يناظر ساعته :توى الساعه عشر.. مستقبل الهنوف يهمني ماله داعي انأجله بعد ..
الهنوف ببتسامه لابوها :الله يخليك لنا يارب ..
جاب فهد الرقم ومده لابوه
ابوفهد :السلام عليكم
الرجال :وعليكم السلام
ابوفهد : الامير سلطان ..
الرجال :لا والله موب انا ..
ابو فهد :اذا تقدر ياولدي تعطيني الامير سلطان
الرجال :ياوالدي الامير مايرد على الناس في الجوالات
ابو فهد :ابيه ضروري
الرجال :تقدر تجيه في مكتبه ولا في بيته اذا كان امر شخصي
ابو فهد :ايه شخصي.. ولا انيب اعرف بيته ياولدي
الرجال :انت بالرياض
ابو فهد :لا بالله منيب حولها
الرجال :اذا جيت الرياض دق على الجوال هذا وانا بدلك عليه
ابو فهد :ماقصرت مع السلامه
الهنوف بؤجل شكله مايبشر بالخير
التفت عليهم ابو فهد :لازم انقابله .. الهنوف بكره انكني قدرت اخذالي يوم رحت انا وياتس انخلص امورتس ولاطلبوتس لينس معي المشوار موب اقريب
الهنوف بخوف وش يوديني برجلي له مأقدر اشوفه يارب ارحمني ويسر اموري
ابو فهد : الهنوف انتي معي
الهنوف بقلق وحزن نزلت راسها : ايه
ام فهد :وش فيتس لونتس امخطوف
ابو فهد :ماعليس يابوتس كله اورقه اتوقعين عليها
الهنوف تسحب ابتسامه :ايه الله ييسر.. قامت منهم وادخلت على لمياء الي منسدحه على السرير و داقها هجوس ماهي مع الناس جات واجلست جنبها التفت عليها لمياء :وش صار
الهنوف :بروح الرياض اجيب اورقتي
اجلست لمياء وبتشجيع :ماعليس انشالله..صيري مثلي شجاعه وقويه اصامد الاعداء ..
الهنوف مبتسمه بهدؤ:الظاهر الاعداء مفلح... واتفكرين فيه يوم دخلت صح
لمياء بسرعه:خير وش عشانه افكر فيه
الهنوف :بس حاسه انه مغير لتس حياتس
لمياء بقرف : هو الوحيد الي اصادفه اكثر واحد في جماعتنا بس وبعد من زين الصدف
الهنوف بتعب :والله مدري بروح ارقد ...قامت منها واطلعت
لمياء ناظرت فيها لين اطلعت وتنهدت من قلب "حلو ومزيون حتى يوم اقرب منه فيه غميزه نفس غميزات اختي هنوف ..وش علي منه وزينه بس احس اني ودي انه يبعد من حياتي قبل يغير لي قلبي
\\\\\
في صالة ابو مفلح
نوره :يمه ام عبد العزيز تتطلب الهنوف للحين
ام مفلح :ايه شفتها يوم نادت نوره
مساعد :وش تبي بنوره
نوره خزته بنظره وسفهته
ام مفلح :ماهيب نوره اختك خالتك
مساعد :ايه ونا افكر مستغرب احد ينادي ذي
نوره :وانت شعليك من سوالف النسوان
مساعد :خخخخخ شكلي قهرتس ذاك اليوم مره ياطريق المشاه... تسوين رياضه ها نويران
نوره :سخيف وربي الله يعينك على ثقالة دمك
ادخل مفلح عليهم وهو وابوه :السلام عليكم
كلهم :وعليكم السلام
ام مفلح :تاخرتم كل ذاه عند الرجاجيل
ابو مفلح:لا روحنا شوي لوورشه
ام مفلح : ليه من الي سيارته خربانه
مفلح :انا ... وصلني ابوي لهناك حطينها وجيت معه ...ببيعه ذالسياره
ابو مفلح :هذي اول مره اتخرب
مفلح :لا قد تعطلت معي لطريق الشرقيه ولا زانت الى قدني برجع
ام مفلح :موب ذاه بس قصدك
مفلح يفسخ اشماغه وببتسامه :لا ابي اشتري جيب ودي به
ابو مفلح :ايه قل كذا
اضحك مفلح وابو مفلح لف على نمشه يسولف عليها..
قام واجلس جنب نوره
حط المركى تحت فخذه والتفت عليها :لبس بنات خالتي نوره ساتر اليوم
نوره بستغراب وضيقه :معاد الا ذي تدخل حتى في لبسهم
مفلح :كلن في راسه عقل واخبر بنفسه
نوره :زين انك عارف وش الي طراك تسال
مفلح ينزل اكمام ثوبه :شفت الهنوف
نوره بتوجس :وين شفتها
مفلح :في المطبخ
نوره بحسره لايتعلق بها: شفتها زين!!.. كان صديت طيب
مفلح :والله هي الي ادخلت علي في المطبخ اهايط مثلن وحذف عليها اشماغي
نوره :ههههه طيب شافتك هي
مفلح :ايه وبكت
نوره بستغراب : غريبه تبكي موب عادتها دمعتها قريبه ..وبتذكر ورحمه .. يمكن ماثر عليها موضوع رجلها الاول
مفلح وخر من المركى :ليه
نوره :ام عبد العزيز ارجعت اتخطبها وهي خايفه
مفلح يرفع حاجبه :طيب اذا ماتبي ترفض
نوره تناظره :الا تبيه.. هي خايفه من رجلها الاولى عشانه مارسل ورقتها
مفلح :اهاا طيب ... وبتردد..والله حلوه البنيه
نوره بأسى :مفلح ترى الحين معرسه على ذمة رجال بلى هالحركات التافهه
مفلح بغيض :لاااا حلو علمتيني ..أبديت رايي..وبعصبيه وصوت قصير ..انا كم مره قلت لاتحللين على كيفتس
نوره بخوف:كلمه قلتها وراحت
ناظرها بهدؤ: اساليها بدون لاتفهمتس ليش بكت يوم شافتني "وفي نفسه ليكون متحسسه من نظرتي لها بالسوق
نوره بتردد:مدري بشوف
مفلح يصك على اسنانه بصرار:لا بتقولين لها ...صد منها وقام البس حذيانه عند لباب وطلع للستراحه
الهنوف ذاك اليوم مازار النوم اعيونها الين اذن الفجر بعدها صلت وراقدت اليوم كله الى اذان العصر ولا نزلت لهم تحت
لمياء تقعد جنبها بالصاله الفوقانيه:ابوي خذا اجازه اليوم وبتروحون بكره الصبح
الهنوف ببتسامه :ادعي لي
لمياء تهديها :وش بيصير يعني
الهنوف تنهد:خايفه وخجلانه منه احس معاد ابي اخليه يمر بحياتي وذاكرتي
لمياء :خلاص حبيبتي اهم شي انتي تزين امورتس ...
هزت راسها بتفهم ونزلت مع لمياء تحت
شافتهم كلهم متجمعين اجلست معهم بذهن شارد وحيل مههدود
ساااره :راشد
راشد :لبيه
ساره بتردد:ودي اروح لامي عند جدتي اتوديني
راشد يعقد حواجبه :ليه
ساره بترجي:والله مليت جالسه وحدي
راشد :ونا اقعد بلحالي
ساره تنهد بحباط وتناظره
راشد يبتسم :والله مدري ياساره يعني اوديتس واخاف امي بترجع بدري شوفي
ساره بفرحه :لا دقيت عليها بترجع بعد اسبوع والله طويله علي
راشد:اجل خلاص بستاذن من الدوام اجيتس والقاتس جاهزه
ساره :الله يخليك يارب ....
في بيت ابو فهد تعشت غصب عنها عقب ماجبرتها امها حست بعياء امسكت فمها ورقت فوق بسرعه رجعت كل الي في بطنها في الحمام
لمياء واقفه عند الباب وبخوف:وش فيتس
الهنوف بالم : احس بتعب وكبدي تقلب علي...وبكت... مأبي اروح
لمياء تسندها الى جلست على السرير :خلاص قولي لابوي
الهنوف بحيره ودموع بعيونها :اخاف يرجعونه يروح ويجي موب هين الطريق
لمياء : توكلي على ربتس انشالله مايخيبتس
الهنوف تنزل ادموعها مره ثانيه :متوكله على ربي بس فيني خوف مابي اشوفه مره ثانيه
لمياء :ايه طيب مراح تشوفينه موب لازم اصلن كل امورهم اتدبر هم مايسون شي
الهنوف تمسح خشمها :انشالله الله يسمع منتس ..اطلعت منها لمياء وهي ارجعت تفكر
قعدت الى الساعه 6 ماجاها النوم مره توقف عند الشباك ومره تنزل للحوش شافتها امها جالسه عند باب المطبخ
ام فهد :ابوتس بيمشي الحين
الهنوف توقف :بروح اخذ عباتي
ام فهد بشك :مانمتي امس صح
الهنوف ببتسامه :لا بنوم انشالله اذا جينا يومين ..
رقت لفوق البست عباتها وانزلت لاابوها تحت بالسياره
ام فهد :سمي بالله
الهنوف تبتسم اطمئن امها:بسم الله
ابو فهد :يالله مشينا انشالله انخلص ابسرعه ماعطوني فرصه كثيره
الهنوف :خلاص انا جاهزه
ابو فهد يمشي :توكلنا على الله ... راحومن عند ام فهد الي تدعي لهم يرجعهم سالمين
في الطريق الهنوف ساكته وتفكر في الا شي الى ان وصلو الرياض الساعه 12 ودق ابو فهد على الرجال ووصف له بيتهم
ابو فهد :بروح لشقه نرتاح والعصر روحي له بيته
الهنوف بفجعه:بلحالي
ابو فهد :بوقف لتس عند الباب مستحي ادخل.. وهو رجلس ناديه وعلميه ولاب ذاك الوجه امقصر
اسكتت الهنوف وهي متلخبطه اخاف والله
الساعه ثلاث اطلعو من الغرفه الي استاجروها
ابو فهد :هو يقول جنوب الرياض بس وين الرياض ماهيب اصغيره
الهنوف ملتزمه الصمت
دق ابو فهد على محمد :انا ذلحين جنوب الرياض طالع منها مره وحده قدها وراي
محمد :خلك على الخط الى ان تجيك لوحه مكتوب فيها مزراع الراحه كيلو وخذ بعدها يمين وبي بان لك البيت وبتعرفه
ابو فهد برتباك :تسلم يابوي مع السلامه
مشو مع نفس الطريق الى اوصفه لهم وبان لهم بيت كبير وفخم صوره نص الحي ماخذه وحوله ابيوت حلوه وعاديه
وقف ابو فهد عند زاوية البيت:يالله يابنتي انزلي له
الهنوف برجى:انزل معي
ابو فهد :ان شافتس وحدتس يمكن يخلص لنا امورنا بسرعه
الهنوف تنزل بؤجل صكت الباب ولفت لاابوها
ابو فهد:الله الله يابوتس بالكلام الهادي والترجاي حتى هو يسمح امرس بسرعه
الهنوف تنهد بضيق اترجاه والحاجه لي!!! يارب ساعدني نفسي ماتطيعني.. غمضت عيونها وتنفست بقوه مشت ووصلت لبوابه طلت على غرفة الحارس
وطلع لها :نعم ياخت
الهنوف :ابي الامير سلطان ضروري
الحارس يتكي على المكتب وببتسامه :موب كل من جاء اندخله اتعرفينه معرفه شخصيه وتثبيتين اهلن وسهلن.. والا قولي وش بغيتي وحن بنعلمه
الهنوف بهدؤ وخوف :قول له الهنوف
الحارس يرفع عينه فيها :الهنوف وش اسم ابوتس وش القربى؟؟.. معليش بس احنى مامنين
الهنوف لعنبوكم والله لوني بنط في حلقه وبقوه :هنوف بنت ابو فهد هنوف ارماح وانا متاكده بيسمح لي
ناظرها الحارس وهز اكتافه ادخل داخل اشجار كثيفه وماعاد يبين لها
غمضت عيونها بهدؤ وبطنها يمغصها . . اشوي وطل عليها الحارس وافتح الباب تنفست بعمق وادخلت ناظرت في الحارس:وين اروح
الحارس :الطريق هذا الي (اشر على طريق واضح بين الاشجار )خلك عليه وسيدي موجود على كراسي هناك
حست بنبض في راسها " سيدك" ابلعت ريقها ووقفت وهي تناظر الطريق المحفوف بالاشجار لفت بنظرها للحديقه الواسعه مدت يدها لقلبها تهدي من رجفانه مشت بأقل من مهلها وكانه تبي شي يحدث وينتهي الحلم الي تعيش فيه ... وقفت بسرعه ملقيها اظهره ومرجع اشماغه ورى اشوي وحاط عينه على الاوراق الي قدامه
تنفست بسرعه ولفت تدور اي شي تمسك فيه حطت يدها على حلقها وامسحته كم مره هدت نفسها خلاص ياهنوف لازم تخلصين بسرعه وتطلعين لا ابوتس وترجعين للبنات مشت الى ان وقفت وراءه .. وبتردد ليش مايلتفت اللحين.. وش اقول له؟؟
تقدمت ووقفت ابعيد اشوي :السلام عليكم
ارفع راسه لها وابتسم وبصوت ثقيل :وعليكم السلام.. هلا والله بالهنوف وش حالتس
ارجعت لااردي بعد ماوضحت ملامحه الي اجذبتها حتى وهي تكره تصرفه الارعن :طيبه
سلطان :سمي يالهنوف وش بغيتي
الهنوف بدون مقدمات خربتها:انا بعرس وبي اورقت طلاقي ماروحتها
اضحك بخفيف وقام لها :طيب يالهنوف على هالخشم اعطيتس ايها... بس موب اليوم بكره عقبها روحي واعرسي على الي تحترين
الهنوف بسرعه :لازم اليوم ابوي ماخذ اجازه يوم واحد بس وبنرجع اليوم
سلطان يهز اكتافه :مافي مشكله يرجع وانا برجعتس سالمه غانمه بس ... ابتسم ابتسامه جذابه ومسك لحيهها..ابي ليله مثل ذيك اليله باظبط ..
حست بحراره وغضب وكرهتته وتفكيره المحدود ناظرت وجهه ونزلت اعيونها على شنبه الخفيف:ابعيدن عن شاربك تلمسني مرتن ثانيه حتى ولو اشعره
امسك برقعها بهدؤ ورفعه بقوه لين شاله من وجهها ناظرته منصدمه
قرب منها وبثقه :لازم ولو.. تجين وتاخذين الي تبين بلاش
الهنوف بتوتر :خذيت الي تبي والى يومك وانا نفسيتي وحياتي كلها متغيره تبي شي غير هذاه
حط اصبعه الابهام على لحيها واصابعه الثانيه تحت ذقنها ورفعه صوبه:ماخذيتس الا وعطيت وابوتس مرتاح بلخير الي عنده الى يومتس هذاه
الهنوف بأسى :خلاص خلني اروح في حال سبيلي والله يجزاك خير ماقصرت...
ابعد عنها وبعدم اهتمام: والله انتي جايزتن لي مره وابيس بعد اليوم وعقبها الله يسهل طريقتس
الهنوف ماينفع معه ترجاي وبغضب:تبطي بعد تذوقها....
امسكها مع عضدها وارفعها صوبه ارفع وحده من حواجبه بستنكار وغيض :طولتيها ورب البيت مامنعني منتس الااني عارف ماتقدرين الا على الكلام
الهنوف بتحدي من الغيض الي فيها:هاطل وانا بنت ناصر ...
هدها وعطاه كف على وجهها كله الى ان طاحت ناظرته بغيض ورصت على اسنانها تمنع دموعها
سلطان بهدؤ :اعقبي ويعقبن الي مثلس.. ليله وحده وباخذها
:سلــــطان انا اخو نوره.. هذي اسواتك وانا مخلن لك الحبل على الغارب
التفت على صوته وراح له بهدؤ حب خشمه وراسه :كيف حالك ياوالدي
ابو سلطان بعتب:اليله الي تطري تبيه بالحلال ولا الحرام ياولد مهره
سلطان وعينه في عين ابوه :باالحلال يبه بالحلال هاذي مرتي ..
قامت والبست برقعها ووقفت مكانها وهي تمسح ادموعها الي انزلت غصب عنها
ابو سلطان يلتفت عليهاوبجراه:ليه ترفضين تبين شي ماعطاتس اياه
الهنوف بصوت قوي وخانقته العبره:منيب مرته انا معلقه اربع اشهور في بيت ابوي انتظر ورقتي الي قايلي بنفسه انه بيرسلها... وماوفقت عليه الا اني داريه انه موب الي بعيش معه طول العمر وهو جاني بذل في بدايه ويبي يعود علي مهانته وانا عيت نفسي ترضاها وماطاوعتني... والمال ماجيت له اطلبه...
راح لمكانه واجلس وهو يناظرها:وانا على كلامي ورقتس بتاصلتس
ابو سلطان يقاطعه وهو معجبه كلامها :لا.. لا.. لاتاصلها مير تكرمها وتعزها مثلها مثل امك وهي في بيتك ... التفت على الهنوف وش اصلتس
الهنوف بهدؤ:......
ابو سلطان :ونعم... ويناظر سلطان الي يناظر الهنوف بسرحان ...كذا تسوي بربع امك وهذي دبرتك في خوالك البنت خلها على ذمتك هذي الي بتجيب لك عيالن يعزونك بين اعيال عمانك
سلطان يلف بنظره لا ابوه :نعم وسبعة انعام.. لكن انا سامح خلاص متنازل لها عن الي ابي وتاخذ اورقتها الان اذا تبي
الهنوف بفرحه خفيفه واستحت من ابو سلطان:ايه ابيها ذلحين ابوي برى
ابو سلطان بصرامه :لا اجلسي في بيت رجلتس وابوتس يقلط في المجلس بروح له الحين ..ارفع عينه في سلطان ورص عليها ..الله الله فيها طعني ذالمره
سلطان وكن الامر مايهمه:سم طال عمرك ابشر الي بيرضيك بمشي فيه
ابو سلطان بنبرة استغراب:تم الموضوع
سلطان بابتسامه استهزاء:ايه تم ولا تبيني اغيره
ابو سلطان :ماخبرتك ياسلطان اتوافق لي على شي يخصك
سلطان يوقف ويروح لابوه وبتمثيل :افاا يبه كل اموري تحت يدك
ابو سلطان يناظره بتوجس:زين هذا الي ابيه
الهنوف بصدمه يخططون ويقررون بدالي يعني يعني خلاص معاد اروح ابد لابورقه ولا بنفسي
راح ابو سلطان للمجالس البيت
وسلطان التفت عليها قرب صوبها وهي منزله راسها وعيونها هماليل
سلطان بتهديد :اسمعي بيرجع الوالد.. وانتي الي ارفضي ماقدر ازعله على الاقل موب االحين..واوعدتس عقب الي ابي اخليتس تروحين..
الهنوف ترفع راسها له شاف ادموعها الي ماقدرت اتسيطر عليها :ايه بعيي حسبالك اني بسكت وبرضى في واحد كل ديره بنت.. ماتنعد مدن المملكه ياسلطان!!!
سلطان ناظر في عيونها الي محددها رمش كثيف واسود ابتسم بستفزاز:دمعتس اقريبه مافيه شي يزعلتس..!! رجل كل يتمنى مواطيه وعز ماعاشن فيه غيرتس
صدت عنه بالم اجلس على كرسي وناظر فيها بتمعن ربع ساعه وارجع ابو سلطان
ابو سلطان واقف من بعيد :انا بروح الحين في امان الله .. الهنوف لاتقصر عليها ولاجي الاكل شي زين
سلطان في نفسه الظاهر خذا راحته عقب الموافقة وقف بسرعه امسكها بيدها وهي تناظره بقهر واعتراض ومشى بها الى ان اوصل ابوه
سلطان:البنت رافضه مره وحده وانت شف الامر بنفسك
ابو سلطان :عليه عهدن ان مايصيبتس شي من صوبنا وان كل امورتس منفذه وبتوافقين مابه شي يحدس ترفضين
الهنوف بخوف ورجى:لا اسمح لي انا برجع مع ابوي مابي اقعد اهناه
ابو سلطان بنظره قاسيه وقويه:ليه ماتجلسين لانقصتس شي دقي لي انا موب لسلطان ...هذا مايردن فيه النسوان
الهنوف بتوتر وبخوف من السالفه لاتعقد : ماقدر
سلطان ساكت ويناظر لها تحاول تقنع ابوه بكلام بارد
ابو سلطان بنظره قويه :لاتراددين بشي تام مدام سلطان وافق انتي وافقي
رص على يدها الي بكفه وكأنها يجبرها تقنعه بعد
لفت بنظرها له وبعناد مدام بيجبرني بوافق اقهره مثل ماقهرني : ماعليه خلاص الي تبيه.. موافقه بس بشوف ابوي
رص على يدها بقوه الين حست الدم توقف فيها تحملت واسكتت لفت عليه عقب مازاد الام بعتب فكها بدون لايناظرها
ابو سلطان :ابوتس علمته وروح ويسلم عليتس ويدعي لتس... يالله مع السلامه والتفت على سلطان سوى لها ياسلطان عرس تفرح به مثل البنات
سلطان ساكت وبنظره سخريه ماقدر يخفيها من ابوه الي شاف نظرته وصد عنه رايح
سلطان ببتسامه رايقه امسك كفوف يديها ولفها له :انا كان بمكاني اني ارسلتس لهلتس وورقتس معتس ولعاد اشوفتس.. وبسلوب عدم مبالاه.. وابوي ماهمني رايه
الهنوف بقهر تبعد عنه :كريه ...
سلطان يلف عنها ويروح : السانتس يبي له تعديل ..روحي لهم داخل...
تنفست بسرعه وغيض ارفعت برقعها شوي تبي نفس اجلست على كراسي الحديقه وين ادخل ومن عنده يروح مايعلمني وقفت بمكانها ولفت بنظرها تدور باب ولا شي أدخل وذا لقيت احد وش اقوله بعدين اناخلاص زوجته يعني تبعه وين اروح ياويلي بجلس لين يجي يدورني اجلست ساعه كامله محد جاء وقفت وراحت تمشي بانحاء الحديقه شافت باب الرئيسي للقصر واتجهت له وقفت عنده ودقت الجرس افتحت لها شغاله فلبينيه :نعم مدام
الهنوف:بدخل داخل بيت
الي ياصل باب البيت الريئسي خلاص ينفتح له الباب افتحته لها وادخلت
ارفعت عيونها بنظره للبيت كله صالات كبيره مفتوحه وواسعه بعضها شعبيه وبعضها كنب وكراسي والدرج بالنص ويتفرع منه درجين باليمين واليسار الي فوق مكشوف للي تحت غير عن صاله جانبيه بها حاجز خشبي لى اليمين وقريبه من الباب اجلست على اقرب كرسي في الصاله المفتوحه حست بتوتر من جلوسها بلحالها ومحد يعرف بوجودها
ادخل المجلس بهيبته وثقته وقفو عقب ماشافوه اجلس
سلطان بهدؤ:تفضلو الله يحيكم
ابو منصورجنبه:الله يحيك ..وش لونك ياابوي
سلطان:بخير يمال الخير وش لونك انت عساك طيب
ابو منصور ببتسامه طيبه:طيب جعل يطيب حالك ..
سلطان على صوته للموجودين:وش الي سمعته مايصلح منكم ولا هوب متوقع
واحد من الجلوس بفشله:والله ياطويل العمر ان الامر احصل من غير قصد والرجال جاي يستسمح
سلطان يلف لراعي المشكله :وش تبي يامانع
مانع بتمثيل:هو اخطا علينا الرجال وادخل علينا في مجلسنا وهددنا وانا تكافينا شره بالله بس انه مارضى وارفع السلاح في وجيهنا وولدي ماصبر ووقف في وجهه بالسلاح ومثل ماتشوف تصاوبو في رجليهم
سلطان برفعة حاجب اليسار ميزه فيه:انا عارف ذاه كله اسالك وش تبي العوض..!!
مانع ببتسامه خبث:كان نبي ديه لعين اولدي الي افقعها لكن الحين خلاص ابيه يخيس بالسجن ولا يفقع عينه مثل ماصار لنا
سلطان ابعد عن المركى وقدم جسمه وبرفض قاطع وهادي:لا لا... بتنازل عنه وبدفع بداله الديه
مانع بغيض من ناجي الي ادخل عليهم بسلاح في مجلسه وفشله قدام ربعه الي جاو من قطر وهو ماقدر يوقفه عند حده..
ارفع راسه بتردد لسلطان: لا مافيه تنازل ابيه ياخذ حقه
سلطان يتمالك نفسه لف بنظره لخاله اخو امه ابو منصور وشاف في عينه انكسار على ولد بنته الي ارفض مانع يتنازل عنه
سلطان بقوه وحده:ناجي بيطلع من السجن اليوم سوا رضيت ولا ضقت والديه بندفعها لولدك لانها حقن لله ماغيرها شي
مانع يناظر ابو منصور وبحقد:بس هذا حقنا ولا علينا من ناجي
سلطان يعود يتعنز ويحرك خيوط المركى وببرود:تطلع الحين من مجلسي الي مايقدر ولد عمه ماقدره والدية لاهيب جايتك لا انت ولا اولدك وناجي يطلع من السجن من عين الصبح
مانع بتوتر وقف واطلع من المجلس عقبه بدت السوالف ترجع طبيعيه وكانه ماصار شي قامو الرجاجيل يطلعون بعد ماذان المغرب
محمد وهو يقرب من سلطان ويجلس جنبه
محمد:ليش رفضت تعطيه حتى الديه ماتوقعت انك بتطرده
سلطان يلف لمحمد وبهدؤ: بغضت نبرة التأمر في صوته وكانه متحكم بالامر
محمد يتنهد:عشان ابوي صبرت نفسك ..ابوي بيتحسس من جماعته
سلطان يلف عنه:كل شي الا خالي يامحمد صعب نظرته تنكسر قدامي عشان واحد مثل مانع
ابو منصور يسمع لهم انهى كلامه مع الي معه ولف له:الله يعينك انت ولدنا ولازم تحمل المشاكل الي بتجيك منهم
سلطان بقوه: يتحكمون بانفسهم موب ذي اول مشكله تصدر منهم ومالينت لهم الطرف
ابو منصور ببتسامه حكيمه وثقه:ان اضمن لك عقب كلامك معه معاد يعودها ..وبتردد ..بشر عن ابوك
سلطان :طيب طيب الظاهر كان يبي شي وراح مانفذه ..
ناظر محمد لابوه بعدم فهم اقامت الصلاه بمسجد البيت وقامو له
ناظرت في المره الي جاتها بالخمسين وجهها سمح ومبتسمه لافه على راسها شيله وفي يدها برقع
ام سلطان:مرحبا والله
