البارت الثاني والثلاثون
ام راشد بفرحه تفتح الباب:مرحبا
راشد يتلفت :البقى ..فيه احد
ام راشد :لا لا كلهن بالمدرسه ادخلو شوي
ادخلت نوره سلمت على عمتها وسلم عليها راشد
راشد :ربع ساعه وبنطلع لنا في شقه
ام راشد: مافيه شقق .. فيه احجر في المحطه..استريحو ذلحين وبدكم اتدوورن
نوره :متى تطلع ساره..؟؟
ام راشدتناظر ساعتها:بقى نص ساعه وتبداء الطلعه..
راشد يقوم:صعبه لحد يجي ويلقانا اهناه بروح وتعالن معنا الى ان نرجع..
ام راشد:انتو روحو اذا جات ساره جيناكم
راشد:يالله نحتريكم على الغداء ...
اطلع هو ونوره بعد نص ساعه ادخلت ساره على امها
ام راشد:بدلي بسرعه بروح لراشد في المحطه
ساره بفرحه:اوصلو ..
ام راشد:ايه بسرعه ..لاروح واخليتس
ساره بعجله:طيب طيب يالله ...بدلت ملابسها علمت البنات واطلعت هي وامها للمحطه
ام راشد:هذا سعود الي عند راشد
ساره تناظرهم بريبه:ايه..خلينا ندخل..
ام راشد:بروح اسلم عليه
ساره بغيض:يمه وش اتسلمين عليه توتس شايفته امس
ام راشد:اجل امره ولا اسلم ...
تنهدت ساره بملل وام راشد تقرب منهم
سعود:مرحبابش
ام راشد:البقى...وش لونك
سعود:زان لونش ..عساش طيبه
ام راشد:طيبه الحمدالله ...
راشد يبتسم:ها يمه وش رايتس اعجبوتس الجماعه
ام راشد تناظر سعود :اي والله ماعليهم قصور ومباركن المنزل الي اجمعنا بذالربع
سعود :جعل يقصر منش الشر ..ماغير عوانينا والساعه المباركه نلتقي فيكم
راشد :هذا يمه ااخو سعود ماخذ اخت ماجد(رجل غزيل)
ام راشد بستغراب:لا اثر انتو هل المعرس والله ياولدي ماندري
سعود : ايه العرس سكيتي عرسه الثاني...
ام راشد :ايه ..هو معرس حرام توى البنت صغيره
راشد انحرج من امه وساره ماسكه ضحكتها
سعود ببتسامه:صح توى عمرها 17 بس اخوي ماعنده مره قبلها متوفيه
ام راشد :الله يرحمها ويعوضه خير
سعود :امين ..يالله اسمحو لي انا وراي مشوار بعيد
راشد:الله ييسر لك ماتشوف شر..مع ان حنى نبي نجلس معك
سعود :انشالله اخلص بدري واجي اذا زانت ظروفي..
راشد:لااا احسب احسابك لازم تجي بسرعه انا اسبوع وماشين
سعود :ابشر .. بس هاا ترى بنشب لك معرس وانا رجالن عزوبي
راشد:هههه مدري بشوف ..اعرس اعرس
سعود يزم شفايفه :امممم العرس بطلناه خلاص نبي الحور ابرك...
راشد:افاااا ماادخل مزاجك احد من حور الدنيا...
ام راشد:كلن يتمناك ..
سعود يناظر ام راشد :عاد جربنا مره وعفنا الباقي ..مع السلامه
راشد:مع السلامه ...
وقف سعود عند باب السياره يرتب مقعده وراشد رقى فوق ناظرت ساره بظهره حست بندم وضيقه تنفست بعمق واتبعت اهلها
.....
وقفت عند الباب ترددت تنزل ناظرت له راقد .. بس اذا نزلت بينقدون علي واخاف يزعل... تنهدت ولفت ترجع للكنب
افتح عيونه وناظرها شاف انها متردده ارفع راسه ونادها:قربي..
لفت له :نعم..
سلطان يجلس ويناظر لها:ساعديني..
رطبت شفايفها وقربت منه.. امسك يدها ووقف عنزت له الى مغاسل داخل الحمام اجلس على البانيو غسل وجهه وفرش اسنانه ولف لها قربت منه وعنزت له اوصل الكنب واجلس عليها
ولفت بتطلع
سلطان :وين ..
الهنوف بهدؤ:بنزل تحت
سلطان ببرود:مارقيت لتس عشان تنزلين..
الهنوف بعتب:لاخلني انزل احاول ولو دقايق ابعد كلامك من راسي شوي بس
سلطان :لا.. بتجلسين يالهنوف وبتسمعيني
الهنوف بالم:سلطان وش تسوي فيني!!.. انا اخاف منك اذا تكلمت ولا تغير اسلوبك علي صعب اسمع مثل كلامك امس ويجي اليوم وانسى صعب علي والله انا انا ماصبر اعترف انه عيب فيني..
سلطان يتامل عيونها غمض عيونه وافتحها بسرعه:المفروض انتس الحين عارفه طبعي وتحملين..
الهنوف بقهر:والمفروض انك بعد عارف طبعي وتحاسب شوي..
سلطان يتافف بنزعاج:لازم تجاوزين وكثير بعد ..
الهنوف ودموعها تنزل:وظنك ماتجاوزت واكثر من الازم تعبت وذاكرت وخبيت عني النتيجه يعني ماتجاوزته وانا الى الحين وهي بخاطري وبعد تعلمني وكانك ماسويت شي.. وفوق هذا حبيتك ياسلطان ..اشهقت بصوتها..حبيتك وانت تجرح وتمد يدك ولو احد غيرك كان سويت اي شي حتى لو اقتل نفسي واعز نفسي من الي كان تسويه فيني .. حطت يدها على فمها ولفت تطلع
سلطان ينفخ بفمه بزهق :الهنووووف
وقفت وعطته جنبها
سلطان :واضح انتس مخبيه كل ذاه في خاطرتس وزين الي طلعتيه عشان اكون على بينه ..انا داري انتس بعد عارفه اني من النوع الصعب يتعلق في مره واحبها ومستحيل يسلم قلبي عبث ابيتس تنسين وتدرين اني لو عرفتس بموقف وكان لقانا غير عن الي صار اني مستحيل اسوي فيتس نفس الي صار وامد يدي اما بنسبه لنتيجه مابي اقولتس وانا بسوي عرس بكذا لازم تروحين عشاني واعدتس فخبيتها عنتس ...
الهنوف تمسح دموعها بتعب
سلطان يناظرها :وكلامي امس ..بتردد في كلامه تنهد وكمل..وحنى باالسياره راجعين اقلقني نواف ياحظك بذالمره واخلاقها ودبرتها وكلامها وزاد الطين بله وهو يمدح زينتس والله لوما هو عارفني واني ماعطي ذاالامور اهميه مثل خبره ان كان قد نزلته من السياره بس صبرت وهو يحسب اني فرحان بمدحتس..
الهنوف:يعني لازم اخرب طبعي عشان يسكت ..
سلطان :تخربين الزين افا.. ماقصدت بكلامي تسذا ابيتس بس تفهمين وش معناته زعلي امس
الهنوف بهدؤ:ماقصرت على التفسير مع انه موب متوقع منك ان توضح كلامك كل ذالتوضيح ..بس بقعد طول حياتي انتظر توضيحاتك بعد ماتجرح
طق الباب لفت للمطبخ وادخلت بسرعه ليشوفها احد وواضح عليها البكى
ادخلت ام سلطان والنايفه وناصر..
عنز ظهره بقلق على الكنب وناظرهم :يالله حيهم
ام سلطان :الله يحيك وش لونك اليوم ..
سلطان :طيب ..
ناصر يتلفت :وين الهنوف ..!!
سلطان يناظره بهدؤ ولف لامه :قد لي اسبوعين من جيت من الشمال ماشفت موضي دقت ولا جات وينها
النايفه بسرعه:سافرت مع رجلها لسويسرا
سلطان بنبره حاده:لاكلمتتس فجاوبي ..وبسخريه ..اووه ليكون زعلانه لسفرها كان بتروحين لها ياحرام..
نزلت راسها بفشله من الي سوت
النايفه :انا اسفه..لفت واطلعت برى بسرعه
ام سلطان تنهد بضيقه:خلاص رضت وتاسفت باقي شهر على عرسها خلها تروح راضيه
سلطان هز راسه بتافف:ناصر ابي الجوال..
راح ناصر لمكتبه جابه وعطاها اياها وراح للمطبخ
ناصر ببتسامه :وش تسوين
تنفست بهدؤ ولفت له ناظرت لبسها فستان نص الفخذ رمادي سيده وبدون اكمام
الهنوف ببتسامه متعبه:ناصر فديتك انا والله احبك مثل اخوي واعزك اكثر مما توقع
ناصر بفرحه:وانا والله اني حبيتس وفرحان ان اخوي سلطان خذا وحده مثلتس كلنا نحبها
تنهدت بضياع وتوتر:انا معتبرتك رجال استحي تشوفني وانا كذا..
ناصر بخجل:اسف ماكان في بيتنا اول احد احاسب عنده جيتي وبدرب نفسي احاسب منكم وعد
الهنوف ويدها على كتفه:والله انك رجال وعقلك كبير..وبتشجيع..اي شي يواجهني صعب بستفزع بك
ناصر :ابشرررري افزعي بي بس..انا بطلع الحين انفذ الوعد
الهنوف ببتسامة طيبه :طيب..اطلع ناصر ناظرت بمراية المطبخ رتبت شعرها واطلعت لاام سلطان الي جالسه جنب سلطان ومعها ورقه
قربت من خالتها حبت راسها شافته ياشر لها تجلس جنبه لفت من ورى الطاوله واجلست جنبه
ام سلطان:الساعه 2 وكانكم ماتغديتو..
الهنوف بهدؤ:اذا يبي الغداء بجيب لك الحين..
سلطان بنظرة استهزاء:توى الحين السؤال..
اسكتت وهي تناظر ام سلطان الي قامت لتلفون ودقت للمطبخ اطلبت غداء ناظرتهم شوي وانزلت تحت
سلطان :عاد كذا وماقدر اصبر انا اقول لامي شي وانتي تثبتين لها العكس..
الهنوف بصدق:مادريت انك تبي اكل
سلطان بقهر :والى الحين مابي واذا جابته رجعيه على طول مابي اشم ريحته..
الهنوف كل هذا تبين انك ماتبي..معليه باصبر عليه على ماقال واحاول اغيره ولو شوي.. اووف انا اتنازل وهو لا..
وقفت تبي تطلع امسكها وجلسها مره ثانيه لفت له على طول لايقول شي وبنبره استهزاء:انا بوقف عند الباب انزله قبل تشم ريحته
سلطان :خليه ابيه..
الهنوف بستغراب:خلاص هدني بجيبه
هدها وهي تلف عنه جابته وحطته قدامه على الطاوله
اجلست على الكنبه القدامه وبعيده عنه ناظرته بملامح وجهه الجذابه وهو يناظر الاكل ارفع راسه له بسرعه ارتبكت وصدت عنه
سلطان :شيليه ماعجبني
الهنوف توقف وتشيله :لو قلت لامك مابي احسن من تقوم وتدق عليهم ..
سلطان :يعني تقصرين في واجبتس وتزعلين يوم قامت تدق..
الهنوف تناظره بصدمه وقهر:انا مقصره في واجبي ...
سلطان يلف عنها ويمدد رجليه على الكنب:لا ..
الهنوف بغيض:بس تبي تقهرني..
سلطان ببتسامه:وش اسوي ادور سالفه ...
مشت عنه حطت الصينيه بالمطبخ ترددت ترجع له رطبت شفايفها خذت نفس واطلعت له برى
شافته يوم لف لها يناظرها تقدمت واجلست على الكنب منزله راسها وتتامل زخارف الفرش بتمعن تأمل ملامحها وباين فيها الضيقه وشين الخاطر
ابتسم وبدون شعور :احبتس ياالهنوف..
مازال عقده خفيفه في حواجبها وتناظر تحت عضت شفايفها بقهر يبي يستميلني بسلوبه مره ثانيه..
دقق في ملامحها ارفعت راسها له شافته ونزلت راسها مره ثانيه حست بنظراته توترت وارفعت راسها
الهنوف بهدؤ وممزوج بقهر ورتباك:وش تناظر..!!
سلطان حرك اصابعه بخفه قدام وجهها:احاول ارسمتس بداخل خيالي..
تنفست بعمق ووقفت:تبي شي قبل انزل لتحت..
سلطان ببتسامه الامبالاه:مابي شي .. بس لاتنزلين..
الهنوف:مشغوله..
سلطان:ترتبين البيت او تزينين العشاء مثلن او ايش..
الهنوف تفرك اصابعها بتوتر وتنفس سريع:انا لازم انزل لو سمحت ..
سلطان يرفع وحده من حواجبه :تفضلي حبيبتي..
ناظرته بسرعه ولفت تنزل اطلعت وصكت الباب حست بدموعها تخونها ليش مارضيت عليه الحين الواحد اذا جاء بيتعذر موب يغير اسلوبه للاحسن وهذا الي سواه
لاحد يلومني لاني مدري وش صاير لي..بس حسيت انه عارف انه يقدر يتحكم فيني وانا لي شخصيه عصيبه..
خذت نفس ونزلت تحت مافيه احد الوقت ظهر توى ماذن العصر تمشت بالحديقه شوي اسمعت اذان العصر لفت للبيت ادخلت الى الحين ومافيه حس لحد ماحبت ترقى مع انها عارفه انه يمكن يتوضى للعصر بس ماقدرت ترقى
............................
سميره بستغراب وقهر:اقول لاتصيرين سخيفه
لمياء بغيض:ايه اسلوبي معه جاف مراح اتاثر بكلامه ولا نظراته انا عارفه من البدايه انه بيلعب بي متعود على البنات
سميره :طيب لاتصيرن معه كذا اهدي
لمياء :لا لا كذااااب انتي لاتنسين يوم كلمته نوف وش قال يقول ماحبها وفي البر يقول اكرهها..بس وشو انقهر يوم شافني ماعطيته وجه ويبيني استسلم له وعقب بلعب بي..هذالا المغازلين
سميره بصدمه: وانت وش دراتس عن المغازلين ..
لمياء بدون اهتمام:يعني انا عايشه بلحالي اسمع ياحبيبتي واشوف ولاتنسين الباص وش قال لنا
سميره:بس كل انسان يتغير
لمياء بدموع:ياويلي ياسميره ليش حظي كذا ليش
سميره بحزن :خلاص يالمياء كل كلامه يبين انه يبيتس لنفسه
لمياء تشهق:كلكم واقفين في صفه ...جاب لي النفسيه مره يقول كلام زين ومره يفشلني ويستهزي ليش ماقلتي انه حقير وماعنده اسلوب ليش بس تكلمون علي انا
سميره تضمها :خلا ص اهدي شوفي البنات يناظرون لنا..
امسحت دموعها وابعدت من سميره المبتسمه
لمياء :خير ليش تبتسمين
سميره :امس محمد كلمني
لمياء بسخريه:وانشالله بعد هو يحرضتس علي
سميره بتردد وخوف:لا يقول يبي يسوي عرسنا مع مفلح
لمياء بقهر:ياشين اعلومتس يعني عشانتس خويتي بفرح
سميره بقهر:مالت والله اني فرحت يوم شفت صورة مفلح بجواله وعلمني انه خويه وفرحت لتس اااه بس علي الي خنتي فرحتي
لمياء :الا صدق الحين يعني اطلعو اصدقاء
سميره :ايه شفته بمقطع لهم بالعمره عرفته وعلمت محمد ان خطيبته الاهو انتي صديقتي
لمياء :ومشالله ومطيحه الميانه بينكم وتوكم ماعرستو
سميره :عاد وش نسوي فيكم انتو متخلفين وانا ناس متطوره اجل عرس على طول لاشوفه ولامكالمه
لمياء :طيب ملينا من النقاش في ذالمسائله بس هو كيف اخطبتس
سميره بدلع :شافني في بيتهم
لمياء بقرف:وي شينتس يوم تدلعين ليتني مسكته بالبر ونصحته..
سميره فجاءه تقرب صوب لمياء وتبوسها:الا لبى روحتس ..من عقب خطبت مفلح عليتس وهو جاي يخطبني وملك بي على طول ههههه
لمياء : كلي بركات الله يزيدني...
...............
نوره بستغراب:تقولينه صادقه
ساره بتوتر:ايه
نوره:اهااا وش قالت عمتي
ساره تنهد:تقول ماعليه لوني وافقت
نوره:شكله بتطلع لنا لمياء ثانيه يبيها وهي تكابر
ساره:يوم رفضت كان ابي احس بالامان توني ماخذيت عليهم وهو جاي يخطب على طول
راشد يدخل الحجره ويجلس:وش عندكم
نوره تلف له:ساره انخطبت
لفت لها ساره بصدمه وغيض
راشد يعدل جلسته:من الي خاطبها
ساره بسرعه:ماتعرفه ...وامي داريه خلاص رفضنا
نوره بدون اهتمام بساره :تعرف واحد اسمه سعود هنا مدري شفته ولا لا
راشد بستغراب:ايوه ايوه سعود اعرفه هو اي خاطبتس
ساره بسحى نزلت راسها :ايه هو
راشد:وليش ترفضين رجال وسنافي وامي تمدحه
ساره ببتسامه:بعيد منا ولا ارتاحت
راشد:كيفتس اهم شي الي يريحتس
ساره :فديتك الله يخليك لي
راشد:انا بطلع المغرب يقولون عندهم دكه يتجمعون فيها بروح لهم ..تبون شي
نوره:سلامتك
راشد:لا جيت جبت العشاء معي منيب مبطي...اطلع وساره تلف لنوره
نوره:ليش ترفضين وانتي متحفزه من واحنى بالبر
ساره بصدق:فكرت من اخطبني وانا مانام قعدت افكر واتخيل حياتي معه حسيت انه موب الي تخيلته ولا ارتحت بصدق
نوره:كيفتس هذا النصيب
ساره:امس كلمتني الهنوف
نوره:وش اخبارها ماحملت
ساره:كان تاكل حبوب المنع
نوره بصدمه:ليه هم عندهم ضعف بيزيدها
ساره :ايه حست بالندم عقب ماحبت رجلها ..على ماظن خلتها نص ارمضان قد لها شهرين تقريبن..
نوره :وش بتسوي في عرس لمياء
ساره :باقي اسبوع وينتهي شهر 11 والعرس بشهر 1 صح
نوره برتباك:ايه
ساره برفعة حاجب:وش فيتس مرتبكه
نوره تبتسم :مافيني شي ..وين امتس مابعد جات
ساره :امي كانه مابعد شافت الناس في حياتها كل يوم عند وحده
نوره :هههههه مشالله عليهم يتجمعون كثير وعمتي منحبسه اهناك
ساره:حظها عاد ماجابت جدتي الا هي وابوتس ووحده ثانيه من رجال بس غريبه مانشوفها
نوره:عشانه ماتقرب لنا وش تبي فينا
.......................
ام سلطان تناظر الهنوف بشك:سلطان يدق على جوالتس ماتردين..
الهنوف تاخذ جوالها من جنبها دق مره العصر بس مارحت وحطته صامت خافت وهي تشوف سبع مكالمات منه اندمت انها حولته صامت اكيد زعلااان الله يستر كاني ماعرف عصبيته حطت الجوال جنبها وقفت مشت شوي وارجعت بتوتر تاخذه من الكنب
ام سلطان:دق على اذان العشاء بس انتو برى ونسيت اطلع اناديكن
الهنوف تبتسم لها وترقى الدرج بسرعه وقفت عند باب الجناح افتحت الباب وادخلت بشويش يارب راقد ..وقفت فجاءه ولا ارجع احسن لي..لالا واذا بغى شي..اووف مشت على فرش الردهه الفاخر وقفت على عتبة باب الحجره وناظرت كنبات التلفزيون مكان اهناه ناظرت السرير موب موجود
ادخلت شوي بوسط الحجره شافته بالبلكونه واقف ومعنز يده على السياج وسرحان
وقفت ورءاه عند باب البلكونه وبسرعه:الجوال كان صامت مادريت وخالتي نست تعلمني انك طالبني ماعليش اسفه..
سلطان يلف لها ويتجه صوب الكرسي اجلس وظهره لها:ماهميتس ليش تأسفين..
الهنوف براحه عقب ماشفته هادي قربت منه:موب قصدي اهملك من واجبي ارعاك..
سلطان يناظر لقدام :بس جايه عشان واجبتس..
الهنوف جرب القهر موب بس انا وببرود:ايه بس عشان واجبي ااديه وبس..
سلطان ببتسامه:لوما حبتس الي متربع اهناه وياشر لصدره..كان قلت لتس ابيات توجعتس على ذالكلام..
الهنوف ترطب شفايفها وبتوتر حاولت تخفيه عنه:تبي تقول ابيات تنفس عن نفسك وتجرحني عندي مناعه ترى ..
سلطان يلف لها وهي واقفه جنبه مد يده ليدها وقدمها لقدامه لفت عنه بقهر واسحبت يدها منه لقته ظهرها وهي تناظر لبرى وتهز رجلها بتوتر
سلطان ابتسم ابتسامه هاديه وجذابه:تدرين بقولها ذالابيات لو ماودي بس مشكله اتناسبتس..
لفت له بعيونها وهي على حالها
سلطان يعنز يديه ورى راسه وبروقان :شفتي نجوم الصبح
ناظرت لفوق ابتسم مره ثانيه وهو يشوفها تناظر لفوق وكمل:
بانت نجوم الصبح والي في عيوني من عصر
لاهوب دمع لاتضايقت اتنهد واسكبه
لاو الله الحلم شيخ عن طموحه ماقصر
لو قصرت سوداليالي عن يمين وشنبه
وان الوني ماتعملت الهزيمه والنصر
ماكن ذقت من الهوى القتال امره واعذبه
شاعر وعصري فاتني واعيش في اغرب عصر
لا الوقت وقتي والزمن مابيني وبينه شبه
لكن هنوف مثلت دور العزيزه في مصر
قدت قميصي واسرفت في وصلي قبل انتبه
يوم انتبهت استشدهت ضدي بحراس وقصر
قلت ارحمي عزيز قومن ذل وارخى منكبه
ماني نبي الله اقوام حسن خصرتس لانحسر
انا بشر عبدن ضعيف كل برق يجذبه
قالت وهي توها تثني كان مافيها خصر
الشعر ياسلطان ورث اجدود ولا موهبه
قلت الشعر سحر يسخر لي قلوب ويختصر عمر
المسافات الطويله والزمان المجدب
