البارت السابع والعشرون
كلهم جالسين بالصاله ويتعشون
راشد :بكره اجهزي مثل ماراحنا الاول
ساره :ابشر
ام راشد:ودتس اروح معتس هالمره
ساره تناظرها بشك :عادي ماراح تضايقين
ام راشد :لا لقدني جنبتس منيب متضايقه ونا اشوفتس واشوف محلتس..
ساره تضمها :فديتس فديتس والله ..كني تحمست لبكره
نوره :افاااا ياعمه بتروحين وتخلينا
ام راشد :انتو منتب صوبي تبون بعض الله يديم عليكم المحبه مالكم حاجه في عجيزكم..
راشد :لاخلا ولاعدم من شوفتس ..
ام راشد بحنان :الله يسعدكم ويوفقكم ياولدي الحمدالله على ذالساعه
راشد يناظر نوره ويبتسم :انشهد
................................
سلطان بضيقه :في غرفتها
ام سلطان بؤجل:ايه ..
رقى لها سلطان فوق طق الباب وادخل
منسدحه على السرير تلعب بشعرها وتهوجس
عدلت جلستها وهي تشوفه يدخل جاء واجلس جنبها
سلطان :وش اخبارتس
النايفه :طيبه
سلطان بدون مقدمات:جربتي في محمد مخططاتس وشفتي كيف رفضناه..وبتاخذين بندر..
النايفه ببرود:مابي احد..
سلطان بدون اهتمام لكلامها:راح ادق عليه واعطيه علم والوقت الي يبي صيري جاهزه..
النايفه ترفع واحد من حواجبها :انا مابي منهم ومصره بعد ...
سلطان بعصبيه:انتي ماتفهمين
النايفه :لااا مافهم
امسك مقدمة بجامتها ورص على اسنانه بقهر:انا افهمتس..غيرهم احلمي لو تاصلين سابع سماء وبندر بتاخذينه غصب عنتس اعناد فيتس..
النايفه بنبرة استهزاء :موب بس انت الي تعرف اتعاند ..ناظرت في يده الي على بجامتها ورفعت عقب عيونها فيه ..مد يدك احسن مره ثانيه..
سلطان بدون شعور اصفعها على خدها بقوه:هذا اسلوب اتعامليني فيه..
النايفه بخوف لا يرجع يجفاها مره ثانيه وبسرعه :خلاص ..خلاص انا موافقه ..والله والله شفني حلفت
ناظرها بحتقار طنشها واطلع
وقفت عند الباب الرئيسي وانفتحت قدامهم البوابه حست بتعب وهم بنص الطريق للبيت كانت بتوقف السايق يشري لها احبوب بس المحلات مصكره
انزلت وبيدها شنطتها اليد دارت بعيونها بانحاء الفله شافته جالس على الكراسي الخارجيه اتجهت له ونزلت طرحتها على كتفها
متراخي بجسمه على الكرسي بتفكير وشماغه ناسفه على راسه بهمال ارفع راسه لها شافها تناظره بعتب وألم
سلطان بهدؤ :مرحبا
تقدمت منه ووقفت قريب
الهنوف:كيف الحال
سلطان ينفث دخان:محيوس..اشر على خده وهو يميله لها ..بوسه
نزلت راسها بهدؤ وباسته
سلطان ياشر على الكرسي بجنبه:تفضلي..
اتجهت للكرسي واجلست عليه وبالم اشرت على الي في يده: ليش هاذي ..
سلطان يتقدم بيديه على الطاوله وبفضفضه اعقد حواجبه بشمزاز:محمد يغتنم سفرتي ويطلب النايفه ... والنايفه لو تعنس ماخذت من برى..
الهنوف بفرحه اخفتها :محمد خاطب النايفه
سلطان يرفع واحده من حواجبه بستغراب :اهاا عندتس علم ... مرفوض الي تبيه
الهنوف بستغراب ورحمه لنايفه:ليه انت الي تعيش حياتها...
سلطان بنظره حاده :ليكون بعد ماأيده كلامها..
الهنوف وعيونها بعيونه :بكل ثقه ايه مايدتها ..تفرضون رايكم وتمشون الي تبون على مزاجكم ليش ماتراعي مشاعرها النايفه لو حبت محمد وحبها بتنسى اي فارق بينهم ولا راح تفكر في الي تفكر فيه انت..
سلطان بنزعاج :انتو ماتفكرون...هي بنت اي مضره او شي يحصلها مراح تعرف تصرف... لو كانت بين اهلها اجاعهم الي بيوجعها مستحيل تطول النايفه مابغت
وقفت وراحت عند راسه وهو يناظر قدام وعاقد حواجبه شالت الزقاره من فمه وحطتها بكاس المويه
سلطان يناظرها:ليش
الهنوف بعتب وتعب:خلاص تكفى يكفي ..قهرتني
سلطان ببتسامه :طيب قدامتس مافيه
الهنوف برجى :ووراي بتشرب
سلطان :لا افكر ابعد منه ..وسهل علي..وبقرف ..وذالي فوق دابله كبدي وش اسوي فيها
الهنوف بنبره هاديه:سلطان حبيبي راح تعيش النايفه حياتها بدونك مع اي رجل اخترته انت او هي.. مشاعرها تختص فيها بتصبر وانت تحسبها مستانسه سلطان الحياه طويله خلى النايفه تعيش مثل مابغت اذا صار لها شي لاسمح الله في مستقبلها بتكون راضيه لانه بختيارها وذا كان بختيارك بتشيل في خاطرها منك طول حياتها او حتى جفت وتخلت..
اجلست على ركبها عند رجليه ويديها على فخذه وبنظرة رجى هاديه: متى هموك عيال عمك اذا تبي تسكتهم ارضى خواطرهن والباقي موب لازم
نزل عيونه لها بهدؤ تامل ملامح وجهها كانه يتعرف عليها من جديد حاوط وجهها بيديه وبنبره متعبه:ابي كل شي زين لهن حتى اعيال الوزراء والكباريه رفضتهم عشانها ...
امسكت يده الي على خدها وباست باطنها :لاتخلي شي يجي بينك وبين خواتك فديتك اسمع رايي...
سلطان بتفكير ابتسم :بسمعه ..انا جاي من فوق شايل بخاطري منها بس اقنعتيني ..اكييد زعلانه روحي قولي لها موافق..
وقف ووقفها معه تنهد بعمق وضمها بقوه ابعدت نفسها منه بقوه ناظرها بستغراب ورفعة حاجب
الهنوف:كتمتني بريحته الخايسه..
سلطان يزم شفايفه:لا تسذا مايصلح ..انفخ بفمه ويده على خصره لفت بوجهها بدون شعور وملامحها توحي بتقزز
الهنوف:وبعد هاذا حرام والله..
سلطان يناظرها بشوق ويبتسم :يالله روحي لنايفه..
لفت بحراج من نظراته خذت شنطتها وعباتها من الطاوله:اشتقت لهم..مشت عنه وهو يرجع يجلس على الكرسي ويطق بصاابعه على الطاوله ونظره لزولها الي اختفى من بين الاشجار
افتحت الباب شافت امه جالسه على الكنب وتناظر التلفزيون
ام سلطان تلف للباب وبشوق وفرحه:مرحبا وحيتي يابعد روحي.
الهنوف تضحك وتضمها :بتس اكثر فديتس وش علومتس..
ام سلطان تجلسها معها على الكنب :زينه زانت اعلومتس والله يالهنوف ان لتس فقده
الهنوف تبوس راسها :ماتفقدين غالي اشتقت لكم واشتقت لنصور وينه..
ام سلطان :توه رايح اليوم يقول بيجهز بكره
الهنوف:هههه وش يجهز بكلات ولا مريول
ام سلطان :ههههه لعاب يبي المراح لرياض باي وسيله
الهنوف:بيتعود لاكبر انشالله
ام سلطان :انشالله ..النايفه لادرت انتس جيتي بتفرح كل الايام الي راحت فوق وبلحالها..
الهنوف :اجل انا بروح لها فوق..
ام سلطان :روحي لاتبطون وانزلو انتي وياها ..
الهنوف توقف :ابشري.. رقت لها فوق ركض على الدرج افتحت الباب عليها بقوه
الهنوف:مبروووك ياحلوه
النايفه تلف لها شافته وقامت ضمتها وصاحت :كل الظروف ضدي وش سويت في حياتي علميني وش سويت..
الهنوف تضحك :اكيد مسويه خير وهذا نتيجته
النايفه تبعد عنها وتمسح دموعها :ماتدرين عن شي محمد خطبني موب بندر بس سلطان رافض حرارم زعلني منه..
الهنوف تجلسها على السرير وبغمزه :لا انا اقولتس مبروك
النايفه ترفع حواجبها :وش مبروكه مابي بندر ولا حد يقنعني اذا قايل لتس اقنعيني..
الهنوف:ههههه الله عاد والي بيقنعتس كل شي عنده تسحيب..
النايفه بالم :جايه من اهلتس مبسوطه.. مراح تفهمين مشاعري..
الهنوف:لا فهمتي غلط. .انا ماضحك على زعلتس انا مستانسه انتس خلاص بيتحقق حلمتس وبتاخذين محمد لان سلطان قالي بنفسه انااااا موافق
النايفه بعدم تصديق وبرجى :تكلمين جد
الهنوف :والله اول ماجيته شفته وقالي خطبتس فرحت لتس بس عقب مقالي انه رافض حنيت عليه الا ان وافق ..هاا افرحي لاتقومين تفكرين انه بيغير رايه
لمياء بفرحه اضحكت :لا لا خلاص مع ان اذا قال راي مايغيره ابد بس هذا اكيد ان احد داعي لتس بقلبه
الهنوف ببتسامه :والله فرحت اني قدرت اقنعه عارفه انك بتفرحين
النايفه تقوم وبسرحان :ماتقدرن تتخيلين وش كثر انا فرحانه بعيش مثل البنات بس يحبني انا..
الهنوف تخزها بنظره :طيب وش فيها هاذا انا ماخذه اخوتس منهم..
النايفه :لا لا كم مره نقول لتس سلطان غير عنهم سلطان معاش معهم سلطان خوالي موب اهلي ..
الهنوف:الا هو الحين معاد يهمني الا انه سلطان الي يبيني لنفسي وابيه وبس..
النايفه :ههههه فديتس الله يسعدتس مثل ماسعدتيني
الهنوف:امين ..يالله بروح اتروش وارقد تعبانه.
النايفه :نوم العوافي ياليت اقدر اروشتس انا وارقدتس
الهنوف:ههههه ..اطلعت من الحجره وهي تسمع النايفه تضحك ومسويه ضجه بالغرفه وهي بلحالها
ادخلت غرفتها صح ارجع لها احساس ماتبيه اطردته من بالها وراحت تروش خلصت والبست بجامه وردي حرير وهي تحط راسها على المخده بتعب بطنها لازال يؤلمها شوي وتحس بزوعه ماقدرت ترقد وعينها تناظر الباب اي صوت برى تفتح عيونها مشتاقه له حيل صح حست باالااحباط من طريقة استقباله هادي وبعد تأخر مارجع للجناح..
تنهدت وانقلبت على ظهرها تنفست وهي تنفخ خصل شعرها من وجهها..ادخل وناظر لها
سلطان ببتسامه: لا زين..حسبتس نمتي..
ابتسمت واجلست بفرحه:انتظرك..
مشى صوبها واجلس على السرير جنبها تنفست بعمق وهي تحاول تبعد عنها االالم
سلطان بنظره حنونه :وش جاتس ياقلب سلطان..
الهنوف تبتسم :الله يخلي لي سلطان ..يبي لي انسدح بس شوي ويروح الالم
مد يده على المخده رتبها وعقب اسدحها بهدؤ وانسدح جنبها ويده على بطنها :جعل يسقى لاجاء هنا بيبي..
الهنوف برتباك:قريب انشالله..
ابتسم براحه وامسح خدها بنعومه:تحبيني..
الهنوف ببتسامه حلوه نزلت عيونها:ايه احبك...
سلطان يبتسم :قد كرهتيني..
الهنوف تنفس بعمق وحراج:ايه ومن قلب بعد ..ومعي عذري
سلطان :ههههه يعني كنت استحق نظرة الكره بعيونتس لما كنى بيطاليا وبرضو لما رجعنا هنا..
الهنوف بدلع :يعني كنت تطقني وانا ماستاهل صدق سخيف ..
سلطان يضحك :لبى الحكي في ذمتي..شوفي انا انسان حراري وتجين بوجهي.. وبهدؤ فجاءه.. مع العلم اني ماكرهتس بيوم صح ازعل واحقد.. بس نظرة عيونتس غصب تحيرني مدري وش يصيبني تربكني ؟!. خذتني ياالهنوف خذتني...
الهنوف بخجل وارتباك:لعاب ليش تخليني اقول اكرهك من قبل وانت ماتكرهني احرجتني..
سلطان يهز اكتافه:يعني انتي ماسويتي فيني شي يستحق اكرهتس صح ماحبيتتس عشان كذا خفيفه يدي عليتس..
الهنوف ترفع عيونها له حطت يدها على خده:والحين..!!
سلطان يقرب منها ويضمها: الحين ..!!احبتس واموت فيتس انتي نعمه ماتوقعت بأصلها..
سبلت عيونها وابتسمت بفرحه وهو يناظر لها وذايب
سلطان بروقان :تسمح لي حبيبة سلطان بقصيده
اضحكت بخفيف :تفضل اسمعها بقلبي قبل اذاني
سلطان بسترسال وعذوبه:قالو تتوب وقلت بالطـرف مصيـوب
والله ماتـوب وصافـي الخـد ماتـاب
قالوا جهلـت وعقلـك اليـوم منهـوب
وكشفت سرك بين ربعـك والاجنـاب
قلت الهوى لقلوب الاحبـاب مرغـوب
ايات حـبٍ صـورت وسـط الالبـاب
قالوا بعقلـك ضايـع الفكـر منكـوب
قلـت المـوده ماتداويهـا الاطـبـاب
عقلي معي ماني مـن العقـل مسلـوب
انا الغريـق وكـل شـيٍ لـه اسبـاب
كان انكم تـدرون بالـي شفـى ايـوب
وجدٍ سطـى بالقلـب والحـب غـلاب
انا غريقٍ مـع هـل الحـب منسـوب
في زمرة العشـاق بالحـب منصـاب
ماطـاب لـي زادٍ ولا اريـد مشـروب
الي صفا لي صاحبي عسـل الانيـاب
يغضى بعينـه وافهـم العلـم مقلـوب
واسـري عليـه بليلـةٍ نورهـا غـاب
ويرخص لي الغالي الى حـل ماجـوب
وعن القرايب حط لـي ستـر وحجـاب
وابعدعن الشكه ولا انـوش لـه ثـوب
الا الحديـث وقرعـة النـاب بالنـاب
اخاف يصبح زين الاوصاف معيـوب
وهو عليه مـن الشـرف كـل جلبـاب
وعرضه نضيف ابيض ولا فيه عذروب
ولا حكـوا فيـه البعيديـن واقــراب
عليـه وجـدي فايـقٍ وجـد يعقـوب
وقلبي من اسبابـه بوسـط الحشـا ذاب
يلومنـي مـن لاشكـى حـب نبنـوب
فتـان لقلـوب العشاشـيـق نـهـاب
اصبح هو الغالب وانـا منـه مغلـوب
غـدا بعقلـي بيـن شـاري وجـلاب
ان كان شفته صفـق القلـب مرعـوب
بالصـدر كنـه بيـن لاوي وجــذاب
والدمع من مـوق النظيريـن مسكـوب
يخضر ديارٍ ممحلـه عقـب الاجـداب
ترقرقت الدموع في عيونها ابتسم و قرب راسها وباسها بين عيونها بشوق
سلطان يبعد راسها وبتنهاد :ليه الدموع يابعدي
الهنوف تمسح دموعها بصابعها: من زود الغلا ترخص لك دموعي.. ماقدر اعبر لك عن مشاعري..
سلطان ببتسامه جذابه:ناظريني بعيونتس وتكفيني من كل كلمه..
ضمته بيديها النحيله وبكت غصب عنها تحبها هو الرجل الي تمناه شخصيه وشكل وحكمه ياما تمنت يحبها وماوضحت له رجفان قلبه لشوفها الى ان بين لها حبه
ابتسم ويده على راسها يمسح شعرها ويسولف عليها بذكرياته
.........................
اصبحو الراشد وراهم مشوار لقريتهم حطو نوره ببيت امها عقب الغداء جالسين كلهم يشربون شاهي ويسولفون
ام مفلح تسولف هي وبنتها والباقي يعلمهم مفلح بسالفه بشغله
ام مفلح بهوجاس :خالتس كلمتني امس ملكة لمياء اليوم..
نوره تنهد بقهر:ماغيرت رايها..
ام مفلح :وليه تغيره رجال سنافي ولاعليه قصور..!!
نوره :مستعجلين على الملكه..
حس بنقباض في صدره من اسمعهم ورافض احساس انه يمكن تكون هي
مفلح بهدؤ:من مكلته قريب ...
ام مفلح بحسره :لمياء ياقرادة حظك..
مفلح يتصنع ابتسامه :حظوظ عاد وش انسوي..
ابو مفلح :يستاهل عمر
مفلح يصد عنهم وبقهر:ودي ادري كيف رضو فيه
ابو مفلح يزجره :ولو منتب صاحي
قام مفلح بغيض ورقى لفوق ان مااقلقت منامتس يالمياء ماكون مفلح حسدن لتس واكون انا الرابح عشان تعرفين من تطنشين ..رقى فوق واجلس على السرير بتفكير طق الباب وادخلت نوره
نوره بدون مقدمات:الهنوف قالت لي قبل تروح تخطب ساره ..
ناظره مفلح بستهزاء وانسدح على السرير ويديه تحت راسه
نوره :وانا معها يعني لمياء راحت وتوفقت وماعطتك اي اهميه.. وساره مافيه مثلها وش تنتظر..
مفلح يعقد حواجبه:ساره ان قلت لها تخلي الوضيفه بترضى..
نوره ببتسامه:انشالله انا بقنعها وبتوافق اصلن الوضيفه خذت عشان الفراغ
لف لها مفلح براسه :اذا ارجع راشد روحت له ..
نوره بفرحه:الله يوفقك والله مافيه مثلها ...جمال وذرابه وحياء و..
مفلح بسخريه يقاطعها:حياء ..!!ليش ماقلتي لي عنها وانتي تدورين وتلفين حول لمياء
نوره تنهد:حسيت انكم مناسبين بعض والحين ربي ماكتب نصيب
لف لجواله يدق اجلس وخذاه ورفع نظره في نوره :هذا محمد ..ممكن تطلعين او اطلع انا
نوره تلف بتطلع:لا انا بطلع.. اطلعت وصكت الباب
مفلح :مرحبا
محمد:السلام ,,اخبارك
مفلح :وعليكم السلام .طيب
محمد:ماطلع اسمك بالعمليه ذي
مفلح :متى بتكون
محمد :يوم الاربعاء او الثلاثاء
مفلح بتفكير :مافيه مشكله كلها قريب
محمد :انت منتب فيها في وحده ثانيه بعد عيد الحج
مفلح :لا بطلبها هاذي مناسبه اكثر..متى انداهمها.؟؟
محمد:اليل هذا طبعن الاجابه تمويه والوقت بعد بيتغير
مفلح :بتجي بالاستراحه
محمد :ايه
مفلح :لا اليوم كنسلها ابيك بمطعم ....
محمد :وش عنده كريم سبلا
مفلح ينفخ بفمه :انتظرك..مع السلامه..
محمد :مع السلامه
نزلهم بالمدرسه واقعد معهم شوي بساحة المدرسه الاماميه الى وقفت العصر عقب راح
فاطمه تمشي لهن :حيالله ام ساره
ام راشد :الله يحيتس
فاطمه :مرحبا بش بين ربعش
ام راشد ببتسامه:بتس اكثر ياامي
ساره بصدمه :ماتشوفيني
فاطمه :لا سمحت منش ابي امش
ام راشد :ههههه انا وساره واحد
ساره تقرب منها وتسلم عليها وتضحك:ترى امي غير ماترضى فيني \
فاطمه تضحك:هالايام بتحلو بوجودش لبى قلبش
ام راشد :فديتس والله انتس حبيبه
فاطمه :جهزي حالش ترى من يدرون اهل القريه بيمسكونش دول
مشو لداخل المدرسه غرفهم وفاطمه تنقل عفشها مع خوياتها عشان ام ساره
سلطان :كلمتهم
مسعود:ايه طال عمرك وعلمتهم ان الطلب من صوبك وعلمته بعد هو تردد شوي وعقب ماعلمته انك صامل وافق وهم اطلبوه للمكله اليوم
سلطان بصوت واطي:زيين زين..ذا الي ابيه.. خذا تلفونه ودق عليه علمه بالموافقه واذا يبي المكله يجي ذلحين
بعد صلاة المغرب ادخل سلطان عليهم بالكتاب سلطان يجلس جنب النايفه الي تناظره بستغراب
سلطان :وقعي هنا..
النايفه :وشو هاذا..
سلطان :هذا كتب اكتابتس موب لازم حفله وشوشره اهم شي راس الرجال الطيب..
النايفه بخجل اسكتت ووقعت على المكان الي ياشر عليه
اطلع وامها تبارك لها
انزلت الهنوف:وشو تباركون عليه
ام سلطان :النايفه تملكت
الهنوف بضحكه تضمها :مبروك ياما رفض ياما على السريع.متى صار
النايفه :هههه قبل شوي
الهنوف:الله يوفقتس ...
النايفه :وياتس ..
اطلعو منه الرجاجيل وراحو ادخل عليهن داخل
سلطان يحب راسها وبهدؤ:مبروك عليتس بندر..
نهاية البارت السابع والعشرون
