نبدأ ببسم الله والصلاة والسلام علي سيدنا محمد صل الله عليه وسلم 🌹
قرأت كتاب اسمه للبنات وبس للدكتور مصطفي زايد وهو غاية في الروعة وحقيقي انصح كل بنت تقرأة الكتاب مش كبير ده كتيب صغير ⚡ وانا قررت أن هنشره هنا لتعم الاستفادة ✨
ودلوقتي اسيبكم مع اول جزء من الكتاب 💞
زهقانه ؟؟ حاسه انك مخنوقه ؟؟
مش حاسة بطعم الحياة ؟؟!!
طب تعالي بينا نطلع رحلة ......؟
تحبي تطلعي رحلة فين ؟
ايه اجمل مكان شوفتيه في حياتك ونفسك تروحيه ؟
❣️ طيب تعالي نحلم سوا .. واي حلم ؟؟
ده احلي حلم في حياة كل واحد فينا
هاخدك معايا مكان مختلف تماما .. مكان كل الناس سعيده فيه !
الكل فرحان ومبسوط ومرتاح البال
مكان كله حب في حب .. الحب الحقيقي بجد
هاخدك ونروح للجنة .. 💖
✨يلا بينا نروح للجنة ...
اهل الجنة : متميزين جدا في الآخرة زي ما كانوا متميزين جدا في الدنيا .. كانوا متميزين في الدنيا برضاهم بأوامر ربنا سبحانه وتعالي
يعرفوا ان ده حرام يتركوه ... وده فرض يعملوه !
⚡اول ناس داخلين الجنة ، النبي صل الله عليه وسلم وصفهم بالقمر ليلة البدر !
والناس اللي وراهم نورهم زي نور الكواكب في السما !!
انتي متخيلة الكلام !! مش نفسك تكوني منهم ؟؟
مش نفسك تكوني بدر يوم القيامة ..
حبيبك بيوصفهم وبيقول صل الله عليه وسلم : " إن أول زمرة يدخلون الجنة علي صورة القمر ليلة البدر ، والذين يلونهم علي أشد كوكب دري في السماء إضاءة ✨
جمالك في الجنة : فوق اي جمال تتصوريه !!
الحورية في الجنة جمالها يفوق اي وصف ، انتي هتبقي اجمل من الحور العين في الجنة !!
يعني انتي ملكة في الجنة !!
متضيعيش سعادة الاخره .. إحنا مش عايزين ندخل الجنة وخلاص ؛ إحنا عايزين اعلي درجات الجنة ؛
عايزين الفردوس الاعلى 💖
اصل الجنة درجات .. وطالما عايزين اعلي درجة
يبقي لازم نتعب شوية ونصبر علشان نفوز بيها ..
زي الطالب اللي بيقعد طول السنة يذاكر ويسهر ويتعب .. بس كله بيهون لما بيلاقي نفسه آخر السنة من الاوائل !
اعظم نعيم في الجنة : اعظم واجمل نعيم في الجنة يا اختي انك تشوفي حبيبك ، ربك اللي تعبتي علشانه ، وصبرتي علي اي كلمه علشان حجابك !
ربك اللي تركتي اي حاجه غلط علشانه !
رؤية الملك عز وجل 🌹
قال رسول الله صل الله عليه وسلم : " اذا دخل أهل الجنة الجنة وأهل النار النار ، نادي مناد : يا اهل الجنة إن لكم عند الله موعد يريد أن ينجزكموه ؟! ، فيقولون : وما هو ؟
الم يثقل الله موازيننا ؛ ويبيض وجوهنا ، ويدخلنا الجنة ، وينجنا من النار ؟
فيكشف الحجاب فينظرون إليه فوالله ما أعطاهم الله شيئا احب إليهم من النظر إليه ولا أقر لأعينهم "
💞 يااااااااه ، مفيش شيء في الجنة احب ولا اروع من رؤية وجه الملك سبحانه وتعالي ربنا يزقنا واياكي رؤية وجهه الكريم ، ورضاه الابدي عنا ..
بعد كل الي قريته وتخيلتيه ده ..
ممكن تبيعي كل ده ب ايه ؟؟
عايز اتكلم معاكي عن شيء مهم جدا في حياة كل مسلمة ، شيء بيميز اي بنت مسلمة عن بنات الكون كله
عايز اتكلم عن حجابك
يووووووه تاني الحجاب طب ما أنا محجبة !
ياترى إنتي فعلا محجبة ؟!!
إحنا منقدرش نقول لأ ؛ لأن فعلا فيه حاجه ملفوفة علي شعرك ! بس للاسف صعب نحكم أن ده حجاب ..!
وقبل ما اكمل كلامي ...
اولا : لازم تعرفي أن ربنا بيحبك .. أيوة بيحبك علشان سهل أن الكتاب ده يوصلك وتقرأي الكلام ده
بنات غيرك كتير ممكن ميوصلهمش الكلام ده..
ويضيعوا أخرتهم وهم مش حاسين ؛ وفاكرين أنهم ماشيين صح ! فالحمد لله أن ربنا بعتلك اللي يذكرك ..
ثانيا : أوعي تزعلي مني .. أو من الكلام .. اصل ده مش كلامي !! ده كلام ربنا سبحانه وتعالي والنبي صل الله عليه وسلم ..
اللي حبهم بيجري في دمي ودمك !
ولا انتي مش بتحبي ربنا والنبي ؟؟؟؟؟؟؟؟؟
يبقي لازم نتفق أن اي حد بيحب حد يبقي لازم يحب كلامه ويسمعه
أنا عايز اتكلم اختي اللي مكتوب في بطاقة الديانه بتاعتها مسلمة ..
واقولها يا اختي ياللي بتصلب وبتصومي وبتطيعي ربنا .. بس ... لسة حجابك مش كامل !!
☑️ الحجاب يا اختي مش مجرد طرحة بتتلف علي الراس وخلاص .. الحجاب يعني لبس البنت المسلمه ككل .. كلمة "حجاب " اصلا يعني بيحجب .. بيمنع .. يعني بيغطي .. وده مش متوافر في لبس البنات في الزمن ده زي ما انتي شايفة !!
☑️ طيب ايه هو الهدف من الحجاب ايه لازمته ؟؟
المفروض أنه بيحمي البنت المسلمه ويعفها ويمنع عنها ذئاب البشر .. ويمنع عنها أي اذي
وكمان علشان نحمي شبابنا من فتنة النساء .. الشباب اللي عينهم اتدمرت من النظر للبنات ..
✨وربنا هو اللي فرض الحجاب .. وهو أعلم بينا وبمصلحتنا واللي فيه الخير لينا ..
الموضوع خطير والله ..
أنا عايزك تخافي علي نفسك .. ! انتي فاكره نفسك ماشية في طريق الجنة وانتي والله مش هتقريبها ولا هتشمي ريحتها الا لما تتوبي !!
طب لنا بكلمك ليه ؟؟؟
أنا لما اشوف اختي ماشية وقدامها حفرة وهتقع فيها وهي مش واحده بالها ؛ لازم احذرها ..
بعد كده لو وقعت في الحفرة يبقي هي اللي اختارت بايديها !!
رسالة الي كل بنت مسلمة : الي كل بنت بتصلي وبتصوم وبتقرأ قران وفاكره ان ( لبسها محترم )
بقولها يا اختي :
مفيش حاجه اسمها لبس محترم ولبس مش محترم !!
مفيش حاجه اسمها بنطلون واسع وبنطلون ضيق !
مفيش حاجه اسمها بنطلون وفوقه ڤيست يغطيه !
مفيش حاجه اسمها بدي لوحده وبدي فوقه بلوزة !
فيه حاجه اسمها الزي الشرعي الاسلامي كما وصفه الله تعالي والرسول صل الله عليه وسلم .. وده اللي هنعرفن بإذن الله
يتبع ....
