الجزء الاول:..
بعد رقص لوقت طويل وتصقيف دخلوا عالبيت بتعب ليشلحو من رجليهن ويرموا حالن عالكنباية
توليب: آخ يا رجليّ 😣كان ضروري تخليني ألبس كعب عالي كتير
منى: يا بنتي اذا ماكنتي طويلة العرسان مابيجوا لأنو مابحبوا البنت القصيرة يلي متلك كم مرة بدي فهمك 😡
توليب: مشان الله مارح تنسي قصة العرسان بقى وبعدين مالي قصيرة😒
منى: لكن بدك تضلي قاعدة على قلبي ماشفتي كيف هدى اجاها عريس كامل مكمل جمال وكمال ومال وماناقصوا شي
توليب: امي كل مين الله كاتبلو نصيب غير التاني فليش انتي بتضلي تدوري عالمظاهر يا ماخد القرد على مالو بكرا بروح المال وبيبقى القرد على حالو
منى: ولك بدك امها لهدى تشمت فينا انو زوجتك واحد مهرهر وبعدين شو ناقصك حتى مايجيكي واحد كامل مكمل
توليب: خلصنا بقا خلصنا مليت من هالسيرة مابدي عرسان بدي انكبس عندك متل المكدوس منيح أو قلك أول حدا بيدخل من هالباب بدو يخطبني رح وافق عليه حتى لو كان منتوف
منى: عند كلمتك؟
توليب: أي عند كلمتي وشهدوا اول شب بيدخل هالباب ليخطبني رح وافق فوراً
منى: وليي لتكوني بعدك عم تستني لهداك..لك مارح تنسي بقا أكيد بكون تجوز وعندو ولاد من عمرك
عصبت توليب من أمها وقفت وتطلعت عليها: أمي مارح يخلص من لسانك بقا..ومشان تطمني أكتر أي بعدني عم استناه ومتأكدة أنو رح يرجع
بهالوقت بقاطعهن فتح الباب وكان لؤي علق جاكيتو ليتطلع عليهن
لؤي: شبكن ليش صواتكن لبرا
توليب: شو بدو يكون نفس موشح كل يوم
تركتن توليب وفاتت على غرفتا.. أمّا منى كانت عم تطلّع عليها بعصبية لتبلش صريخ على بنتا
منى: ولك حتى دراسة متل العالم والخلق مادرستي ليكي أخوكي دكتور قد الدنيا اما انتي معالجة فيزيائية على شو رح يجي العريس المنيح
قرب لؤي من امو ليهديها وناولها كاسة مي لتشرب شوي وترجعها
لؤي: يا ماما يا حبيبتي كم مرة بدي قلك خفي عالبنت حرام عليكي عملتيلها عقدة نفسية من ورا العرسان والزواج
منى: أنا شو بدي من هالدنيا غير شوفكن متجوزين ومبسوطين..بس أختك ماعم تفهم هالشي ولساتا حاطا هداك الولد براسها
لؤي: لاتاكلي همها بكرا بتتجوز وبتفرحي فيها انتي لاتضلي تشغلي بالك فيها
ترك أمو ليروح على غرفة أختو ويدق الباب ويدخل كانت عم تبكي وأول ما شافتو مسحت دموعها
توليب: فوت أخي
فات عالغرفة وقعد جنبا عالتخت وتطلع فيها كان لسا في دموع على خدودها مسحهن وتطلع بعيونها
لؤي: كم مرة بدي قلك لاتبكي
توليب: امك كتير بتزودها عالواحد
لؤي: بعرف بس كمان انتي لابقا تردي جواب وسمعي وطنشي..هلأ خلينا نغير الموضوع سمعت أنو عيلة أميرة رفيقتك بدهن يروحو رحلة وبدن ياكي تروحي معهن
توليب: شو عرفك
لؤي: علي يا أختي
مد ايدو على جيبتو وطالع منها مصاري وحطهن بإيد توليب
لؤي: خدي هدول جيبي كلشي بيلزمك
أنت تقرأ
8_مايو
Actionالرواية باللغة العامية.. عندما تأخذك عاطفتك إلى طريق غامض..طريق لا تعرف مايخفيه لك..لتكون أنتَ الضحية و الطُّعم في عالم يملؤه السَّواد والممنوعات..فتجبر على فعل أشياء لم تفعلها من قبل في سبيل العودة إلى حياتك السابقة.. 8_مايو بقلمي
