سالوفات إيلاف..♥

عناية الشعر💇

هلا والله..

اليوم راح احجي الكم تجربتي الشخصيه ويه الشعر وشلون اعتني بشعري اول شي خل نتفق على شي تره شعري مو واو ولا شعر روبونزل بس صحي الحمدلله وما يتساقط..
اني كضيت طفولتي وبعض من مراهقتي شعري گصير..
حرفيا من جنت طفلة امي ما جانت اطول الي شعري يعني لو تشوفون شعري ولادي كله جان فوگ اذني جانت تكصه الي گصه الطاسة(الله يسامج امي جنت اطلع راس الخبل💔).
المهم قررت اطول شعري بعطله الثالث على الرابع الابتدائي عساس كبرت وإني راح امشطه وبالك عني 😂💔..
وصدگ طولته وصار جوة كتوفي بشوي بس الله لا اوريكم ما جنت امشطه اله بالشفعات لان متعودة على الشعر الگصير ما جان يتشربك خاصتا اني شعري چثير ناعم لذلك بسرعه يتشربك..
المهم جتي الوالده وكالت انتي مو مال احترام اشو تعاي جتي وكصته الي گصه الطاسة الي اطلع بيها رأسي چنه طوبه مال تنس😂💔..
المهم يا خياتي هاي جانت اخر گصه وطولت شعري وراها وصار لنهاية ظهري وصلت للأول متوسط شو حنيت لايام راس الطوبة🌚💔
ضليت شهر الح على ماما تكصه الي بس جانت معارضة ونفر من العائلة الله يهدي جان كل ما اكول اريد اكصه اترزل😂💔
المهم ماما جانت معارضة لان ما شاء الله شعري جان ثخين وطويل وتكول حرامات تگصي..
اخر شي ماما طكت مرارتها وكالت شوي تعاي جاي بيه لو بيج..
وصدگ كصيته بس مو حيل گصير لا ويه اذاني وجنت فرحانه حيل لان الصراحه طلع حلو شلت الذيل الي نكص وكمت افر بي وافتر بالبيت والشخص الي جان معارض انضربت منه وزعل بس رضه بعدين😂💔
المهم كام يصير شعري لا هو طويل لا هو گصير خبلني..
بس تحملت لان حبيت اطوله وصدگ طولته واخر مره گصيته جنت صف اول متوسط وهسه اني خامس علمي..
الصراحه حابه اگصه ومشتيهه شعر گصير بس هل المره انعدم اذا گصيته فساكته🌚💔.
-------------------------
هسه نجي شنو استخدمت لشعري وطول؟!
شوفوا اول خلطة بحياتي جربتها على شعري هي خلطة الثوم والفلفل البارد..
الصراحة الي تكره ريحه الثوم انتي هواي جاي تعانين😂
لان الثوم چثير زين للاظافر والشعر لذلك حاولوا تحبوا اني بالنسبة إلي چثير احب ريحته وابدا ما اتضايق منها..
هسه اعلمكم شلون تسووها، تحتاتجون:
١-زيت زيتون.
٢-فلفل بارد.
٣-ثوم.
تجيبون علبة يفضل تكون من زجاج وتقطعون تقريباً فلفل على حسب طول شعركم مثلا ٣ فلفلات، وتحطون من ٧-٥ روس مال ثوم وراها تحطون زيت الزيتون لحد ما تنملي العلبة..
تخلونه بمكان مضلم لمدة أسبوع وراها تبدون تستخدموا من مرة إلى ثلاثة مرات بالاسبوع النتيجة تبين من اول شهر..
تحطي على شعرج ساعيتن وراها غسلي ومن تحطي لفي راسج يا اما بكيس هو الي مخصص للمسكات مال الشعر أو عادي جيس اسود(هذا الي تضمه الوالدة كل ما ترجع من السوك وتستحسف تذبهم😂).
هسه نجي للأسئلة الي اكيد راح تسالوها🌚.
شنو يسوي للشعر؟
يطول ويثخن الشعر.
يظل ريحه مال ثوم من اغسله؟
اذا ريحته الشامبو مالتج قوية وغسلتي زين ابد ما يظل وعلمود تتاكدين ميظل ريحه من تطلعين بخي عطر على شعرج..
اني بالنسبة إلي ما جان يظل ريحه.
------------------------
هسه نجي للخلطة الثانية..
خلطة الاولفيرا وزيت جوز الهند طبعا هاي الخلطة چثير تفيد الي شعرهم جاف ومتقصف لان چثير ترطب..
طبعا الي ما عدها اولفيرا بالبيت انصحها تشتري وتزرعها لان حرفيا تخبل للشعر والبشره والي تريد تسوي الخلطة بس ما عدها اولفيرا عادي جيبي الجل جاهز عد اي كوزمتك تلكي..
بس اني انصح بالطبيعي احسن..
شلون نسويها؟!
اول شي اذا الاولفيرا عندج بالبيت نضيفها وطلعي بس الجل واخذي وحطي وياها جوز الهند على حسب طول شعرج سوي الخلطة وحطيهم بالخلاط ينخلطون زين ورها حطيهم على الاطراف وصعدي للجذور لان مثل مكلت الكم هي ترطب وتعالج التقصف..
تخليها لمدة ساعه وراها غسلي لشعرج چثير مفيدة ومن اول استخدام تحسين صدك الشعر ترطب..
-------------------------
هسه راح اعرض الكم احسن الزيوت الي مجربتها اني واذا مو اني فأحد من عائلتي يعني ما جبت شي الكم ما مجرب قبل🌚♥