هاتي خل نكمل عليك..
ردت عليها اختها وقالت:لالا خلاص هاني قريب نكمل..
قعمزت حداها وقالت:تعرفي ياغاليه الليل كله مارقدته البارح واني نفكر..
سألتها وقالت:في شنو؟
ردت عليها وقالت:في كلام اختك نعيمه فالعيد كلامها مزبوط لازم يكون لينا معاش في الدوله اني وياك..بالذات اني لازم خوتك يجرولي ع معاش المطلقات ع خاطر حنين.
تنهدت اختها وسيبت اللي فيدها وقالت:واني ماعندي عليش نجري عليه المعاش فالدوله..
قعدت تشبحلها اختها وهي ساكته..
هي ابتسمت وقالت:هي بسرعه تو قريب يجن نساوين خوتك خل ندير للعويله فطورهم..
بضحكه قالت اختها:حتى كانهم فاطرين لازم يفطروا هنى يبوا دلع غاليه..بالذات بنت عمر وبنت هانيبال..
ابتسمت اختها..
بعدين هي قالت:ماني طايقه نشوف الفسخه مرت عمر..
:ومن طايق يشوفها مازايده كان في السم..
:ايه ماتتعظ من شي بكل هدي..
سكتوا شويه بعدين قالت الصغيره..
:مسكينه كان مرات الصغير ريتي اخر مرة من شكت لهانيبال منه..
ضحكت وقالت:لكن هو يخاف راهو غير تجيب سيرة هلها يولي على تالياته..
:ههه..ربي يهديه...لكن ملاحظه حاجه كيف اللي مرات هانيبال بدت تشد في روحها مش كيف قبل..
:اها..ملاحظه ماعاد تبي الخلطه واجد..
تنهدت وقالت:بقولي هكي خير..دارت كيف مرات حميد هديك معاد ريناها بكل حتى في أخر عيد ماريناها
:مريضه راهي ماعاد كيف قبل..
سكتوا الزوز بعدين قالت الكبيره:استاحشت رزان واجد حتى هي شدت كراعها وامها كان تبيها تعديلها..
:ايه كرهت الجيه هنى قاعده تذكر في بوها الله يرحمه..كيف رمزي اللي لينا عام ومعاه ماريناه هو رانيا..
تنهدت وقالت:خييي ع النفوس كيف تتغير..ياريت لو نقدر نرد الزمان لورا راني خليتهم كلهم حداي..مش كل حد في تركينه..رباب في مصر..دلال في الامارات..رانيا ورمزي في امريكا...ورزان في طرابلس..نزلوا دموعها..
تنهدت اختها بحزن وقالت:هدى حال الدنيا ياوخيتي هدي الدنيا...
مسحت دموعها وقالت:العويله هادم بنخليهم حداي لين نموت..
ابتسمت اختها الصغيره بألم وقعدت ساكته...
💕💕💕💕💕💕
