إلى أولئك المُغرمين بأنفاس الصباح العراقية ، أولئك الذين يحبون أن يستيقظوا باكراً ، يتذقون الچاي المهيل ويستمتعون بالفطور العراقي خصوصاً الكاهي والگيمر
"صباحكم عافية" ♥️
شلونكم إن شاءلله تكونون بخير
بارت اليوم راح نتكلم عن قصص أمثال عراقيه
قصه مثل (كفيان شر ملا عليوي)
في أحدى القرى العراقيه كان اكو جامع
وكل الناس تصلي بهذا الجامع ماعدا
واحد ماكان يصلي..
وأمام الجامع اسمه (عليوي) وجان يضوج
منه لان مايصلي بالجامع.
وكلما يضرب مثل على هذا الشخص
يكولون لاتصيرون مثل فلان الي مايصلي
بالجامع،مره راد ذاك الشخص يخطب
فاكالوله لازم الامام (عليوي) هو الي يكتب
عقد الزواج وهو يضوج منك لان ماتصلي
روح صلي علمود يكتب عقد زواجك
فذاك الشخص ماضل عنده غير حل
راح للجامع يصلي صلاة الفجر
بلش يصلي وكال"نويت إن اصلي صلاة
الفجر چفيان شر ملا عليوي"
ومن ذاك الوكت صار المثل شائع
_________________♕
(لاحضت برجيلها،ولاخذت سيد علي)
يضرب هذا المثل للشخص الي يطمع
بالكثير فيخسر الي عنده قصته
تزوجت إمرأة حسناء من رجل فقير
قليل الرزق وكان ودود لزوجته حريص
على سعادتها وبعد مرور سنوات على زواجهم
ملت من فقر زوجها فملت عشرته والعيشه وياه
بيوم من الايام راحت لفتاح الفال يكشف طالعها
كان فتاح الفال شخص معروف اسمه سيد علي
فشاف سيد علي حسن المرأة فزاغت عينه وقرر
إن يوقعها بشباكه فأخبرها إن نجمها ونجم زوجها
لايتلائمان واحسن حل لها الطلاق
ولمح انه مستعد للزواج منها واسعادها
بعد العدة فصدم المرأة كلامه وطلبت الطلاق
من زوجها فطلقها مجبرا،
ورجعت للسيد علي وطلبت إن ينفذ وعده
وبقى كل يوم يمهلها ويكلها اصبري
لحدما أيست منه ورجعت لزوجها نادمه
باكيه لكنه رفض يرجعها لعصمته بعد عملتها
فرجعت لتعيش مع أمها وعلم الناس
بالأمر فقالوا (لاحضت برجيلها، ولاخذت سيد علي)
ومن يومها صار هذا المثل مشهور
__________________♕
(بين حانا ومانه ضاعت لحانه)
يضرب هذا المثل للشخص واكع بمصيبتين
ومايكدر يخلص منها قصته تكول اكو رجل
زوجته اسمها حانه فلما كبرت عجبه يتزوج
وفعلا اتزوج بفتاة حسناء اسمها مانه
فكان يعدل بينهم كما امر الله تعالى
فيقضي ليله مع حانه وليله مع مانه
وكانت كل وحده تريده إن يبقى لها وحدها
وعندما يختلي بزوجته الأولى حانه
تأخذ الشعرات السوداء من لحيته
فتنتفهما حتى تصير بيضاء
ويحس روحه شايب ومناسب بس الها
وأذا اختلى بزوجه الصغيرة مانه
تنتف الشعرات البيضاء من لحيته
حتى تصبح سوداء ويحس روحه شاب
ومناسب بس الها وبقت الزوجتين على هل حال
لحدما خلص شعر اللحيه كلها
فكان الرجل جالس مع اصحابه
بالمقهى سأله احدهم:هاي شنو ابو فلان؟
وين لحيتك؟مزينها!!
فقال الرجل:لا والله مازوينتها،بس بين حانه
ومانه ضاعت لحانه.
وصارت هاي الجمله مثل يتداوله العامه.
وبالنهايه أتمنى تعجبكم الفقرة
ونستمر بيها لولا؟
مع السلامه ♥
أنت تقرأ
شدة ياس
General Fictionأللهم أني استودعتك وطني من شماله الى جنوبه ومن شرقه إلى غربه وأرضه وسماءه واستودعك أهله الطيبين صغيرهم وكبيرهم وأمنه وأمانه وخيراتهم فأحفظه بعينك التي لاتنام يأمن لا تضيع ودائعه عندك.. اللهم العراق🇮🇶
