قلب مستعمل

الــجزء الاول

"حجرة ورقة مقص"

صوت مزدوج تسمع من طرف بنت و ولد مقابلين مع بعضياتهم و أول مسالاو شافو فيدين بعضياتهم كانت البنت رابحة الحجرة بالورق

البنت تبسمات بحماس:وااااع غلبتك غلبتك يلاه سييير دابا للبيرو دالحارس العام و جيب ورقة دالدخول

الولد :لا أهند لا، حرااام عليك واش ديما مللي تغلبيني فهاد اللعبة تطلبي شي حاجة صعيبة هكااا

هند علات كتوفها بزوج مامسوقاش و عوجات فمها للجانبين مميقة فيه:ماشي سوقي دير اللي قلتلك .. راك نتا اللي مكاتعرفش تستغل الفرصة مللي كاتكون نوبتك تحكم أحسام

حسام مغوبش فيها:حرااام عليك والله حتى حرام

بقات معوجات فمها فيه معلية كتوفها بزوج و مشات لواحد الركينة كاتمتم:يلاه كانتسنااااك

مشات كاتشوف فساعة يديها و مبتاسمة بشر، بنت بوجه ملائكي بجمال ساحر ولكن بالاستعانة بالمكياج، كاتبان فنيونة، بشعر زعيعر شوية و عوينات فالزريرق مايل للگري، داك اللون السماوي الجذاب، خذوذ مليانين و بشرة بيضاء اي خدش بسييط كايبان فيها

بنت مشاكسة مستغلة للفرص، من الشوفة فيها ماتعطيهاش عمرها 21 عام كاتبان صغيرة .. هي الكبيرة د قسمهم على حسب مضوبلة التاسعة جوج مرات أما الباك مخيمة فيه هذا عامها الرابع فيه بعدما قصاوها و رجعات باستعطاف .. هادو الايامات دالپريپاراسيون للامتحانات و لكن هي ذماغها ثقيييل فالقراية، عطيوها الماكياج و المسارية و بعدو لهيه

بقات مدة من الوقت واقفة مربعة يديها كاتسنا حسام اللي دخل هادي مدة للبيرو دالحارس العام وتعطل، تأفأفات كاتجبد المسكة من صاكها و دارتها ففمها كاتنضغ و طرطقها بصوووت عالي حتى بانلها حسام جاي عندها مبتاسم ابتسامة جانبية

حسام بشر:لقيت غي النائبة ديالو ههههه

هند نتراتلو الورقة د الدخول مخنزرة فيه:ايوا و دوختيها فحال ديما بزوج كلمات

حسام بقهقهة عالية:اياااه ههه

هند دفعاتو من قدامها:يلاه تلاح انا معطلة عشرة دقااايق دابا

مشات من قدامو بضع خطوات، جبدات الورقة فيها ختم باسم الحارس العام، كتبات فيها سميتها و الساعة اللي تعطاتها فيها الورقة و وقفات فباب القسم كاتدق و تنضع المسكة، حتى تحل عليها الباب اللي كايسدو هاد الأستاذ بالساقطة .. شاف فيها معلي حاجبو