يوم جديد :
حاطة راسها مع لي دوسيي لي بين يديها مطلعتوش كامل ؛ فرحانة بزاف لي ولات تصرف على روحها بروحها على الاقل نقصت شوية عبئ على يماها ؛ طلعت راسها كي حست واحد دخل لعندها
نهال : مسيو مؤيد كشما تسحق ؟
مؤيد : جيت نشوفك وين واصلة فالخدمة
نهال : هاا قريب نكمل مقعدليش بزاف
مؤيد : مليح .... احمم واش رايك تخرجي تفطري معاياضيقت عينيها فيه
مؤيد : يعني قصدي كنت رايح نفطر قلت اذا جي
نهال : لالا مسيو صاحا
مؤيد : متخافيش مراحش ناكلك
نهال : هههه
مؤيد : هيا جي ولا لالا
نهال : خلاص دوك نسقم هاذ ليدوسيي و نجي
مؤيد : خلاص راني برا نستناك
نهال : داكوور........
ناضت روسلين شعلت تليفون لقاتها ثلاتة تاع لعشية تشوكات
روسلين : اياااه ثلاتة ... بففف شحال وليت نرقد
لقات شحال من ابال من عند سراج رجعت طفات التليفون و حطته معينهاش تهدر اصلا حاسة روحها دايخة من رقاد ، زادت شوية و ناضت دوشت نشفت شعرها و لبست بيجاما روز و هبطت لتحت ؛ دخلت ديراكت للكوزينة كانت جيعانة بزاف غير دخلت لقات فاطمة و فخرية تما
روسلين : مساء الخير
فخرية : مساء الانوار روسلينفتحت فريجيدار تحوس كشما تاكل لقات قاطو رفدته ة قعدت فالطابلة مقابلة فاطمة و تاكل
فاطمة : فخرية وجديلي الخضر باش نطيب
فخرية : ايه مدام فاطمة
روسلين : ااه ماني نتي حاطيبي لعشا ؟
فخرية : هي حبت قتلها خلي عليك محبتش ؛ بصح صراحة ماكلة مدام فاطمة لا يعلى عليها
روسلين : اممم واش راح ديري
فاطمة : حنديرلكم طعام ( كاين لي يقولو كسكسي وكاين بربوشة يعني كل واحد كيفاش يسميه حنا نقولولوا طعام ) يعني حنديرو فخاطر ادهم نعرفو يحبو
روسلين : امم مليح
فاطمة : هيا نوضي تشوفي معايا
روسلين : وين
فاطمة : تعاونيني
روسلين : ههه ملقيتيش شكون يعاونك تقوليلي ليا انا زيرو فطياب
فاطمة : يا سيدي نعلمك ؛ نوعدك شهر تولي طيري فطياب
روسلين : زعما
فاطمة : سيي
روسلين : ههه خلاص تفاهمنا مالاناضت روسلين معا فاطمة ؛ عاونتها فكلش داروا الطعام و السلطة من كل نوع و فنفس الوقت فاطمة مسايرتها و تعلم فيها جوزوها بين ضحك و قسرة لحقت ستة و نص كان كلش وجد
روسلين : ياهه ههه طيبت اليوم
فاطمة : ههه قتلك ساهلة و زيد الله يبارك عليك راسك خفيف منا لاخر الشهر تكوني طيري فطياب
روسلين : ان شاء الله ؛ انا نطلع نشوف ماما مشفتهاش كامل اليومطلعت روسلين لشمبرة رهف طبطبت ملقاتهاش سقسات فخرية قاتلها راهي برا ؛ خرجت لقاتها قاعدة وغايسة عنقتها ملور
روسلين : وشبيه الزين غايس
رهف : ههه مابيه والو ... اقعدي تشوفيقعدت روسلين
رهف : ايهيه يا لالة راحلك زعاف
روسلين : اوهوه راني على ما يرام
رهف : بصح ختك مشكيتش
روسلين : وشبيها 😧
رهف : روسلين بنتي تعرفي ميس بزاف sensible المسكينة لبارح طلعت تواسيك كي لقاتك تقلقتي و نتي واش درتيلها عيطتي عليها هكذاك مجياش
روسلين : مكانتش نيتي نزعفها كي كنت مقلقة عيطت عليها بصح ماشي قصدي
رهف : علبالي ... دوكا غير شوفي كيفاش تنحي الزعاف لبنتي
روسلين : هه متتقلقيش ؛ خليها عليازادت قعدت معاها شوية منبعد راحوا تعشاو و كل واحد وين راح
فاطمة كانت قاعدة فشمبرتها تقرا فالقران حتى سمعت الدقديق ، كملت الايات لي قعدو
فاطمة : صدق الله العظيم ، انعم شكون
فتحت الباب و رمات راسها
روسلين : هاذي انا نقدر ندخل
فاطمة : بيانسور ارواحي......
روسلين : فطوم جيتك قاصداتك فحاجة لاحبيتي زعما
فاطمة : ههه قولي زعما حشمتي
روسلين : حبيت ندير قاطو لميس بارسكو راهي زعفانة مني ؛ و مدام هي تحب la tarte tatin قلت نسيي نديرهالها حوست فالانترنت لقيت بزاف ليروسات و بحكم معنديش expérience سما معرفتش اما لمليحة رجعت بيني و بين روحي تفكرت بلي عندنا شاف فدار لدرجة انه اليوم كامل مسحوا تباسا tellement ماكلتها بنينة .... واش رايك تمديلي la recette
فاطمة : ههه نعاونك بصح منعرفش هاذ الحلوة لي راكي تهدري عليها
روسلين : شوفي دوك نوريهالكوراتلها لاتارت
روسلين : هاذي la pâte نورمال عجينة تاع تارت ؛ وهنا تفاح caramélisé منبعد كي طيب يقلبوها
فاطمة : اممم نمدلك la recette على حساب واش فهمت و ان شاء الله راح جيك خير ملي موالفة تاكليها ، وشنو خليلي مورصو منها
روسلين : اههه مارسي فطووم
فاطمة : بصح عذريني بنتي راني عياانة رجليا وجعوني مالوقفة ليوم منقدرش نهبط معاك
روسلين : معليش مديلي la recette و شوية les conseils يكفيونيفاطمة قاعدة تملي عليها و هي تكتب فالتلفون حرف بحرف من واش تقولوا فاطمة كي كملت باستها
روسلين : مارسي فطومتيي
وهبطت تجري للكوزينة ؛ جبدت كلش وجدته قدامها
روسلين : بسم الله
بدات تقشر فالتفاح و تتعافر معاه خلات فيه شوية برك ناس يقشروه باش ينحيو القشرة وهي نحات القشرة و التفاح لداخل قشرت و قطعت شحال من حبة باش صدارلها
روسلين : يعني سافاا .... ايه قاتلي ماني ديريلو القارص باش ميكحالش
عصرت عليه القارص و راحت دير العجينة ؛ مور 10 دقاق العجينة مولاتش عجينة ولات تتفتت وحدها تالمون ناشفة
ادهم كان يهدم فالبيرو منبعد هبط يجيب قرعة ماء وعلى دخلته للكوزينة يلقاها مقلبة كامل و روسلين تلعب بهذيك العجينة و الفرينة
ادهم : واش راكي دايرة فالحالة !!!
يتبع 💚💚💚 .... ( فالليل كامل نزيدلكم بارت متنساوش تخليو ارائكم فالاحداث و توقعاتكم 💛 )
VOUS LISEZ
ابن عمي { ادهم و روسلين } _ باللهجة الجزائرية
Romanceالقصة دور في دار وحدة بين اولاد العم و باقي التفاصيل تعرفوهم فالكرونيك ملاحظة : الرواية من نسج خيالي لا علاقة لها بالواقع