صفية : حطولي كاس تاي انا طار عليا النعاس اصلا
جابولها كاسها قاعدة تشرب و ريحان كانت ساكتة هي بطبعها متحبش الهدرة بزاف
صفية : واشبيك مرت خويا ساكتة
ريحان : والو غست برك
صفية : اممم .... قربت دخلة تاع المسيد
ريحان : ايه صح مقعدلهاش بزاف
صفية : ربي يوفقهم ؛ لبارح برك نشفى لجاد و قمر كي دخلوا للمسيد
ريحان : ايه واش تحبي دنيا تجري
سقمت صفية قعدتها و قالتلها
صفية : اممم هاذ العام يوليو يقراو مع ميس فمسيد واحد يعني يوليو يروحو و يجيو كيفكيف
ريحان : اممم يعني ميس طفلة عاقلة معنديش بروبلام اذا راحو مع بنت عمهم بالعكس هكذا مام هي متحسش روحها وحدها
صفية : ايه مام انا هكذاك قلت ... بصح ختها لكبيرة سمحيلي مي لازم رهف تعاودلها تربية
ريحان : هي صح لسانها قبيح و ترجع الهدرة بزاف بصح تبانلي مليحة يعني ماشي للدرجة لي راكي تهدري عليها
صفية : ايه يا ريحان اقعدي نية هكذا حتى تاكلك ندامة مع الاخر
شدتلها صفية يدها
صفية : كي تفسدلك تربية ولادك تما تعرفي واش راني نهدر ياك كامل ولاد خاوتي و لي تشوفو عيني مراح نزيد عليه ؛ روماركيتها بلي تقربت بزاف من قمر و جاد خطرة تكون فشمبرتهم و دوكا فصالون معاهم يعني معليش راهم عائلة بصح راني نقولك هكذا باش ديري بالك على ولادك راكي تعرفي لبستها و هدرتها تخافي ولادك يتعلموا منها نعرفك ربيتيهم نعم التربية بصح متعرفي المعاشرة واش دير
ريحان قعدت ساكتة و صفية قدرت توسوسلها و دخللها شك
( شحال منحملش ناس لي كيما صفية لي يهدرو فناس و زيدو يفسدو الاخرين عليهم 😒😒😒 )
صفية : انا نخليك نطلع نشرب دواء تاعي و نرقد تصبحي بخير
ريحان : و نتي بخير
.......
روسلين منبعد ما طفاو التليفزيون و طلعوا الاخرين قعدت غير هي دير بتليفون حتى جاها نعاس ؛ جازت للكوزينة تشرب الماء غير دخلت لقات ريحان قاعدة و غايسة ؛ راحت ديراكت شربت الماء و جات خارجة
ريحان : روسلين
دورت راسها مستغربة واش تسحق منها
روسلين : انعم طاطا
ريحان : راح نطلب منك طلب روسلين ... بعدي على ولادي تعيشي منسحقكش دوري بيهم ولا تهدري معاهم
روسلين : سمحيلي طاطا بصح واش درت !! غلطت معاهم فحاجة
ريحان : مغلطتيش .... بصح مرانيش حابة تاثري عليهم بتربيتك سمحيلي مي انا ولادي ربيتهم مليح و منسحقش تفسد تربيتهم
خزرت روسلين فيها مشوكية من هدرتها كانت دايمن تبانلها ريحان عاقلة و هادئة ؛ غاضتها عمرها من هدرتها
روسلين : وعلاش وشبيها تربيتي 😥
ريحان : روسلين انا منعرفكش مليح يعني منقدرش نحكم عليك بصح لي شفناه منك هاذ اليامات صراحة يبين تربيتك مليح
روسلين : بصح حكمتي عليا بلا ما تعرفيني ..... ايه خلاص ولادك مندورش بيهم بصح ديري في بالك بلي راح يجي نهار و تندمي على هدرتك
ريحان : بصفتي ام مراحش نغلط فحاجة خذيتها لمصلحة ولادي
......
دخلت طونوبيل تاع ادهم للدار هبط منها و دخل رايح ديراكت لشمبرته قابلته نرجس
نرجس : اوهوه وليد الخال رانا نتلقاو بزاف هاذ الخطرة .... واش كنت راح نقلك طاطا ريحان مصبح و هي تحوس عليك قاتلي كي يجي قوليلو يلقاني فالكوزينة
جاز ادهم عليها ديراكت للكوزينة و هي تبسمت تبسيمة شر
......
روسلين دورت راسها كانت راح تخرج منبعد رجعت عند ريحان
روسلين : نصححلك حاجة يا مرت عمي ، لا انتي ولا غيرك تقدرو تهدرو على تربيتنا التربية لي مدتهالنا ماما نتي متقدريش تمديها لولادك علبالك وعلاش بارسكو نتي كي مات راجلك لقيتي لي وقف معاك بصح ماما لالا علمتنا نتحملوا مسؤوليتنا وحدنا و اذا تعتبري البنادم لي يدافع على روحو و على حقه و ميسكتش على الظلم قليل تربية انا نعتبر تفكيرك جهل لا اكثر ولا اقل سمحيلي مي حنا ماما معلمتناش نسكتو على حقنا كيما تسكتي نتي على حقك و تخلي صفية تبهدلك و تجرحك و نتي ساكتة
ريحان عينيها تعمرو بدموع لي قالتهولها روسلين صح ؛ مالغري صفية جامي ضاربت معاها ولا دارتلها واش دارت لرهف بصح ملي مات راجلها ظل ترميلها الكلام المسموم و المعاني
دورت روسلين راسها خارجة لقات ادهم واقف موراها ؛ بلعت ريقها كي شافت الخزرت تاعه دنا عندها و خزر فيماها و رجع خزر لروسلين
ادهم : هاذي الاولى و الاخرى لي تهدري فيها هكذا مع يما ...
روسلين : ماشي نتا لي تعلمني واش ندير واش منديرش
خبطته بكتفها و جات خارجة ؛ جبدها بيدو و رجعها قدامه
ريحان : ادهم خلاص
...
ادهم : انا ماشي صفية و لا جدي نسكتلك
جبدها من وجهها بيدو
ادهم : ندمك على نهار لي زدتي فيه و نرجعلك ياماتك مرار
زاد جبدها
ادهم : بلاكي تزيدي تهدري معايا هكذا فهمتي
زيرلها على وجهها حتى توجعت
ادهم : و هاذي ( دورها ليماه ) ردي بالك ترجعي تهدري معاها هكذاك و دوكا راح تطلبي السماح منها و تخرجي عليا منا وجهك منشوفوش
طلقلها وجها عينيها تعمرو بدموع كانت شادتهم بسيف
روسلين : ماشي روسلين لي تطلب سماح
رجع جبدها عندو
ادهم : و انا كلمتي ما تتكسرش
ريحان : ادهم يرضى عليك ربي خلاص خلينا منها
روسلين : انا نكسرهالك
ادهم عينيه حمارو و شكون هي باش تهدر معاه هكذا
..........
هذا هو البارت نتلقاو فالليل ان شاء الله فبارت جديد ؛ توقعاتكم على البارت الجاي الاجزاء الجاية ان شاء الله راح تكون متعلقة اكثر شي بروسلين و ادهم يعني مادابيا تخليولي افكاركم و اقتراحاتكم ؛ رايكم في الحكاية حاليا و الى الملتقى ان شاء الله في بارت اخر 💛💚
VOUS LISEZ
ابن عمي { ادهم و روسلين } _ باللهجة الجزائرية
Romanceالقصة دور في دار وحدة بين اولاد العم و باقي التفاصيل تعرفوهم فالكرونيك ملاحظة : الرواية من نسج خيالي لا علاقة لها بالواقع
