حكاوي

حكاية واحد (قطتي الضايعة)

_ عصام : ها يا جماعه احنا عددنا مش كتير النهارده دي حاجه كويسه جدا عشان المعظم يقدر يتكلم ... ها مين يحب يشاركنا احساس ليه او موقف ضايقه.

_واحد من الحضور : انا هتكلم .

_عصام : عرفنا بنفسك و احكيلنا .

_انا اسمي (احمد قاسم) مشهور بين صحابي ب(أحمد قطة) متستغربوش استنوا بس و هتعرفوا ... انا كنت تعبت في فتره من سنه تقريباً و كنت تعبت اوي و اتشخصت كتئاب و كانت عيلتي و صاحبي (عبد المجيد) المعايا دلوقتي اهو كانوا اكتر ناس جنبي و معايا و حاولوا يساعدوني اني اخرج من الفتره دي اختي حبت تخلي عندي صاحب معايا ال 24 ساعة نصحى سوا .... ناكل سوا .... ننزل نخرج ... نروح نعمل كل حاجه سوا فجابتلي قط و بقى اسمه(حنفي) و بقى أقرب روح ليا كنا ديما سوا و هو الخرجني من الجو الكنت فيه ..... مكنش قطي بس كان ليا كل حاجه فضلنا مع بعض كتير ..... من اسبوعين (بدأت رعشة في صوت احمد و حزن) خرج لوحده معرفش راح فين مستنيه يرجعلي ... ناس كتير بتقولي (ده اكيد مات خلاص ).....( ده مش هيرجع ).... (ايه يا عم دي حتة قطه ) ... (انت زعلان ليه ما تجبلك واحده غيرها) .... ليه مش بيقدروا الأنا حاسس بيه... ده مش مجرد قط ده صاحبي في الوقت الهما سابوني فيه هو كان معايا لما كان بيبقى( عبد المجيد) مشغول و مفيش حد ينزل معايا و نتمشى شويه عالنيل كان بينزل معايا عمره ما رد عليا و قالي زي ناس كتيره اه هنبقى نشوف ان شاء الله و ننزل و انا عارف ان ده مش هيحصل لما كنت مخنوق مش عايز اقوم من سريري كان هو بيخليني اقوم لابسط حاجه احطله اكله و اعد لحد لما ياكل .... ده مش قط ده صاحبي الوحيد أقرب حد ليا ... بدعي ربنا انو يرجعلي .....
_واحده من الحضور بكل عفويه و حنيه : متقلقش حنفي هيرجع زي بندق صاحبي.

_عصام : ( بابتسامه هاديه) اهو متضايقش اهو بندق رجعلها يبقى حنفي هيجيلك.... فعلا الناس بتشوف الحكايه من بره بس من غير ما تعرف تفاصيل فبتحكم عالفاضي من غير ما يكونوا عارفين الحقيقه .... انا بردو كان عندي سمكتي و ماتت و انا صغير فضلت شهر ابص للحوض بتاعها و اعيط و امي الله يرحمها بقى كانت تقولي عصام كفايا عياط هجبلك سمكه غيرها ... بس هي مكنتش فاهمه ان السمكة دي كانت صاحبتي الوحيده.....الحيوانات دول بيبقوا ساعات اوفي من ناس كتيره اوي و يستاهلوا حزننا عليهم.

****