طبعا صارلي فترة كلش جبيرة مناشرة ولا متفاعلة بالوات لان نفسيتي مزفته وحرفيا ما اعرف شنو اريد ومكضيتهة بين التلي وبين سينمانا 🌚
طبعا هالكليشة للي يهمهم امري ويسألون علية ☻
المهم بما انو احنة هسة بشهر بحرم واغلب الناس ميعرفون شنو وليش وشصاير بهالأيام راح شوية اتفلسف براسكم وخصوصا للي من غير ديانات او جنسيات او مذاهب الخ الخ *وتحياتنا الهم يعني .. تاج وباج🌝*
فشسمة خنبدي :-
شهر محرم هُو أول شهر بالتقويم الهجري الأسلامي وبيه صارت معركة الطف بسنة 61 للهجرة و 680 ميلادي
هاجر الأمام الحسين هو وأهله وعياله من بعد استشهاد الأمام الحسن (عليهم السلام اجمعين) من مكة المكرمة إلى كربلاء استشهد الأمام الحُسين (؏) بالعاشر من محرم واللي الشيعة يسمونه عاشوراء
بس هنا السؤال .. مَن هو الحُسين ؟
هُو الحُسين ابنُ علي ابن أبي طالب سبطُ النبي المصطفى مُحمد (ص) وريحانتُه أُمهُ فاطِمة الزهراء سيدة نساء العالمين سيدُ شباب أهل الجنة .. وسيدُ الشُهداء .
المهم خرج الحسين هوة ونساءه واطفاله واخوه العباس (؏) وجان يعرف انو هوة رايح للمكان اللي حيموت بيه جان يعرف حينقتل هوة واولاده وانصاره واخوه
بس مع ذلك استمر بطريقه ووصل لكربلاء بدعوة من اهلها وكالوله تعال احنا حنعاونك ونوكف بوجه يزيد والخ الخ من الكلام
وبس وصل غدروه وانسحبوا وتركوه وحده بارض المعركة مع عدد قليل من المقاتلين ضد جيش يزيد الألفي
شنو سبب خروج الحُسين ومقاتلة يزيد ؟
نرجعلكم شوية ليورة وشنو صار وية الامام الحسن اخو الامام الحسين (؏)
الامام الحسن بعدما استلم الخلافة الراشدية واللي اغلب الناس متدري بهالشي ومتدري بانو الحسن جان الخليفة الراشدي الخامس لكن حكمة استمر بس فترة قصيرة كم شهر ما اعرف شكد بالضبط
هنا الامام الحسن عقد معاهدة وية معاوية الله يلعنه بانو ياخذ هوة الحكم حتة لتصير حرب وحقناً لدماء المسلمين لان جان يشوف بانو هوة اولى بالحكم على العراق والشام واخذ الحكم
بعد ما استشهد الامام الحسن ووراها مات معاوية ايضا واستلم الحكم يزيد اللعين هنا شنو صار
جان يزيد حاكم فاسق يلعب قمار ويشرب الخمر ويلاعب القردة والخ من الاشياء الخايسة وجان ظالم وجائر حكم بالوراثة مو عن طريق اجماع الناس (يعني مثل الانتخابات مال ذاك الوكت) ويكولون انو جان اكو ظلم للناس والفقراء همين بذاك الوكت
فدزوا اهل المدينة وكبارها رسائل للامام الحسين وانو همة يبايعونه حتة يخلصون من حكم يزيد الظالم وهيج واكيد هاي مو كل التفاصيل اكو اشياء هواي تكدرون تطلعون عليها بالنت
المهم خنكمل رسل الامام ابن عمه مسلم ابن عقيل (رض) لكربلاء حتة يأكد عالبيعة وهيج مدري شنو وهمين انقتل وانقتل هانئ ابن عروة ايضا وبعدهة اجة الامام لكربلاء وصارت المعركة ..
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
هاي المعركة الغير متكافئة لا من ناحية العدد ولا من اسلحة ولا مؤونة
صارت المعركة على مقربة من نهر الفرات ومع هذا ماتَ الحسينُ عطشاناً حرموا الماء على الحسين واهل بيته وكل ما احد يريد ياخذ ماي يروي عطش الاطفال اللي يبكون من العطش يمنعونه حتة انهم قطعوا ايدين العباس ثنينهن بس حتة ما ياخذلهم ماي يروون بيه ضمأهم
خلصت المعركة وانقطع رأس الحسين عليه السلام واخذوا النساء سبايا ومعهم الامام السجاد اللي كان مريض ومكدر يشارك بالمعركة
المهم عوفونا من كل هالتفاصيل الحسين عليه السلام طلع بثورة عظيمة ضد الظلم والجور
طلع ضد الفساد وحتى يصلح دين النبي اللي خربه يزيد واقتبس منه عليه السلام (اني لم اخرج اشرا ولا بطرا بل خرجت للاصلاح في امة جدي رسول الله )
ثورة الحسين عظيمة كلش عظيمة ثورة انسانية ضد الظلم والطغيان ثورة مبادئ وقيم واخلاق ثورته تعدت كل المفاهيم والكلمات ثورة يعتبر منها الصغير والجبير المرأة والرجل الدارس والأمي
الحسين عليه السلام ما استشهد حتة بس نبجي علية ونلطم ونطبر روسنة الامام الحسين ثورته اعظم من كل هالشكليات والرياء اللي ديصير هالايام المحرمة الحسين عليه السلام طلع ضد الظلم .. طلع ضد كل انسان فاسد وعاث جور بهالأرض طلع هوة وأهله علمود قضية جبيرة ، كلش جبيرة انقتل وشاف اولاده واخوانه وهمة ينقتلون واحد ورة الثاني ومات عطشان وانقطع رأسه الشريف حتة تبقى ذكراه عالقة ببال الناس ويتعلمون من قيمه واخلاقه وصبره عالمصائب
الحُسين عِبرة وَ عَبرة .. فطوبى لمن اعتبر
والسلام عليكم 🌚🤝🏻
لا لا لحظة لحظة هيييو لتنسون بعد اسبوع على عيد ميلادي الميعايدني اشكه وصلتين 🌚😂 احم اتشاقة بس هيييو انتبهوا اريد تكلبون المنصة مالتي كلاب واشتركوا بقناة التلي مالتي @BasraPoet والرابط مالتهة بالبايو وخلوا تصويت لهذا البارت وسووا تاكات لاصدقائكم
