رجعت ببارت جديد نتمنى يعجبكم 🥺
.
.
.
من مور سيمانة
.
.
.
كنت قاعدة فالدار منيش نجاوب على وسيم حسيته طاح من عينيي
المهم ولا كاتلني الفيد من الروتين كل يوم نفس الروتين قراية الدار كاين غير مريم و كوتر لي كانو يفوجو عليا بتمهبيل تاعهم هههه و كل مرة نوقفو عند قنتنا العادة متبدلتش غير موليتش نشوف وسيم وهدا الشي خلاني نفرح منيش باغية نتلاقا معاه
دخلت للدار كيما العادة ماما تنڨرش بسكو بطيت برا وبابا يهدر في التلفون مع عمي على البوليتيك و يتناقشو رحت لبيتي قلعت عليا قشي لي خنقني مع السخانة لي برا ولبست بيجامتي لي عبارة عن تريكو عريض و شورط دايما هكا بيجاماتي في الصيف غير لعرا ههه
دخلت طوالات وزدت دخلت دوش غسلت يديا ووجهي من العرق و كورونا ههه
خرجت من الدوش ورحت الكوزينا بغيت نتقهوا وماما تقولي تبعي معايا باش تعلمي طيبي وانا نتبع ونسقسي هادي شاه وعلاه راكي ديري هادا المهم نهاري فات عادي وانا كرهت وبغيت نبدل الجو ايا دخلت القروب قنتنا وقلتلهم علاه مانخرجوش غدوا ندورو شويا و بلاك نديرو شوبينغ قالولي مبعد نجاوبوك حتى يسقسو والديهم و تفكرت بلي انا ني نهدر و ماسقسيت والديا ماعندي دراهم للشوبينغ :(
رحت عند ماما وبديت ندلقلها
انا: ماماا الشابة في النسا قاع
ماما: مالكي
انا:كيفاه مالني منهدرش مع ماما لي نبغيها
ماما: جيني ديراكت شا خاصك
انا: صحاباتي راهم خارجين وقالك الخرجا ماتحلاش بلا بيا
(الله الله شحال نكدب🙂😂)
ماما: وشكون هادو صحاباتك ووين باغيين تروحو
انا:كوثر و مريم ياك تعرفيهم وتقوليلي عاقلين وناس ملاح (نتي لي ناس ملاح😂)
وباغيين غير ندورو كرهنا من القرايا والستريس تاع الباك
ماما: ايوا صاحا روحي بصح بلا مانوصيك هاه عيني
انا: واه واه متخفيش هكي بوسة في الخدود موااااح
ماما:روحي الله يهديك
انا: اميييييين 😂
انا جيت رايحة حتى نتفكر معنديش دراهم ودرت دوميتور ماما كي شافتني جايا قاتلي: مالكي عاود تاني
انا: غير خاصني دراهم حمبوك بلاك نبغي نشري كاش حاجا شافت فيا ودخلت يديها في المخبأ السري تاع كل ام وجبدت الدراهم من صدرها وعطاطتني بستها وجيت موليا لبيتيي
