نجاح من وسط الوجع

بارت الاول

قصة نجاح في وسط الوجع ..

جزء الاول

طلعت من البيت و اني الف اللفاف زين على خشمي حتى لا اتمرض لان ما عندي فلوس علاج و رحت امشي شوية شوية و ارجف من البرد لان قميصي خفيف و بارد ...

وصلت للمسطبة ويا العمال و كل واحد داير على لكمتة الي متزوج و عندة اطفال و الي يتيم و يعيش اخوتة و الى اخره ..

اتقدم الي رجال جبير بالعمر ..

_سلام عليكم

_و عليكم السلام حجي تفضل

_اول مرة اشوفك هنا انتة جديد ؟

_اي اليوم اول يوم

_شنو اسمك ؟ و شكد عمرك ؟

_اسمي احمد مواليد ٩٧

غيم بوجهي و راح استغربت حجية ..

ضليت انتضر و الجو كلش بارد و ما ماكل شي احس معدتي تصوصي ..

اجت سيارة حديثة و كلها ركضت الها ناس تصيح اني خلفة بناء و ناس تصيح اني خلفة لبخ اخذ الرجال ٣ رياجيل و جان ناقصه واحد صاح علية واحد منهم ما اعرفة ..

_يولد روح وياهم الرجال طالب واحد يبني الة غرفة

_بس اني هسة اجيت حتى ما عندي اختصاص

_هههههه يا اختصاص هذا ليش وين احنا بالمستشفى ، روح و يا هذا الرجال اسمة صادق هو يعلمك

صعدت وياهم و ما اعرف منو صادق اصلا ..

دخلنا بيت جبير كلش يخبل عبالك قصر اول مرة اشوف هيج شي لان الميتم الي عشت بي كلة كم متر و عايشين بي الف طفل ..

اخذنا لممر ورى بيتة ..

_ابنو الي هاي المساحة غرفة مساحتها ٤×٣ محتاجها هاي اليومين ياريت تكملون اليوم و انطيكم الي تردوه

راح صاحب البيت و صاح علية صادق ..

_انتة يولد انكل طابوك بالعربانة و جيبة يمي

اخذتو الة و بلش يصفطون بيها و اني انقل و الجو بلش يكسر  و الشمس طلعت قوية اليوم حمدت ربي بلكت احصل شي زين حتى اشتري اكل لان راح اوكع من طولي ..

اجة صاحب البيت وياه صينية ريوك ..

_اتفضلو على زادكم و بعدين رجعو كملو و انتة ابني هاي الك قمصلة مال ابني ما يريدها اتدفئ بيها

اخذتها فرحان و الله وكت يا احمد الناس صارت تتصدق عليك

اكلت حد ما شبعت و بنينا الو الغرفة و صادق فهم انو اني بعدني جديد على الشغلة و ركز علية حتى يعلمني

_اني اسطة صادق راح اعلمك حتى منا و هيج تطلع ويانا كون مطيع و احمد ربك دائما على الي تاخذة.

و من ساعة ٥ الصبح نشتغل قريب المغرب يلا كملناها بهذا اليوم تعلمت شلون اصفط طابوك و شلون اجهز خبطة و البخ ..

و حصلت اول يوم ١٣ الف بس ..

رجعت فرحان اخذت لفات فلافل بالف و قوطية ب٥٠٠ دينار و ضميت ٥٠٠٠ حتى اجمع فلوس الايجار ..

هسة لازم تعرفون منو احمد ؟

.. اني احمد جنت الطفل الوحيد و المدلل عند اهلي و ابوية حالتة زينة موضف و راتب قوي بيت ملك و سيارة و جنت مرتاح ..

بس عماتي و جدتي ضغطو على امي حتى تخلف و راحت تراجع يم الدكتورة و مرة من المرات صار حادث و اتوفو والدتي و والدي ..

بس خلصت الفاتحة كعدو يتناقشون وين راح اعيش ..

عماتي كان عندهم حجة من البداية

_اعذروني بس احنا زلمنا غربة شلون نربيه

_و اني اصلا ما احب الاطفال عدى بنتي و ابني طبعا

حجة عمي الوسطاني
_لعد شلون وين نوديه

_اخذه انتة

_اني راتبي يادوب يكفي اعيش عائلتي

صار نقاش حاد نهايتة التخلي عني و عافوني بابشع ميتم بالعراق ..

جان عمري ٦ سنوات بيتنا صار الهم و سيارة ابوية هم و حتى تقاعد مالتة ..

اول يوم جنت بس ابجي و مستغرب الحياة الجديدة جان تجي مرة ضعيفة حيل و ضربتني بشطب رمان شوغت روحي

بجيت من الوجع روحي انسحنت

_اخ يا يمة ايدي

_بسسس كافي عاد الصم حلكك

خنكت عبرتي و سكتت

جانت المسؤولة علينا حيييل حقيرة ..

لازم ننام ساعة ١٠ و نكعد ساعة ٥ مطفين كلنا اكبر واحد بينا عمرة ١٢ سنة ..

جان مدرسة للميتم و الي يقصر بواجبة يقوموه فلقة ..

ابجي كل ليلة على امي و ابوية قهرر دلالي طلع من خشمي

جان يحلم ابوية اصير مهندس نفط .. مهنتة المفضلة

بس بطلت عند صف سادس بوووجع صح المدرسين حقراء و قاسيين بس جنت احبها

و طلعوني عند عمر ١٨ سنة بقيت انام بالشارع لحد ما دلوني بسعدون و جان منقذي ..

يتبع....