نجاح من وسط الوجع

بارت الرابع

قصة نجاح من وسط الوجع..

الجزء الرابع ..

طلعت اركض من المحل ، صف السيارة كبال الباب و طب يصيح..

_ناججح ابو شهاب ناجح

_الله يبشرك بالخير

خنكتني عبرتي الصراحة انصدمت يعني هسة اني عندي شهادة ثالث متوسط؟

_هاي شبيك يمعود افرح لا تخلصها علية اهئ و اهئ

_اهئ و اهئ شنو ؟

_عود يعني داتبجي

_زين الولد ما طلعت نتائج مالتهم ؟

_بلا الحمد الله ناجحين كلكم

_الف مبروك

_الله يبارك بيك حبيبي ، تعال نكعد تعبت

_حيدر خوية انطيني الكراسي اليمك

سألني _ خوش ولد حيدر يشتغل لا؟

_اي والله خوش ولد خطية امين حيل و عفتة طول امتحاناتي رجعت نفس الوضع من اني جنت بي

_ناوي تبطلة ورى ما كملت امتحانات؟

_لاا مستحييل لان مريت بنفس وضعة بس اني وحدي هو عندة اخوان صغار و امة مثل ما ساعدتني ان شاء الله اساعدة و ما اقصر

_احمد راح اكلك شي و كلمتين حطهم ترجية باذنك ، شنو انطاك ربك انطي مثل ما الله رزقك انطي للعالم اني ساعدتك و اتمنيت تساعد غير ناس انت هم و الناس هم تساعد اشخاص اقل من حالتهم ، ربك انعم عليك شارك الناس الي اقل منك بالمادة لان بيوم مريت بنفس ايامهم الي دايعيشوها حاليا و شكد راح تساعد احد الله راح يزيدك

_كلامك على عيني و راسي و ان شاء الله ما انساه بيوم

_يلا لعد كوم عيني سد المحل هم الولد يروح يتغدة و يرتاح و انت هم لان ليوم خالتك زبيدة محضرة الغدة و تنتضرنا بالباب

_هههههههه يجوز عبالها راسبين هسة تلكيها شايلة صوندة و واكفة بالباب

_هههه ترى اني ما علية انتو تنكتلون اذا واحد عندة درجة قليلة

سديت المحل ، راح حيدر البيتهم و احنا اخذنا محمد و مصطفى من المدرسة لان هم مو وزاري ، الوزاري ياخذون النتائج من النت و الباقين من المدرسة ..

صدك طلعت خالتي ام مصطفى واكفة بالباب و شايلة جفجير و شادة شال على راسها ..

_هاا بشرو شنو

_يمة بالاول ذبي الجفجير

_اكلللك صار عندي صداع و ارتفاع بالضغط و جسمي كلة يهتز ما بية حيل دوخة الدور الثاني

_ناجحين و بكل جدارة محمد معدلة ٧٢ و مصطفى ٩٣ و احمد ٨٠

_الف مبروك و الف الحمد الله