نجاح من وسط الوجع

بارت الثاني

قصة نجاح من وسط الوجع ..

جزء الثاني ..

اي واحد بالميتم يصير عمرة ١٨ يطلعوه و لو يصير مشرد لو عصابجي لو سكير ماكو غير حل ..

كضيت اسبوع بالشارع انام على مسطبة و الجو جان بااارد بعز الشتاء ..

اقضي حاجتي بالجامع و الاكل الناس القريبة تتصدق علية ..

جان اكو واحد ابو محل دائما يباوع علية و يمكن ضاج مني ..

_خالي ترى ما يصير صارلك اسبوع هنا شعندك مو حتى الناس الي تجي تشتري مني تخاف و تشرد

_ليش عمي شكلي بي شي يخوف ؟

_لا بس عبالهم مخبل لو انتحاري

_ههههه و اذا انتحاري ليش ما فجرت روحي من اول مرة و لو مخبل ليش ساكت و كاعد كلشي ما اسوي

_اي بس لا تبقى هنا

_لو عندي مكان ما جان اليسوة و الي ما يسوى يهيني

_انه ما جاي اهينك جاي اكلك كاعد تقطع رزقي

تقدم واحد شاب و سألة

_ها خوية شبيك سلامات

الرجال حجالة السالفة ..

_انتة هم ما يصير هيج تسوي وياه دروح للمحل و اني اتفاهم وياه

رجع حجة وياي

_اعذرني خوية هذا اخوية الجبير شوية عصبي ، و اذا تريد بيت تكعد بي لو اي مساعدة روح لسعدون هو يبيع و يشتري بالبيوت و قطع الاراضي و اي احد يحتاج شي يروح الة بمثابة مختار يعني ..

دلني على مكان سعدون و كالي بهيج وقت يكون بالجامع ..

طبيت للجامع سألت واحد واكف يتوضة عن ؤجال اسمة سعدون و كال تلكاه جوة لابس دشداشة بيضة ..

لكيتة يصلي انتضرة يكمل

_محتاج شي وليدي ؟

_هااا اي الناس دلوني عليك و اريد تساعدني اني يتيم و ما عندي مكان اروح الة

_تدلل عيوني الك كوم وياي لبيتي و ما يصير خاطرك الة طيب

اخذني لبيت كلش حلو و اني اكول كل الناس بيوت حلوة حياة مرتاحة بس اني حضي اعوج يمكن و حرمني من امي و ابوية.

طبينا للبيت دخلنا الديوانية و جان ولد اثنين متمددين يلعبون بالموبايل

_كومو بابا اجة خطار

كامو الولد يطلعون بكدي سلمو و دخلو جابو مي

_كول لامك تجهز غدة

_مشكور ما اريد أخرك جاي احجي وياك و اروح

_دسكت و احجيلي قصتك

حجيتلة كلشي من وصلت لحادث امي و ابوية بجيت ما كدرت احبس دمعتي

_الله يرحمهم و يساعدك

_مشتاقلهم و الله و حتى صور الهم ما عندي

_لا حول ولا قوة الا بالله

تغدينا و وداني لبيت زين بس اني ما عندي ايجار و لا فلوس اصلا

_عمي اني ما عندي فلوس منين ادفع

_اني ادفع الك اول شهرين و انتة اشتغل و ادفع ..

جان ايجارة ١٥٠ و اني خايف لا ما اكدر ادفع وعدني اذا لكة بيت احسن بايجار اقل او شغل زين الي يكلي

جابلي فراش و غراض قديمة ساعدني بيها و اتسوكلي مال يومين ..

فضله ما انساه لو يذبحوني ..

و بديت ادور شغل بس ماكو و بلش يخلص المسواك و ما لكيت غير حل واحد اطلع عمالة و الله كريم ..

.....................

صارلي اسبوع بهذا البيت و اول يوم بشغل العمالة قسمت فلوسي ايجار و فلوس اضمها للمولد و مصاريف البيت كل البقالي ٢٠٠٠ دينار كلت اذا جعت اشتري بيهن اكل بالليل ..

و كلت لسعدون يخلي الي بس امبير واحد لان حتى غراض ما الي بس على كد الضوة ..

و مشت الايام و اني اشتغل و بالشغل صاحب البيت النشتغل الة يجيب النة ريوك و غدة و من ارجع اشتري لفة فلافل اسد بيها جوعي للعشة و اضم فلوسي ..

تالي الليل اشوف جيبي شكد بي فلوس الكة ١٠ الاف لو ١١ لان الي يحصلة الاسطة يتقسم علينا و احصل كل يوم يادوب ١٢ الف لو ١٣

٥٠٠٠ ايجار ٢٠٠٠ اضمها يبقى ٥٠٠٠ الف دينار عشة و الباقي اجمعة عبالي اشتري اثاث و غراض للبيت بس بعد ما يحتاج لان اي واحد من الجيران عندة شي قديم ينطي الي و سعدون يمرلي ينطيني شغلات ما يحتاجها لو ملابس صغار على ولدة و ما يلبسوها و اشبع قهر من اخذهن بس مجبور ..

و صرت احسب فلوسي الي تبقى و مرت الايام و اجاني سعدون فرحان..

_احمد لكيت الك شغل

_الله عليك ؟

_و الله عامل بمحل من ٨ لل٥ العصر ينطيك ١٥ يوميا

_بس اني اريد شفت ليلي

باوعلي باستغراب ..

_شعجب ؟ على العموم اكو شغل طالبين بالمستشفى عامل بكافتريا على الاطباء الخفارة من ٥ العصر ل١٢ بليل ينطوك هم ١٠ باليوم

حمدت و شكرتة صح هواي ساعات عمل و راتب قليل بس اهون

حجالي وياهم و قبلوني

اطلع بالستة الصبح للعمالة اخلص بال١٢ مرات اكثر انام و ارد اروح للكافتريا اوزع جايات و ابيع لفات ..

اضم شغل الكافتريا حتى اجمعة و شغل العمالة اعيش منة ..

وصار عمري عمري ١٩ سنة بيوم عيد ميلادي بجيت بجي حد ما الله كال بسسس

_صار عيد ميلادي ١٩ سنة يعني صارلكم ١٣ سنة من عفتوني

اتمرضت بيومها بس ابد ما مديت ايدي على فلوس الكافتريا اضمها و من اول يوم ما صرفت شي منهم و حتى ما اعرف شكد اساسا ..

و عادي شنو مريض ؟ هه قابل بشر طبيعي كلش عادي امرض و اموت و محد يدري ..

شكد جعت شكد اتمرضت بس ما مديت ايدي اخاف احتاجهم بيوم

بس هالمرة فتحت علبة الحليب الي اجمع بيها و صارلي ١١ شهر يوميا اذب ١٠ الاف ..

و انصدم ب٣ ملايين و ٢٠٠ الف ..

يتبع ...