نجاح من وسط الوجع

بارت الخامس

قصة نجاح من وسط الوجع..

جزء الخامس و الاخير ..

قريت رقمة اكثر من مرة ..

_اخي انت متأكد ؟

_اي و الله انت احمد حسن طلع تعيينك يمنا على دائرتنا

_اذا شقة ارجوك احجي

_هاي شبيك خوية صدك جذب

سدة بوجهي رديت دكيت

_يعني انت متأكد اني هسة اتعينت يمكم ؟

_اي انت اتعينت يمنا و تعال للدائرة يوم الاحد

_هاا تمام مشكور
سديتة النوب رجعت اتصلت

_معقولة اخي يعني واحد عراقي يتعين هسة ؟

زمخ بية

_اكلك انت شارب شي هي بس انت العايز و تكمل السبحة لو ضال على هوسة جهالي اشرفلي

سدة بوجهي بقيت صافت بالموبايل دقايق و حضرني

_شلون عالم ما تستحي ، مدري اني زودتها بس و الله حقي يعني واحد عراقي بسنة ٢٠٢١ يتعين صدك جذب ..

ثاني يوم انطيت خبر لسعدون و رحت للدائرة ..

طبيت الها لكيت زلم اثنين يم الاستعلامات ..

_سلام عليكم

_اهلا عليكم السلام

_اني طلع تعييني يمكم البارحة

اندار علية الثاني _هاا هاي انت البارحة الي طلعت روحي؟

_يا خوية و الله حقي يعني مواطن عراقي يتعين ورى ٥ اشهر من تخرجة

_حقك يابة صار التعيين صدفة و حلم عند الخريجين بالرغم هو حق من حقوقهم

_بزود الحرامية كلش يصير ، على العموم هسة شسوي ؟

_اخذ هاي الاستمارة امليها و وقع هنا

مليت الاستمارة و وقعت و كالي تعال باشر يوم ٧/١٥ /٢٠٢١

بيومها اشتريت قاط اباشر بي لان انتبهت اغلب الموضفين هناك لابسين قوط ..

قاط نيلي.. شعري شوية طويل حلقتة و خففتة ..

كعدت من النوم مبتسم اتصلت على حيدر وصيتة على المحل و انطيت الة خبر اني راح اداوم ..

جنت موصي اسامة و ناصر الي محلاتهم يمي يديرون بالهم على حيدر ..

اتجهزت اخذت موبايلي و طلعت مستعجل كلت اخاف اتأخر ..

دخلت للدائرة ازدحام الامة مكلوبة ..

سألت واحد مر من يمي _بلا زحمة شكو اليوم؟

_ماكو شي بس هو هذا وضع دوائر الحكومية و اليوم خميس كلها تريد تكمل معاملاتها قبل الجمعة لان عطلة