වලා සියපත් ( නිමාවී ඇත.)

ඒ තමා.......

පිවිසුම් ද්වාරය දෙස සිට යම් උපකරණයක් යන්ලි විසින් තල්ලු කරගෙන පැමිණියා ය. එය පාද හතරකින් සමන්විත වූ අතර එම පාද කෙළවර කුඩා සකයන් සවි කර තිබුණි. එම පාද සතර මත ඔප දමන ලද දැව පෘෂ්ඨයක් තබා තිබූ අතර එම පෘෂ්ඨය මත තබා තිබුණේ අලංකාර කේකයක් නොව කේක් කුළුණකි. එම කේකය රෝස දම් පැහැ වූ අතර එහි ඉහළ සුපුෂ්පිත අරවින්දයක් රඳවා තිබුණි. සියලු දෙනාට තම සාංවත්සරික කේකය කැපීමට ආරාධනා කළ ෆෙන්ග්මියන්-යූ යුවළ ඒ දෙසට ගමන් කළහ. තම දෙමාපියන් වෙතට දම් පැහැ පීත්ත පටියක් ගැටගසන ලද කිනිස්සක් ලබා දුන් යන්ලි පසෙකට වූවා ය. එම කේකය කැපූ විට අවට පැතිරුණු සුගන්ධයෙන්ම එහි රසවත්භාවය පිළිබඳ කිසිදු සංශයක් නොවීය.

ශාලාවේ සිටි සියලු දෙනා අතර සියපත් පත් මත තැබූ කේක කැබලි බෙදා දුන් පසු ඒවා රස බැලීමට ඔවුන් යොමු වූ අතර සුරංගනාව පිටතට රැගෙන ගිය ජින් ලින්ග් වෙනුවෙන් කේක කැබල්ලක් වෙන් කර තැබීමට ඔවුන්ට අමතක වී තිබුණි. ඔහුගේ දෙමාපියන් පවා සිතා තිබුණේ ඔහු වෙනුවෙන් ඔවුන්ගේ මෑණියන් කොටසක් වෙන් කර තබනු ඇත බව ය, කෙසේ වෙතත් ඔවුන් ද තම රසවත් කැබල්ල අනුභව කොට අවසන් ව සියපත් පත්‍රය ද ඉවතලා තිබුණි. එබැවින් තම මුව එල්ලා ගෙන සිටි ජින් ලින්ග් වෙනුවෙන් තම කේක කැබල්ල ලබා දීමට ලන් ශිචෙන් ඉදිරිපත් වූවේ ඔහු ඒ වනවිටත් එය රස බැලීමට සිතා නොතිබූ හෙයිනි. ජින් ලින්ග් තම සේවූජුන් මාමණ්ඩියගෙන් කේක කැබැල්ල ගෙන ඔහුට ස්තුති කළේ ඔහු අත වූ කේක් කැබැල්ල වෙත මාන බලන වූෂියෑන් මාමණ්ඩිය වෙතට විරිත්තමිනි.

ලන් ශිචෙන් සිදු කළ ක්‍රියාව දුටු ජින් ගුවන්යාඕ සහ ජියැන්ග් චෙන්ග් දෙදෙනාම තමන් අතවූ කේක කැබලිවලින් කොටසක් ඔහු වෙත ලබාදීමට ඉදිරිපත් වූහ. ඔහු අසලට පැමිණි දෙදෙනාම එකිනෙකා වෙත නොපහන් බැල්මවල් හෙළූ අතර ඔවුන් ඉදිරියේ වූ ලන් ශිචෙන් දෙලොවක අතරමංව සිටියේ ය. දෙදෙනාගේම සිත් නොපහන් වන අන්දමට ඔවුන්ගේ තිලිණය ලබා ගැනීමට සිතූ ඔහු දෙදෙනාගෙන්ම කේක් කොටස බැගින් ලබා ගෙන එය අසීරුවෙන් මුව ලා ගත්තේ තමාට මධුමේහය වැළඳේවිදැයි යන සැකය ද සිත දරාගෙන ය.