لا تهتم بشأني أيها الزمان، فالأمور على ما يرام، ولا
تقلق بما يحدث لي، فأنا لا زلت أنخدع، وأنجرح من
أقرب الناس، فلا تقلق لأن الحزن أصبح جزءاً لا
يتجزأ من حياتي.
الكاتبة رورو
نازك: كاعده على باية الدرج وكت الضحى واحجي
ويه امي وچنت ستوني متخرجه من دار المعلمات.
نازك: يمه شلون راح يطلع تعييني وما عندي
هدوم وضالة بالهدوم القديمه شلون هسه .
ابويه رجال بسيط يشتغل علاف (يبيع تمن وطحين)
وأمي مرة اميه خلي اعرفكم هسه على نفسي قبل
لاندخل بلاحداث...
اولا اني اسمي نازك مواليد 1945 من مدينة العمارة
ميسان تسلســلي الثانية عندي اخ اكبر مني هادي
واخ اصغر صالح واخت اجتي بعده نهلة وبعدها
اجتي إقبال وبعدها اجتي ازهار وبعدها اجه بزر
الگعده هاني....
بس كل هاي الاسماء ولا واحد منهم تنطبق صفات اسمه عليه
من جنت صغيرة هواي امور صارت الي جنت العب
ويه بنات جوارينا وبنت خالتي بالشارع ركضن وانا
ركضت وراهن وضيعت الدرب وگمت ابچي لزمني
واحد رجال وگلي تعاي اني اوديچ لأهلچ واني اگله
لا ما وهو يجرجر بيدي ويريد يخطفني واني اگله
مااردي عمو مااريد اريد اهلي اريد امي ابويه
وبوكتها فات رجال چبير گلي بويه انتي مو بنت
فلان كتله اي عمو اني بنته گله ولك انته منو
وشرايد منها وخر ايدك منها وبلگوه خلصني من
عنده بعدين عرفت ان هذا الي يريد يخطفني من
الكواوله مفردها كاولي(راقص) والحمدلله الله
نجاني باعجوبه ورجعني لاهلي ولكيت امي تلطم
بباب الحوش والناس ملتمه عبالهم ضعت
والحمدلله رجعت لاهلي سالمه ومااخفي عليكم
حصلت كتله محترمه من ايد الوالده وصحيح امي
امرأة جاهله لكنها صاحبة شخصية قوية وكلمتها
مسموعه بيتنا چان بنص الولاية بيوت اهل گبل
يطلقون عليها بيوت الشرقيه (اي لايوجد سقف في
منتصف البيت)
حياتنا حلوة وبسيطه وچانت حافله بلأحداث
الحلوة والمؤلمه اهل والدي يسكنون في احدى
المحافظات الجنوبيه اعمامه واولاد عمه علما لا
يوجد لدي اعمام والدي كان الوحيد لأهله .
كلما چان يروح ابويه يم اهله يرجع منگلب علينه
چانت امي تگول سحرهم اربعين يوم ويبطل.
كبرنا وشبينا الله سبحانه وتعالى وفقني بالدراسه
اخوي الچبير التهه بالسياسه والصغار
بعدهم
يدرسون اختي نهلة بالمتوسطه وبطلت والصغار
بعدهم يدرسون كملوا مسائي بعدين المهم اتخرجت
من دار المعلمات قبل مدة الدراسة بالدار (اي معهد
المعلمات حاليا) 3سنوات
هسه اني كاعده عالدرج وحايرة منين اشتري هدوم
وما احس الا فجأه انشمر عليه قطعه نقديه معدنيه
ام 200فلس وبذاك الوكت چان بعهد الستينات الها
قيمه والحمدلله اشتريت ملابس جديده وعباية جديده وتحضرت.
في بداية الأمر طلبوا منا التربية نروح لمحافظه كربلاء المقدسة
ومناك يوزعونا على المحافظات القريبه منها
سافرت انا وصديقات اثنين وياي بعد برفقة اباءنا
واستقرينا في فندق بكربلاء وبقينا بيه لمدة 3 اشهر في الفندق
وكانت وحدة من صاحباتي شوي حركه تحب مغازلة
الرجال بحيث ابو الفندق اتخبل عليها الا شويه لو ما
ابوها موجود جان كبلت ويا بلغة الحاضر وطلع
تعيينا تلاثتنه بمحافظه النجف الاشرف بعد 3 اشهر
من الصبر رحنا احنه برفقه اباءنا للنجف وأجرنا بيت
قريب عالمدرسة وكان يتكون من طابقين كل طابق
بيه3 غرف نوم وحمام ومطبخ وسرداب (السرداب
هو مكان تحت الارض يستخدم لحفظ المواد
الغذائية على الاكثر المواد لبرودته)
وتمتاز بيوت النجف وكربلاء بوجود السراديب اكثر
شي واستقرينا هناك واشترالي ابويه الحاجيات
الضرورية دولاب وچرباية وفراش ورجعوا اباءنا
للعمارة واحنه ضلينا بالنجف وهنا بدأت مرحلة
جديدة بحياتي.....
يتبع......
شتتوقعون الي راح يصير بالاحداث الجايه لنازك؟
انطوني رأيكم بالتعليقات.! 🌹
ولاتنسون النجمه والتعليق الحلو علمود استمر الكم بسرد القصه وعلما ان القصه حقيقة 🌷♥
أنت تقرأ
هل جزاء الاحسان الا الاحسان(قيد التعديل)
Literatura Femininaتتحدث قصتنا عن بطلتنا التي استلمت برقية من اهلها تطالبها بالعودة اليوم الفلاني للتفاجأ عندما اتت لاهلها وعلمت ان اليوم هو قطع مهرها. معاناة. تفرقة. تضحية. وفاء..
