امي واكفه تعد وتصف علينا اني وشهد ورغم لا ناقة ولا جمل اني انشملت بالرزالة ...كلها طلعت من جوه راسي واني راعية المشاكل ....
بجيت كله بسببه فضحنا فضيحة وهالنوب من علي يكول اله تريدها يرد بكل عين وكحه يكول اله لا بس هي شلها بالزواج ...عمو كاظم ومهند تفشلوا بسببي ويه الاقارب ناطيهم موافقة احنا واجا خربها وطلع ...يا سواد وجهج يا نور خزاني والله ما يكولون العالم شنو البيني وبينه هسه .. لا هو اليرحم ولا يخلي رحمة الله تنزل!!
هالنوب كل ضيمنا بكوم وهاي شهد تبجي وتحلف ما ترجع لبيتها وتكول الهم خل يطلك احسن ..نسالها ليش شكو ما ترضى تفك حلكها وتحجي وهو احنا شوكت وافتهمنا شنو البينهم...بلاء ونزلوا براسنا هالاثنين ...
خطية علي يهدي ويسكت بشهد ويرجع الي ويطمن بيه ...كل هالاحداث يومين بس كل الصار بيومين اني انطرد الخاطب وشهد زعلانة وما تحجي ...داليا علي وداها هناك يكول ما اريد يصير مغاثث لو حجي زايد تهدأ الوضعية وارجعها وصايرين هو وياها بيناتنا مقسومين هي لاهلها وهو لاهله صاف وامي ترعد علينا اعزيجن اذا انخرب بيت اخوجن ...
هناك ودك موبايلي
ابو ليان .......
شلته واني ارجف من فوك لجوة ...رحت بغرفتي ارد عليه يكعد يعيط ويضيح مو عاجبه
فهد:اي ست نور عاجبج تتزوجين
سكتت ما جاوبته وهو متخبل عاط
-ما تحجين عاجبج تتزوجين غيري
تشجعت ولميت صوتي وانهديت
-اذا تبقى هيج مخليني سلعة عالرف وحاجزها لا انت مشتريها ولا صايرة لغيرك اي ارضاها
-شعجبج بي اريد افتهم ارمل بكد جدج وعنده جهال شلون توافقين واني شنو عندج
-انت شنو؟؟؟اانت مو راضي تخطي خطوة بعد واني ما مستعدة ابقى هيج مو مسالة زواج بس... اني هم من حقي واريد اخلق اسرة واخلف حالي حال البنات
-عساج لا صرتي ولج تتغابين نور ...كلت الج انتظري بعد ارتب وضعي
-اي وضع ما تكلي شعندك اشو يومية ساحلني يا نور تعاي بنتي مريضة ...يا نور عندي سفر ...يا نور جدتي والبيت واني راضية وساكتة حتى ملابسك تتوصخ صرت تجيني حتى اروح اغسلهم شنو بعد ومكعدني ...خدامة احد كالك لو ما عندي شي بس انت ؟؟
ساكت ويسمع بالاخير حاجاني بغضب مكتوم صوته تغير ونبرته هدات بحقد
-مانتنا ست نور مسويه فضل ..ديلا ارتاحي راح نتزوج بس والخلقج اذا طلبتي شي بعد الزواج لا اسوي المحد مسويه ...نتزوج وخلي يمج وببالج شرطي بالزواج خلفة ماكو
-شنو؟؟عود ليش
-هيج بكيفي ويعجبني تريدين ويعجبج يا هلا ما يعجبج ما اخليج تتزوجين دام هالخشم يطبه الهوا وحق الخلقج ما اخليج شارع تشوفين بعد لو اني لو اني ...وهاا خاف عبالج اغير رأي بعد الزواج تصيرين يمي وتشوفين
اريد ارد انقطع الاتصال ...كعدت ابجي وابجي لحد ما طككت عيوني وبككت ..كمت اسحل بروحي ...طلعت امي استلمتني رزالة وين اولي يا ربي وين اولي هالنوب علي توه نزل وهي من ينزل بودها تحبسهم هو وداليا بالغرفة ما تطلعهم تكول بلكن تحبل النوب وابنهم لازم اني اخذه اني منهم ...اليوم داليا يم اهلها وتشوف علي حاير ومهموم وهي هاجت علينا كلش
