داليا:
بقيت ببيت امي يوم واليوم البعده راحت هي تشوف فهد قبل لا يسافرون هو وعروسته ورجعت امي بقت تعد بالاخير طكت روحي ...وبنفس اليوم انتقلت اني يم جدة ونادية وليون بنت فهد وره ما راح فهد اخاف منه ..طبعا عمتي وشهد اجني ويباوعن الي بضوجة بس محد كال شي لان فرحة العرسان واللمة واني اجيت جانوا بعدهم ما ماشيات ...
طلعوا همه من الصبح واحنا بقينا بالبيت ورجع احمد بعد ما وصلهم كان يدري بالمشكلة كلها مو هاي شهد هم عدها خباثة والظاهر حاميته عليه زين....رزلني رزالة زينة ويعيط علينا اني وامي هي عاتبته وسكت واني كضيتها ابجي هذا اخويه عود !!ما مفتهم السالفة بس سامع علي زعلان وملتحق گلبها للدنيا ...ويكلي ما تخافين عليه انت هو شغله سهل وانت تشغليه بسوالف ماصخه وزعل وضل يلح اوديج لبيتج واني عاندت
خفت من فهد اكثر همين وموقفه ....عافوني ولا احد بعد سولف بالسالفة وراها وعلي هم لا اتصل ولا سأل عبالك صدك مثل ما كالت امي كيف وارتاح ...يووو هاي شبيه هرموناتي ضاربة حيل ولا اكدر افكر بعد كلمه تجيبني وغيرها توديني!!
مرت الايام بسرعة تركض واني ببيت اهلي استقريت ما رجعت ويه امي لبيتها استحي من زوجها ...جدتي ما تحجي بالسالفة بس زعلانة مني ...الكل زعل لزعله ومحد سائلني شبيج حتى امي التهت عني وبطلت
اليوم نزوله سمعت جدة تسولف ويه عمتي بالموبايل كالت الها بااطريق ...اني كنت يمها اشو بطني وجعتني بصورة غريبة كلت يجوز حالة نفسية لو قلق بس الوجع مستمر وروحي مقبوضة ....
وقت غروب دينزل الف مره كلت اله لا تنزل متأخر انتظر ثاني يوم والصباح رباح ..شالع كلبي هالرجال؟؟وكل شي يسويه بالعكس..
كملت مسح البيت نظفته كله لان فهد ونواره هاليومين يبينون... تعدلت بوكفتي ضهري مقسوم احسه جدتي طلعت من الحمام متوضية توها حاجتني
-ولج يمه قابل شبي البيت ومسحتي هسه متوازية
-لا بيبي مو نادية وحسوني طشوا البسكت
اجاني حسوني يركض مدمر نفسه بالكاكاو هو ونادية ما يبطلون اكل ابد ..
شلته بصعوبة وكوه اجر نفسي وجدتي نهرتني
-ولج يمه بطنج ماردتها خطيه لا تشيلين هذا سمين يعذبج
-خل اغسله وابدله قبل ما التهي بالعشا
-ما نريد لا تتعبين سويلنا فواكه خبزة ولبن ..اخاف انت مشتهية اكل سوي لروحج بس
-لا اسوي
-ولج يمه لا تتعبين وجهج اصفر اليوم هاي شنو هالعناد هذا لا يصير عليج شي شاحجي
مشيت شويه حسيت حرورة وكعت مني ...ذبيته وبخوف دخلت للحمام اتفقد نفسي ..انخبصت واني اشوف ايدي مغطاية باللون الاحمر احس اذني صفرت ....غسلت وطلعت ابجي ادور احد اشكيله
صارت بوجهي جدتي
-جدة الحكيلي
-ولج شبيج ..انخبصت وتقربت الي واني ابجي وارجف
-جدة راح اسقط
-اسم الله الرحمن بنيتي ولج شلون شنو؟؟من الشغل انعل ابو هيج شغلة ولج شسوي رماد براسنا علي يصخمنا
