داليا :
مشت بينا سيارة ابو صهيب وامي كاعدة يمه ما رضت على تصرفي ورادتني ارجع وياه واني جلبت بيدها تكول اني اتصرف بس لا تعوفين بيتج واني ما بنفسي اروح وياه حيل مأذيني كلامه بالايام الفاتت....
اول ما خليت رجلي من سيارة عمو ..علي طبك بالباب ويه نزلتنا حتى ما سدينا الباب بعده عمو ابو صهيب بره ..تسالم وياه وضل مستغرب ليش تبعنا اني الفترة المضت سولفت لامي كل الكلام لان جنت مقهورة حيل منه وهي سكتتني نهائي ما ترضى احجي بس كالت يخلص العرس واتصرف ..ومثل طبيعتها الدائمة اكيد حتى ابو صهيب ما يدري هو خطيه الرجال ما يتدخل بحياتنا ولا يحشر نفسه وهالشي حبيناه بي كزوج ام
امي وكفت يم جهتها من السايرة ما طلعت ولا فاتت للبيت ناويه عركه من وكفتها هاي... واني خفت اخذت حسوني وفتت ركض عالبيت وكفت بطرمته عيونه بيها نظرة غضب خوفتني مره تصيبني برهبة بالغة ومره تصد غاد ويسولف وياهم مدا اسمع كلامه بوضوح ...
سمعت صوت امي تكوله نفوت جوة ونحجي وهو يجاوب بنبرة جفاء رغم هدوءها
-غير وكت اجيج عمه بس خل تجي داليا هسه
ابو صهيب :دفوتوا جوه يا ابني اكعدوا يمنا شويه واخذهم بعدين... تعال فوت ؟؟
فتت لداخل المطبخ وطليت بس راسي واني ارجف اعرف نفسي مو كد زعله بس لازم ما يتعود هيج وياي يصير اني ما استاهل هيج يحجي
وكفت ماده بس عيني وكل ما يتقرب عالبيت اختل اكثر وعيونه مثل عيون النسر عليه لحد ما فاتوا من باب الكليدور عالصالة ....
اخذت نفس طويل وغمضت عيني اسكت بروحي اللي بهذلتني عليه ما يجي بكلبي عليه حتى الزعل كثر حبي اله
كعدت بالمطبخ حسوني بحضني واباوع بوجهه وهو يكمش بحجابي يجر بي بطني كبرانة شويه ..حطيت ايدي عليها اخفف قلقي وانزعاجي وكأن بحركاتي احاول ابعد الهم عن اطفالي ما اريد مشاكل اني ومو ناويه على شي غير اريده يخفف اسلوب وياي ويغيره
...
فاتت امي للمطبخ سكتة اخذت مي وراحت بس انطتني خزرة وطلعت ..ما تريد تخرب علاقتنا والظاهر علي مشتعل جاي ورانا
دقايق واسمع صوتها وصوته يتحاجون وهي تكول اله مو من حقك وهو يكول اني ما مقصر وياها !!
تجادلوا عالذهب اللي انطته الي واسمعه منفعل
-ليش شنو مقصر وياها اني؟؟
مريم:بنتي وانطيها لعد المن ضال شنو ورايه هنه شعندي اني هو هالبنتين شنو كوه هي تكطعها عني ابن عمك ما كال شي هم الها بكده ومثله شنو حرام انطي لبناتي؟؟
-محد كايل هيج شوكت كاطعها اني كوه تريدن تسونها طلابة
-هاي احنا صرنا ندور طلايب
-حشاج عمه هسه ليش تصيرين طرف بمشكلة ما موجودة اصلا
-بنتي من تزوجت لليوم تخاف من كل شي لخاطرك تكول يزعل ويضوج وحاطه خاطرك فوك خواطرنا تالي هاي جزاتها
