حب في زمن قل فيه الوفاء
بقلمي لينا❤️
البارت 6 والاخير
🌹🌹🌹🌹🌹
نرجع بالزمن شويه ليوره ويه رزان
رزان ... مرت الايام واني اعتمدت على نفسي واعمل واني بلبيت واحس نفسي قويه لان اني بمجتمع ميسمح الي اكون مطلقه لازم اتحمل الظلم ولاهانه والقهر والجوع واتحمل مسؤليه البيت والاطفال من غير كلام يعني اجباري اعيش واقع حال اني مقانعه بكل تفاصيله .. مر على زواجي اربع سنوات واني قايمه بكل واجباتي اتجاهه بس بلمقابل مشفت منه اي مبادره او تحمل مسؤليه تجاه اولاده وتجاهي ،، كان يطلع وميرجع للفجر ،، وتسربت الامال مني بان يرجع زوجي لصوابه ويلتفت لبيته جان عندي امل تكون هذه نزوه وفتره ويمل ويرجعلنه ،، لكن العكس صار كان زوجي احمد يحاول بكل طريقه يذلني كان يتفنن بالضرب وبالخيانه ومو بس هذا اكتشفت مو بس الي خايني حتى خاين صديقه وعنده علاقه ويه زوجته من يومها طلع احمد من عيني واذا متحمله وساكته فمن اجل اولادي وبسبب مجتمنه الميرحم ،، كنت اكدر اخونه واكدر اطلع ابكيفي واكدر اصادق واحجي ويه اي شخص بس الحمدلله كدرت اكون قويه ومتمسكه باالله وباخلاقي لان اذا هو خان زوجته وخان صاحبه وخان حتى نفسه هذه مشكلته هو وهذه تربيته واخلاقه ،، حتى هجر هجرني انام بنفس الغرفه بس منفصلين .. سنتين وهو هاجرني ياريت لو بس على هذا گام يفتح كامره ويه البنات بغرفه نومي واني اشوف خيانته كدام عيني واشوف كلشي ،، وماكتفى بهذا بل تمادى وصلت بيه الحال يجيبهن للبيت كلش كرهته وكرهت نفسي وكرهت الرجال ...
كل هاي المده كنت مااحجي لاخواني على تصرفاته بس لهنا وكافي اجه اليوم الي لازم اخلي اله حد اتصلت على اخويه واجه للبيت وحجه ويه اهله كانوا ميرضون على تصرفاته اخويه حجه وياه بس بدون فائده وضربه اخويه وصارت ابينهم مشاكل كلش قويه وادخل اخوه وكالوا ننطي اخر فرصه
اني اباوع الهم واحجي خلي ننهي الموضوع لان اني حاولت بس بدون فائده كان الموقف اقوى مني ومابقى امامي غير الصمت والصبر ..
اتصلت سهى تسالني عن احوالي حجيت الها الي صار كالت اخر فرصه وبعد لاتبقين لان انسان عديم الضمير والاحساس والمسؤليه كلشي اتوقع يطلع من عده ،، كنت انسى همومي وياهها كانت دائما تساعدني وتحولي مبلغ من المال اوووف شنو احجي عنها قليل ....
وهسه صديقتي وحبيبتي صارلها فتره بالمستشفى .. وحالتها كل يوم شكل يوم زينه ويوم لا ،،، وكل يوم ادعيلها تشفى،، ورجعت لذاكرتي لسهى الي تغيرت وره ماتعرفت على رائد صح كانت فرحانه وسعيده ونست همها لكن تفاجئت واستغربت الها سهى جانت انسانه ميهزها رجال ابدا قويه بمعنى الكلمه بس من اتعرفت على رائد صارت انسانه كلش ضعيفه وبسبب ضعفها جنت خايفه عليها لذلك تصرفت تصرف وياها من وره ضهرها وهسه متندمه عليه واتمنى لو مامسويته فديوم كالتلي اريد اتصل على ملاكي واطلع وياه واول مااشوفه اخذه بلاحضان ،، اني صحت عليها وج مخبله .. جاوبتني رح اطلع وياه وشنو يريد يصير خلي يصير وماامنع نفسي من فد شي .. اني كلش خفت عليها سهى انسانه عاقله بس مجنونه بنفس الوقت ، خفت عليها لان حبت هذا الشخص حب موطبيعي واتعلقت بيه ،، هو انسان محترم الى ابعد الحدود ويمكن لو غير انسان كان استغل الموقف لصالحه بس هو كان كلش يخاف عليها وحريص على مستقبلها ..
اني اتصلت على رائد وحذرته ميطلع وياهها لان هذي مجنونه وصير مشكله الها واله
اتفهم رائد الموقف وكلي اني اخوج واعجبج واعرف اشلون اتصرف بقت سهى تحاول وياه وهو يتحجج انو هو بلدوام او رجع للبيت .. وكلش هي انقهرت لان ماگدرت تلتقي بيه ،، واني جنت السبب بهذا الشي وهسه ندمانه حييييل ...
اتصلت كامره على صديقه عمري وحبيبتي جانت بالمستشفى وحالتها رجعت شويه سيئه بعد ماتحسنت شويه ،، اول ماحجيت بدت توصيني ..
وصتني على ملاكي وكلتلي : امانه بركبتج ومااسامحج عليه ابقي ويه ملاكي ولاتعوفينه ..
رزان : سهى حبيبتي اطلبي مني اي شي بس اعذريني مااكدر صعبه وانتي مبيج شي وراح ترجعين واصيرين احسن من قبل ..
سهى : لااني كلش تعبانه وامانتج حبيب عمري ولاتخلين دمعاته تنزل امانه ومااوصيج هذا روحي ..
رزان : جنت احجي وياها واني گلبي يوجعني وبگلبي ادعي الها .. وخفت لا صدك افقدها لصديقتي الوحيده ..
رزان : سهى اريد منج تسامحيني على شغله سويتها من وراج ..
سهى : شنو الشغله ؟؟
رزان : اني منعت لقائج ويه رائد اني اتصلت بيه وحذرته من ان يقبل يشوفج ،، بس والله سويت هالشي علمودج ..
سهى: ليش هيجي رزان ليش تدرين حلمي جان اشوفه والتقي بيه .. وانتي قضيتي على هذا الحلم .
رزان : سهى بس سمعيني ،، سهى ..
غلقت التلفون اتصلت وماجاوبت عفتها لحد ماتهدأ واتصل بيها مره لخ .
