حب في زمن قل فيه الوفاء
بقلمي لينا♥️
البارت 3
🌺🌺🌺
رزان : بعد ان نصحتني سهى انفصل من احمد وجانت دائماً دكلي تره هذا ميفيدج وابدي حياتج وفعلا قررت انفصل عنه وابدي من جديد لكن بالوقت الضايع اكشفت اني حامل وكانت صدمه وضربه قويه الي
.. وجنت محتاره شسوي واني افكر بأطفالي و قررت لخاطر ابني عمر وابني الي رح يولد احاول ويه احمد وانطيه فرصه ثانيه واهلي هم شجعوني وخاصه مجتمعنه ميرحم .. رح ابذل جهدي حتى ارجع علاقتي بزوجي لان اني ام لطفل وحامل ... ورجعت لزوجي واملي استعيد زوجي ومينهدم بيتي ويمكن طفلي الثاني يكون هو السبب حتى زوجي يرجع لصوابه ويلتفت لعائلته ..
مرت ايام لكن العكس صار احمد ابتعد عني اكثر ومشاكلنه زادت وطول فتره حملي جنت اني باسوء ايام عمري واصعب الضروف وحتى بولادتي ماجان حاضر بس اهله جانو واكفين ويايه ولدت ابني يزن والغصه بكلبي ابني انولد مثل اليتيم وابوه عايش ،، الحمد لله اهله ماتركوني وكانو بكل خطوه ويايه وساعدوني لحد ما تشافيت وكدرت اوكف على رجلي ،، احمد جان ماله اي دور بحياتنا وهجرني وحتى المصروف جان گاطعه وكل فلوسه على سوالفه المكسره وعلى البنات لذلك لغيته من حياتي وصرت انطي دروس تقويه بالاضافه الى صرت محترفه خياطه ، واخيط وشغلي ماشي ..
والحمدلله نجحت بعملي لكن مشاكلي ويه احمد مستمره والي مصبرني اولادي وصديقتي وحبيبتي سهى كانت اقرب انسانه على روحي ..
مره اتصلت عليه سهى وجانت فرحانه گالت اني جايه لاربيل واريد ازورج ..
سهى : رحنه زياره لبيت خالو الي ساكن باربيل
اتصلت على رزان وكلتلها اريد ازورج رحبت وفرحت اخذت ماما ورحت الها وصلت باب البيت اتصلت عليها كتله اطلعي اني بالباب، طلع علينه شاب مرتب موكبير بالعمر يعني عمره 27 سنه فتح الباب ويقه صافن اني محجيت ماما حجت وياه طلعت رران
حضنتني واستقبلتني احسن استقبال كعدنه تقريبا ساعه وطلعنه ..
بقينه شهر باربيل وكلش اتونسه وغيرنه جوو وقبل منرجع طلبت من ماما اودع رزان .. لكن مانا ماعجبه وجانت رافضه وبعد توسل ياله قبلت رحنه ولكيت نفس الشاب دخلنه وكعدنه وودعتها وراها رجعنه لبغداد ..
صح جان حزن بگلبي بس رجعت مثل قبل اركض مثل الطفله وماكو احد سلم من مقالبي جان داخلي شكل والخارج شكل .. يمكن جنت احاول اتغلب على حزن گلبي بتصرفاتي الطفوليه وخاصه ماما جانت باستمرار تعيد عليه نفس الجمله وجه البومه موتي ابوج كانت تقتلني بكلامها وبتصرفها القاسي ويايه ،، بس كنت اكابر المهم اركض والعب واشتري العاب ،، وخالوا محمد جان يحاول يعوضني فقدان بابا وكل ميجي يمنه يجيبلي لعبه شكل ...
بعد مرجعنه من اربيل بايام اتصلت رزان بيه ..
رزان : سهى حبيبتي شلونج ،،اريد احجي وياج بموضوع ،،
سهى : شنو اي احجي ؟؟
رزان : اكلج حبيبتي اخويه من شافج كلش انعجب بيج ويريد يخطبج ...
هنا هاجت عليه كل مواجعي ورجعلي الحزن وبقيت ابجي وذكرت بابا وزاد حقدي على كل الرجال ،،
سهى : شدتحجين رزان تره بعده الجرح بگلبي والي عشته دمر حياتي لتشوفيني اضحك واسولف هذا فقط قناع اخفي جواه الالم والانكسار ،، بابا مات گدام عيوني ماكو حزن اكثر من هذا انتي اكثر وحده تعرفين همي
رزان كلش انقهرت عليها جانت تبجي وتحجي بحركه ..
رزان : اسفه سهى .. اعتذر بعد ماافتح الموضوع وياج بس كافي بجي لخاطري ..
اني و رزان صرنه روح وحده ،، صارت اقرب انسانه الي عوضتني وحدتي ووهونت عليّ قسوه امي ،، رزان عمرها نفس عمري لذلك جانت تفهمني واني هم افهمها جنت كلشي احجيلها وهي هم تحجيلي همومها ..
وره كم يوم دكت رزان ..
سهى : الووو..
الووو
سهى : تفاجئت بصوت رجال فزيت ..
گتله منو وو ؟؟؟
كلي اني اخوه رزان ، اريد تسمعيني للنهايه اني رايدج بلحلال وشنو تطلبين اني حاضر فكري ولاتستعجلين بالرد ...
سديت للخط بوجهه وكلشي محجيت لان جنت مصدومه .. واني صايره نار 🔥 كلش ضجت وانقهرت من صديقه عمري الي اعتبرتها اعز من اختي وامنت بيها تغدر بيه ،، قررت انهي علاقتي وياهه وره ساعه اتصلت ماردت عليها .. راسلتني وينج سهى ..
دزيتلها مسج
سهى : حرامات اني امنت بيج وانتي خنتي ثقتي .. لو ماانتي صديقتي وتعرفيني ،، بعد لا اعرفج ولا تعرفيني ..
رزان : سهى شبيج شنو صار ؟؟
سهى : ليش تغشمين نفسج مو اخوج مخابر من تلفونج ويگلي يريد يخطبني ،، مو اتفقنه انتهى الموضوع ،،
رزان : والله مااعرف اذا اخويه متصل عليج واني راح اقطع علاقتي باخويه لخاطرج ومواني الي اقبل بهيج سوالف ..
سهى : رح اصدگج لان اني اعرفج بس گوليله لاخوج يبعد عن طريقي لان اني ماارتبط لا بيه ولا بغيره ..
اني قررت ادخل كليه اهليه قسم رياضيات لان كان حلم بابا وقررت انجح واكمل واخذ لماجستير بديت بالدوام خط اروح وارجع وكان بكل خطوه ويايه خالوا محمد ربي يحفظه ولايحرمني منه جنت منعزله ماالي علاقه باحد اكو هوايه طلاب الي يريد يتعارف والي يريد يطلبني للزواج واني لابسه الكل وكارهه شي اسمه رجال اجه يوم واني مرحله ثانيه دا اطلع من البيت الصبح داروح للخط .. شفت جيرانه ولد شاب عمره 30 سنه تقريبا شكله مقبول دا يتفق ويه الخط لان اخته داوم بنفس الكليه فتحت باب البيت وصعدت بالسياره بدون لاسلام ولاكلام بقه صافن ويباوع وابد منزل عينه من عليه ،، اني مدرتله بال بقه يوميه الصبح اشوفه بلباب ويباوع مهتميت اله اخته تصعد بلخط وسلام من بعيد لحد مااجه يوم واجتي امه لبيتنا وكانت هنا الكارثه وهنا المصيبه الي حلت عليه وطلبتني لابنها طبعا ماما وافقت وبدون تردد ،، هنا بدت مشاكلي ويه ماما يعني باختصار صارت حرب بيني وبينه اني رافضه فكره زواج وهي تعتبر اجتني احسن فرصه واحسن قسمه الولد خوش ولد ومودب واخلاق وحالته الماديه فوق الممتاز بس اني رافضه الزواج وبدت المعاناه والكلام الميخلص وبدت تعاملني بعنف وضرب ودور ويايه الزله بقيت اكعد وابجي واخلي صوره بابا بحضني واهمس وينك بابا تعال شوف بنت گلبك شصار بيها منو الها ومنو الي يحميها اني بحاجتك بابا ..
تجي ايام ابقى بدون اكل ولاانزل جوه وماما ولا كانه اني بنتها .. هدي وتقى الي اعتبرهن اخواتي اني ربيتهم كنت انسه همي وياهن كنت انتبه عليهن وادرسهن ومااخلي شي بنفسهم وحتى من اريد انام وحده تنام منا وحده منا اموت عليهن .. واذا نزلت جوه راساً ماما دگلي اي نزلت وجه البومه الي بسببها مات ابوها هذي الكلمات الي تقتلني واحس تقطع بكلبي وبدت تصعد ماما بغرفتي وتراقب وتجي على غفله تاخذ لمبايل من ايدي كل عقلها اني اعرف واحد كعدت وياهها احاول اقنعها ياماما ياحبيبتي والله مااعرف احد ولااريد اعرف احد ماما افهميني اكره شي اسمه رجال ومستحيل ارتبط او ازوج .. مفاد وياها الكلام نفس الشي تعيده يوميه ..
اتصلت على خالوا محمد حجيتله كلشي اجه وحجه وياها بس مفاد حاولت كل الطرق وياها نفس الحجي ونفس المشاكل اووووف كلش تعبت
وبيوم اجه خالو احسه يريد يحجي شي بس خايف من رده فعلي
سهى : خالوا انته روحي وعمري وصديقي الوحيد وسندي شنو تريد كول ..
خالو : مزعلين مني؟؟
سهى : ازعل من كل الدنيا اله انته..
خالو : يابنتي ازوجي لاتبقين هيجي روحي شوفي مستقبلج ..
باوعت عليه ونزلت دموعي وحضني ويبجي
خالو : امانه لاتبجين اش اسكتي والله مااعيده بعد بس اني علمودج امج قافله واني اخاف عليج ..
سهى : خالو اني اكره الزواج واذا ماما قافله اني هم قافله ،، خالو ماما كرهتني نفسي والدنيا كلها وابن جيرانه لويبقى بس هوه مااخذه ..
اجكد حقدت عليه اشكد حاولت ورفضته ولو بس هو يبقى مااقبل بيه كنت احاول ويه نفسي اتحمل ماما وبديت اخذ لموضوع بضحك ومن تزعل اسميها جبار ابو المولده ..
ماما زادت بالعنف ويايه وتضربني وتاذيني بدون سبب رادت تضغط عليه حتى اوافق على ابن جيرانه ،، اني جنت متحمله وكل يوم اروح لملابس بابا بغرفته واشم عطره واشوف كتاباته وذكرياته انسى كلشي ويصير عندي قوه وطاقه .. لكن مرات افقد قدرتي على التحمل وافكر بلانتحار لان كلش تعبت ..
حاولت اكسب ماما واتعلمت كلشي طبخ وخبز وتنظيف بحيث مااخليه كلشي اسوي بس هم مفاد .. مابقى عندي غير الدعاء رفعت ايدي للسماء وابقى اتوسل لله يارب تهديه عليه ومتبقى هيجي كنت اتمنى تاخذني بحضنها وطبب عليه وتحسسني بحبها وحنانها اباوع لحضنها من بعيد واحس بيه حلم ومستحيل اوصله انطي عمري كله مقابل دقيقه باحضانها عشت اسؤ ايامي والله العظيم عمري متعرفت على شاب اوحجيت ويه شاب اواتواصلت لاصداقه ولاعلاقه ولااي شي .. لحد مااجه يوم وتغير كلشي بحياتي ..
ماما وصديقاتها سوو بيج بالفيس عمل تابع لشركه ادويه بلاعشاب وطبعاً هي عدها الفيس بموبايلي اني ماجان عندي فيس خاص بيه سوت ماما طلبات صداقه لهوايه ناس وكان شرط طلب الصداقه يكون للي منتسب شرطي اوضابط لان عدهم راتب وكل اشويه تاخذ مبايلي بحجه العمل ابدا ماعارضت اول يوم من ماما سوت البيج اني كاعده سمعت صوت رساله كلت خلي اشوف منوو فتحت وكانت الصدمه الكبرى وفزيت وصحت بصوت هذا بابا كلبي راد يوكف .. فتحت المسج
( السلام عليكم ...
اني بدون شعور .. وعليكم السلام ..
ردلي ممكن نتعرف ؟؟ صفنت ورجعت لعقلي هذا مو بابا بس يشبه طبق لاصل بقيت صافنه رد ياالله : عادي على راحتكم اني بدون تفكير ولاتردد ولاخوف ..
سهى : اي عادي نتعرف وكان اجمل يوم بحياتي واحس لدنيه فتحتلي احضانها وماكو احد اسعد مني مسحت الدردشه ..
واني افكر بملاكي نعم سميته ملاك ومر كم يوم واني كل يوم احجي ويه ملاكي صح اكبر مني بهوايه بس احس هو روحي وكانما اني اعرفه واعرف كلشي بداخله احس بيه كتاب مفتوح وواضح ..
رزان : يوم من لايام اتصلت عليه سهى ومثل كل مره نفتح كاميرا ونسولف بس هالمره جانت تختلف جانت كلش فرحانه اول مره اشوف الفرحه بعيونها ... سالتها عن السبب !!
سهى : رزان متدرين شصار اني اتعرفت على انسان كلش حباب وراقي وخلوق ومتصدگين طلع يشبه بابا ...
كانت تتكلم واني استمع اله وبدن مااقاطعه وهي سعيده كلش فرحت اله لكن تفاجئت من گلتلي عن عمره هو عمره بالخمسين اني خفت عليها لان دا اشوف تعلقها بهذا الشخص يزيد يوم عن يوم ابدا الحب ميجي بيوم وليله وفارق العمر ابينهم كبير لكن هي جانت تمدح بيه وباخلاقه .. بس بقيت اني بقلق واشوف شنو تاليتها ...
سهى : تعرفت على ملاكي اكثر وتعلقت بيه اكثر .. وبقينه نتراسل طول الليل وحجالي كلشي عن نفسه ،، ارتاحيت اله وحسيت هوهذا الي احلم بيه واتمناه بديت حبيته نعم حبيته رغم اعرف هً اكبر مني ورغم كلام رزان الي وهي دگلي دااعوض حرماني من بابا بس هذا مو مهم المهم اني حبيته وحسيت بطعم ثاني للحياه وصرت احب الدنيا وبديت اسمع اغاني ..
كان يدزلي اغاني كلش حلووه اني مسامعته حتى صديقتي رزان تعرفني لااسمع اغاني ولااعرفها صرت احس بكل اغنيه اسمعهاتعبر عن حبي .. بديت ادزله اغاني صار تغيير بحياتي كلش حلووو بديت اشوف الدنيا حلووه اني وين كنت ضامه نفسي الدنيا جان لونها اسود صار اله لون وشكل رغم اني حركه بلبيت ومااكعد واركض واكمز ومقالبي ماكو احد سلم منها لكن على غفله صرت هادء ولاصوت ولاصياح ولامقالب ،، بدت ماما تراقبني تكلي سهى اشو خانسه شكو اشعندج كتله اهدأ معاجبكم احجي معاجبكم وتالي اشلون وياكم كالت لاوضعج ابدا موطبيعي ضحكت وبديت اتصنع الحركات والمقالب حتى لايشكون بيه ..
اما اني وملاكي صرنه واحد ميكدر يفارك الثاني دائما يرسلي صورته تخبل اجنن اموت عليه اول حب بحياتي وعيونه تخبل اموت عليهن واعشق كل تفاصيله كنت اقره واشوف شنو بداخله ملاك ابدا موانسان عادي احس بداخله شباب وحيويه وحب وحنان وعطف يغمر كل هذي الدنيا داخله عباره عن صدق وفاء واخلاص كنت اشوفه جوهره ماكو احد عرف قيمته بس اني اكتشفته كان يحب الحياه ويحب يعيش كل تفاصيلها .. وفديوم ماماوالي جنت اسميها جبار جانت طالعه قررت اتصل عليه .. اول مره اتصل جنه نتواصل بس مسجات ..
گلت الووو ..
رائد : اهلاً وسهلاً ..
اني بعد مااكدر احجي ذبت من سمعت صوته وكوه الحجايه تطلع من عدي جسمي كله يرجف وكلبي يدك على السريع ومااعرف شنو صار بيه مستحيل اكدر اقاوم صوته ماطولت وياه صوته يخبل .. جنت متوتره واول مانهيت المكالمه مسحت كل المسج مثل كل مره لان ماما تاخذه دائماً مني بحجه البيج .. ومااحس الا انسحب من ايدي باوعت لكيته جبار ( ماما ) باوعت للموبايل شافت صورته بالبروفايل مالته كالت هذا منو ولج هي من عادتها اذا تشوف غلط او شي مترضه عليه بدون تفاهم سحل وضرب عبالك تلعب مصارعه .. من باوعت شافت صورته سكتت ومحجت اي شي بكلبي كلت اني انتهيت اتحضرت للكتله بس انتضر انتضر ماكو .. باوعت عليها وبگلبي كلت طار الرجال من ايدي لان بقت صافنه ومتعرف شنو تحجي ..
سهى : هااا ...
باوعت سوت نفسه ممنتبه اوممركزه وراحت ..
اني اباوع واكول باع راحت ونست الكتله ،، ضحكت كلت هسه اني حاسده نفسي شسوي موبيدي علمتني على الكتل ،، ومن عرفت يشبه بابا الله يرحمه زادت بمراقبتي .. ودزت خبر لجيرانه لام عامر بالموافقه على الخطوبه .. اني تخبلت وخوالي حاولوا وياهه بس مكدرو على شي .. تعالت الاصوات و ماكدرت اتحمل .. طلعت من البيت رحت ودكيت باب بيتهم وطلع هو طبعا تفاجئ وبقى صافن بوجهي اول مره اني اسويه بحياتي مادري مين جتني الجرأه ..
سهى : اذا تكول اني رجال وكد كلمتك ابتعد عن طريقي واني لوتبقى بس انته بهاي الدنيه مااخذك ... ورجعت للبيت ،،
شويه واجتي لبيتنه وهي تصيح وتعيط گدام ماما ..
ان عامر : وليش بنتج عيني تكول لابني هيج .. مو عيب هي هاي تربينج .. طبعا جبار اتحطمت احلامها بزواجي بعد الي سويته .. واكيد اليوم مارح ينتهي على خير واني من يمي اتحضرت للضرب ونزلت الها ليش اخليه تصعد الدرج واتعبها وتالي اصير الكتله مضاعف ،، المهم اكلت نصيبي والحمدلله اريد اصعد للدرج مااكدر واني ابجي على نفسي وحظي رحت لغرفه بابا مثل كل مره ابوس بصورته واشم بملابسه .. واصيلحه يجي يخلصني من هالعذاب .. بابا وينك بابا وينك حبيبي اني بلياك ضايعه وماالي احد انته سندي ليش عفتني ومااحس واني نايم على ملابسه وصورته حسيت على صوت خالوا محمد وهو يكعد بيه باوعت اله وبدون كلام ركضت لحضنه واني ابجي واشهك بصوت حضني ..
خالو : لاتخفين اني موجود ومااخلي احد يمسج ..
طلع خالوا اني رحت لغرفتي فتحت مبايلي لكيت ملاكي مراسلني فتحت راسلته
رائد : سهى مشتاقلج ..
بعدني دا اراسل بيه ماحسيت الا جبار فوك راسي ولاعبالك مريه وعدها انوثه بوكس وعلى خشمي محسيت اله واني غركانه بدمي وروحي تريد تطلع كله بسبب ابن جيرانه عامر ...
دكيت على خالوا اجه اخذني للصيدليه ..
ابو الصيدليه: اشبيها الحلوه من ضربها ..
اني كلش جنت ضايجه وخشمي يوجعني كتله هذا جبار ابو المولده استغرب وگلي : اشوداج على جبار خالوا گام يضحك وميكدر يسيطر على نفسه ..
طلعنه ورحنه للمنصور واشترالي حلويات وكرزات وبقه خطيه يفتر بلشارع لحد 12 بليل رجعنه..
خالو جان ضايج من تصرفات ماما ويايه وحذرها هالمره ..
خالو ي بس تتعرضيلها بعد اخليها تقيم دعوى عليج .
صعدت لغرفتي وفتحت المراسله جنت مشتاقه لملاكي ..
شفت دازلي مسجات ..
سهى : هلووو ..
رائد : وينج ياسهى ؟؟
سهى حجيتله على الي صار ..
وهو دزلي اغنيه سلامات لحميد منصور اول مره اسمعها وبقيت اسمعها كلسع وصرت اموت عليها..
نسيت كل الم بيه ومعاناتي هو الوحيد البلسم لجروحي وبقينه نضحك ونسوالف لحد مااذن الفجر ماحسيت بالوقت شلون خلص بسرعه .. توادعنه وصليت ونمت مرت الايام واني اتعلق بيه اكثر وبعد مااكدر اعيش من دونه صار كل حياتي وكلشي حلوو بعيني اموت من اشوف صورته واضيع بين عيونه من اسمع صوته او اشوفه احس اريد احضنه اريد اكون قريبه منه وماافارگه وابجي لان كلش اشتاقله والمسافات الي تفصلنه صارت تالمني .. بديت احلم بيه اوصافه رجال طويل ضخم هيبه لومشه وكلشي يلوكله هيبه وشيخ ربعه وكله تحسب اله الف حساب وكله تهابه وتسمع كلمته .. اتمنى اصير اله وهو الي رغم فارق السن البينه بس هو روحه شباب وكلبه شباب كنت اتمنى اصير اله والعب وياه مثل الطفل اصعد على اكتافه وانام باحضانه واستنشق انفاسه وعطره واكون مثل ضله وين ميروح ...اعشق روحه وعيونه وطوله وكلشي بي وكل تفاصيله ... مرت الايام وصار روحي والهوى الي اتنفسه وساكن وياي بكل احساسي بقينه نتراسل ومجبرني على اي شي وكلي وعد مني اخليج بلمكان الي ترديه كان ميستغني عني ساعه ولااني اكدر استغني عنه حبيبي ونور عيني نبقى نحجي للفجر ولانتعب والوقت يخلص بسرعه نروح نصلي واكعد من الصبح حتى اصبح عليه كنت دائما اسمي ملاكي وهو يكولي بنيتي كنت اعشق هاي الكلمه
لكن بسبب غيرتي عليه حجيت بطريقه زعل مني ومن تصرفي ..واني جنت غلطانه .. حاولت اعتذر بس بقه زعلان حاولت احجي وياه بس هو كلش اخذ على نفسه.. كنت باسؤ حال دموع وقهر واكل مااكلت للعصر ماكدرت اتحمل عدي ادويه اخذتهن واحس مابقى عدي شي اخاف عليه ونمت وبعده محسيت على نفسي ..واني بلمستشفى وغاسلين معدتي طلع تسمم عندي فتحت عيني لكيت خالوا محمد يبجي عليه ولازم ايدي ويحجي على ماما يكول اله بسببك فتحت وطلعوني للبيت الساعه 12ونص بليل اتصلت عليه رزان كالت احد موجود يمج كتله لا كالت خطيه رائد دا يسال عليج كلش فرحت راساً فتحت لكيته داز كومه مسجات وميقبل ينام حتى يطمان عليه.
رائد : اشلونك
سهى الحمد لله ...
رائد : اخبارج ؟؟
سهى : زينه
جنت احجي وياه بثكل ..
رائد : اشو ليوم ناشفه ..
انهاريت وبديت ابجي
سهى : حبيبي مااكدر اعيش بلياك حياتي انته اموت من دونك احبك واموت عليك .
رائد : هسه ارتاحيت واطمانيت عليج بس اني زعلان منج .. شلون هيج تسوين انطيني وعد مسويه بعد ..
سهى : اوعدك ..
بقيت اسبوع مريضه كلش لان صار عدي ارتفاع بالضغط بسبب الادويه .. ارتاحيت من ماما تقريبا اسبوع وبعده رجعت حليمه لعادته القديمه تحجي وتصارخ وهم موضوع الزواج اوووف ياربي خلصني من هل عذاب ...
جنت ضايجه وسولفت لملاكي عن اصرار ماما تزويجي حجيتله كلشي وانصدمت بجوابه ..
رائد : اني انصحج تزوجين لان هو خلاصج الوحيد من كل المشاكل بعدج شابه وامامج مستقبل وحياه ..
اني خرسيت وسكتت ،، من كل عقلي كنت افكر نزوج اني وياه .. وسالته بدون تفكير ..
سهى : حبيبي اذا اكلك خلي نزوج توافق ؟؟ بدوون تردد ولاتفكير راساً رد عليه
رائد : طبعا لا ... بسبب بناتي مااريد اكسرهم وسبب العمر وسبب الفرق بين العائلتين ...
اني انضربت على راسي وغيرت لموضوع احتراما لنفسي وخليت المووضوع طبيعي .. لا وجاوبته
سهى : لوموافق كان حضرتك ومااحجي وياك بعد ...
انصدمت كنت احلم احلام وابنيها واني اشوف نفسي زوجته لكن كل هذا طلع مجرد اماني وامنيات واحلام ضائعه وقررت ابعد عنه بهدوء ... لكن هو ماتركني هو وكانما ساحر اله جاذبيه خاصه واسلوب مقنع وبنفس الوقت كلامه ساحر رجعت اتواصل وياه وحبي اله يكبر وجنت اكول بداخلي ماكو شي مستحيل يمكن تتحقق امنيتي ونكون سوه ...
بيوم اجه خالوا من عمان علينه للبيت يسلم على ماما وجان صديقه وياه همه شراكه بعمل هناك بعمان .. دخل خالو للبيت وصديقه بقى بلباب ينتضر.. اني جنت طالعه ويه خالو محمد نسوك نزلت من السياره وشفت واحد واكف بلباب ويباوع منزل عينه اني بقيت ادك بلباب فتره ياالله فتحوا الباب دخلت لكيت خالوا سلمت عليه وكلش فرحت من شفته وراها ودعنه خالو وراح هو وصديقه بعد يومين خالوا فاتحني بموضوع
خالو : صديقي يريد يتقدملج شنو تكولين ...
سهى : خالو اني ماريد ازوج ..
خالو.: فكري بالموضوع زين ونطيني عود خبر ...
مثل كل ليله دنسولف اني وملاك .. سهى : ملاكي اكو واحد خطبني صديق خالو ...
بكل برود كلي
رائد : شكو بيها اذا الولد خوش ولد اتوكلي على الله ...
اني هنا كلش انقهرت واتالمت ليش اذا ميريد يزوجني ليش خلاني اتعلق بي ليش من ردت اعوفه ماخلاني ؟؟ ليش جدد بگلبي الامل ان نكون سوه ...
جنت مجروحه وردت اعاقبه
سهى : اذا هيج رايك راح اوافق ..
رائد : اي وافقي راساً اتصلت على خالو
سهى : اني موافقه .
يتتتتبع🌹🌹🌹
اشباه الابطال القصه
سهى
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
رزان
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
