(Inspired from Obsession❤💙)
ကိုယ်ကပဲမင်းကိုလိုက်တွယ်ကပ်ပြီးချုပ်ချယ်မိနေတာလား? နေရာတိုင်းမှာမင်းကိုလိုအပ်လာတဲ့အထိပဲ။ လွတ်လပ်တာကိုမှကြိုက်တဲ့မင်းအတွက်တော့ ကိုယ်ကထောင်ချောက်တစ်ခုလိုဖြစ်နေမှာ မင်းကိုယ်တိုင်ကလဲသိတယ်ထင်တယ် အကြောင်းပြချက်မျိုးစုံပြရင်း ရှောင်ပြေးသွားပေါင်းလဲမနည်းဘူးလေ ကိုယ်တားရဲ့သားနဲ့ကိုရှောင်ပြေးသွားတာ.....
ကိုယ်ရဲ့ခေါင်းစဥ်တပ်မရတဲ့စွဲလမ်းမှုတွေကြောင့် မင်းအနေကျပ်မှာလဲစိုးရိမ်မိတယ် ဒါပေမယ့်မျက်စိအကြည့်တစ်ချက်တိုင်းမှာမင်းမျက်နှာလေးကိုမြင်ချင်မိနေတုန်းပဲ။ ထိန်းလေလေ တပ်မက်စိတ်တွေကပိုပြင်းထန်လာလေဆိုတော့လဲဆိုးသားကွာ အချိန်သတ်မှတ်ထားခြင်းမရှိတဲ့ချိန်ကိုက်ဗုံးတစ်လုံးလိုမျိုး ကိုယ်ဘယ်အချိန်ပေါက်ကွဲမိမယ်မသိရပြန်ဘူး.....
အထီးကျန်ဆန်နေတတ်တဲ့သာမန်ညတွေထက်ဒီညလေးကပိုထူးခြားနေသလိုပဲနော် ကိုယ်ပြင်ပေးထားတဲ့ထိုင်ခုံလေးပေါ်မှာထိုင်နေတဲ့မင်းကအရင်ကထက်တောင်ပိုလှနေသေးတာ တစ်ခုမေးစရာရှိတယ် ဘာလို့ငိုနေရတာတုန်း? ကိုယ်ရူးသွားအောင်အထိတပ်မက်ရတဲ့အသည်းပုံနှုတ်ခမ်းလေးပေါ်အောင်ပြုံးလိုက်စမ်းပါ မင်းကပြုံးနေရင်အလှဆုံးပဲကို။ ကိုယ်ညှင်သာမှာပါ ဘယ်သူရှေ့မှာမှဒူးမထောက်ဖူးတဲ့ကောင်က မင်းရှေ့ဆိုအလိုလိုဦးညွှတ်မိလာတာပဲကြည့်လေ.....
အပြင်လူတွေပြောတဲ့မင်းကနှလုံးလှတယ်ဆိုတာအလိမ်အညာစကားမဟုတ်ဘူးပဲ, နှလုံးသားနီနီလေးကိုလက်နှစ်ဖက်နဲ့သေချာကိုင်ရင်းမျက်ဝါးထင်ထင်မြင်ရတော့မင်းကိုပိုတောင်တန်ဖိုးထားမိလာတယ် မြတ်နိုးရတဲ့ဆံသားဖြူဖြူလေးတွေကလဲဒီနေ့မှကိုယ့်လက်ဖျားအထိအတွေ့ မှာပိုတောင်နူးညံ့နေရော, ကြောက်လန့်နေတဲ့အကြည့်တွေနဲ့မကြည့်ပါနဲ့လား ကိုယ်ရင်တွေနာရလို့ ခဏလေးပါပဲ ကတိပေးရဲတယ် ဒီခဏဆိုတဲ့အချိန်လေးပြီးတာနဲ့ကိုယ်တို့ကတစ်သက်လုံးမခွဲပဲနေရတော့မှာ....
အိပ်သွားတာလား ကလေး မျက်လုံးလေးတွေဖွင့်ပြီးကိုယ့်ကိုကြည့်ပါဦးကွာ ခုလိုကြီးအိပ်သွားရင်ဘယ်ကြည်နူးဖို့ကောင်းတော့မှာလဲ? မထူးတော့ဘူး မင်းကမထလာတော့မယ်အတူတူတော့ ကိုယ်ပါအိပ်စက်လိုက်ရင်မကောင်းဘူးလား မင်းရဲ့ဘေးမှာတင်ပဲအိပ်မယ်လေ ကိုယ်လဲဘယ်ကိုမှမသွားတော့သလိုမင်းလဲမသွားနဲ့တော့ တစ်သက်လုံးမင်းကိုကာကွယ်သွားမယ့်အပြင်ကိုယ်တို့နှစ်ယောက်တည်းပဲ ပျော်ဖို့မကောင်းဘူးလား ကိုယ်မင်းကိုရူးလောက်အောင်ချစ်ရတာလဲယုံပြီမှလား ပြန်ဖြေပါဦး မျက်နှာကြီးတည်မနေပါနဲ့
ကဲပါ ကိုယ်လဲမျက်လုံးလေးတွေမှိတ်လိုက်တော့မယ်နော် မင်းရယ်ကိုယ်ရယ်တစ်ဖက်ခြမ်းမှာပြန်ဆုံရအောင်.....