#البندر (1)♥️
_ انت طبيعي ؟
_ انتي مجنونة ؟ انا مهندس
_ وه ! وانا هعمل ايه بهندستك يا بندري يا ابيض
_ هو انا كدا بتهزق
_ وسع عشان أشوف شغلي
_ انا مش عادي
_ اومال انت ايه لا مؤخذة
_ انا مهندسسس
_ ماشي
_ خدي بس ... هو انتي اسمك ايه
_ زينب ووسع كدا احسن الكفر كله بيبص علينا
_ كفر ايه احنا في الجاهلية
_ طبعاً ما انت ابن مدن مش عارف لا اصول و لا عارف خشا
_ طيب طيب هقابلك تاني امتا ؟
رفعت الزلعة على راسها وابتسمت
_ اما تيجي تنط في البحر تاني يا سي قاسم
على شط البحر في بلدي الي متربتش فيها
انا اصولي ريفية لكن من بعد ما والدي ربنا فتحها عليه سافر بينا على مصر و عشنا حياتنا كلها هناك، انا اصلا ولادتي كانت هنا .. عشت هنا تلت سنين و بعدها سافرت و مرجعتش الا بعد وفاة بابا عشان الورث وتقسيمه.
جدو الله يرحمه كان من اعيان البلد هنا، راجل مقتدر محتكم على أراضي و شوية فلوس مخزنها تحت البلاطة لعياله من حوالي أربع سنين جالنا البيت و كانت اول مرة اشوفه فيها .. يومها قرر انه يفتكر ان ليه ابن في القاهرة و ان ليه حق عليه وفعلاً بابا قرر انه يرجع بس بعدها جدو تعب و بابا استلمه و فضل مشغول معاه لحد ما جدو اتوفى
بعد موت جدو رجعت عشان اخد حقي انا وحيد .. والدتي اتوفت من سنة وبابا وراها مليش حد و لسة ببتدي حياتي
لحد ما قابلت عمي .. عمي سليمان اخو بابا والي المفروض في مقام أبويا
_ حقك ؟ حق ايه يا ابو حق ؟ انت ناسي ان ابوك سافر يعمل عملية كلفته الي وراه و الي قدامه
_ ابويا لا يمكن يكون فرط في أرضه !
_ اوماله يا اخويا ... الاثبتات كلها موجودة
ورمي في وشي شوية ورق.. عقود .. وصلات امانة .. وورق كتير كدا وانا عارف كويس انه شغل نصب و دا الي اتأكدت منه بعد فترة بدرس و بربط كل حاجة ببعضها
و في يوم و احنا قاعدين لقيته بيقرب مني
_ انا عايزك تجوز بنتي يا قاسم
_ نعم ؟
_ انت ابني و ابن الغالي و انا عارف انك مهندس و لسه بتبتدي حياتك يعني عايز الي يعينك وطبعا زي ما انت شايف .. ابوك مسابلكش حاجة و بدل ما ترجع ايدك فاضية خد نهلة بنتي واهي متعلمة زيك وانا هساعدك في كل الترتيبات
نهلة .. نهلة بنت عمي الكبيرة
كنت ملاحظ اعجابها بيا من اول ما دخلت الدوار، كنت حاسس انها مشدودالي و انها دايما بتحاول تقرب مني وانا رغم كل الصد الي هي خدته مني لسه بتحاول و بتعافر و اخرها بتتقدملي !
_ لأ !
_ اوماله يا حبيبي بشوقك .. بس انت عارف ان الدوار صغير و اوضتك علاء ابني داخلة دماغه و عايزها .. فانت ممكن تنزل تقعد في الاوضة الي جمب المطبخ
_ جمب الخدم !
_ ومالهم الخدم يا بشمهندس مش بني ادمين
كنت عارف انه هيوجهلي اهانات ..عارف ان حياتي كلها بقت عبارة عن كابوس مش هعرف اخرج منه غير اما اتحط في كابوس تاني اسود
وقفت عالشط مغمض عيني ومستسلم للهوا حواليا، قررت اني اسيبني .. اسيب نفسي مع التيار واشوف اما افتح عيني هبقي فين ؟؛
هفتح عيني من الأساس ولا هفضل متعلق لا انا طايلها سما ولا طولتها أرض !
لا طولت اعيش وسط العايشين ولا طولت راحة الميتين !
وفي اللحظة دي ظهرت ..
زينب زي ما قالتلي اسمها قبل ما اقرر لقيت كفها على صدري و بتحاول تشدني برا الماية .. كانت بتعاند البحر و تياره و قوته و انا مستسلم .. كل الي بعمله اني باصص للسما و بسأله ..
