တူညီဝတ်စုံနဲ့ လူငယ် ခြောက်ယောက်ကအပြေးအလွှားထွက်လာကြတယ်။ သူတို့အထက်အရာရှိက လူစုချိန်ကို တစ်နာရီတိတိ ရှေ့တိုးလိုက်သည်လေ။ အကြောင်းကြားပြီးပြီးချင်း ငါးမိနစ်အတွင်း ရောက်ရမည်ဆိုတော့ တချို့တွေဆို ဝတ်စုံကြယ်သီးတွေတောင်လွဲလို့။
ပြည်သူ့ဝန်ထမ်းတွေအတွက် စီမံပေးသော နေထိုင်ရာ ဝန်းကျယ်ကြီးထဲမှာ လူပျိုဆောင်ကနေ ရဲသားတွေက ပြေးထွက်လာကာ စုရပ်ဖြစ်တဲ့ Mainတံခါးပေါက်နားမှာ သတိအနေအထားရပ်နေကြသည်။ အရာရှိက စည်းကမ်းတင်းကြပ်တာမို့ မည်သူမှ အသက်ရဲရဲမရူူရဲဘူး။ ငါးစက္ကန့်လောက်ကြာချိန်မှာပဲ ဝတ်စုံအပြည့်ကို သေသပ်စွာဝတ်ထားတဲ့ သူတို့အရာရှိက ရောက်လာသည်။
ဝန်ထမ်းအိမ်ယာတွေပဲ ရှိတဲ့ ဝန်းက အတော့်အတော် ကျယ်ဝန်းလှတာမို့ မိသားစုတွေလည်း များသည်။ သူ့ရာထူးနဲ့သူ နေရာချထားတာမို့ ပုံစံတွေကတော့ မတူညီကြဘူး။ တစ်ချို့မိသားစုက အရွယ်ရောက်ပြီးသား သမီးပျိုတွေဆိုရင် အရာရှိကို လူပျိုအမှတ်နဲ့ ငမ်းနေကြတုန်း။လူပျိုထင်ဆိုရင် အရာရှိဝမ်ရဲ့ အိမ်ထောင်ဖက်ကို မည်သူမှ မမြင်ဖူးကြသေးဘူးလေ။ အရာရှိဝမ်က အိမ်ထောင်သည်တွေအတွက် ရည်ရွယ်တဲ့ အိမ်မှာ နေခြင်းကြောင့်သာ အိမ်ထောင်ရှိမှန်းသိကြတာ။ လူပျိုအဆောင်တွေရဲ့ နံရံတွေက ပါးတာမို့ အိမ်ထောင်သည်တွေအတွက် အဆင်မပြေဘူးလေ။အရာရှိဝမ်ရဲ့ အိမ်ထောင်ဖက်က ခရီးသွားနေတာမို့ ဒီနှစ်လလေးအတွင်းမှာ ဘယ်သူမှ မမြင်ဖူးကြသေးဘူး။
အရာရှိက ပေကျင်းကို ပြောင်းလာတာ နှစ်လလောက်သာရှိသေးသည်လေ။ နှစ်လလောက်အတွင်းမှာပဲ အရာရှိက စည်းကမ်းကြီးတာမို့ အကုန်ကြောက်ကြသည်။ အသက်လေး နှစ်ဆယ့်လေးနှစ်ကျော်သာ ရှိသေးတဲ့ အရာရှိက မျက်နှာထားက အမြဲတင်းမာနေသည်။ မာန်တက်နေတာမျိုးမဟုတ်ပဲ သြဇာအပြည့်ရှိတဲ့ တည်ကြည်တဲ့မျက်နှာမျိုး။ဒီဝန်ထမ်း ဝန်းအတွင်းမှာတော့ အရာရှိက ရာထူးအကြီးဆုံးပင်။
အခုလည်း မူးယစ်ဆေးဝါးအမှုတစ်ခုအတွက် သတင်းအတိအကျရထားတာမို့ မြို့တော်အတွင်းက ရပ်ကွက်တစ်ခုထဲ ဝင်ရောက်ဖမ်းဆီးရမှာပင်။ လမ်းလျှောက်လာတဲ့ အရာရှိရဲ့ ခြေလှမ်းတွေကအစ အလှမ်းညီကာ သေသပ်သည်၊ မြန်ဆန်သည်။ ဘေးမှာတော့ အရာရှိလက်ထောက်က အပြေးတစ်ပိုင်းလိုက်လာရသည်။