#طفلة_أرهقت_قلبي الحلقة الثانية والعشرون الجزء الأول
قراءة ممتعه💜💜
" يظنون ان کسرهم لنا سيهلكنا ،💔
و لكننا نصنع منه ما لا يتوقعون👌 "
دنيا مانعرفش كم من الوقت خذيت وأني واقفه في مكاني ونحاول نستوعب اللي صار، مررت نظري وشفت نظرة الإستهزاء في عيونهم اللي خلتني غصبآ عني نستجمع قوتي اللي هما إستغربوها، وقدمت لعمتي اللي منهاره تعيط على الأرض ولاحد منهم فكر يقربها شني بيقولولها أحني اللي قهرناك احني اللي حرقنا قلبك على ولدك أحني اللي سعينا باش نأخذوه منك، في رأيي ماعندهمش مبرر لفعلتهم اللي بيها تعدو حدود الحقاره غادي
سندت عمتي ونوضتها معاي ولأنه ماعنديش مفتاح للحوش وعمتي قعدت شنطتها في السياره ماكنش قدامي إلا حوش عمي المبروك في هالوقت
بشير بغضب😠: وين ماشيه أنتي؟
دنيا، تلفتت بنص عين😒: أي لسان اللي مازال عندك باش تتكلم بيه بعد اللي درته وتتجرأ وتسألني حتى وين ماشيه، وقاحه عندكم يالطيف
مفتاح، بحده: أحترمي نفسك ياحيوانه أنتي فعلا لازمك تربايه
دنيا، بهزوه: ومني بيربيني مثلا أنت ولا أنت🤔، قالك فعلا الجمل مايشوفش لعوج رقبته شوفو صغاركم قبل وبعدين تعالو قارنو بيني وبينهم في التربيه
عادل، بحده: دنيا عيب هالكلام اللي تقولي فيه مهما كان هاذم عمامك راهو
دنيا، بضحكه😅: أي صح عمامي وأنت ولد عمي المرشح الأول لنيل جائزة إنجازاتهم اللي هيا أني طبعا، بس ياخساره تعبتو أرواحكم على الفاضي، وسندت عمتي بخوف😟 لما حسيتها راح إطيح من إيدي
قرب سامر وشد عمته من الجهه الثانيه، واللي هما خوتها ودمهم واحد واقفين يتفرجو ولا تحركلهم ساكن
دنيا، بحده: ياويلكم من ربي اللي راح نشكيكم ليه، وعد مش راح نقصر معاكم أبدا ومش راح ننسي اللي درتوه معاي بكل، ومشيت وخليتهم واقفين والكره معبي قلوبهم والجشع مالي عيونهم
بشير قدم لمفتاح، وبعصبيه😡: ليش ماشديتها مش قلت معاش بنخليها عند مصطفى، لازم تجبر سعاد أنها تتنازل لواحد مننا، بسكوتك هذا ماأستفدنا شي من اللي درناه
مفتاح، بغضب😠: ماشفتش أختك كيف صاير فيها مهما كان راهو ولدها توا أجله هالموضوع شويه، ومشي وهوا يزفر بغضب😤
فات الوقت والكل سمعو باللي صار وعمتي كل شويه تزيد تتعب أكثر معاش عرفت كيف نتصرف معاها، وحتى عمي المبروك مش موجود حرت كيف إندير لو خليتها هكي راح تموت بينا وأحني نتفرجو
فوزيه، بتوتر: تليفون محمد مقفل إن شاءالله خير يارب، وطبست على سعاد، وبحزن😔: تسمعي فيا ياسعيده ردي عليا هزي حتى برأسك شني تحسي!!
بس لاحياة لمن تنادي
أيه، بضيق: ليش مرت عمي فاطمه ماكلمتش عمي ولا واحد من ولادها يجي يرفعها مش شافتها مريضه، دارت دوره وطلعت
سنيه، بغضب😠: تي هاذي ماتنحسبش على النساوين أصلا جايه تقصقص بالك تحصل كلمه تدوي بيها ما همها في حد
سرور، بخوف😟: نمشي نكلم عمي مفتاح ولا عادل يجو يرفعوها
دنيا، بسرعه: لا أني توا نتصرف خذيت تليفوني وطلعت من جنبهم، كلمت خالتي ودقائق وكانت هيا ومؤيد قدام الحوش، طلعنا عمتي وأحني كلنا نكركرو فيها، طلعت من حوش عمي اللي خشتله على رجليها زي الجثه، ولحظات مع سرعة مؤيد وصلنا لأقرب عياده
