#طفلة_أرهقت_قلبي الحلقة الواحد والعشرون الجزء الأول
قراءة ممتعه💜💜
" إلهي ..أنا أؤمن .. وأنت قادرٌ
هذا كُلُّ شيءٍ "🤲
محمد خاش ويشح في أحمد من إيده وبعياط: خشي ياحيوان ياللي ماتتحشم على وجهك هذا أخرة لودانك وتنسريفك
أيه وسنيه وسرور طلعو من المطبخ بخلعه على صوت عياط محمد اللي دار ضجه في الحوش
المبروك، بخلعه: خيركم شني فيه!! هوا المغضوب هذا روح!!
محمد، بغضب😠: روح وياريته ماروح يابوي وحذفه بقوته لين طاح قدامهم على ركابه
فوزيه، بخوف🤨: أسم الله خيرك يامحمد مع خوك
محمد، بعياط: ماهوش خوي فاهمين، اللي يتعاطى ويتاجر في السم ويضيع معاه شباب في عمر الزهور بكل برود وهوا يضحك ماهوش خوي ولا نتشرف بيه، ورفس أحمد اللي قدامه بكل قوته
المبروك، بصدمه😯: كيف!! ونزل رأسه لأحمد اللي طايح لوطه ويتوجع من رفسة محمد، وبشك: تكلم أنطق حق هالكلام اللي يقول فيه خوك!!
سكوت أحمد وعدم محاولته الدفاع عن نفسه كان كافي يخليهم يصدقو
محمد، بغضب😠: تي هوا اللي قالها بفمه لا وقالك نأخذ مره مره طرف حشيش يحسابه هالشي ساهل ومايضرش هالواطي الحقير هذا على أخر الوقت خوي يطلع هكي غير علاش مروح بس ياريتك أنت اللي شدوك وتفكينا منك
فوزيه، بدموع😢: لاه عليك ياوليدي تدعي على خوك
محمد زفر بغضب وقعد ساكت
المبروك، بعصبيه😡: هذا الفرخ قاعد ناقصه تربايه وأني عجزت فيه لكن دواه عندي توا نوريه، جبده يكركر فيه للدار، ولحظات وكان صوت ضرب المبروك وعياط محمد هوا اللي مسيطر على أركان الحوش
فوزيه، بخوف😟: لاه عليك يامحمد ياوليدي ليش تقول قدام بوك عارفه مايتحملش، زودله راهو يدير في شي حاجه يخليه ملوح طول عمره
محمد، بغضب: إن شاءالله يقتله ويريحنا منه، وتلفت لأيه بغضب😠: هيا أطلعي أنتي، ولف وطلع وهوا معصب
أيه خشت بسرعه لبست عبايتها وخذت تليفونها وطلعت
أما فوزيه وبناتها قعدو مسيطر عليهم الخوف والتوتر وصوت أحمد اللي يعيط من ضرب بوه يرن في كل الحوش، فجأة إنقطع الصوت وطلع المبروك داهش ويلهث من المجهود اللي داره، سكر الباب بالمفتاح وحطه في جيبه وطلع من غير مايقول كلمه
في السياره محمد معصب وواصل حده ويضرب في الدومان بقوته كلها ويسوق بسرعه جنونيه
أيه، بخوف😟: باللهي عليك يامحمد بالشويه نخاف من السرعه راهو
محمد شافلها بضيق وتلفت للطريق وهوا يزفر بغضب😤، وخفض السرعه وهوا يفكر في الكلام اللي قاله أحمد
Flashback
أحمد، بهزوه😏: لا واللهي أنت اللي تسخف، على فكره لو تعرف اللي درته على خاطرك راهو خذيتني بالأحضان، أنت مديونلي برقبتك ياولد العمه😉
حسام بصدمه😯: كيف أنت شني قصدك!!
محمد قعد يشوفله بإستغراب🤔
أحمد، بهزوه😏: خليفه الهادي ال.......، كنت ممكن تكون تحت رحمته توا، لولا أني خلصتك منه وبعته نزهه 7أو8 سنين يغير جوه شويه
حسام، بصدمه😯: كيف!! أنت من وين تعرفه خليفه!! ونزهة شني اللي تحكي عليها، تكلم بوضوح وفكنا من التسهويك
أحمد تسند على الكرسي: واللهي تقدر تقول معرفه قديمه، وربك كاتب أني نسمع تخطيطه، كان بيديرني طعم باش يحصل عليك، مسكين يحساب روحه بيقدر يضحك عليا ويطيحني في فخه
محمد للحظه حس بالفخر بأنه خوه دار حاجه كويسه ونفع بيها حد، بإستغراب🤔: وكيف درتله
أحمد: أني كنت قاعد عنده وسمعته يهدرز هوا وخوه كيف راح يشدو حسام، ويسلموني أني لمركز الشرطه بالبضاعه اللي عندي، فاأني كنت أذكي منه وقررت نتغذا بيه قبل مايتعشي بيا، أستنيتهم لين رقدو وتسللت لسيارته وفتحتها بتل معوج بحكم خبرتي طبعا😌
حسام، بتركيز: أي وبعدين شني صار!!
أحمد: لغمتله السياره ببضاعتي كلها، والكيسات اللي كانت فيهم البضاعه حطيت فيهم صوف المخدات باش ماحدش يشك فيا، ولما طلع الصبح طلعت معاه لنص الطريق ونزلت ووليت خذيت الكيسات ولوحتهم في أول مكب، ونزلت لطرابلس وخذيت شفره بإسم واحد سوداني وبلغت عليه، وبعد ماطلع عمي مصطفي من المحكمة بدقائق الشرطه حاصرت المكان وشدوه في سيارته وفتشوها وطلعو البضاعه منها ورفعوه في البوكس، وبحسب معرفتي ضبط الممنوعات بالكميه هذي أقل شي 7 أو 8 سنوات حبس
حسام قعد فاتح عيونه بصدمه ومش مصدق أنه أحمد دار هكي على خاطره
أحمد، بغرور: راهو ماتفكرش أني درت هكي محبه فيك لا يافالح، بس لو خليته يوصلك معناه أني رحت في خبر كان، فقررت إندير خير في حياتي ننقذك ومنها نتخلص منه هوا، يعني زي مايقولو عصفورين بحجر واحد، واحد خير وواحد شر وقعد يضحك 😅
محمد قاعد مش مستوعب الكلام ويحلل فيه في دماغه، بضاعه وممنوعات وخوه كان قاعد عند قائد كتيبه، بشك: وشني نوعها البضاعه اللي تأخذ السنوات هاذم كلهم حبس
أحمد، بضحكه😁: كوكتيل شوية حشيش على شوية بودره على حبيبات يعني مخلطه
حسام، بشك: زعما هوا اللي كان يبعتلي في رسايل تهديد
أحمد، بإستغراب: رسائل شني لاهذي مانعرفهاش أني، شكلهم أعداء هلبا يابرو
محمد، بصدمه: شويه شويه أنت من وين جبتها البضاعه اللي تحكي عليها
أحمد، بتوتر: متاع واحد صاحبي
محمد، بشك: أي صاحب هذا اللي يخدم في حاجه زي هذي وأنت كيف تصاحب واحد زي هذا وكيف تأخذ منه حاجات هكي
أحمد أرتبك ومعاش عرف شني يقول، هذا وين إستاقظ أنه فضح روحه، وبتوتر: لا مش صاحبي يخدم معاي بس
محمد وفاش تخدم أنت وياه إن شاءالله إتاجرو في الممنوعات
أحمد نزل رأسه وقعد يحك فيه بتوتر
محمد، بغضب😠: تكلم أنطق ياحيوان هذي الخدمه اللي تخدم فيها!! هذا وين تغيب بالشهر تمشي تسمم في الصغار والشباب بهالسم، الله يلعنك من بين الخوت الله يلعنك ياحيوان، وناض حذفه بقوه هوا والكرسي، وطبس شده من سوريته، وبعصبيه😡: تتعاطي في حاجه تكلم خير مانكسرلك دماغك الخامر هذا
أحمد، بتوتر: لا مانتعاطاش مره مره نأخذ طرف حشيش بس تغيرة جو مش ديمه
محمد، بغضب😠: لا واللهي تغيرة جو صار!! طاح فيه ضرب كفوف ومشي وهوا يشح فيه من سوريته لين وصله لحوشهم
