ချစ်သောပြည့်ရှင်မင်း(Completed)

Part 40

တလမေနန်း မြင်းပေါ်လွှားခနဲခုန်တက်ကာ သမိန်သူရစံအိမ်တော်ကို အပြင်းနှင်သွားသည်။သမိန်သူရရဲ့စံအိမ်တော်တွင် လူတွေကရှုပ်ထွေးပွေလီနေသည်။တလမေနန်း မြင်းပေါ်မှဆင်းကာ လူအုပ်အလယ်ကို ကြည့်သည်။ဗညားငယ်မင်းသားက တလမေနန်းမင်းသမီးကိုခပ်တင်းတင်းဖက်လိုက်သည်။

"အစ်မတော် စိတ်ထိန်းပါ"

တလမေနန်း လူအုပ်အလယ်မှ ချစ်ရသူအမောင်ကိုကြည့်ကာ စကားလုံးတွေကထွက်ကျမလာတော့။ချစ်ရသူအမောင်သည် ရွှေသလွန်ပေါ်တွင် လှဲလျောင်းနေသည်။စစ်သေနာပတိချုပ်အင်္ဂါရပ်နှင့်အညီ ရွှေရောင်တောက်သောချပ်ဝတ်တန်ဆာကို ဝတ်ဆင်ထားသည်။ရွှေခါးစည်း၊‌ရွှေနားတောင်း၊ထိပ်ချွန်ကော့တက်နေသည့်ရွှေဖိနပ်၊‌ပုလဲသွယ်လည်ဆွဲများ။အမြဲတမ်း ရင်ဖိုဖွယ်စူးစိုက်ကြည့်နေတတ်သည့်မျက်ဝန်းညိုကြီးတွေက မျက်ခွံရဲ့ဖုံးလွှမ်းခြင်းကို ခံထားရသည်။ရွှေသလွန်ပေါ်တွင် လှဲလျောင်းနေသည်မှာ အိပ်စက်နေသည်အလား။

တလမေနန်း မျက်လုံးအိမ်တွေထဲတွင် မျက်ရည်စတွေလည်းမရှိ။ခံစားချက်ကင်းမဲ့သည့်မျက်ဝန်းတွေနှင့် ချစ်ရသူအမောင်ကို ကြည့်နေသည်။

"အစ်မ နင် ငိုလေ ငိုပါ"

ဗညားငယ်မင်းသား တလမေနန်းမင်းသမီးကိုဖက်ထားပြီး ငိုကာပြောသည်။တလမေနန်း  ဦးနှောက်ထဲဘာဆိုဘာမှမရှိတော့ပေ။

တလမေနန်းမင်းသမီး မြေပြင်ပေါ်ပုံလျက်သား ကျသွားသည်။တ‌လမေနန်းရဲ့မျက်လုံးတွေက နီရဲလာသည်။ရုပ်အလောင်းကိုကြည့်ကာ စကားလုံးတချို့ ထွက်အံကျလာသည်။

"ဒုံဝန်းအရေးပြီးရင်လက်ဆက်ကြမယ်တဲ့"

"ဒုံဝန်းအရေးပြီးရင်လက်ဆက်ကြမယ်တဲ့"

"ဒုံဝန်းအရေးပြီးရင်လက်ဆက်ကြမယ်တဲ့"

"ဒုံဝန်းအရေးပြီးရင်လက်ဆက်ကြမယ်တဲ့"

တလမေနန်း ထိုစကားလုံးကိုသာထပ်ခါထပ်ခါ ရေရွတ်နေသည်။တလ‌မေနန်းသည် မငို။ပြူး‌ကြောင်သောမျက်လုံးတစ်စုံနှင့် သမိန်သူရကိုသာ ကြည့်နေသည်။နီရဲသောမျက်လုံးအစုံကလည်း မည်သည့်အရာကိုမျှမြင်နေဟန်မတူ။