بداية النهايه

الحلقه ٥

البارت الخامس
لحظه صوت صرخة صافى باسم جمال  قطع الصوت فى المكان والكل مبقاش مستوعب إللى حصل
الصوت ملى المكان بعدها والكل جرى يشوف صافيه إللى وقعت من قالبة السلم فى الشارع
جمال وقف مكانه مش قادر يتحرك وهو شايفها نايمه فى الارض وحواليها دم ومش بتتحرك
عدى على عقله شريط سينما بكل ذكرياتهم وضحكهم وهما صغيرين ولما كانوا يسهروا سوا ويخرجوا سوا وازاى كانت بتهتم بلبسه وحياته ومنسيش طبعا كل اللى عمله فيها وبقا يفتكر عياطها وهو سامع آخر حاجه نطقتها وهى بتقع وكان إسمه .
صوتها مع صورة دموعها وبكاها وهى بتقوله انها انكسرت وهو مكانش السند ليها كانت زى سكينه بارده بتمشي على رقابته
الكل حاول يفوق جمال اللى بقا واقف مش قادر ينطق ولا يتكلم وفى دنيا غير الدنيا " وكأننا مبنعرفش قيمة إللى معانا غير لما بيروحوا مننا "
مفاقش غير على قلم نزل على وشه وكان القلم دا من إيد أمه إللى فوقته وقالتله إلحق أختك واقف تفكر فى إيه ندمان على إيه ولا على إيه ياجمال أختك لو راحت منى هتبقى انت السبب ياجمال ومش هسامحك  ولا هسامح نفسي وانهارت  عياط جمال حاول يمسك ايد والدته زقته بايدها بعنف : روح لاختك  رووووح

جرى جمال بسرعه ولقى الناس متجمعين حوالين اخته
وهى نايمه فى الارض مبتنطقش
فضل جنبها ماسك إيدها وغطاها بملايه حدفتها جارتهم لحد ماتيجى الاسعاف وبعد دقايق وصلت الاسعاف وشالوا صافى  وطلعوا بيها على المستشفى
وبعد الاشاعات دخلت صافى  العمليات ولان عندها نزيف وفقدت دم كتير كانت حالتها صعبه غير الكدامات والكسور
جمال وناس كتير من المنطقه فضلوا مستنيين بره اى حد يخرج يطمنهم على حالتها وبعد ساعات خرج الدكتور وقالهم انهم وقفولها النزيف وهتفضل ٢٤ساعه تحت الملاحظه .

بعد عدة ساعات..
عند صافيه  كانت فى غرفة العنايه وحاسه بوجع وحاسه ان نفسها مش طبيعى ومغمضه عينيها سامعه كل اللى حواليها وصوت الاجهزه  بس مش قادره تركز كويس ومش قادره تفتح او تتحرك .

حست صافيه بخطوات فى الاوضه جنبها وشمت ريحة برفيوم قويه حست انها كانت بتشمها كتير قبل كدا بس مش عارفه فين !

هديت انفاس صافيه بتحاول تميز الصوت جنبها
كان صوت بتغلفه الحنيه والحب 
: صافيه  قومى عشان خاطرى صعب عليا أشوفك بالشكل دا .
صافيه  انا مش ممكن هسيبك تانى برضاكى أو غصب عنك هكون معاكى
انا موجود فى الدنيا دى عشانك  أنا متأكد انى اتخلقت أعبد ربنا وبعدها اكون عوضك  اعيش بس عشانك وعشان احبك .
صافيه صدقينى كل الوجع اللى انتى فيه دلوقتى  اكتر منه فى قلبي
قلبي موجوع عليكى
فين ضحكتك اللى لما كانت بتطلع كأن الشمس بتطلع معاها
عينيكى كانت بتضحك قبل شفايفك  وقتها بس كان قلبي بيكون طاير من فرحته
من يوم ما اتحرمتى من ضحكتك وانا قلبي اتحرم من فرحته.
صافيه انا خلاص مش هسيبك تانى بس انتى كمان اوعى تسيبينى  .