والقاسية قلوبهم (كسرة روح) كامله

كريم ونور الخاتمه

والقاسية قلوبهم (حكايه ٢) نور وكريم (الخاتمه) بقلمي ناهد خالد🌸
بعد شهر*
_اه وبعدين..
_بس ياسيدي قمت واخده منه الاتنين كيلو طماطم ب ١٠ ج مش الكيلو ونص زي ماهو كان عاوز يضحك عليا.
_نور ياحبيبتي هو انا اي دخلي في خناقاتك مع بياع الطماطم يعني هو لازم تحكيلي ال.....
بصتله برفعة حاجب وقالت :
_في حاجه يا كريم!
ضحك ببلاهه وقال:
_لا ياحبيبتي خالص، وعملتي اي بقي مع بتاع الفراخ اللي كان عاوزك تاخدي الكيلو ب٣٠ قال فاكر هيعرف يضحك عليكي..
كتمت ضحكتها بصعوبه وقالت:
_لا ياحبيبي انا جبتها ب ٣٠ فعلاً ماهو ده سعرها الطبيعي...متحاولش تجتهد من عندك يا كيمو لو سمحت..
بصلها ثواني بسكوت وبعدها انفجروا الاتنين في الضحك وكريم بيقول:
_يا عالكسفه الي أنت فيها ياحازم!
_عادي ياحبيبي بتحصل، المهم قولي عملت اي في الملف اللي المفروض كنت تسلمه امبارح عدلت الخطأ اللي فيه؟
_اه فكرتيني بصي ياستي...
فضلوا اكتر من نص ساعه تقريباً بيحكلها عن الملف واللي حصل في شغله والولاد قاعدين جنبهم علي الكنبه بيتفرجوا علي الكرتون... قطع كلامه رنة تليفونه، بص للأسم لقاها والدته:
_ايوه ياست الكل ازيك؟
_اخوك طلق مراته ياكريم..
اعتدل في قعدته وردد بدهشه:
_اي؟ لي ياماما اي اللي حصل؟
_معرفش قالي انا زهقت وقرفت من طريقتها واسلوبها ودايما في مشاكل مع بعض وشايفه اني مليقش بيها، عاوزاه يسيب شغله ويدور علي شغل بمرتب اعلي ويغير لها الشقه زي ما انت عملت ل نور ويجيب عربيه وحوارات كتير فوق طاقته مبقاش قادر يتحمل..
_خلاص ياماما لو هو كده مرتاح خلاص، وكمان الحمد لله ان محصلش حمل ولا حاجه.
ردت بسخريه:
_لا ماطلع الهانم كانت مأجله الموضوع بمزاجها وهو ميعرفش واكتشف انها بتاخد حبوب من ورا، ولما سألها قالتله احنا لسه في اول جوازنا ومن حقي اتمتع بحياتي قبل ربطة العيال.. شوفت! حتي مفكرتش تشاركه في القرار اللي ميخصهاش لوحدها، مش زي نور اللي كانت هتتجنن لما عدي ٣ شهور علي جوازكم من غير حمل..
اتنهد بهدوء وقال:
_متقارنيش بينهم ياماما لان مفيش مقارنه، احسن والحمد لله ان الأمور انتهت بدري بدري..
_ماشي يا حبيبي انا قلت اعرفك
_وهو عندك؟ وعامل اي؟
_لا تمام اوي، ده كمان راح عيد ميلاد بنت واحد صاحبه..
_بجد!
_مش شروق اللي يتزعل عليها ياكريم..
_صح، تمام ياحبيبتي عاوزه حاجه؟
_لا ياحبيبي سلامتك..
(بقلمي ناهد خالد)
_في حاجه ياكريم؟
_شروق و حسن اطلقوا..
شهقت بخضه وقالت:
_لا حول الله لي؟
حكلها اللي عرفه، وكمل :
_كده احسن حسن مكنش مرتاح..
_طب متعرفش شروق راحت عند اهلي ولا لا؟
_مش عارف، بس اومال هتروح فين..
_اصلها اخر مره بابا قالها متدخلش بيتنا تاني.
_ايوه بس الوضع مختلف اكيد مش هيرموها في الشارع.
نور*
كلمت ماما وعرفت منها ان شروق عندهم بس تعاملهم معاها علي الهامش، بس اكيد كل حاجه هترجع بينهم مع الوقت في الاخر دول أهلها ، عرفت كمان ان طلاقها مأثر فيها معرفش من انهي جانب بس مأثر ومبقتش بتخرج زي الاول ومعظم الوقت ساكته، كلمتها مرتين اطمن عليها في مكالمه متتعداش الدقيقه بس بعمل اللي لازم اعمله هي في النهايه اختي برضو، وربنا موصيني عليها...
__________(بقلمي ناهد خالد) ________
بعد مرور سنه *