♡ماكرة ابليس♡
20/12/1989
اقليم ازيلال.. تحديدا قرية ايت محمد
واقف رجل في العقد الخامس من عمره، شكله انيق بشعره الاشقر مخلط ببعض شعيرات الشيب، عيونه زرقاء كأنها محيط صافي و بشرة بااااهتة لدرجة اذا وقفتي امامه تحس بالبرد... بيهبته وقفته كتخلي لي أمامه حاني راسو احتراما ليه.. فيده عكاز لي كان مجرد اكسيسوار ورثه عن ابوه..
هالة من البرود و الصلابة محيطة بيه.. وقف امام باب بيت صغير.. بيت مبني باللوح (الطين و التبن) ضايرة بيه حديقة صغيرة امام الباب.. رفع العكاز ديالو و طرق الباب ثلاث مرات حتى فتحات له بنت صغيرة في سن الثامنة...
_ كاين باباك بنتي؟
شافت فيه بنظراتها الطفولية لابسة فستان طويل و تحت منه سروال عاكفين لها على راسها زيف و شعيراتها الذهبية خارجين من القدام..
_لا مكاينش خرج للجنان..
حرك راسه بالايجاب خاشي يديه فجيبه جبد منو بعض النقود قرب مدهم لها شداتهم و الفرحة تتنقز من عينيها... في حين توجه هو للمكان لي قالت له عليه.. الجنان فين كيخدم.. و بمجرد ما وقف امامه الثاني طلق شنو كان فيديه بدهشة رمى داك الفاس و مشا تيجري عندو حاني راسو..
_ سيدي.! بغيت شي حاجة اش نزلك لجنان؟
شاف فيه بنظرة عمييييقة و نطق بصوت جامد..
_ الامانة ديالي تكون عندي دابا!
بلع ريقه حاس برجفة اجتاحت اوصاله، تسارعو دقات قلبه، كلامه مع انه كان غامض الا انه فهمو مزيان، تذوق طعم الصدأ فحلقه لانه الطلب منما كان صعيب عليه ، لكن هيبة الشخص لي واقف امامه خلاتو ميقدرش يرجع فكلامه!
_ اجي معايا اسيدي لدار!
سبقو متوجهين لمنزله البسييييط،بمجرد ما فتح الباب رجع للوراء و اشر ليه باحترام يدخل، ولج للداخل للمكان لي قال له.، كان عبارة عن صالون للضوف بسييط فيه سدادر و حصيرة تتوسهم طبلة صغيرة، جلس فوق السداري بعنجهية و هو كيشوف من الفوق للفوق و كيتسنى الامانة لي لي واعدو بيها!
_ محند! معنديش الوقت لي نضيعو فالجلوس هنا! المدام كتسنا!
دوز يده على جبينه كيحرك راسو بالايجاب، توجه مباشرة للداخل فين كاينين اولاده و زوجتو - محند اب ل ستة اطفال! المعيل الوحيد لعائلتو كان هو فثط.. ستة اطفال و امهم و الابن السابع جاي فالطريق! قلة الشيء و الفقر لي كانو عايشينو خلاتو يفكر في اشياء غايندم عليها اشد الندم او يمكن بدا يندم من دابا! ..
وقف امام الغرفة لي كانتو مجموعين فيها كاملين،. الام حسات بقلبها تزير بمجرد ما سمعات صوته كيحنحن امام الباب.. زيرات على ابنها ذو الاربع سنوات معنقاه بجنوون
_ ايوي ( ولدي) ماغانخليهش يديه !
نطقات بقهرة و دموع مغرقيين عينيها ما اصعب الفقر و قلة الشيء و الاصعب هو فراق الكبدة
_نعلي شيطان المرا! ولدك غايعيش مخير و حتى حنا! مابغيتيش تبدلي هاد الخربة و تسكني فدار بحال ناس؟
حركت راسها بنفي و حباات من الدمووع كتساقط من عيونها
_ بغيت ولدي واخة نعيشو فالعشة!!
حرك راسه بنفاذ صبر و هو كيقرب لها.. جر منها الدري بعنف و تم غادي بيه قلبه يتقطع الى اشلاء لكن حدته و صلابته معاها كتبينو امامها طاغية قلبة حجر مكيحنش.. بسرعة ناضت طايحة على رجليه
_ الله يرحم ليك ميمتك.. خلي ليا ولدي! الله يسهل عليك امحند! ولدي لا ماتشوينيش فكبدتي امحند.. ماتبيييعش ولدك حرااااام
تنهد و دفعها.. طلق من الولد لي كان كيشوف بعيونه الزرقااء كيف لون البحر مافاهم والو بخلاف اخوته الكبار لي كانو نوعا ما فاهمين شوية، جلس على ركابيه امامها كيشووف فيها برجاء عكس جبروته معاها و قسوته :
_راه ولدي تا انا ! غايمشي يقرا في احسن المدارس.. غايعيش احسن عيشة.. يلبس بحال الناس و ياكل بحال النااس! بغيت نعتق واااحد من ولادي افاظنة و هو يعتق خووتو مسحي دموعك و خرجي عطيه لراجل بيديك باش يرتاح قلبك عليه! نعلي شيطان فاظنة الى عزيز عليك ولدك غاتفرحي ليه!
بلعت ريقها تتشوف فيه بنظرة بااهتة حاسة بيديها بردو عليها مكانتش لا على البال ولا على الخاطر يجي شي نهار تبيع ولدها لشخص غريب لمجرد أنه رب عمل زوجها و عندو الفلوس.!
_نعلي شيطان و نوضي!
اش عند الميت ميدير قدام غسالو؟ وقفت مرفوعة كأنها جسد بدون روح.. قربات لابنها و جلسات على ركابيها امامه كتمسح فدموعها.. تعنق و تبووس فيه و تشم ريحتو كانها باغية تخبيه من العالم كامل!
_ دييه ديييه امحند ديييه..!
اخذ الابن متوجه لعند الشخص لي كان مزال جالس في مكانه بهيبته المعهودة كيضرب بعكازو على الارضية، شاف فالساعة ديالو و رجع وجه انظاره الحادة لمحند..
_ اش هاد التعطال ؟ هادشي كلو باش تجيب الامانة؟
بلع ريقه و غمض عينيه بالم كيعتصر صدره قبل ما ينزل على ركابيه لابنه..
_ سير اولدي عند عمك سير..،
بنظرات خائفة توجه الابن لعندو كيشوف فيه مفاهمش راسو علاش غادي لعندو ولا علاش هو جاي لعندهم.. اما هو فكان مسلط عليه انظاره و عينيه فيهم لمعة من الفرحة و الامل! هزو بين يديه و جلسو على حجره.. شاف فوجهه كان غاية فالجمال، بشعر أشقر و عيون زرقاء كلانها محيط صاافي، وقع في حب الطفل لي مكانتش اول مرة يشوفو بحكم خدمة الاب ديالو.. مد يده لجيبه جبد منو ضرف عامر فلوس.. حطهم فوق الطبلة
_ الارض لي واعدتك بيها غدا تولي ديالك قانونيا! هاد الولد تنساه عمرك تقلب عليه.
خذا ضرف الفلوس كينبش فيه و هو تيتمتم بكلمات غير مفهومة من قوة فرحته مشات له الهضرة.. في حياتو كاملة مشافش هاد الكمية ديال الفلوس.. في حين هاد الاخير وقف و هو هاز فدراعو الطفل و قبل ما يخرج وقف فالباب كيشوف فالاب لي باع ولدو بارض و بعض فلوس ماساويين عندو هو حتى نقطة في بحر ثروته..
_مخصكش تنسى! تفكر مزيان هاد نهار و حفرو فدماغك! هذا يوم ميلادك! و هذا لي كتشوف امامك اليوم غاتقطع صلتك معاه للابد! غايكون اخر يوم نتادي عليه بابا! خصك تفكر هاد اللقطة و تخليها محفورة فذاكرتك اليوم هو باع حيت محتاج و انا شريت حيت محتاج ! و بين البايع و الشاري فرق كبير!!!
#يتبع
أنت تقرأ
Diablo Astuto (ماكرة ابليس)🥀
Romance#Soon🔥🔥 15/1/2022 #Diablo_Astuto🔥🔞 🖤 ماكرة ابليس🖤 #ليالي_نسيم مشاعر صاخبة ، ليالٍ هادئة ، قلوب تائهة بين أضواء بانكوك 🖤
