الدهاشنة (لملكة الإبداع ايه محمد )

(الدهاشنة 2)الفصل الثالث

#الدهاشنة2...(#صراع_السلطة_والكبرياء.)
#الفصل_الثالث..
(الفصل إهداء للقارئة الجميلة سلمى مسعد💙..)
رفع كفيه ليتصافح كلاً منهما بحرارةٍ، ثم جلس "بدر" على المقعد المقابل له، ليشير للنادل الذي أتى سريعاً ، فقال:
_إتنين قهوة سادة يا برنس.
أشار له بابتسامةٍ واسعة، ثم غادر ليحضر ما طلبه، وحينما التفت برأسه تجاه ابن عمه وجده يحدجه بنظراتٍ كالسهام، فرفع حاجبيه متسائلاً في دهشة:
_أيه؟!
أجابه "عبد الرحمن" بتعصبٍ شديد:
_متخيل أني في الساعتين اللي كنت بستنى حضرتك فيهم دول مطلبتش عشرين كوبية قهوة!
مرر يديه على طول رقبته وهو يشير له:
_حقك عليا بقا ما أنت عارف لو مفتكرتش عيد ميلادها هيحصلي أيه؟
جذب "عبد الرحمن" حقيبته الجلد السوداء ثم أخرج منها عدد من الملفاتٍ:
_طيب نخلينا بقا بالمهم عشان عايز أرجع البيت قبل معاد أدوية أمي.
هز رأسه بخفةٍ، فطرح "عبد الرحمن" من أمامه عدد من الملفاتٍ، ليتابع بجديةٍ تامة شرح تفاصيل العقود التي أتمها مع التجار خارج مصر، بأمرٍ من "فهد"، تابع"بدر" مراجعة الملفات بإعجابٍ شديد من السعر الذي تمكن من الإتفاق عليه مع الشركات المستوردة، فأغلق الحقيبة وهو يدفعها تجاهه قائلاً:
_ويبقى كده كل شيء تمام، بلغ عمي بقا.
سأله "بدر" باهتمامٍ:
_ليه أنت مش ناوي تيجي الصعيد بالإجازة دي كمان ولا أيه؟
أجابه "عبد الرحمن" بنبرةٍ سكنها الحزن:
_لا للأسف المرادي مش هقدر، لأن والدتي تعبانه شوية.
صمت "بدر" مطولاً قبل أن يطرح عليه ذاك الإقتراح الغير محبب:
_طيب ما تجبها معاك السرايا وأهي بالمرة تغير جو.
بإبتسامة متكلفة قال:
_وتفتكر هيتقبلوها، أو عمي هيتقبلها بعد اللي عملته؟
تنشطت ذكريات "بدر" سريعاً، ليتذكر ما طرح أمامه عدة مرات من حديث عائلته الذي غاص بالماضي ليذكره بما فعلته "مروج" زوجة عمه الراحلة ب"راوية"، مازال يتذكر كيف يبغضها الجميع؛ ولكن ما يحدث معها الآن هو حالة تزلزل المشاعر لها، فبالطبع عليهم التخلي عن الماضي، أخشونت نبرته وهو يشدد على يديه:
_متقلقش سيب الموضوع ده عليا، والدتك محتاجة لمساعدة وأنت مش هتقدر تسد في كل ده، أنا هكلم عمي.
منحه "عبد الرحمن" ابتسامة صغيرة بحبس آلمه بداخلها، ثم قال:
_مفيش داعي تتعب نفسك يا "بدر"، أنا مدي ألف عذر لعمي، اللي عملته أمي صعب حد ينساه بسهولة.
قال بتصميمٍ:
_وحالتها حالياً متستهلش مننا غير السماح على اللي عملته قبل كده.
أومأ برأسه بألمٍ، ثم نهض ليشير له بهدوءٍ:
_طيب أنا لازم أرجع البيت، أنت عارف مواعيد دوا الحاجة.
بتفهمٍ وحب قال:
_هتصل بيك نتفق ونتقابل عشان"آسر" نازل القاهرة بكره بليل.
أشار له بيديه:
_هستنى مكالمتك، سلام.
أشار له بابتسامةٍ صغيرة:
_في رعاية الله.
ثم جلس "بدر" يرتشف قهوته، فلفح وجهه نسمة هواء عليلة دفعته عن قصدٍ لتذكر حينما يعبث الهواء بخصلات شعرها الأصفر، ابتسامتها التي تلاحقه أينما ذهب، عبث بملامحه فهو لا يود إسترجاع أي ذكرى متعلقة بها، فوضع كوب القهوة الغير مكتمل بتقززٍ وكأن رائحتها هي من تدفعه لتذكرها، ثم نهض ليجذب المال من جيب بنطاله الرمادي، ليغادر سريعاً قبل أن تتمكن منه أكثر من ذلك!
*********
بشقة الفتيات.
انتهت "حور" من قضاء فريضتها ثم جلست لتتابع دراستها بالردهة المقابلة لباب الشقة، شعرت بحركةٍ خافتة بالخارج فما كان منها الا الإقتراب لتقف بالقرب منه، حررت "روجينا" المفتاح ببطءٍ شديد ثم ولجت للداخل لتغلقه سريعاً، والتقطت أنفاسها براحةٍ وسعادة، واستدارت لترفع يدها على صدرها وهي تردد بهلعٍ:
_"حور"، فزعتيني!
بنظراتٍ حادة، سألتها:
_كنتِ فين كل ده يا "روجينا"، أنتي عارفة الساعة كام دلوقتي؟
جلست على الأريكةٍ ثم خلعت حذائها بضيقٍ شديد مما تسمعه من محاضرات لازعة من ابنة عمها التي واصلت بنصائحها:
_عارفة لو حد من ولاد عمك لمحك وأنتي راجعة وش الصبح كده هيعمل فيكي أيه!
ألقت الحذاء أرضاً وهي تجيبها بضيقٍ:
_كنت سهرانه مع" تقى" والوقت أخدنا.
لوت شفتيها بتهكمٍ:
_"تقى" تاني يا "روجينا" مش حذرتك من البنت دي أنا! ، أنتي عارفة بيتكلموا عنها إزاي!
خلعت حجابها وهي تصيح بإنفعالٍ:
_يوووه معتش ورانا غير السيرة اللي مش بتتقفل دي!
وقفت "حور" مقابلها لتجيبها بشراسةٍ وتحد لمواصلة الحديث:
_أيوه معتش ورانا الا هو، أصلك مش شايفة نفسك بقيتي أيه من ساعة ما صحبتي البت دي، غيرتك ١٨٠درجة وكأنك بقيتي واحدة تانية أنا معرفهاش.
اندفعت لغرفتها وهي تردد بضيقٍ شديد:
_متشكرة لنصايحك.
إتبعتها "حور" وهي تستكمل بتعصبٍ شديد:
_هنصحك وهفضل أنصحك دائماً متنسيش أنك بنت عمي وليا الحق بده!
جلست على الفراش وهي تفرك وجهها بغيظٍ، تخلت عنه وهي تحاول أن تتحدث بلطفٍ:
_طيب يا "حور" هنتكلم بكره لأني بجد تعبانه ومحتاجة أرتاح ممكن!
جذبت "حور" المقعد القريب منها ثم جلست مقابلها وهي تشير لها بهدوءٍ:
_هطلع بس هقولك حاجة واحدة.
اضطرت الإنصياع لها حتى تغادر من أمامها، فقالت الأخيرة بهدوءٍ:
_إختيار الصديق اللي بنصاحبه يا "روجينا" هو شيء أساسي زي إختيار شريك الحياة بالظبط، لأنه للأسفل تصرفاته وأخلاقه بتنعكس علينا، في صديقة بتشجعك أنك يكون ليكِ كيان وتحققي طموحاتك وبتشدك لو لقيتك بتقربي من الغلط.
وبابتسامة منحت وجهها إشراقة، أضافت:
_بتقربك خطوة من ربنا وبتراقب تصرفاتك عشان لما تغلطي تلحقك، هي شايفاكي حد من أهلها ومتقبلش بأي سوء يمسك، دي بتبقى الصحبة الخير اللي بتشدك بطريق كله صلاح.
وبملامحٍ ممتعضة، قالت:
_وفي صحبة كلها شر، زي "تقى" بتاعتك دي، بتشجعك وبتوسوسلك زي الشيطان، الحجاب شكله وحش، لا لبسك مهرول، تعالي نروح الحتة الفلانية وغيره كتير أوي، إنعكاس شخصيتها السييء مع الوقت هينعكس عليكي غصب عنك وده فعلاً اللي ابتدى يحصل معاكي من أول ما بدأتي تصاحبيها، راجعي نفسك يا "روجينا".
وتركتها وغادرت الغرفة بأكملها، عل كلماتها تفيقها مما هي به!
********
بالطابق العلوي.
كان يجلس" يحيى"، على المكتب الصغير المقابل لفراشه، يراجع على الحاسوب بعض الحسابات الخاصة لبعض التجار، وفي تلك اللحظة إندفعت "ماسة" للداخل كالتيار لتقف لجوار مقعده ثم تمسكت بيديه وهي تشير له بخوفٍ:
_"يحيى".
أمسك بيدها المرتجفة ثم نهض، فتخبأت من خلفه لتتشبث بملابسه، ففهم ما يحدث حينما ولجت "إلهام" لتردد في يأس:
_بحاول أنيمها مش قادرة.
أشار لها بابتسامةٍ هادئة:
_روحي إنتي، وسبيها.
أومأت برأسها بحبورٍ:
_تحت أمرك يا بشمهندس.
وبالفعل أغلقت باب الغرفة وغادرت على الفورٍ، فجذب "يحيى" يدها المتشبثة بالتيشرت الخاص به، ثم أخرجها لتقف من أمامه تتدلى شفتيها السفلية بحزنٍ، ابتسم وهو يتأملها ثم جلس على حافة الفراش ليجذبها لجواره متسائلاً بضيقٍ مصطنع:
_مش "ماسة" قالت أنها مش هتضايق المربية بتاعتها أبداً!
حدجته بنظرة حادة من عينيها الزرقاء قبل أن تخبره بتلعثمٍ:
_و"يحيى"قال لماسة أنها لو خدت الدوا هتنام معاه مش هتنام مع "إلهام" الوحشة!
ضحك حتى كُشف عن أسنانه، وهو يردد:
_في دي عندك حق، الإتفاق إتفاق.
ثم نهض ليغلق الضوء النابع من مكتبه، ليعود إليها سريعاً، أشار لها بالتمدد فتمددت ليطرح الغطاء على جسدها، ثم استلقى لجوارها ليجذبها لأحضانه، فقالت "ماسة" بتذمرٍ:
_مش هتحكي لماسة حدوتة.
ردد بعد ضحكة عالية:
_بعد المجهود ده بالشغل ولسه هحكي حواديت، ماشي يا ستي.
وقال وقد هامت عينيه بالماضي:
_كان في بنت جميلة، عيونها بتشبه لون موج البحر، وشعرها اسود وطويل.
قاطعته بطفوليةٍ:
_زي ماسة كده.
تعالت ضحكاته على ذكائها بتميز عن من يقص، فقربها لصدره، ثم قال:
_أه يا ستي زي"ماسة" كده، وقعت في حب شاب كان بيعشق التراب اللي بتمشي عليه بس مكنش يقدر يقولها ده ولا يعترف بيه.
تساءلت بتلقائية:
_ليه؟
بشرودٍ قاسي بماضيه قال:
_لأنه ببساطة كان عارف إنها مش ليه، من طفولتهم وهما بيقولوا إنها لإبن عمه الكبير، فمكنش يقدر يتكلم ولا يقول إنه بيحبها.
_وبعدين.
ابتسم وهو يقص هذا الشطر بالتحديد:
_كان منتظر إنها تعترفله بحبه ومحصلش رغم إن عيونها كلها مليانة مشاعر وحب تجاهه، وبعد كده إتفاجأ بيها بتعترف بحبه قدام الناس كلها، وبعد كده اتجوزوا وعاشوا أجمل أيام حياتهم وبالرغم من كده كان حريص إنها تكمل تعليمها لإنها كانت صغيرة بالسن..
وبألمٍ شديد اتبع لهجته قال:
_بس مكنش يعرف إن بعد كده هيحصل اللي هيكون السبب في آآ..
أمسك "بحيى" بذاته وهو يستكمل ذاك الشطر المؤلم، تناسى تماماً مع من يقص ومن تستمع، فرفع إصبعيه ليزيح تلك الدمعة العالقة بأهدابه سريعاً، ثم تطلع لها فحمد الله كثيراً حينما وجدها غفت على ذراعيه، داثرها "يحيى" جيداً ثم طبع قبلة صغيرة على وجنتها بحنانٍ، لينجرف خلف طوفان ذكرياته الموجعة.
**********
تخفى ضوء القمر الخافت خشية من ضوء الشمس، الذي غدى ليكسو العالم بضيائه، فتبقى ساعات النهار الأولى هي أنقى نسمات الهواء التي تتنقل بين المساكن، لذا يحب أن يكون منفرداً بذاته بتلك اللحظة، يتجول بين الحشائش والأراضي الزراعية بفرسه الأسود، يعتليه بمهارةٍ وحرافية، تنقل "آسر" بين الأراضي الزراعية براحةٍ تستحوذ عليه حينما يتمشى بالخيال في وسط ذاك الجمال الذي يأسره، فأراد أن يمتع عينيه قليلاً قبل أن يستعد لسفره بالمساء، لا يعلم بأن من ساقه القدر إليها أول مرة سيعود ليسوقه إليها من جديد!
**********
بالقاهرة.
استيقظت "حور" باكراً، فاستغلت ان اليوم ليس لديها مذاكرة أو محاضرات، فأعدت طعام الفطور ثم دقت الجرس على شقة الشباب المقابلة لها، ففتح "بدر" الباب وهو يقول بنومٍ:
_في أيه على الصبح، مش عارف أنام شوية أنا!
أجابته ساخرة:
_الحق عليا بصحيك عشان تفطر قبل ما تنزل المطار.
ضيق عينيه بدهشةٍ:
_مطار أيه!
قالت وهي تهم بالصعود لشقة "يحيى":
_وأنت هتعرف إزاي وأنت قافل موبيلك، عمك بيحاول يوصلك من إمبارح ولما معرفش كلمني وقالي أبلغك تنزل كمان ساعتين أنت وحد من الشباب عشان تكون باستقبال"تالين" و"رؤى".
غادر النوم حدقتيه ليغلفهما الجفاء فور سماع إسمها، فقال بحدةٍ:
_شوفي "يحيى" أنا مش فاضي للكلام ده.
تهدلت كتفيها بإستغراب:
_بس عمي قال آآ.
قاطعها بحدةٍ:
_قولتلك أيه؟
صعدت للأعلى باستسلامٍ:
_زي ما تحب هشوف "يحيى" كده.
وبالفعل صعدت للأعلى، تاركة النيران تحرق قلبه الذي عاد ليخفق من جديد!
********
بمكتب "أيان المغازي"
تسللت بسمة على ثغره حينما زف له هذا الخبر السعيد بالنسبة إليه والتعيس بالنسبة للدهاشنة، فرد على المتصل بانتشاءٍ:
_براڤو عليك، هما لسه شافوا حاجة من اللي ناويها ليهم، هانت كلهم كام يوم ورأسهم هتبقى في الأرض.
وأغلق الهاتف ثم فتح درج خزانته، ليجذب صورتها التي لا تفارق درج مكتبه، مرر أصابعه على جسدها بوقاحةٍ وهو يردد بحقدٍ:
_وبنتك هتبقى في حضني وخدامة تحت رجلي يا كبير الدهاشنة!
.............. يتبع............. لقاء سيحتمها على مقابلة أخر من توقعت رؤياه!..... سحابة عشق ابتلعت بجوفها قصة لم تكتمل ثم سيمنحهما القدر فرصة للإلتقاء مجدداً فهل سيتمسك كلاً منهما بها؟.......
أفعى متنكرة ستحوم عليه لتنتزع حياته فهل سيقوى حبه الضعيف على المحاربة؟
ترقبوا القادم من ملحمة #الدهاشنة 2..
#بقلمي_آية_محمد_رفعت..
طبعاً هتسألوني ليه الفصل منزلش امبارح، للاسف الشديد الساعه ١٢ انتهيت من كتابته ولما جيت انزله بدل ما أعمل نسخ عملت لصق وضاع تعبي كله، ومحبتش أنزلكم بوست بده لأن في بعض القراء تعليقتهم بتكون مش لطيفة فسهرت على الجزء ده صحيح مش كبير بس حاولت بقدر الإمكان عشان مزعلكمش، والنهاردة هحاول بإذن الله أنزلكم الفصل الرابع المهم تكونوا مبسوطين، وهنتظر رأيكم على الفصل والأحداث وطلب أخير من حضراتكم بتمنى تفاعل لطيف منكم جوه البوست ده لأنه يستحق كل التقدير فعلاً، أنا دايماً بتعشم الخير فيكم 💙
https://m.facebook.com/story.php?story_fbid=4810565852372242&id=386876678074537&sfnsn=scwspmo
******___________*********