عشق حد الانكسار

بارت ٤

بقلم خلود وائل 🌻
انتهت ندي من تطريز منديل كتب الكتاب وشطفته بسرعه وسابته علشان ينشف وبعدين قعدت تذاكر شويه ووصلت مديحه ومنه ال وشها بيطلع قلوب وسلمت علي بباها واخوها ودخلت اوضتها بسرعه وهي فرحانه ورمت نفسها بفرحه علي السرير
ندي بتعجب:لا اله الا الله طب مفيش سلام عليكم حتي
منه :هاااااح .. سلام عليكم ياستي
ندي وهي بتقفل الكتاب وبتبص لمنه بأنتباه:مالك يامنه أنتي كويسه
اتعدلت منه شويه علي سريرها وبصت لندي :هتصدقيني لو قلتلك أني بأحسن مايكون من الأحوال
ندي بهزار:أنتي سخنه ياحبيبتي ولا أيه دة ال يشوفك الوقتي ميشوفكيش وانتي نازله مع مامتك من ساعه
منه:أحلي ساعه في حياتي ياندي والله
ندي باهتمام:لااااه دة باينه موضوع كبير أحكيلي من طقطق لسلامو عليكو
منه:شفت القمر ياندي وسلمت عليه لأ وكمان اتكلم معايا
ندي :انتي شاربه حاجه يابه
منه:شاربه الهنا كله وقومي بقي من هنا قبل ما انكد عليكي وانا فرحانه
ندي بتعجب:هتنكدي عليا وانتي فرحانه دة أنتي علي الله حكايتك خالص انا رايحه لديحه أفهم منها ايه ال حصل
منه :احسن بردو يلا من هنا يلا
بالخارج.....
ياسر:المهم تكوني خدتي معاكي زيارة محترمه من قيمتك ياام عبدة
مديحه:امااال ياياسر دة انا جبتلهم جاتوة وفاكهه معتبرة
ياسر:ربنا يهنيهم ويجعل البيت دة وش السعد عليهم
مديحه:بيت ايه دة ياياسر بسم الله مشاء الله اربع ادوار كل دور شقتين الشقه منهم تشرح القلب ولا ابنها خالد اللهم صلي على النبي بقي راجل قد الدنيا طول بعرض وبيشتغل سمسار باين او حاجه ذي كدة وهو ال جابلهم البيت دة
ياسر:خالد طول عمرة محترم وابن راجل ربنا يكرمه ويخليه لأمه وأخته
مديحه:مطلعش ذي أخوة التاني قليل الأصل
ياسر:مديحه ملناش دعوة ربنا يهدي
مديحه:الله هو انا قلت حاجه
ياسر:أنتي اعوذ بالله منك
مديحه:يوووة ياراجل
ندي:السلام عليكم ياأهل البيت
كلاهما:وعليكم السلام ورحمه الله وبركاته
ندي:حمد لله على السلامه يامدوحه الا قوليلي البت منه مالها كدة من ساعه ماجت وهي مش مظبطه
ياسر:تعبانه ...مالها .. اجبلها دكتور
ندي بتوتر:لااا لا ابدا يابابا انا بهزر هي ذي القرد جوة اهي
عبد الرحمن من وراها :لو القرد سمعتك هتعملي ايه ساعتها
ندي بمرح:هنحدفلها موزة 😂😂
ضحكو كلهم وطلعتلهم منه علي صوت ضحكهم وانضمت ليهم :بتضحكو علي ايه!
عبد الرحمن: علي الموزة
منه بعدم فهم:موزة ايه!؟
ياسر:متاخديش في بالك انتي ياحبيبتي الا صحيح انتي مالك ندي بتقول انك تعبانه
منه بصت بزهق لندي وقالت :لا يابابا انا ذي الفل متقلقش ماما مش هنتعشي ولا ايه
مديحه:عنيا ياقلب امك يلا ياندي نجهز العشا
ندي :حاضر ...
_______________________________
بأحدي المستشفيات الكبيرة وأمام غرفه العمليات كان يجلس ضياء بيه بشموخ وفتور لفترة طويله من الزمن قطعها خروج الدكتور من العمليات وراح ناحيته
الدكتور:ضياء بيه ..
ضياء بملل:اخلص ماتت ولا لسه عايشه
الدكتور:لا لسه عايشه
ضياء:هتنقطني بالكلام متخلص
الدكتور:بصراحه ياضياء بيه حالتها صعبه
بصله ضياء بتحذير انه يتكلم بدون مقدمات فاتكلم بسرعه :عندها ضلع مكسور ونزيف داخلي وقفناه بصعوبه أما رجليها الشمال فكانت متدمرة ونزفت كميات مهوله والحل الأنسب ليها كان البتر فبترناها
ضياء بملل:وبعدين
الدكتور:وفيه اصابه في العمود الفقري شبه قصرت علي الحبل الشوكي فهي تقريبا أصبحت مشلوله في الوقت الحالي
وقف ضياء قدامه وهندم چاكيت بدلته:مش عملتلها اللازم
الدكتور:ايوة يافندم
ضياء:وديها اوضتها وخلص كل ال عليك وانا هستلم من هنا
الدكتور: حاضر يافندم
مشي الدكتور علشان ينفذ تعليمات ضياء وبعدين قرب منه واحد من الحرس بتوعه
ضياء:كلم اهلها وارميلها قرشين وشوف طلباتهم كلها ونفذهالهم المهم مسمعلهمش صوت فاهم
الحارس:بس يابيه
ضياء بنرفزة:بس ايه تاني اخلص انت كمان
الحارس:ساعه الحادثه تلفونها اتفشفش ميه حته ملقناهوش غير فتافيت وتقريبا حد ابن حرام سرق شنطتها وسط الهيصه ولمه الناس ف...
ضياء بحدة:نعم!! يعني ايه كمان مش هتعرفو توصلو لأهلها
الحارس بحذر:نستني بكرة الصبح لحد ماتفوق وربنا يسهلها يابيه
كز ضياء علي اسنانه بضيق شديد :تفضلو هنا ملازمينها ولو حصل اي حاجه تبلغني فاهم
الحارس:فاهم
ضياء لأول مرة يحس بالخوف والتوهان وملقاش حل قدامه غير أنه يروح بيته وينام لحد ماتفوق بكرة ويعرف منها هي مين وساعتها هيتصرف معاها وبالفعل بعد فترة كان في بيته وقابلته مراته ميرهان ببرودها المعتاد
ميرهان :اهلا بالبيه ال شرف نص الليل
ضياء بضيق: ميرهان انا مخنوق وفيا كفايتي ابعدي عني الساعه دي احسنلك
ميرهان:والا ايه انت هتهددني علي أخر الزمن
ضياء بحدة:ودي تيجي بردو انا ضياء الفلاح ههدد بنت السفير ميرهان هانم لا متجيش انا هقف ساكت ذي التلميذ وانتي تبيعي وتشتري فيا براحتك وتقولي مابدالك لحد ماتخلصي موشح كل ليله وبعدين أدخل انام واصحي تاني يوم اطحن في ام الشغل علشان ألبي أحتيجاتك ومتطلبات بريستيچك وسط صحباتك وهوانم المجتمع الراقي ال انتي منه ارتاحتي كدة ولا لسه
مريهان بحدة:انت بتزعقلي ليه الوقتي انا مطلبتش منك حاجه علي فكرة
ضياء:انا قرفت وتعبت وانتي مبترحميش مبتشوفيش غير نفسك كل ليله مستنياني علشان تنكدي عليا وتحاسبيني كنت فين ومع مين وبعمل ايه ارحمي بقي سنين طويله وانتي مبتلاقيش متعتك غير وانتي بتنكدي عليا
ميرهان:ضياء انا___
ضياء مقاطعا:بلا ضياء بلا زفت انا داخل اتخمد وأياكي تفكري تصحيني فاهمه
دخل اوضته بنرفزة شديدة وغير هدومه بسرعه ونام علي السرير والآف الافكار بتدور في دماغه فكان الحل الأنسب ليها هو النوم والهروب منها
___________________
وصل عمر بيته بلهفه ودخل ينادي بكل صوته علي مامته ال كانت بتعيط وتدعي ربنا يردلها بنتها بالسلامه
عمر :حبيبه فين ياماما
حنان ببكاء: معرفش يابني خرجت من الصبح للكليه وكلمتني الضهر تعرفني انها خلصت وهتروح المكتبه تصور شويه ورق وهتيجي علي طول وبعدها بشويه كلمتها مبتردش وبعدين تليفونها اتقفل والساعه بقت تسعه بليل وهي مرجعتش أنا خايفه اوي ياعمر أختك جرالها حاجه انا قلبي حاسس
عمر بقلق:لا ياماما متقوليش كدة أكيد هي بخير هتلاقيها بس راحت لحد من صحبتها ونست تقولك
حنان ببكاء:دور علي اختك ياعمر انا هيجرالي حاجه يابني بلغ البوليس اعمل اي حاجه
عمر :بعد الشر عليكي ياماما خليكي انتي هنا وانا هنزل ادور عليها ورني عليها جايز يكون تلفونها كان فاصل وهي شحنته
حنان:😭😭😭
قرب منها عمر وحضنها جامد يطمنها وباس جبهتها ونزل بسرعه راح القسم وعمل محضر وراح لكل صحباتها ال يعرفهم وكان بيوصلها ليهم طول سنين الجامعه وكلهم اكدو انهم ميعرفوش عنها حاجه من الضهر وبعد ساعات طويله فضل يلف في الشوارع ويدور في المستشفيات وقدم بلاغ في القسم بتغيبها وسابلهم مواصفتها وقرب الفجر رجع بيته تعبان ومرهق ودماغه هتنفجر من كتر التفكير واحساسه بالعجز بيقتله وكل الافكار الصعبه بتهاجمه عن حال اخته لحد ماوصل الشقه وقابلته مامته بلهفه وقلق
حنان :طمني يابني الله يخليك .... اختك فين .. مجبتهاش معاك ليه ياعمر .... يابني ريحني الله يريح قلبك
عمر بضياع:معرفتش اوصل لأي حاجه ياماما
قال جملته بأنكسار ونزلت دموعه بحرقه من عنيه وهو بيردد:حبيبه راحت ياماما راحت
فاق من نوبه البكاء علي صوت وقوع مامته مغمي عليها في الأرض
عمر :ماماااااا