حكايات سجود

حكاية 2

- بس انتي ليه بتعملي كدا
=عشان ده حقهم علينا بابا علمني كدا
********************
"انا سجود عندي 25سنة والدي متوفي وعايشة مع والدتي متخرجة من كلية هندسة وبشتغل في شركة كبيرة الحمد لله وناجحة في شغلي لاني بحبه وبقبض كويس جدا الحمد لله وانا بستغل الحكاية دي"

كنت قاعدة عالمكتب بتاعي في يوم لما لقيت هدي زميلتي في الشغل وصحبتي وزي الاخوات
ولاني انا وهي معندناش اخوات بنات فبنحاول نعوض بعض
لقيتها داخلة ووشها في الارض ومكسوفة ترفع عينها في عيني؟!
قومت ليها بسرعة

=مالك يا هدي فيكي ايه؟
-ببكاء :سامحيني يا سجود
=تعالي بس اقعدي واهدي مالك فيكي ايه واسامحك علي ايه؟
-انا.. انا مش عارفة اقولك ازاي
بصي بصراحة انا مشيت وراكي..
=بعدم فهم: مش فاهمة حاجة براحة بس بالله عليكي
-اخر مرة كنتي معايا فيها وسيبتيني زي كل مرة انا مشيت وراكي بس انا والله مكنش قصدي حاجة انا بس كنت عاوزة اطمن عليكي لان الموضوع اتكرر كتير وانا خوفت
واكملت بعياط: مكنتش اعرف انك جميلة اوي كدا وبتروحي تساعدي المحتاجين ومش عاوزة حد يعرف
=بابتسامة:خلاص اهدي يا هدي حصل خير انا فعلا مكنتش عاوزة حد يعرف بس خلاص انتي مكانش قصدك حاجة وبعدين انتي اختي وليكي حق تخافي عليا
-طب انتي بتعملي كدا ليه
=عشان ده حقهم علينا بابا علمني كدا
-طب ممكن اجي معاكي المرة الجاية واشارك بحاجة انا كمان
=طبعا يا قلبي وعانقتا بعضهما
..................................................................
وبالفعل بعد فترة جاء موعد زيارة سجود وذهبت هدي معها
=السلام عليكم يا طنط فاطمة عاملة ايه
*الحمد لله يا قلبي انتي عاملة ايه
=في زحام من النعم الحمد لله
معايا ضيوف عاوزين يشوفوكي
*انتي وضيوفك في عيني وبعدين حد يستأذن في بيته برده؟

دخلت هدي
-السلام عليكم
=وعليكم السلام يا حبيبتي اتفضلي

واتعرفوا علي بعض وبعد ضحك وهزار

*انا هحكيلكوا بقي يا بنات عن قصتي

نظرت لها كل من سجود وهدي باهتمام

*من 10 سنين كنت متجوزة وعايشة حياة هادية مع جوزي وبنتي وكنا عايشين في شقة ايجار والدنيا كانت متيسرة الحمد لله
لحد ما جوزي مات ربنا يرحمه بقيت قاعدة انا وبنتي في الشقة لوحدنا وانا مكنتش بشتغل لحد ما جه ميعاد دفع الايجار جه صاحب الشقة ومرأفش بحالنا ورمانا في الشارع يلا ربنا يرحمه ميجوزش عليه غير الرحمة
وبقيت انا وبنتي بنمشي في الشوارع انا مكنش هاممني نفسي بس كنت خايفة عليها هي
لحد ما قابلت والدك ربنا يرحمه كتر خيره رعانا وساعدنا وجابلي بيت وسكنا فيه وانا كنت شاطرة في الخياطة
جابلي مكنة وبقيت اشتغل عليها وجابلي زباين كمان وكان بييجي كل شهر يبص عليا لو محتاجة حاجة

ثم اكملت وهي تنظر لسجود بعيون باكية:
وبعدين جيتي انتي كملتي الي كان بيعمله وساعدتيني في جوازة بنتي وكمان بتيجي تبصي عليا كل فترة ربنا يخليكي يا قلبي

ذهبت سجود وارتمت في احضانها ببكاء فهي لم تكن تعلم هذي القصة فوالدها لم يخبرها كيف تعرف علي فاطمة وابنتها
=ايه الي انتي بتقوليه ده يا بطوط مش انا بنتك برده
*اكيد يا قلبي
-طب وانا مليش حضن
فتحوا لها زراعهم وارتمت هي الاخري في احضانهم

ثم ودعوا فاطمة وذهبوا مع وعد بالزيارة مجددا

-تعرفي يا سجود الحكاية دي بتفكرني بجملة كنت قرأتها
=جملة ايه؟
- "ترحل ويبقي الاثر"
=فعلا معاكي حق كلنا هنمشي بس اهم حاجة الاثر الي هنسيبه سواء حلو او وحش
يعني بابا وصاحب البيت الاتنين سابوا اثر باختلاف النوع
ويا حبذا من يترك اثرا طيبا تتذكره به النفوس

" ترحل ويبقي الاثر "

_خلود خالد Khokh