العلاقات البشرية هي من أكتر الحاجات المعقدة اللي ممكن حد يشوفها، بحاول أحلل علاقات كتير سواء حقيقية أو درامية، لأن ممكن وفي أي وقت تلاقي نفسك في علاقة مشابهة لعلاقة شوفتها سواء علاقة سليمة أو مؤذية toxic.
في مسلسل "أبو العروسة" الشهير شدتني علاقة "جابر و عبير" خاصة في الجزء التالت اللي بيتعرض حالياً واللي اعترفوا فيه لبعض بحقيقة حبهم بس على الرغم من كدا مكملوش وعلاقتهم منفعتش من البداية، ركزت علي علاقتهم ببعض وباللي حواليهم، اشمعنا علاقتهم باللي حواليهم كويسة بس علاقتهم ببعض لا!
علاقتهم كانت ناقصة حاجة مهمة جداً واللي تعتبر من أساسات أي علاقة صِحية ناجحة، وهي" الإحترام المتبادل"
مفيش حوار واحد دار بين جابر و عبير إلا وكان في إهانة لطرف من الأطراف أو تصغير منه ، واللي بدورها بتكسر الطرفين وبتغطي على الحب اللي بين الطرفين تماماً مهما كان حجم الحب دا، علاقتهم من أكتر العلاقات ال toxic اللي ممكن تشوفوها،الكلمة زي ما هي قادرة تخلي بني آدم أسعد إنسان، قادرة بردو إنها تكسر ثقته بنفسه و تهز كيانه و تخليه أتعس إنسان..
تخيلوا الإنسان اللي المفروض هو أهم إنسان ف حياتكم بدل ما يشجعكم علي الاستمرار و ياخد بإيدكم، يكسر طموحكم وثقتكم في قدرتكم علي القيام بأبسط الحاجات،وحتى لو كان الكلام دا مُصاحب بالإعتذار بعدها، في حاجات بتسيب ندبة في القلب، في كلام مبنقدرش نتخطاه خصوصاً لو جه من شخص مهم ف حياتنا، ممكن كلام وحش حد غريب عنك قاله ليك ميفرقش معاك، لكن لما ييجي نفس الكلام من شخص مقرب ليك وبتحبه بيبقا شعور تاني خالص مش قادرة أوصفه، ربما يكون أقرب لخيبة أمل أو خِذلان.
لو لقيتوا نفسكم في علاقة زي دي، علاقة خالية من الإحترام.. اهربوا فوراً قبل ما العلاقة دي تستنزفكم و تؤذيكم نفسياً.
