KING -23
“ကျွန်တော့်ကြောင့်ဖြစ်တာ။ ကျွန်တော်သာမသွားခဲ့ရင် အခုလိုဖြစ်မှာမဟုတ်ဘူး။ ကျွန်တော့်ကြောင့်!”
ကားပေါ်ကဆင်းဆင်းချင်း အိမ်ထဲပြေးဝင်ပြီးနောက် King က အုတ်နံရံကိုလက်သီးနဲ့ထိုးသည်။ King ရဲ့လက်ဖျံကနေ ဟန်စစ် ဆွဲထိန်းကိုင်နေပေမယ့် ထိန်းချုပ်ရခက်နေ၏။ စိတ်ခံစားချက်တွေ ပြင်းထန်နေပုံရပြီး နောက်တစ်ကြိမ် မေ့လဲသွားမှာကိုလည်း ဟန်စစ်စိုးရိမ်သည်။ ဆေးရုံခေါ်သွားဖို့လည်း ဒီအခြေအနေနဲ့မဖြစ်။ အန္တရာယ်ရှိတဲ့အရာတွေနဲ့ ဝေးဝေးထားဖို့ ကြိုးတုပ်ထားရမလိုပင်။
King ခါးကနေ ဆွဲပွေ့လိုက်ပြီး အိပ်ခန်းထဲက ခုတင်ပေါ် ပက်လက်လှန်ပစ်ချလိုက်မိသည်။ ရုန်းရင်းဆန်ခတ် ပြန်ကုန်းထဖို့လုပ်နေသည့် King လက်နှစ်ဖက်ကိုချုပ်လိုက်ပြီး ပေါင်ရင်းနှစ်ဖက်ကို ဟန်စစ်ဒူးနဲ့ ဖိထားရသည့်အခြေအနေ။
“မင်းကြောင့်မဟုတ်ဘူး စိုင်းစက်။ လူတစ်ယောက်ရဲ့ သေခြင်း၊ ရှင်ခြင်းက ဘာလို့မင်းကြောင့်ဖြစ်ရမှာလဲ။ ကိုယ့်ကိုကိုယ်အပြစ်မတင်နဲ့။ ငါ့ကိုကြည့် ငါ့ကိုလည်းကြည့်ဦး။ မင်း ဒီလိုဖြစ်နေတာကို ဘာမှမလုပ်ပေးနိုင်တဲ့ ငါ့ကိုလည်း ကြည့်ပေး ပါဦး”
ဟန်စစ်အော်ဟစ်ပစ်လိုက်တော့ ရုန်းကန်နေတာတွေ ငြိမ်ကျသွားသည်။ ဘာမှမပြောတော့ဘဲ အံကိုတင်းတင်းကြိတ်ပြီး မျက်ရည်တွေစီးကျနေပုံက ဟန်စစ်ကို ပိုစိတ်ပူလာစေပြန်သည်။
“စိုင်းစက် အံကြိတ်မထားနဲ့။ ငါပြောတာကြားလား။ စက်! စိုင်းစက်! စိုင်းစက်အာဏာရှင်!”
ပါးကိုခပ်ဆတ်ဆတ်လေးရိုက်ပြီး သတိပေးနေပေမယ့် King ကအသိမရှိတော့သူလိုလည်ပင်းကို ကျိုးကျမတက်စောင်းထားခဲ့သည်။ ဟန်စစ် ချောက်ချားလာနေရင်း King ရဲ့ ပါးပြင်နှစ်ဖက်ကို အုပ်ကိုင်ပြီး ကိုယ်တိုင်လည်း မျက်ရည်တွေကျလာရ၏။
မမျှော်လင့်ဘဲ King ကိုအုပ်မိုးထားသည့် ဟန်စစ် လည်တိုင်ကနေ လက်ခနဲလျှောဆင်းသွားတဲ့ဆွဲကြိုးကြောင့် King အကြည့်တွေ ဟန်စစ်ဆီရောက်လာသည်။ King လည်တိုင်ပေါ် ဖေးတင်သွားသည့်ဆွဲကြိုးရှိလက်စွပ်ကို လက်ချောင်းတွေနဲ့ ဆွဲမကြည့်ချိန်အထိ ဟန်စစ်လက်တွေက King ပါးပြင်ကိုအုပ်ကိုင်ထားမိဆဲ။
YOU ARE READING
KING
Actionကံတရားကေနာက္တစ္ႀကိမ္လွည့္စားခဲ့ရင္ေတာင္ မင္းကကိုယ့္ဆီကိုပဲေရာက္လာဦးမွာ ကံတရားကနောက်တစ်ကြိမ်လှည့်စားခဲ့ရင်တောင် မင်းကကိုယ့်ဆီကိုပဲရောက်လာဦးမှာ Cover Artist_ Bryan
