- انتي تخينة اوي يلا يا فشلة المفروض تخسي هو انتي بتعدي من الباب ازاي تلاقي حد بيزقك
قالت كدا و الفصل كله نزل على نفسه ضحك .. كل يوم على الحال دا واحده من الفصل تيجي تتريق عليا و انا طبعاً الغبية اللي مبتعرفش ترد .. كل اللي بعمله اني بعيط و بس حتي لما قولت للمدرسة بصتلي بقرف و قالت مهم معاهم حق .. محدش فيهم بيفكر شعوري اي ولا إني ممكن أزعل مثلا .. أيوة مش باكل كتير بس جسمي بيتخن مش شوية الماية
كميه تنمر غير طبيعية ابقي ماشية في الشارع يتقالي بالنص خافي على الأرض لتتكسر تحت و الضحك طبعاً للركب حتي أهلي في البيت امي دايما تناديني يا دبتي عارفه انها بتهزر لكني بجد بضايق قطعت اكل عشان اخس تعبت و دخلت المستشفى و ركبت محاليل جالي هبوط في الدورة الدموية طب اعمل اي عشان انا تعب من كمية التنمر دا
بقيت مكتئبه مش عاوزة اروح المدرسه مش عاوزه أخرج الشارع حياتي بلا هدف جربت اخس بس مفيش فايدة انا جسمي كدا طب لي مش بتراعوا مشاعر البشر
بعد ضغط من أهلي رجعت تاني المدرسة و التنمر بيزيد و مقالب و حاجات ميتحملهاش بشر بس كنت بصبر لحد ما في يوم طاقتي نفذت قعدت اعيط في الحمام بنوته جت قعدت جمبي
- انتي بتعيطي لي
- اتنهدت و قولت عشان جسمي مليان و باخد كمية تنمر محدش يستحمها انا زمبي اي ربنا خلقني كدا حاولت اخس و فشلت والله أكلي أقل أكل بس جسمي اللي بيتخن من أقل حاجة
ردت عليا بابتسامة و قالت بس انتي جميله زي ما انتي .. بصتلها باستغراب كملت و قالت كل إنسان ربنا خلقه بإحسان صوره حبي نفسك و متخليش حد يهز ثقتك في نفسك و اللي بيتنمروا عليكي دول انتي اللي ادتيهم الفرصة
بصتلها أوي فكملت أيوة لو ادتيهم على دماغهم من الأول مكنوش هيتمادوا.. زي ما بيعمولوا اعملي و خليكي واثقة من نفسك حبي نفسك عشان تستاهل .. رجعت الفصل بعد ما اتعرفت على البنت قعدت مكاني و انا عندي ثقه في نفسي لابعد حد انا جميلة زي ما انا
- اي دا الفشلة مبسوطة دا انتي شوية و هتنفجري الكل ضحك كالعادة وقفت و بصتلها و قولت مين اللي بيتكلم خله السنان على الأقل تخني مديني منظر و محليني لكن خله السنان اللي بتتكلم دي و شوية و هتختفي نعمل فيها اي اقولك احنا ناخدك نسلك بيكي السنان و في أقرب باسكت و هنرميكي تعرفي لي لانك هتكوني غير صالحة للاستخدام الكل مات على نفسه من الضحك و البنت انهارت في العياط مصعبتش عليا ولا ندمت لحظة زي ما عملت انا عملت و خليها تدوق و تحس باللي كانت بتعمله فيا ..
دلوقتي اقدر اقف و أقول للدنيا بحالها أيوة انا تخينه أيوة جسمي مليان بس انا عاجبني نفسك كدا قبل ما تفكر و تشوف و تتريق على عيوب غيرك شوف نفسك الأول هتلاقيها ملايانه عيوب.. حب نفسك لأنها تستاهل متخليش حد يهزك من جوه و اي حد يحاول يتريق عليك و الموضوع هيسببلك اذي نفسي متسمحلوش و وقفوا عند حده حتي لو كان أقرب حد ليك
سلام علي من احبونا بعيوبنا قبل محاسننا
همسات ليلية
حكايات آخر
اسكريبت
اقبلوني كما أنا
بقلم زهرة عصام
