Nidang ang bawkin class chu a ngai te tein an kal leh a,khua pawh a lum tha leh khawp mai.
Luh hun ala nihloh vangin Hriatsanga chu college canteen ah chuan kil khatah thuin ngawi rengin lehkhabu a chhiar melh melh a,a thil order a nghah lai chuan a cold drinks lei chu a lem leh zeuh zel a,ama tawkah a buai ve em em mai a ni.
Reivaklo hnuah a eitur chu dawhkanah an rawn chhawp sak a,a lehkhabu te chu khupin a bag-ah a thun lut a,riltam hmel deuhin eitur chu a en a,a nui sek bawk a.
Mahse dawr chhunga mi pathum rawn lut te a hmuh chuan a nui lai chu a tawp chiang kher mai. Hnuailam bih zeuhin a then sawk a,a hawichhuah leh chuan tum hmukin fiante chu a la a,a eitur lei ho chu a ei hmawk hmawk a,lo hmutu tan chuan a thil ei chu a tui hmel vaklo maithei a ni.
Muanpuia te thianho chu a melh leh zeuh zeuh a,a hmaa a rilru hahdamna zawng zawng an rawn tibo vek ni maiin a hria. Chhan pawh awmloin a mood chu a off nghal em em mai a ni.
Chutih lai chuan Muanpuia te ve thung chu an thawveng em em a,an thutna tur an pan lai pawh chuan Hriatsanga chu a hmu lawklo leh nghal.
Thil an order zawh hnu chuan an thil zir a harzia vel chu an sawi sap sap a,chutihlai chuan Muanpuia chu hawi kualin an thlang lawka lo thu Hriatsanga chu a hmu thut a,ala phu uih zui. Rang tawkin a hawi sawn nghal a,a thiante titi chu tuilo zet hian a zawm zeuh zeuh a,a mit sir chuan thlang lam chu a melh leh zeuh zeuh thin,mahse awmzia a awm vak chuanglo. Chhan chu thlang lama mi chuan a melh pawh a melh let duhlo miau a.
Thil an ei tam lai chuan Hriatsanga ve thung chuan a eizo der tawh a,a ei man te pein canteen atang chuan hawilet tawh miahlo hian a chhuak nal nal a,chu chu a hmuh chuan Muanpuia chu a thaw hak a,lungawilo zet hian a eitur chu a ei chhunzawm a.
"Tuna chhuak chiah kha in hria em?"a thianpa pakhat Jason-a'n a rawn tih chuan Muanpuia chuan rang zet hian a melh nghal hra a,a thianpa pakhat tho Sangpuia chuan a lu alo thing na na a.
"Higher ah khan kan kal ho thin a. Tinge? Enge thleng a?" a ti chhuak a,an sawichhuah thut chhan hre chak bawk si,engatan maha ngailo anga lan duh bawk si chuan a awm a,a thil ei lai chu tlem te te hian a ei a.
"Tunlai chu ka hmu ngun riau a. Thian a nei pawhin ka hrelo,amah hlirin ka la hmu."
Muanpuia chuan hnuailam bih pahin a nui sek a,ngaihtuah hmel deuh hian a bek chu a tuai a,a thiante chu hriatthiam loh hmel deuh hian a en a.
"I va hre ve...ngee thil a awm a nilo maw?"a tih chuan Jason chuan Muanpuia chu dawhkan hnuai atang chuan a pet nghal sawk a,a ke chu na tih hmel deuh hian a tuai nghal a. "Engeee???" An pathum chuan an nui hak hak a.
"Tlemin a chianglo amawni le ka ti...a chhelo ve tho sia,thian emaw bialnu zui rengtu tal neih ve awm..."Sangpuia pawh chuan a rawn tih chhunzawm a, Muanpuia chuan hahthlak tih hmel zet hian thawk a la hak a,a lu chu a thing na na bawk a.
"In duh chuan be chhin ula, lehkha alo thiam phei chuan a tih chi viau ang,"a tih chuan a coke chu a lem khulh a, Hriatsanga lehkha thiam theih zia a hrechiang mai si a,a rilru chuan a khi vur vur mai a ni. A thiante lah lehkha an zir tha peih silo a,lehkhathiam te chu an duh dawn tih a hre vek bawk si. Vawikhat tal tha deuha thil kan sawi dun ala ngai dawn hrim hrim a,step khatna a ni mai.
An ei man an pek hnu chuan peihlo zet hian an tho tawng tawng hlawm a, muangchangin class lam chu an pan a,chutih lai chuan Muanpuia chuan Hriatsanga chu hmuh tumin a hawi kual sek a,mahse hmuhtur themte pawh a awmlo. Classroom chhungah lehkhabu a chhiar leh tawh a ni ngei ngei ang.
Nilenga class an lak hnuah a tawp a tawpah chuan ban a hun ta der mai. Hmeichhe thenkhat chu an intifai suau suau a,a thenin makeup an inhnawih tha a,a thenin an pheikhawk leh kawr chuar leh bal vel an en fel bawk a, college zirlai ni mah se an zirlaipuite tan chuan school naupang,school ban dawn a intifai lek an ang tho.
Hriatsanga chuan a lehkhabu vel a khung fel hnu chuan kawngkhar lam chu a pan nghal a,pawn lamah a chhuak hman tep tih chuan hmeichhe aw hian ring leng lawngin a hmingpumin a rawn ko a,a ding chiang kher mai.
A hmel a siam chhiat vak hnu chuan muangchang hian a hawi let a,a lam pana lo tlan mek hmeichhe pakhat fit 5 vel leka sang chu alo nuih sang a,mahse a nui der tih erawh tupawn an hre thei ang.
A bul a rawn thlen chuan chunu chuan a zakah chuan a dek zawk a, a phu chiang kher mai.
"Minlo nghak rawh ka tih mawlh mawlh kha! Min nin hmel deuh khan min en ziah suh,keimah bak i thuruk i hrilh ngamloh kha,"a tih chuan Hriatsanga chuan rang tawkin a hmui chu a hup sak a,room atang chuan a chhuahpui dawr dawr a,chunu chu a te bawk si nen, Hriatsanga pen rual chuan a tlan dawr dawr hi a ni mai.
"Thuruk chungchang kha sawi ziah suh Malsawmzual,miin an hre palh ange,"tih pahin a hmui a hup sakna chu a la sawn,a dara kuah sak tum pah chuan tilui tih hriat zet hian a kuah fuhlo der a,Sawmzuali chu a lungawilo kher mai.
Hriatsanga chu na vaklo hian a nem sawk a,tum bur pahin a melhrum bawk a,a kuangkuah than a. "Tumah ka hrilh peih bawklo,in la sang pa."
Nuih hawk hawk pahin Hriatsanga chuan a darah chuan a va kuah sak a,"Zanah ka lo leng dawn ania,upa ho an lo leng dawn a ka awm peihlo."
"Tehreng mai....uiii enteh,hrilh tur che ka nei. Section C ah star thar ka nei a,"Sawmzualin a tih rual rual chuan awihloh hmel zetin Hriatsanga chuan a en nghal a,a chek tlak tlak bawk a,"Lerh-i leh! Tunkara star thar i neih vawili na a ni tawh."
An pahnih chuan an zawi te hian an nui char char a,an hnung lawka Muanpuia te thian pathum kal mek pawh an hmulo.
A hmaa kal te pahnih inkawmngeih hmel zet a hmuh chuan Muanpuia chu a insehruh teuh a,thawk a la hak a. Thian a neilo emaw tih nak laiin. A bialnu a nih vaih chuan a pawi viau ang.
A tum hmuk a,kal hmawk hmawkin Hriatsanga te thian dun chu a lehpel hmak a,a thiante pahnih chu an inmelh zeuh a,rang tawkin an zui ve nghal a,ngawi rengin an pathum chuan an inthen hma chu an inzui ngawt ngawt mai a ni.
Hriatsanga ve thung chu amah rawn kalpel tu a hmuh chuan a ding chut a,reiloteah a pangngaiin a kal leh nghal a,mahse Sawmzuali chuan chuti maia kaltir a tumlo hle tih a hmel atang chuan a lang nghal vek thei.
Nui put put chungin Hriatsanga chu a va nek salh a,a kut chu hmalama suihin a pen theuh theuh a,dingdihlip euhin Hriatsanga beng bulah chuan a han hrilhru sar sar a"Hey lover boy."
Rang tawkin a tlan nghal a,a bawp seilo ta na na chu an in man leh rang teh e.
