Zanah Hriatsanga chu Sawmzuali te inah a leng ta ngei a,mipa tih takah dar 11 velah a haw ve a,mahse a chunga thil thleng erawh a nuihzatthlak hle.
An thian dun in inkarah hian a khat tawkin in pariat a ding a,engemawni a hriat ni,in pakhatna a thlen atang chuan a tiril hi a mur sung sung tan a,a phone pawh khawih talo chuan a hoodie hmaa ipte ah chuan a kut pahnih a thun lut a,lukhum a khum than bawk a.
Thil ri hlek a hriat chuan a hawi nghal hrek hrek zel a,midangin an hmu angem tih pawh a ngaihtuah thei tawhlo.
An in a thleng tep tawh,in pahnih vel ala awm ang tih chuan thlang lam step atang tuemawni hi hmanhmawh tih hriat zet hian a rawn tlan chho thut a,a phu nasa ngei mai.
A au thawt a,a kal lai chu a petek nawk nawk bawk a,light êng atanga tunge a nih a hmuh theih takah thaw huaiin a kut lehlam chuan kun pahin a khup a dawm a,a kut lehlamin a awm a dawm bawk a,thawk a la kawk a,a chil a la hak tep zui.
Step tawpa mak tih vanga lo la ding Muanpuia chu ngei hmel tawk hian a melh a,pakhat lah chu inthiamloh hmel deuh hian alo la nui then thu zui.
"Tuma hnenah sawi reng reng suh,"tih pahin Hriatsanga chu kal mai a tum a,mahse Muanpuia'n hnung lam atanga a la rawn zui vang chuan a ding chawt a,a hnunglam chu a melh zeuh a.
"Tinge min rawn zui a?"
Chutah Muanpuia chu a nui ta hak a, Hriatsanga bula kal hnaih pah chuan a darah a ben sak thek thek a,"In dawrah thil ka lo lei dawn mawle."
Rang tawkin Hriatsanga chu a kun nghal a,Muanpuia hmuh theihloh ah a hmel chu a siam chhe vak vak a.
"Nih chuan kal hmasa rawh,miin kan inhmu emaw an ti palh ang,"a tih rual rual chuan a thil sawi chu a inchhir leh nghal. A meng phawk nghal kawk a,rang tawkin a hmui chu a beng chawrh bawk a.
"Keimah kan kal hmasa leh zawk mai ang,"tih pahin Muanpuia chu a tlansan nghal nal nal a,an in pawh a thleng chak narawh e.
Muanpuia chuan hnunglam atang an in a thlen hma chu a en zui vang vang a. Kawngkhar a hawn dawna Muanpuia en tura a hawi zeuh lai leh alo la en reng tih a hriat vanga rang tawka luh a tum vanga kawngkhar inkhar lai zawka a intauh lai te chu a hmu vek a,a chal tuai vut vut chunga zak tih hriat zeta inchhung lama Hriatsanga a luh hnu chuan Muanpuia chu amahin a nui put put a,muangchangin Hriatsanga te in lam chu a pan a.
Dawr pawn lam an kalh tawh vangin inchhung atang chuan a lut a,a hawi kual pawn Hriatsanga rêng hmuh tur a awm tawhlo. Hriatsanga nu chuan Muanpuia chu dawrah chuan a luhpui a.
"Hriata nen khan in inhmu lo ami? Tunah khan ani pawh alo lut chiah a."
"Kan in nang fulo chiah chiah a niang,ka hmu miahlo." A lei duh ho chu a en kual a, Hriatsanga nu chuan thutthlenga thutthlak pahin bag atang a phone a la chhuak nghal a.
"Nia,a ni ang. Ani pawh a leng alo haw chiah a. Taka,lo leng thin ta cheu Muana,"a tih chuan Muanpuia chu a nui sek a,a lei tur ho chu dawhkanah chuan a dah khawm a.
"Nia...rawn len te pawh hi a tha ang. Mahse Hriatsanga hi a induh tawh lutuk a,"a tih chuan nu Hmuni chu a chek tlak tlak a,"Hepa tak hi chu aw...hauh deuh ala ngai dawn a nihhi."
"Nia lo hau teh, college ah pawh min be duhlo ania,"a ti leh a, polythene-a a inkhung fel hnu chuan pawisa a pe vat a.
"Tehreng mai, nangpawn lo hau deuh rawh."
An pahniha an nuih hak hak hnu chuan Muanpuia chu dawr chhung atang chuan a chhuak a, Hriatsanga erawh hmuh tur ala awm ta chuanglo.
.
.
.
.
.
.
.
Class atanga a chhuaha a thil hmuh vang chuan Hriatsanga chu a ding chawt a,a hnung lam atanga rawn zuitu Sawmzuali chu lo inring heklo le, Hriatsanga hnung ah chuan a intauh chawrh a,a tlu lek lek leh nghal.
"Enge i-"
Hriatsanga hauh a tum lai chu ani pawh a thil hmuh vang chuan a tawp chut a,thawk a la hak a.
"Hmelchhe sawi chu koh aiin a hnai tak tak a nih hi. Nizanah kan sawi kan sawi a,saw...tunah kan college ah a rawn lan nawlh saw,"Sawmzuali chuan a ti bul bul a,kuangkuah pah chuan a thaw chhuak hak a,a lawmawm tih piahlamin a lawmawm.
"A ho emai,kal tho ang,"tih pahin Hriatsanga chu chumite lam pan chuan a kal a, Sawmzuali chuan a zui nghal det det bawk a. "Awiii Lalpa leh! Kan kalna tur lamah an la ding zui alaw. Aishhhhh!!!"
A ke chu a per tawr tawr a, Hriatsanga chuan a nuih hak hak a,"Engah mah ngai duh suh,thil kal tawh alawm."
"I ex te zingah Lallawmzuali saw ka ngei ber,"tih paha Muanpuia te thianho zinga lo ding mek hmeichhe pakhat a melhrum laklawh lai chuan Sawmzuali chu a ding ngil awt a, Hriatsanga chu a sik zeuh a.
"Uii saw ka star pa!! Section C ah star thar ka nei ka tih kha i hria em? Muanpuia dinglama ding Sangpui saw alawm ka star pa chuuuu!!!!Nimin khan ka hrilh theihnghilh che a."
Awihloh hmel zetin Hriatsanga chuan Sawmzuali chu a en a,a chalah a kut zungchal chuan a nawr sawk a,"LERHI".
Muanpuia te bul an kal pelh chuan an thla a muang hman hle a,mahse a rei lo.
"Hriatsang."
Hmeichhe aw in a rawn tih chuan Hriatsanga chu a ding chut a,thawk a lak ham ham hnu chuan muangchangin a hawi let a,amah rawn ko tu Lawmzuali chu a nuih sek a.
Chutih lai ve thung chuan Sawmzuali erawh a sa kher mai. A hmel an hmuh theihloh zawnga ala din vang chuan nasa mang khengin a hmel chu a siam chhia a,a hawi vat loh phah. Mahse a hawi hnu chuan a melh hmasak ber chu a bul lawka lo ding Sangpuia chu a ni a,alo en reng tawh leh nghal.
Nelawm deuh hian a nuih a, mahse Lawmzuali a melh leh chuan a tum leh nghal hmuk a, Hriatsanga bulah chuan a tawlh hnai hret hret bawk a,a tawpah chuan a hnungah chuan a ding than a.
"Ilo dam tha maw?"nui sang chunga Lawmzuali'n a tih chuan Hriatsanga chu a bu nghauh a,chutih lai chuan Sawmzuali ve thung chu Hriatsanga hnungah din pah chuan ri lo hian alo uak der a,a mi ngei a pek nat lutuk vang chuan a star pain a hmu reng tih leh alo nuih char char tih erawh a hrelo thung.
"Nang?"
"Immm,dam ve tawk tawk. Tunlai college kal nuam i ti viaulo maw? A û hi a induh lutuk a,engmah pawh min hrilh ngailo,"a tih chuan Hriatsanga chuan a kekawr ipte vei lama a kut zen chu a hum ruh a, Lawmzuali chuan a tilui tih a hrethiam nghal,chubakah amah chiah nilo,chulaia awm ve Sawmzuali leh Muanpuia pawn an hre bawk a,an awm chu a nuam tawh chiahlo ang.
"Nuam e,nakinah ilo la lut ve dawn nia." Hriatsanga chu a nui lui hram hram a,mahse Sawmzuali chuan a ti theilo lek lek tawh a ni.
"Nia...taka kan inhmuhlohna a rei tawh sia, engtikah nge kan inhmuh leh dawn a hriat bawk silo a,kan inchibai ve reng reng dawn ami?"tih paha Lawmzuali'n a kut a dah chhuah chuan Hriatsanga chu a ding ngil at a,a awmdan atang a duhlo tih Sawmzuali chuan a hre nghal a,a inrawlh vat a ngai tih pawh a hrethiam nghal.
Muangchanga Lawmzuali kut vawnsak tuma a kut a tihchet chuan rang tawkin Sawmzuali chuan Hriatsanga kut chu a vawnsak a,a kai nghal daih bawk a. Nui lui tih leh a nui lem lem tih hriat zeta Lawmzuali en pah chuan a insehruh teuh a,"Kan kal a ngai tlat, mangtha."
A tê zawkin a hnunga a kaih paha zui det dettu a hnuk deuh thaw anga a lan vang chuan thenkhat chuan an en duh hle a,mahse Hriatsanga chuan a haw phallo. Amah chhanchhuaktu ni hial hian a hria a,hnung lam atang chuan a nuih ver ver a.
"Thanks aw Lerhi,awmlo la chu engtinnge ka awm ang?"a tih chuan rang tawkin Sawmzuali chu a hawi let a,step-a an chhoh pah chuan an inkaihna chu a phelh a, Hriatsanga bula din pahin a kawngah chuan a kuah a,"Chuchiah mai,ka awm hi chu lawm hle rawh,"tih pahin Hriatsanga nâkah chuan a dek sak zeuh a,nuih uar uar pahin Sawmzuali chu a step-ah chuan a tlanchho nghal a, Hriatsanga pawh chuan a dek leh tawh avang chuan a um nghal a.
An thlang lam kawta ding mek Muanpuia te thianho leh Lawmzuali te chuan an thlir thap a,an zinga nuilo awm chhun chu an zinga hmeichhe awmchhun chu a ni.
