قمري انتي

قمري انتي البارت الحادي عشر

قصة # قمري أنتي

قمر : بعد مرور ايام علي اخذني لعيالي من رجعنه لكيت اولادي مسويلي مفاجاه مسويلي عيد ميلاد

جان علي متفق هو وياهم حته يرتبون البيت نفاخ وزينه بالحيطان وديجي وكيك وشربت حيل فرحت أجوي بيت عيالي هم جانو يعرفون

جانت احلى حفله الكل طوني هدايه اخر واحد علي انطاني اوراق فتحتهن اوراق عمره يابه شكد فرحت من اعماقي واخيرا راح اروح لبيت الله راح تتحقق امنيتي والسفر بعد سبوع

كملنه كلشي ملابسنه جنطنه امنه جهالنه يم عيالي ودعناهم صعب أعوفهم واسافر ضليت احضن وابوس بجهالي وماشبع يشحطني علي أصعد بالسياره ورجع انزل أحضنهم ودموعي تجري بس من اتذكر اني راحيه

للحبيب المصطفى
(صلى الله عليه واله وصحبه وسلم )

تجيني القوه والصبر شحطني علي يمعوده راح تروح علينه الطياره صعدت مشت السياره عيني عله ولدي لحد ماكمت ماشوفهم بعد

دموعي مطر السبحه بيدي اسبح واستغفر وادعي الله يصبرني عله فراقهم رحنه للمطار كملنه الاجرائات وصعدنه بالطياره

جنت خايفه وحاضنه علي اول ماطارت الطياره ردت اموت من الخوف بس من ستقرت بالجو لا عادي عبالك صاعده سياره

والي هداني اكثر وانزل السكينه عله كل الركاب كلهم مو بس اني تكبيرات المعتمرين

لبيك اللهم لبيك ....
لبيك لاشريك لك لبيك انه الحمد والنعمته لك والملك لاشريك لك

كلنه كمنه نهتف ونكبر ونبجي عل دنيا الي متسوه شي وصلنه السعوديه كلبي يرجف من الرهبه عبالك راح اوكف كدام رب العالمين وفعلا هيه بيت الله والي يوكف بيها كانما واكف بين ادين رب العالمين

لزمتني رجفه من اول ماوصلنه السعوديه صعدنه باصات رحنه للفندق اريد اطير وروح لمكه والمسجد النبوي سبحنه عل سريع وتوضينه ونزلنه تمشينه

أول مادخلت من الباب وشفت الكعبه كدامي وكعت بالكاع دموعي كامت تجري

سندني علي وكومني كال

- اذا من اولها هيج خل نرجع ادري بيج راح تموتين روحج من البجي

هوايه حجه وصاني وحلفني ماابجي ماجاوبه ولا احجي بس عيني عل كعبه ودموعي تجري عفته ومشيت وكفت كدامها حسيت احساس مينوصف

عبالك رب العالمين صار قريب مني حيل كانما واكفه كدامه جنت أشهك من داخلي شبعت بجي لحد ماضلت دموع ولاضل حيل

كمت أدعي ماخليت دعاء مادعيته ماخليت احد مادعيتله زوجي أولادي أبويه أمي أخويه عيالي دعيتلهم واحد واحد

دعيت للمسلمين الاحياء والاموات ابجي وادعي كمت صليت ماعرف شكد بس أصلي لحد مااتعب بعد رجليه ميشيلني أكعد أقرأ قرأن شويه أرتاح وارجع أصلي

يجي علي يحجي ويايه ماسمعه جنت مغيبه عن العالم فاصله يتنهد ويعوفني ويروح وره ساعه يرجع يتوسل لتبجين دموعج تاذيني لتعبين نفسج

جنت فاصله عن العالم اخر شي للمغرب اجه علي شحطني شحط للفندق ضل باله خطيه نشل حاله من ورايه طلعت الفندق منتهيه

راح جاب قياس الضغط طلع ضغطي مرتفع شبعني رزايل وحجي ماجاوب بس اباوع

بعدها أجه راضاني حضني ولليل كله يتوسل بيه اذا رحنه باجر ماابجي واني عفت كلبي هناك بيت الله زهدت حيل من الدنيا

نايمه بحضنه ماصدكت دك المنبه عله صلاة الفجر فزيت كلي نشاط جفل علي كال
بسم الله الرحمن الرحيم شبيج

كتله صلاة الفجر سبحنه وتوضينه بدلنه ونزلنه وعلي مشتغل مابطل حجي يتوسل ويوصي بيه بعدها رحنه للمسجد النبوي خوب هنا من وكفت كدام قبر النبي متنوصف متنوصب مستحيل تنوصف هاي الحضات والمشاعر وكفت كدام قبر النبي

نزلت ساجده موتت روحي بالبجي كوه يشحطني علي باليل اروح بتالي نفس ساعتين بالفندق وارجع 

لهنا وخلصت قصتنه وكان ختامها مسك والحمد لله اتمنى تكون عجبتكم تحياتي

.......
أكتبولي رايكم بالقصه ولتنسون التصويت ⭐⭐⭐ وتعليقاتكم الحلوه
....